Lukas 7
7
Yesu gaini abaiɗi askarai na askarai pini miya ɗaw na Kapernahum
Mat. 5.13; Yoh. 4.46-54
1Asakal n'a vada gaini seŋ zi miɗi na siɗi ɗai n'e ɗa ziɓiriŋ ɗa, a niya war Kapernahum.
2Abaiɗi askarai na askarai pini miya ɗaw ɗa, ɗifni zi sɗa a na fu veglek gobi a mra, a ɗif zi sɗa na ni a firiyaŋ gara. 3Won hlai n'a ɵina labarni Yesu ɗa, a ɵina zamai arbani n'abakai n'arbaɗi ɗai na Yidiya buri e siiwiŋ aŋ halasi a zuula begeni ta. 4E cûsi sini Yesu, e siiwiŋ, e siyi mini gara e miɗi: A ɗif na dai dai na ku kiɗa ku zini pɗem, 5buri ni a diriɗi ɗaimu gara, a rga sinagogne na wimu ɗa a ni. 6Yesu a hala gaiɗi, won hlai n'a ŋasi gobi sini dalamni ɗa, abaiɗi askarai na miya ktai pini a ɵiniɗi marmakaini sini aŋ miɗini ɓa: Epiɗ-ɗai, ku kaya suku haa ku niyasi aha war dalamŋa ɗa kai, 7mu tala sa haa mu dai dai na mu halaɗi suku gaini ma ɗa dama kai na ɗa burini hanɗa, amma muɗa seŋ ktai kapai ɗifŋa zi sɗa ɗa a zuula wiini ta. 8Ta gaini mada ɗa, na abakai n'e ŋi mada e ɗa, m'aŋ gaiɗi askarai na mu midiɗi lai, mu miɗini li wiini ktai ɓa: Hala ɗa, a hala, wiini na zamai ɓa: halasi ɗa a halasi, wiini begeɗa ɓa: Za hanɗa a zaŋ lai. 9Won hlai na Yesu a ɵina seŋ hanɗa a bunda hiyak gara burini, a bunda arni sini firiɗi ɗai n'e tipi pini, a muɗa: Koo war Izrayel tekeɗeɗi mu nava yimi na maini hanɗa ɵa kai. 10Won hlai na ɗai n'e ɵiniɗi e wiyisi aha ɗa, e nivisi bege ɗa veglek kir kai.
Yesu a ɵiya ahiɗi muni na Nayin amai
11Asakal par a hala war fuŋ n'abai na yikini ɓa Nayin, ɗaini zi hitri gaini firi abai e ɗi fu gaini warɗi futi. 12Won hlai n'a ŋasi gobi mini magalani fuŋ n'abai ɗa, a nava ɗai e ɗa libi ɗif zi mri edi sek mini waŋ, ahi n'aŋ tiɗi emini ketekeɗik, emini te muni na war greŋ, ɗai viya war fuŋ n'abai par e ɗi fu gaiɗi. 13Epiɗ-ɗai a tiliti, hiini-haw a yimaŋ buriɗi, a miɗiɗi: Ku tuwa kai. 14A halasi gobi sini, a yima wala n'e libiŋ gaini ɗa, ɗai n'e libiŋ e ɗiyi, a muɗa: Marmaya, mu muɗuku, faka amai. 15Ɗif zi mri a sumna amai dam, a tika pini aŋ muɗa seŋ, a siŋɗi wiiɗi emini. 16Ɗai paŋ hunai a yimiɗi, e kûli Alaw e miɗi: Ɗif na mini Alaw n'abai a luɓasi li arbamu, Alaw a halasi li aŋ zina piɗi ɗaini. 17Seŋ hanɗa a wa edi miɗini war Yudiya paŋ, gaini afti na ɵimaɗi paŋ lai.
Yahana zi baptisme a ɵina ɗai sini Yesu
Mat. 11.2-19
18Ɗai zi hitri na wiini Yohana e miɗini labar hanɗa paŋ. Yohana a yika ɗai sulu arbaɗi ɗaini zi hitri par. 19A ɵiniɗi sini Epiɗ-ɗai aŋ zilbiŋ ɓa: Tuku ku Ni n'aga a halasi ɗa, zaw mi biyi na zamai ɗi? 20Won hlai na ɗai e cûsi sini, e miɗini: Yohana zi baptisme a ɵiniyisi suku buri mi zilbuku ɓa: Tuku ku Ni n'aga a halasi ɗa, zaw mi biyi na zamai ɗi? 21Won hlai ni dama, Yesu a zûûliɗi ɗai zi veglek viya gaini veglek zamai zamai viya, gaini ksalai viya lai, a mala arɗi na malvanai edi viya lai. 22Yesu a wiyiɗi seŋ a muɗa: Hili ki miɗini wiini Yohana gaini wala na ki tiliŋ, na ki ɵiniŋ lai:
na malvanai e tili,
na daŋlaŋai e bindi e hili gaini futini,
na dugomai e bindi hilu,
na ganaŋai e bindi e ɵini,
zi mri e ɵiyi amai, na murgakai e ɗa yimi labar na
pɗem n'a ɓaka ɗa lai.
