Lukas 8
8
Falakai n'e hili pini Yesu
1Asakal par a tika pini a hala warni fuŋ n'abakai paŋ paŋ, war fuŋ n'agogoi lai, a ɓaka, a muɗa labar na pɗem na midiɗi pai n'Alaw edi lai, na doogo pi sulu e ɗi fu gaini lai. 2Gaiɗi falakai zamai n'e zûûli mini ksalai par, mini veglek par lai, maiɗi: Mariya n'e yikiti ɓa magdalene na ksalai muguzak a niyasi edi midiɗi par, 3gaiɗi Yowana na munini Kuza, n'abai na miɗini wazagaini Herod, gaiɗi Susana, gaiɗi na zamai viya lai, e zini piɗi gaini wazagai.
Seŋ zi siŋka maini midini ɗif zi sûwiɗi seyem
Mat. 13.1-9; Mark. 4.1-9
4Firiɗi ɗai n'abai a tapasi sini, ɗai na war fuŋ n'abai paŋ par, a miɗiɗi seŋ zi siŋka maini hanɗa: 5Ɗif zi sûûɗi seyem a hala edi aŋ suuɗa seyemni. Won hlai n'a na suuɗaŋ ɗa, galni seyem zamai ɗa a yaka ɵimaɗi futi, a kirpa azumai pini eziɗi ɗai, wala zi ɗufli n'arbani hlai n'amai a sumaŋ. 6Zamai a yaka midini afti zi kriyit, won hlai n'a diya amai ɗa, a siita edi buri ɓa alam aŋ kai. 7Galni zamai a yaka arni hedek, hedek a diya amai gaini aŋ bonu, a rozoŋ lai. 8Gal na zamai a yaka midini afti na pɗem, won hlai n'a diya amai ɗa, a wa ali haa miya miya; won hlai n'a muɗa hanɗa a ɗuula a muɗa: Ni na ɵimaɗi zi ɵini a na aga a ɵina.
Yesu a muɗa gaini seŋ zi siŋka maini buri ma ɗa?
Mat. 13.10-17; Mark. 4.10-12
9Ɗaini zi hiri e zilbiŋ ɓa seŋ zi siŋka maini hanɗa a siŋka ɗa a ma ɗa? 10A waya seŋ a muɗa: A sa siki tiki buri ki siɗi wazagai zi ŋoyai na wiiɗi pai na wiini Alaw, amma siɗi na zamai ɗa, a sa siɗi war seŋ zi siŋka maini, -kapai won hlai n'e tili ɗa, e siɗi wala ktai kai, won hlai n'e ziɓiri ɗa, e ɵini wala ktai kaalai.
Gaglai na miɗini seŋ zi siŋka maini na midini ɗif zi sûûɗi seyem
Mat. 13.18-23; Mark. 4.13-20
11Seŋ zi siŋka maini hanɗa a muɗa na ɗa maini nɵa: Seyem ɗa a seŋni Alaw, 12Nagai na ɵimaɗi futi e ɗi nagai n'e ɵini seŋ, asakal par, Mat a halasi a mula seŋ hanɗa edi warɗi agulɗi par, kapai e yimi aŋ nivi kûri kai. 13Nagai na midini afti zi kriyit ɗa, e ɗi nagai na won hlai n'e ɵini seŋ li, e yimiŋ gaini firiyi, amma sirdaini warɗi kai. E yimi burini hlai n'agwi, amma won hlai na titimi a cosi li ɗa, e yimi warɗi edi. 14Ni n'a yaka arbani hedek ɗa, e ɗi nagai n'e ɵini seŋ li ɗa, e yimi, hiini gaini farai gaini diriɗi duniya lai a rozoŋ warɗi war payaiɗi, a kiɗa a wa ali n'a naya kai. 15Amma ni n'a yaka midini afti na pɗem ɗa, e ɗi nagai n'e ɵini seŋ ɗa gaini hangal na gaini tiki pɗem ta, e yimiŋ warɗi agulɗi lai, e siiki haa e wi ali.
