Lukas 10
10
Yesu a ɵiniɗi na doogo doogo muguzak pi sulu edi
Mat. 10.7-16
1Asakal hanɗa Epiɗ-ɗai a vara ɗai zamai doogo doogo muguzak pi sulu, a ɵiniɗi sulu sulu wuzani war fuŋ n'abakai paŋ gaini hlai paŋ na Ni gaini midini dama a dara a hala woni ta ta ɗa. 2A miɗiɗi: Hiɗi a na abai, amma ɗai zi sɗa ɗa e ɗa agwi, buri nɵa ki siiwi Epin-gezani hiɗi buri a ɵinasi ɗai zi sɗa war hiɗini. 3Hili, mu ɵiniki na ɗa, maini alini adumai n'arbani belemke nɵa; 4Ki mili guɓo zi farai tiki kai, sak kaalai, harabak eziki kaalai, ki ɵiɓini wuti wiini ɗif kaalai. 5Dalam paŋ na ki niyi li aha warni ɗa, ki miɗi avut tar ɗa ɓa: Ɵeɗ a sumna miɗini dalam hanɗa. 6Na ɓa ɗif zi ɵeɗ a na aha war dalam hanɗa, ɵeŋki aga a sumna miɗini, na ɓa nɵa kai, ɵeŋki aga a wayasi siki. 7Simni warni dalam hanɗa, ki simi simi na e siŋki ɗa, ki ci wala zi ci na e siŋki ɗa lai, buri ɗif zi sɗa paŋ sai a nava vrakni, ki jûgû warni dalam yaw yaw kai. 8War fuŋ n'abai paŋ na ki niyi li woni ɗa, na ɓa e yimiki li siɗi ɗa, aga ki simi simi n'e tikiŋ wuzaki paŋ. 9Ki zûûliɗi zi veglek na woni, ki miɗiɗi wiiɗi ɗai ɓa: Paini Alaw t'aŋ ɵimaki gobi. 10Amma war fuŋ n'abai paŋ n'aga ki niyi aha woni, na ɗai e diri e yimiki siɗi kai ɗa, ki hili edi warni futini n'abakai ɗa ki miɗi: 11Alogodo na warni fuŋki par n'a duɓuka eziyi kaw, mi ɗa ɵiɓiŋkiɗi edi. Amma ki yimiŋ midiki pɗem ɓa: Paini Alaw te halasi siki ya. 12Mu midiki, war mefeŋ ni ɗa, fuŋ n'abai hanɗa aga a sɗa gir a siwiti Sodoma.
Haw gara burini fuŋ n'abakai n'a dara a yima kai
Mat. 11.21-23
13Haw gara buriku Korazin, haw gara buriku Betsaida, buri ɓa wazagai zi hiila n'abakai n'a za warki ɗa, a za fu na ɗa warɗi Tirus gaiɗi Sidon ɗa, aŋ na ɗa e wi sak zi ziidai siɗi ya, e simni arni bonu ya lai. 14Buri hanɗa warni mefeŋ zi sariya ɗa, tiki aga ki siɗi gir ki siiwiɗi ɗai na Tirus gaiɗi na Sidon. 15Tuku Kapernahum, ku hiina ɓa Alaw aga a riyuku amai war hlai n'amai ɗa ɗi? Zaw kai aga a husukusi haa azumai warni hlaiɗi ɗai zi mri. 16Ni n'a ɵina piki a ɵina pa, ni n'a ɵina piki kai, a ɵina kai na ɗa pa, ni n'a bla edi siki, a bla edi sa ta, ni n'a bla edi sa ta ɗa, a bla edi na ɗa sini Ni n'a ɵinaŋasi ɗa lai.
Na doogo doogo muguzak pi sulu e wiyisi aha
17Na doogo doogo muguzak pi sulu e wiyisi aha gaini firiyi e miɗi: Epiɗ-ɗai, war yikuku ksalai a gada piyi. 18Amma a miɗiɗi: Mu tala Satan a kɵasi azumai war hlai n'amai par maini wilɗi nɵa, 19mu siki spak aŋ kirpi wala meefeŋ gaini hurdi lai azumai pini eziki, miɗini spakni gawki lai, wala ktai n'aga a kiɗa a ziki meefeŋ aŋ kai. 20Gaini hanɗa paŋ ɗa, ki firiyi burini na ɓa ksalai a gada piki kai, amma ki firiyi burini na ɓa, yikiki aŋ gaini ɗû warni fuŋ-n'Alaw.
Yesu a firiya
Mat. 11.25-27
21Won hlai ni Yesu a va gaini firiyi pini spakni Seze-sɗik, a muɗa: Mu zuku tese, Epin-gezani hlai n'amai gaiɗi yai lai, buri ku ŋoya wazagai hanɗa arɗi na yalakai gaiɗi zi siɗi, amma ku siŋkaŋ edi arɗi akoɗokokai, nkam, Apa, buri a tala arku pɗem aŋ za nɵa. 22Wazagai paŋ a sasi ta sini Apa par, ɗif n'a sɗa Ahi aŋ kai, sai Api tar, ɗif a sɗa Api aŋ sai Ahi tar, gaini ni na Ahi a rga warni aŋ siŋkiŋni edi lai.
