Lukas 6
6
Ɗai zi hitri e hiɗi miɗini seyem war Sabbat
Mat. 12.1-18; Mark. 2.22-28
1Won hlai n'e ɗa vigi warni vowai war mefeŋ na wiini Sabbat ɗa, ɗaini zi hitri e hiɗi miɗini seyem, e fiŋkiŋ war tiɗi e limiŋ. 2Zamai arbaɗi Farisekai e miɗi: ki zi wala n'aŋ gaini ɗili warni Sabbat ɗal ɗa buri ma ɗa? 3Yesu a waya seŋ a miɗiɗi: Ki tili warni ɗû kai ɗi? Wala na David a zaŋ won hlai na wiyamai te zaŋ gaiɗi na pini paŋ ɗa, ki tiliŋ warni ɗû kai ɗi? 4Niyi n'a niya amlai warni dalamni Alaw a mulasi peŋ n'a sa sini Alaw, a lumaŋ, a sa wiiɗi nagai na gaini lai, paŋ ktai futi te sa siɗi buri e miliŋ kai, e limiŋ ɗa sai e ɗi paakai zi ɓaka kiiɗi ta. Ki tili hanɗa kai ɗi? 5A miɗiɗi: Ahini ɗif ɗa abai miɗini Sabbat lai.
Ɗif na tini gaini mri
Mat. 12.9-14; Mark. 3.1-6
6War Sabbat zamai ɗa, a hala war sinagogne aŋ hitra, ɗif ktai a na fu won na tini na wus gaini mri pini su. 7Ɗai zi ɗû wazagai gaiɗi Farisekai e tiki hangalɗi sini Yesu aŋ tiliŋ haw n'aga a zuula ɗif war Sabba ɗi ɗa kapai e nivi wala n'e pi seŋ midini gaini. 8Amma a sɗa hiiniɗi ba, a miɗini wiini ɗif na tini gaini mri ɓa: Faka amai, ɗiya amai arɗi zaw. 9Yesu a miɗiɗi: Mu zilbiki ɓa: Wala na ɗif a sɗa aŋ zaŋ war Sabbat ɗa a ma ɗa? E zi ɗa a pɗem, zaw e zi ɗa a meefeŋ ɗi? A kurɗa suŋfa; zaw aŋ baŋ ɗi? 10Nɵa, a guna arni a tiliɗi paŋ, a muɗa wiini ɗif ɗa: Yimitisi tuku edi, a za nɵa lai, tini te zuula. 11E bûvi gaini hiy, e sispi arbaɗi marɗi miɗini wala n'aga e ziŋ sini Yesu ɗa.
Yesu a viriɗi Apostelai na doogo pi sulu
Mat. 10.1-4; Mark. 3.13-16; Sdaɗ. Apost. 1.13
12War mefeŋ ni ɗa, Yesu a hala aŋ siiwi amai midiɗi huwuŋ, a faana ɵa talal aŋ siiwa Alaw. 13Won hlai na hlai a sɗasi li edi ɗa, a yikiɗi ɗaini zi hitri, a vara arbaɗi par doogo pi sulu, a siɗi yikiɗi ɓa: Apostelai. 14Hanɗa a Simun n'a sini yiki zamai ɓa: Peter, gaini Andreya na tawalni, Yakob gaini Yohana, Filip gaini Bartelemi, 15Matewus gaini Tumas, Yakob n'ahini Alfewus, gaini Simun na e yikiŋ ɓa: Zelotus, a dara a muɗa: N'a firiya ɓa gawni a ɗa midini aftini kai. 16Yudas n'ahini Yakob, gaini Yudas Iskariyot, n'a bunda aŋ ɗif n'a sa Yesu edi tiɗi gawni.
Yesu a hitra firiɗi ɗai, a zûûliɗi zi veglek ɗa lai
Mat. 4.23-25; Mark. 3.7-13
17A niya azumai gaiɗi, a halasi a ɗiya warni hlai na plas, na firiɗi ɗai n'abai gaiɗi ɗai zi hitri, gaini faraɗi ɗai viya e hilisi a Yudiya par, a Yeruzalem par, agoɗom wulani Tirus gaiɗi Sidon par lai. 18E hilisi buri e ɵini hitrini, buri e zûûli warni veglekɗi par lai. Nagai na ksalai a na ka a hûwyiɗi lai e nivi zûûli paŋ. 19Firiɗi ɗai e piyi futi aŋ tikiti tiɗi sini buri spak ktai a niyasi edi sini par, a zuula ɗai.
