Lukas 4
4
Mat a tetema Yesu
Mat. 4.1-11; Mark. 1.12-13
1Yesu, won hlai n'a va li gaini Seze-sɗik, a waisi warni Yurdan par, Seze a kaŋ edi warni basga na kaɗataŋ. 2Woni, Mat a tetemaŋ haa mefeŋ doogo doogo puɗu. War mefeŋ doogo doogo puɗu hanɗa, a suma wala kai, hlai na mefeŋ hanɗa a va li ɗa, wiyamai te yimaŋ. 3Nɵa, Mat a miɗini: Na ɓa k'Ahini Alaw fakat ɗa, muɗa sini ahi-fuŋ hanɗa kapai a bunda aŋ ɓuk. 4Yesu a wiyini seŋ, a muɗa: Aŋ gaini ɗû ɓa: Ɗif a sumna karni gaini wala zi simi kiini kai.
5Mat a kaŋ amai midini hlai n'amai mogo, gaini yafai kai a siŋkitini aftiɗi paakai na midiɗi yai ɗa paŋ, 6a miɗini: Aga mu suku spak gaini der paŋ n'a na miɗini afitiɗi paakai hanɗa, buri a sasi ta, nɵa aga mu siŋni wiini asiya na mu dara mu siŋni lai. 7Buri nɵa, na ɓa, ku hurga li azumai wuza ɗa, aga mu suku hanɗa paŋ aŋ wiiku. 8Yesu a waya seŋ a miɗini: Aŋ gaini ɗû ɓa:
Aga ku hurga azumai wuzani Epiɗ-ɗai Alaw na wiiku,
Aga ku siiwa ɗa a Ni ktai.
9Mat a kaŋ a Yeruzalem pra, a tikaŋ amai merfeŋni tempel amai, a miɗini: Ɓa k'Ahini Alaw fakat ɗa, blaɗi suku azumai won na par. 10Buri aŋ gaini ɗû ɓa: Aga a sa miɗi wiiɗi ɗaini zi ɵeŋ buriku,
kapai e giɗmuku.
11Pra nagai aga e lubuku amai tiɗi ɗaw,
kapai azuku a daba sini ahi-fuŋ kai zaŋ.
12Yesu a waya seŋ a miɗini: Aŋ gaini ɗû ɓa: Aga ku tetema Epiɗ-ɗai Alaw na wiiku kai.
13Won hlai n'a vada gaini tetemini paŋ li, Mat a yima sini edi sini par buri hlai n'agwi.
Yesu a tika pini sdani war Galileya
Mat. 4.12-17; Mark. 1.14-15; Yoh. 4.1-3
14Yesu a waya war Galileya gaini vi gaini spak na wiini Seze-sɗik, labarni a wa edi midini hlai n'aŋ warni paŋ. 15A hitra amlai warni sinagogne na wiiɗi ɗa, ɗai paŋ e kûlûŋ paŋ.
War Nazaret ɗai e bili Yesu arɗi kai
Mat. 13.53-58; Mark. 6.1-6
16A halasi a Nazaret, war hlai n'a wula amai woni. Warni mefeŋ ni Sabbat ɗa, a hala amlai warni sinagogne maini n'a na zaŋ kûreɗ-kûreɗ nɵa, a faka amai buri a ŋa ɗû na wiini Alaw edi wuzaɗi ɗai. 17E kinisi maktuɓ na wiini ɗif na mini Alaw Ezaya, a badaŋ edi, a nava hlai n'a muɗa maini nɵa:
18Seze na wiini Epiɗ-ɗai a na mada,
buri a maŋa emel n'e tiki ɗai war sda gaini mada,
kapai mu ɓaka labar na pɗem siɗi na murgakai,
a ɵinaŋa aŋ muɗa midini pli n'edi siɗi ɗai na war daŋgai,
midini arai-zi-mili edi na wiiɗi na malvanai,
aŋ pliɗi nagai n'e ɗa siɗi gir tiɗi ɗai edi lai.
19Aŋ muɗa midini buza n'EPIƊ-ƊAI aga a siŋka yumni edi siɗi ɗai na warni.