Pɗem na wiiɗi ɗai zi hitri
Mat. 13.16-17
23A bunda arni siɗi ɗaini zi hitri a miɗiɗi wiiɗi nagai kiiɗi ta ɓa: Ɵeɗ midiɗi nagai n'e ɗa tili wazagai na ki ɗa tiliŋ ɗa. 24Buri mu miɗiki ɗai na mini Alaw viya gaiɗi paakai viya lai e piyi aŋ tili wazagai na ki ɗa tiliŋ na ɗa, amma e tiliŋ kai. E piyi aŋ ɵini seŋ na ki ɗa ɵiniŋ na ɗa, amma e ɵiniŋ kai.
Seŋ zi siŋka maini midini ɗif na pɗem na Samariya
Mat. 22.34-40; Mark. 12.28-34
25Tili, ɗif n'a sɗa gadai gara ktai, a fakasi buri a tetemaŋ a muɗa: Api zi hitri, aga mu za ɗa a mada kapai mu nava suŋfa n'a vada kai aŋ bulum ɗa? 26A miɗini: Aŋ gaini ɗû warni gadai ɗa ɓa maɵa ɗa? Ku ɵinaŋ na ɗa maɵa maɵa ɗa? 27A waya seŋ a muɗa: Aga ku dara Epiɗ-ɗai Alaw na wiiku gaiɗi agulku paŋ, gaini suŋfaɗi-agulku paŋ, gaini gadaŋku paŋ, gaini siɗiku paŋ. Ku dara maiku maini suku nɵa lai. 28Yesu a miɗini: Ku waya seŋ gaini futini, za hanɗa aga ku sumna karku lai. 29Amma ni a firiya, a siŋka edi ɓa, zilbi na wiini ɗa te na gaiɗi futini, a muɗa sini Yesu: Maya ɗa asiya ɗa? 30Yesu a waya seŋ a muɗa: Ɗif ktai a halasi azumai a Yeruzalem par a Yeriko sek, gorɓolokai e yimiŋ, e mili wazagaini paŋ, e ɵiɓiŋ, e hili wiiɗi, e hiniŋ gobi a mra. 31Wala a za nɵa, pai zi ɓaka ktai a vugasi warɗi futi na ɗa, a talaŋ waŋ, a vuga edi ɵimaɗi ɗaw. 32Levite ktai a za nɵa lai, a cosi warni hlai ni ɗa a talaŋ waŋ, a vuga edi ɵimaɗi ɗaw, 33Amma ɗif na Samariya ktai, warni morkoini a cosi warni hlai n'aŋ warni ɗa, won hlai n'a talaŋ, a bunda arni haw. 34A hala sini, a ma mini wurukni edi gaini emel gaini vin lai, asakal par a faɗa mini wuruk lai. A tikaŋ amai midini ablehöni ta, a kaŋ war dalam na morkokoi e yimiŋ aŋ haaya ɗa ta, a tika hangalni sini lai. 35Dawaini, won hlai na hlai a sɗasi li edi, a mula sulai sulu a siŋni wiini epin-gezani dalam zi haaya ɗa ca, a miɗini: Ku tika hangalku sini pɗem, na ɓa farai a ba a suwa hanɗa li ɗa, mu wayasi li ɗa aga mu vurguŋku. 36Arbaɗi na hu hanɗa, ku hiina ɓa, n'a siŋka edi aŋ maini ɗif n'a kɵa war tiɗi gorɓolokai ɗa asiya ɗa? 37A muɗa: A ni n'a za pɗem sini ɗa. Yesu a miɗini: Hala, ku za nɵa lai.
Yesu a ɗûgûliti Marta gaiɗi Mariya
38Won hlai n'e ɗa warni morkoiɗi, a co warni fuŋ ktai, muni ktai yikiɗi Marta te yimaŋ siɗi, 39Mariya, na tawalɗi te sumna azumai ezini Yesu aŋ ɵina seŋ n'a na hitraŋ ɗa. 40Amma Marta te huwya siɗi gaini sɗa viya burini, te halasi sini te miɗini: Epiɗ-ɗai, tawala te hinaŋa blaŋ mini sɗa ɗa, ku miɗiɗi ta te halasi te zina pa agwi lai kai ɗi? 41Amma Yesu a waya seŋ a miɗiɗi: Marta, Marta, tuku ku huwya suku gaini wazagai viya, ku sumna azumai kaalai na ɗa meere, 42Wala na pɗem ɗa a na ktai, Mariya te vara ɗa a gal na pɗem n'a suwa paŋ ɗa, aga a yima edi tiɗi par kaalai.
Currently Selected:
Lukas 10: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