Ɵeɗ gaini gir
Mat. 5.2-12
20Nɵa won hlai n'a yima arni amai a tiliɗi ɗaini zi hitri a muɗa:
Ɵeɗ ɗa aŋ midiki tiki na murgakai,
buri pai n'Alaw ɗa te wiiki.
21Ɵeɗ ɗa aŋ midiki, tiki na wiyamai te ziki tiyana,
buri ɓa aga ki vi. Ɵeɗ aŋ midiki tiki na tûwi tiyana, buri aga ki riyi
22Ɵeɗ ɗa aŋ midiki won hlai na ɗai e diriki kai, won hlai n'e tikiki arki edi arbaɗi par, e tirkiki, e biliki edi arbaɗi par maiɗi ɗai na maafanai nɵa, burini Ahini ɗif.
23Ki firiyi war mefeŋ ni ɗa, ki pri amai gaini firiyi,
buri ɓa vrakki a na abai war fuŋ-n'Alaw,
buri ɓa tamaiɗi e ɗi ka e zi siɗi ɗai na mini Alaw ɗa maini hanɗa ɵa lai.
24Amma gir gara buriki tiki zi farai,
buri tiki ki nivi muluk na wiiki ya.
25Gir gara buriki tiki na ki ɗa gaini vi tiyana, wiyamai aga te ziki,
gir gara buriki tiki na ki ɗa riyi tiyana,
aga ki hini warni kwimi, warni tuwi lai.
26Gir gara buriki won hlai na ɗai paŋ e miɗi midiki ɗa a pɗem;
tamaiɗi e ɗi ka e zi siɗi ɗai na mini Alaw na jre kai kai ɗa maini hanɗa nɵa.
Diri na siɗi gawki
Mat. 5.38-48
27Amma tiki na ki ɗa ɵini na ɗa, mu miɗiki ɓa: Ki diriɗi gawki, ki zi pɗem siɗi nagai n'e diriki kai ɗa. 28Ki ɓikiɗi nagai n'e tûûsiki ɗa, siiwi buriɗi nagai n'e miɗi meefeŋ midiki ɗa. 29Ɓa ɗif a ɵiɓuku war galaiku na ktai, ku bindinisi na hanɗa lai, ɓa ɗif a mula dawraku li gaini gdaŋ ɗa, ku hinaŋ a militi jaŋfaku lai.
30Asiya ɗi paŋ n'a zulbuku ɗa, sini; n'a mula wazagai gaini gdaŋ ɗa, ku zilbaŋ tini par kir kai.
31Na ki diri ɓa ɗai e ziŋ siki ɗa, ki zi siɗi nagai nɵa lai. 32Na ɓa ki diriɗi ɗa e ɗi nagai n'e diriki ɗa, pɗem na ki ziŋ na kapai ɗai e kûlûki burini ɗa a na wata ɗa? Ɗai na tuwarai lai e diriɗi ɗa e ɗi nagai n'e diriɗi lai kai ɗi? 33Na ɓa ki zi pɗem siɗi nagai n'e ziki pɗem ɗa, pɗem na ki ziŋ na kapai ɗai e kûlûki burini ɗa, a na wata ɗa? Ɗai na tuwarai e zi na ɗa ɵa lai kai ɗi? 34Na ɓa ki tifi wazagai ɗa wiiɗi ɗai na ki hiini ɓa aga e wiyiŋkisi ɗa, pɗem na ki ziŋ na kapai e kûlûki burini ɗa a na wata ɗa? Ɗai na jaaɗi gaini Alaw kai ɗa maa e tûfi wazagai wiiɗi marɗi, e wiyiŋ gaini riba kaalai. 35Amma ki diriɗi gawki, ki zi pɗem siɗi, ki tifi gaini hiini na miɗini vrakni kai, vrakki a za abai, aga ki bindi aŋ alini Alaw n'amai n'amai, buri Ni a za pɗem siɗi nagai na tese warɗi kai, gaiɗi na maafanai lai. 36Ki zi siki malkakai maini n'Epiki na war fuŋ-n'Alaw a na melke ɗa nɵa.