Seŋ zi siŋka maini miɗini lampa
Mark. 4.21-25
16Won hlai n'e tiki afu li warni lampa ɗa, ɗif n'a pa wala miɗini aŋ kai, n'e wuti azumai pini dunu aŋ kaalai, amma e higiti amai sini wala n'e higi lampa sini, kapai nagai n'e niyisi amlai paŋ e tili gaglai ɗa. 17Buri wala zi ŋoyai n'aga a siŋka edi kai aŋ kai, wala zi kuɗuhai n'aga a sɗa edi warni gaglai kai ɗa aŋ kaalai. 18Buri nɵa, ki zi hangal gaini ɵeŋ na ki ɵini seŋ ɗa, buri ɓa ni na a wiini a na ɗa, aga a sa sini, amma ni na wiini aŋ kai ɗa, na hiina ɓa aŋ tini ɗa aga a yima edi.
Emini Yesu gaiɗi tawalakaini
Mat. 12.46-50; Mark. 3.31-35
19Emini gaiɗi tawalakaini e cûsi, amma e kiɗi amlai sini kai buri firiɗi ɗai. 20E miɗini ɓa: Amuku gaiɗi tawalakaiku e ɗa anene, e diri e nivi gaiku. 21Amma a wiyiɗi seŋ a miɗiɗi: Ama gaiɗi tawalakaya e ɗi nagai n'e ɵini seŋni Alaw, e zi pini lai ɗa.
Yesu a tika Berber azumai
Mat. 8.18, 23-27; Mark. 4.35-41
22Mefeŋ ktai ɗa a niya war hulum n'abai gaiɗi ɗaini zi hitri, a miɗiɗi: Hulumu bundumu anene kata, e ɵi hulum edi. 23Amma won hlai n'e ɗa ɵiki ɗa, Ni a kala weseŋ, berber n'abai a tikasi miɗini bal ɗa, hulum n'abai a tika pini a va gaini yem, e siɗi wala n'e zi ɗa kai. 24E hili sini, e ɵiyiŋ amai e miɗini: Api zi hitri, Api zi hitri, mu bumu li. Won hlai n'a ɵiyasi amai, a ɓara smer gaini mayaw lai, a tika azumai, hlai paŋ a bunda ɗiŋ. 25Asakal par a miɗiɗi: Yimiki aŋ wata ɗa? Hunai te yimiɗi e bindi hiyak, e miɗi arbaɗi marɗi: Ni hanɗa asiya ɵa ɗa? A muɗa sini smer gaini yem, nagai e gidi pini lai ɗa?
Yesu a zuula ɗif na gaini ksalai miɗini
Mat. 8.28-34; Mark. 5.1-20
26E yimi amai mini afti na wiiɗi Gerazenekai n'a na ɗikat Galeliya ɗa. 27Won hlai n'a pra amai tar ɗa, ɗif ktai na warni fuŋ n'abai par na gaini ksalai miɗini a halasi wuzani. A faana yaw, a wa sapa sini kaalai, a faana aha war dalam kaalai, amma a faana warni yeɵ. 28Won hlai n'a tala Yesu a ɗuula, a kɵa azumai ezini a muɗa gaini wulani amai, a muɗa: Wala n'a tupuku gaya ɗa a mada, Yesu Ahini Alaw n'amai, mu siiwuku, ku turlaŋa kai. 29Yesu a miɗini wiini ksalai buri a niyasi edi sini ɗif n'a sumna miɗini haa ɗi par ɗa par. Hlai zamai viya, ksalai a sini arni edi war basga sek, nɵa e rgiŋ gaini jaɓ, e wiini pokolom ezini lai, gaini hanɗa paŋ a haɗaŋ edi. 30Yesu a zilbaŋ, e yikuku maɵa ɗa? A wiyini seŋ a muɗa: Legiyon, buri ksalai a niya warni viya. 31Ksalai a siiwaŋ buri a ɵiniɗi war huduk na wuŋŋa kai. 32Farani hoho n'abai a na fu woni aŋ suma amai midiɗi huwuŋ, ksalai a siiwa Yesu buri a hinaŋ a niya warni, asitiɗi futi hanɗa. 33Ksalai a niyasi edi warni ɗif par, a niya warni hoho ɗa, farani hoho a fakasi amai par miɗini huwuŋ gaini rûvi, a niya agoɗom bal, a mra agoɗom kafa.