23ɵeɗ aŋ miɗini ni n'aga mu za aŋ wala zi dibi burini kai ɗa. 24Asakal hiliɗi ɗai na Yohana a ɵiniɗisi ɗa, a tika pini a miɗiɗi wiini firiɗi ɗai gaini Yohana maini nɵa: Ki hili, ki tilisi edi warni basga ɗa a ma ɗa? A vayai na smer a gigizaŋ ɗi? 25Nɵa, ki hili ki tili ɗa a ma ɗa? A ɗif na sapa sini gaini wi gaini futini ɗi? Nagai n'e wi sapakai na gaini futini siɗi, na e ɗa warni muluk lai ɗa, e ɗa aha warni dalamɗi paakai. 26Ki hili ki tili ɗa a ma ɗa? Ki tili ɗaa ɗif na mini Alaw ɗi? Nkam, mu miɗiki, a suwa ɗif na mini Alaw. 27Aŋ gaini ɗû miɗini maini nɵa:
Mu na ɵinaɗi ɵeŋ na wiya wuzaku,
aga a ɓisiti futiku wuzaku. 28Mu midiki: Arbaɗi nagai na falakai e wiiɗi paŋ ɗa, n'abai n'aga a suwa Yohana ɗa aŋ kai, amma n'agwi na asakal warɗi paini fuŋ-n'Alaw, Ni abai a suwaŋ.
29Ɗai n'e ɵini mini paŋ, gaiɗi ɗai zi tar ɗa lai paŋ e yimi ɓa Alaw a jre, nɵa e nivi baptisme tini Yohana par. 30Farisekai gaiɗi ɗai n'e siɗi gadai zi ɗû gara ɗa, won hlai n'e diri e nivi baptisme tini par kai ɗa, e bili edi sini wazagai n'Alaw a kataŋ buriɗi ɗa.
31Pinziba hanɗa, aga mu kitiɗi gaini asiya ɗa? E ɗiŋ ɗa maini asiya ɵa ɗa? 32E ɗi na maiɗi aliyagoi n'e simni won hlai n'e tipi woni, n'e yiki marɗi e miɗi ɓa: Tiyi mi yibi algaita, amma tiki ki didimi kai, tiyi mi zini yama zi tuwi, tiki ki tûwi kai, 33Buri Yohana zi baptisme a halasi, a suma ɓuk kai, a ca vin kaalai, tiki ki miɗi ɓa: ksalai aŋ miɗini. 34Ahini ɗif a halasi, a suma, a ca lai, tiki ki miɗi ɓa: a ɗif na haram, a ca vin gara lai, a marmaiɗi ɗai zi tar gaiɗi ɗai na tuwarai. 35Amma yel na wiini Alaw, alini Alaw paŋ e siɗi ɓa a jre.
Yesu gaiɗi muni na uwuri ɗa
Mat. 26.6-13; Mark. 14.3-9; Yoh. 12.1-8
36Ktai arbaɗi Farisekai a yikaŋ aŋ suma gaini, nɵa a hala ahani ɗif na Farise ɗa, a faana azumai sini simi ɗa. 37Amma muni ktai, muni na tuwuri, te sɗa ɓa a na suma ahani Farise ɗa, te kitisi agagazai alabastre gaini vi gaini Yitir. 38Te ɗiyasi duɓani par, sini ezini par te tuwa, te diiɓa ezini Yesu gaini tuwi n'arɗi ɗa, te girdaŋ edi gaini ayir na midiɗi, te sisiɓa ezini te mini yitir ezini lai. 39Won hlai na ɗif a tala hanɗa, ɗif na Farise n'a yikaŋsi ɗa a hiina warni ɓa, na ɓa ɗif hanɗa a ɗif na mini Alaw fakat ɗa, aga a siɗiti muni na te na tika tiɗi sini ɗa, na te siya ɗa: Muni na tuwuri.
40Yesu a miɗini: Simun, mu dara mu muɗuku seŋ ktai, a wiyini seŋ: Epin-geza, muɗa wiiku. 41Tumuŋ a na fu midiɗi ɗai sulu, na ktai aŋ miɗini sulai miya ɵim, na hanɗa aŋ miɗini sulai doogo doogo ɵim lai. 42Won hlai n'a tala haa wala n'e virgiŋni gaini aŋ kai ɗa, a hiniɗi sulu paŋ mak, arbaɗi na sulu ɗa, n'aga a daraŋ a suwa ɗa a na wata ɗa? 43Simun a wiyini seŋ: Mu hiina ɓa, a ni n'a hinini tumuŋni abai ɗa. Yesu a miɗini: Tuku, ku muɗa gaini futini. 44Asakal par a bunda arni siɗi muni, a miɗini wiini Simun: Ku na tiliti muni hanɗa tiɓ? Mu niyasi ahaku ɗa ku saŋa yem buri mu ma aza kai, amma na ɗa, te diiɓa aza gaini tuwi na wiiɗi, te girdaŋ edi gaini ayir na midiɗi lai. 45Ku kɵa amai wula kai, amma na ɗa, haa hlai na mu niyasi aha par, siɗi aŋ sisiɓa aza ɵa. 46Tuku ku ma emel mada kai, amma na ɗa te ma yitir aza. 47Buri nɵa mu mɗuku: Tuwurɗi na viya a haza edi li, buri ɓa te dara viya, amma ni na tuwurni e hiniŋni viya kai ɗa a dara agwi lai. 48A miɗiɗi wiiɗi muni: Tuwurku a haza edi li. 49Nagai n'e ɗi fu aŋ simi gaini e tiki piɗi aŋ hiini gaini warɗi ɓa: Ni hanɗa asiya ɗa? Na haa a haza tuwur edi ɗa. 50Amma a miɗiɗi wiiɗi muni: Yimiku a kuruku li, hala jam.
Currently Selected:
Lukas 7: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