Ɗûkûlini sariya midiɗi na zamai
Mat. 7.1-5
37Ki ɗûklûti sariya midiɗi na zamai ɗa kai, kapai Alaw a ɗûklûti sariya midiki kai, ki kûti sariya midiɗi na zamai ɗa kai, nɵa Alaw aga a kûti sariya midiki kaalai. Ki hini tuwurɗi marki kapai Alaw a hiniki na wiiki lai. 38Si tiki edi, Alaw aga a siki lai, daram na gaini futini, na gaini vi gaini futini, na gaini didigi dak, na gaini pi amai haa a yaka azumai siɗi zuɗuɗu, aga a mula warni ɵubiki n'abai n'aŋ sini sapaki. Buri daram na ki ŋi gaiɗi, aga a ɗa siki gaiɗi lai.
39A muɗa seŋ zi siŋka maini zamai pra: Ɗif na melveŋ ɗa a kiɗa a ɵa wuzani maini na melveŋ ɗi? Nagai sulu paŋ aga e yiki warni waŋ kai ɗi? 40Ɗif zi hitri ɗa, a suwa Api zi hitri n'a hitraŋ ɗa kai. Amma asiya asiya ɗi paŋ n'a hitra li gaini futini aga a bunda maini api zi hitri n'a hitraŋ ɗa nɵa. 41Tuku ku tala evek n'a na arni maiku ɗa, amma voɗok n'a na arku tuku ɗa, ku sɗaŋ kai ɗa buri ma ɗa? 42Ku miɗini wiini maiku ɓa: Maya, hinaŋa mu tikasi evek n'arku ɗa edi, amma voɗok n'a na arku ɗa, tuku ku sɗaŋ kai ɗa maɵa maɵa ɗa? Tuku zi rhai, tika voɗok n'a na arku tuku ɗa edi ɗaw haw, kapai ku paya futi aŋ tikasi evek n'arni tawalku edi ɵa.
Ɗif a sɗa luwuŋ paŋ sini alini
Mat. 7.16-20; 12.33-35
43Luwuŋ na pɗem a wa ali na gaini hûfi kai, luwuŋ zi veglek ɗa a wa ali na pɗamai kaalai. 44Buri luwuŋ paŋ ɗa a sɗa sini alini n'a waŋ. E rûwisi alini luwuŋ Fige sini hedek par kai, e rûwisi alini luwuŋ zi vin sini duvuɗvuɗ par kaalai. 45Ɗif na pɗem ɗa, warɗi godai na pɗem na warɗi agulni par ɗa, a kasi wala na pɗem edi; amma na meefeŋ ɗa, warni godai na meefeŋ par, a kasi wala na meefeŋ edi lai. Buri a niyasi edi mini ɗif par ɗa a wala na agulni a va gaini gara ɗa.
Dalam zi tûûri na sulu
Mat. 7.24-27
46Tiki ki yikiŋa Epiɗ-ɗai, Epiɗ-ɗai, amma wala na mu miɗiki li ɓa ki ziŋ ɗa, ki ziŋ kai ɗa buri ma ɗa? 47Asiya ɗi paŋ n'a halasi sa, n'a ɵina seŋŋa, n'a za pini lai ɗa, mu dara mu siŋkiki ɗif n'a kata gaini ɗa. 48A na maini ɗif n'a dara a rga dalam, n'a huda ezini azumai hulum, a torosi ezini azumai par miɗini huwuŋ; Yem a suma, a ɵiɓa amai sini dalam, amma a kiɗa a muguzaŋ kai buri a ɗiya gaini futini. 49Amma ni n'a ɵina seŋ a za pini kai ɗa, a na maini ɗif n'a dara a rga dalam midini afti na kadai, a huda ezini, yem a ɵiɓa amai sini, tizaw a ho azumai, hûni ɗa a za abai.
Currently Selected:
Lukas 6: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