20Asakal par a faɗa maktuɓ ɗa amai, a siŋni wiini ɗif n'a kaŋsi ɗa, a hala a sumna azumai dam, arɗi ɗai na war sinagogne paŋ a hiɗika sini sek. 21Nɵa a tika pini aŋ miɗiɗi: Girna ɗa, seŋ na ki ɵiniŋ hanɗa a va amai li. 22Ɗai paŋ e zi zaida miɗini, e bindi hiyak buri seŋ na pɗamai n'a niyasi edi mini par ɗa, e miɗi: Hanɗa a Ahini Yosef ɗa kai ɗi? 23A miɗiɗi: A futini, aga ki miɗiŋa seŋ zi siŋka maini n'a muɗa ɓa: tuku dokor, zuula suku tuku dama, wazagai n'a zasi war Kapernahum maini na ki ɵiniŋ na ɵa ɗa, zaŋ miɗini aftiku won na lai. 24A miɗiɗi pra: Jre, mu miɗiki, ɗif na mini Alaw ktai n'e yimiŋ midini aftini aŋ kai. 25Jre, mu miɗiki, war mefeŋ na wiini ɗif na mini Alaw Eliyas ɗa, falakai na war greŋ e ɗi fu war Izrayel viya. Won hlai na faŋ a ɵa kai haa buza hu gaini gal, won hlai na wiyamai n'amai te za midini afti lai ɗa, 26gaini hanɗa paŋ ɗa, Alaw a ɵina Eliyas sini ktai arbayi kai, amma a ɵinaŋ siɗi muni na war greŋ na Sarepta, midini afti na Sidon. 27War mefeŋ na wiini ɗif na mini Alaw Eliza, ɗai na dugomai e ɗi fu viya aha warɗi Izrayel, amma gaini hanɗa paŋ, ktai n'arbaɗi n'a bunda hilu aŋ kai, sai Naaman na Siriya par tar. 28Won hlai n'e ɵini seŋ hanɗa, ɗai na war sinagogne paŋ e bindi gaini hiy n'abai. 29E fiki amai sini e birgiŋsi edi war fuŋ n'abai ɗa par, e kiŋ edi mini hlai na gaini zigi jak siɗi huwuŋ, na fuŋɗi n'abai a rga midiɗi ɗa kapai e hûgûŋ azumai. 30Amma a vugasi arbaɗi ɗaw, a hala wiini.
Yesu a zuula ɗif na gaini ksalai na hihir miɗini
Mark. 1.21-28
31Yesu a hala a Kapernahum, fuŋ n'abai na Galileya, a hitriɗi ɗai war mefeŋ na wiini Sabbat. 32Hitri n'a hitriɗi ɗa, a bindiɗi hiyak buri seŋni ɗa a muɗaŋ gaini spak pini. 33Ɗif na gaini ksalai na hihir miɗini a na fu amlai warni sinagogne, a ɗuula a muɗa: 34Yesu na Nazaret, n'a tupuku gaiyi ɗa a ma ɗa? Ku halasi ɗa aŋ tûûriyi edi ɗi? Mu suɗuku ya, tuku ku na sɗik na ku halasi sini Alaw par, 35Yesu a ɓaraŋ a muɗa: Ba muku! A niya edi sini ɗif par, a zini wala ktai na meefeŋ kai. 36Ɗai paŋ hunai te yimiɗi, e zilbi siɗi arbaɗi marɗi, e miɗi: A miɗi na maɵa maɵa ɗa? A muɗa sini seze na haharai gaini spak, gaini gdaŋ, a niya edi lai ɗa! 37Labar na miɗini a wa edi midini hlai n'aŋ woni paŋ.
Yesu a zuula ɗai zi veglek viya
Mat. 8.14-17; Mark. 1.29-34
38A fakasi war sinagogne par a halasi ahani Simun. Suwulni Simun te na fu siɗi gaini sûwi gara, e siiwiŋ buri a zina piɗi ta. 39A goɓo azumai midiɗi, a ɓara si zi sûwi ɗa, si zi sûwi ɗa a hiniti. Won hlai ni tizaw, te faka amai te tika piɗi aŋ zina piɗi. 40Won hlai na futi te nawa li, ɗai na ɗaiɗi zi veglek e ɗa, na veglek na maɗi maɗi paŋ aŋ siɗi ɗa, e kiɗinisi, a tika tini midiɗi, a zûûliɗi. 41Ksalai lai a niyasi edi siɗi ɗai viya par, a ɗuula a muɗa: Tuku ɗa k'Ahini Alaw. A ɓiriɗi, a hiniɗi aŋ miɗi seŋ kai buri e siɗi ya ɓa ni a Kristu.
Yesu a ɓaka labar na pɗem war Galeliya
Mat. 4.23; Mark. 1.35-39
42Won hlai na hlai a sɗa li edi ɗa, a hala warni hlai na baŋa, ɗai ɗa e tiki piɗi e piyiŋ, e hilisi haa pini ta, e firiyi ɓa e hiniŋ a hala kai, a sumna gaiɗi. 43Amma a miɗiɗi: A dewele buriya ɓa mu ɓaka labar na pɗem na wiidi pain'Alaw midiɗi duniya paŋ ɗa, sini fuŋ n'abakai na zamai ɗa lai, buri Alaw a ɵinaŋasi burini hanɗa. 44A ɓaka seŋ warni sinagogne na war Yudiya.
Currently Selected:
Lukas 4: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