34Won hlai n'e tili wala n'a za ɗa, nagai n'e giɗimi hoho ɗa e pri edi, e ki labar war fuŋ n'abai gaini fuŋ n'agogoi na ɵimaɗi lai. 35Ɗai e niyisi edi aŋ tili wala n'a za ɗa, e cûsi sini Yesu ɗa, e nivisi ɗif na ksalai a niyasi edi sini par ɗa azumai ezini Yesu dam gaini sapa sini ca gaini hangalni, hunai te yimiɗi. 36Nagai n'e tili wala n'a za ɗa, e miɗiŋɗi wiiɗi marɗi gaini zûûli na ɗif zi ksalai a zuula gaini lai. 37Ɗai na midini afti na wiiɗi Gerazenekai paŋ e siiwi Yesu buri a yima sini edi midini aftiɗi par, buri e ɗi fu warni hunai n'abai. A niya warni hulum n'abai, a hiniɗi a hala. 38Ɗif na ksalai a niyasi edi sini par a siiwaŋ buri a yimaŋ pini; Yesu a hinaŋ aŋ hala gaini kai, a miɗini: 39Waya aha, muɗa wala n'Alaw a zaŋ suku paŋ wiiɗi ɗai. A hala a ɓaka warni fuŋ n'abakai ɗa paŋ miɗini wala na Yesu a zaŋ sini ɗa.
Ahini Yerus gaiɗi muni na te tetema sapani Yesu
Mat. 9.18-26; Mark. 5.21-43
40Won hlai na Yesu a wayasi ɗa, firiɗi ɗai a yimaŋ gaini firiyi buri nagai paŋ e ɗi fu aŋ biyiŋ. 41Ɗif ktai yikini Yerus a cosi, ni a abai na war sinagogne, a hurga azumai ezini Yesu, a siiwaŋ buri a halaɗi ahani. 42Buri Ahini ketekeɗik, te za buza doogo pi sulu, te ŋa ta aŋ mri. Won hlai n'a na hala ɗa, firiɗi ɗai e hiɵiŋ haa suŋfani a dara aŋ wula.
43Muni ktai te na fu, fel a ka gaiɗi a za gobi buza doogo pi sulu, te ba faraiɗi paŋ edi piɗi doktorai, amma ɗif a kiɗa aŋ zûûliti kai. 44Te suɓukasi duɓani par, te tetema mini sapani Yesu, war hlai ni tizaw, felɗi zi ki ɗa a ɗiya. 45Yesu a muɗa: A tetemaŋa ɗa asiya ɗa? Amma won hlai na ɗif paŋ, a muɗa ɓa: a ni a ni ɗa, Peter a miɗini: Api zi hitri, firiɗi ɗai a hiɵiku, e pirɵuku gara. 46Amma Yesu a waya seŋ: Ɗif a tetemaŋa, mu sɗa ɵa buri spak ktai a niyasi edi sa par. 47Muni, won hlai na te tala ɓa, wala na te zaŋ ɗa azi ŋoyai kir kai ɗa, te halasi, te ziriya lai, te bula siɗi azumai wuzani Yesu, wuzani arɗi ɗai paŋ, te muɗa edi gaglai midini wala n'a kiti aŋ tika tiɗi sini pini ɗa, zûûli na te zuula won hlai ni ɗa lai. 48Amma a miɗiɗi: Ahiya, yimiku a zuuluku li, hala jam.
49A na fu aŋ muɗa hai, a tala ɗa ɗif ktai na ahani abai na war sinagogne par a halasi a miɗini: Ahiku te mra su, ku huwya Api zi hitri kai. 50Amma Yesu a ɵina seŋ hanɗa, a miɗini wiini abai na war sinagogne: Ku huna kai, yima bas, nɵa aga te zuula. 51Won hlai n'a co aha ɗa, a hina ɗif zamai a niya amlai gaini kai, sai Peter gaini Yohana gaini Yakob, gaini epiɗi ahiyagwi gaiɗi emiɗi lai. 52Ɗai paŋ e tûwi, e ɵi marava siɗi buriɗi, amma Yesu a muɗa: Ki tûwi kai, te mra kai, te kala ɗa a weseŋ. 53Nagai e riyi pini buri e siɗi ɓa, te mra su ya. 54Amma a yimiti a muɗa gaini wulani amai a muɗa: Ahiya ku faka amai. 55Suŋfaɗi a wayasi warɗi, war hlai ni tizaw te faka amai, a miɗiɗi buri e siɗi simi. 56Tamaiɗi ahiyagwi e bindi hiyak gara; Yesu a gidiɗi miɗi buri e miɗi wala n'a za ɗa wiini ɗif kai.
Currently Selected:
Lukas 8: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
