Lukas 3
3
Yohana zi baptisme a ɗif na mini Alaw maini nɵa
Mat. 3.1-6; Mark. 2.1-6; Yoh. 1.19-23
1War buza n'ag'aŋ doogo pi ɵim, na Sezar Tiberiyus, aŋ warɗi pai ɗa, Pontiyus Pilatus a na fu aŋ Lawan na Yudiya, Herod a na aŋ abai midini galni aftiɗi pai n'ag'aŋ puɗu, a dara a muɗa midini afti na Galileya. Filip na tawalni n'abai na tamaiɗi na falakai kiiɗi kiiɗi ɗa, a na fu aŋ abai na midini galni aftiɗi n'ag'aŋ puɗu, a dara a muɗa midiɗi Itureya gaini afti na Trakonitide. Lizaniyas a na aŋ abai na midini galni aftiɗi pai n'ag'aŋ puɗu, a dara a muɗa, Abilene. 2Hlai na Annas gaini Kaifas e ɗa aŋ paakai n'abakai zi ɓaka lai ɗa, seŋ na wiini Alaw a muɗa sini Yohana n'ahini Sakariyas edi warni basga na kaɗataŋ.
3A hala midini afti na ɵimaɗi Yurdan ɗa paŋ, a ɓaka miɗini baptisme na wiini bindi na gamai na wiini hiini, na pini hanɗa Alaw a haza tuwur edi ɗa. 4Maini n'a ɗosi warni maktuɓ na wiini seŋ na wiini ɗif na mini Alaw Esaya ɗa nɵa:
wule a na wa edi war basga na kaɗataŋ,
ziziniti futi na wiini Epiɗ-ɗai,
ɗûpi futini n'agogoi cir cir lai.
5Huduk paŋ aga a ŋaɗa amai,
huwaŋai gaini boŋorai paŋ aga a yima azumai,
futi na gaini viyɗi pek pek paŋ aga a ɗopa cir cir,
futi zi darɓaɵai aga a kata azumai.
6Ɗai paŋ aga e tili kûri na wiini Alaw.
Ɓikini-seŋ na wiini Yohana zi baptisme
Mat. 3.7-10
7A miɗiɗi wiiɗi ɗai n'e hilisi edi mini aŋ nivi baptisme tini par ɗa ɓa: Pinzibani hiɓe, a hitriki aŋ pri edi wuzani hiy n'aga a halasi ɗa asiya ɗa? 8Buri nɵa ki wi ali n'a kata pini bindi na gamai na wiini hiiniki. Ki miɗi kai ɓa: Epiyi a Abraham, buri mu miɗiki Alaw a kiɗa aŋ mula arbani alini fuŋ hanɗa par, a bundaŋ aŋ alini Abraham. 9Tiyana par, beŋel ɗa aŋ gaini zizini ta, aŋ bula luwaŋai azumai sini sirdaini par, nɵa luwuŋ paŋ n'a wa ali na pɗamai kai ɗa aga a ɗukla azumai, a ɵiŋka arni afu.
Ali na wiini bindi na gamai na wiini hiini
10Ɗai e zilbiŋ e miɗi: Aga mi zi ɗa a ma ɗa? 11A waya seŋ a miɗiɗi: ɗif na dawrani a na sulu ɗa, aga ɓurwaŋ gaini ni na wiini aŋ kai ɗa, ɗif na walani zi simi a na ɗa, a za nɵa lai. 12Ɗai zi tar e hilisi sini lai aŋ nivi baptisme, e zilbiŋ e miɗi: Api-zi- hitri, tiyi aga mi zi ɗa a ma lai ɗa? 13A waya seŋ a miɗiɗi: Ki yimi farai tiɗi ɗai a suwa na futi te sa siki aŋ yimiŋ ɗa kai. 14Askarai lai e zilbiŋ e miɗi: Tiyi ɗa, aga mi zi ɗa a ma lai ɗa? A miɗiɗi: Ki mili wazagai tiɗi ɗai gaini gdaŋ kai. Ki pi seŋ midini ɗif aŋ blaŋ kaalai, ki zi gaini vrakki n'a na ɗa.
Yohana zi baptisme a muɗa miɗini ni n'aga a halasi
Mat. 3.11-12; Mark. 1.7-8; Yoh. 1.24-28
15Ɗai paŋ e ɗi fu war bayai, nɵa won hlai n'e tili Yohana ɗa, e zilbi siɗi ɓa: Hanɗa a Kristu ɗa ɗi kaai! 16Yohana a waya seŋ wiiɗi ɗai paŋ, a muɗa: Ta mu siki baptisme gaini yem, amma ni na spak a suwaŋa, a na halasi, ni ɗa sogom na miɗini harabakni tekeɗeɗi mu kiɗa miɗini aŋ plaŋ edi kai, ni aga a ziki edi sɗik gaini Seze-sɗik, gaini afu na wiiɗi sariya lai maini gaini yem nɵa. 17Wulai zi fili t'aŋ tini, aga a zizina lulufni, aga a mula algama war vreni, amma bra ɗa aga a yaŋ edi arni afu n'a mra kai.
Herod gaini Yohana zi baptisme
Mat. 14.3-4; Mark. 6.17-18
18Yohana a ɓaka labar na pɗem siɗi ɗai gaini arai zi pi zamai zamai viya lai. 19Herod, abai na midini galni aftiɗi pai n'ag'aŋ puɗu, na Yohana a na gadaŋ midini seŋ na wiiɗi Herodiyas na munini tawalni, gaini wazagai na maafanai n'a na zaŋ ɗa lai. 20Midini meefeŋ hanɗa paŋ, a ɵa ka Yohana warɗi daŋgai su pra.
Baptisme na wiini Yesu
Mat. 3.13-17; Mark. 1.9-11; Yoh. 1.29-34
21Won hlai na ɗai paŋ e ɗa nivi baptisme ɗa, Yesu a nava lai, hlai n'a na siiwa ɗa, hlai n'amai ɗa a mala edi. 22Seze-sɗik a yorosi azumai midini, a tala maini dere nɵa, wule a wasi amai war hlai n'amai par ɓa: Tuku k'Ahiya n'a gula te firiya muduku gara, mu vuruku ɗa ku tuku.
Yikiɗi tamaini Yesu
Mat. 1.1-17
23Yesu, won hlai n'a tika pini gaini sdani, buzani a za doogo doogo hu ta, maini na ɗai e hiini midini nɵa ɗa: A ahini Yosef, n'ahini Eli, 24n'ahini Matat, n'ahini Levi, n'ahini Melki, n'ahini Yanai, n'ahini Yosef, 25n'ahini Matatiyas, n'ahini Amos, n'ahini Nahum, n'ahini Esili, n'ahini Nagai, 26n'ahini Maat, n'ahini Matatiyas, n'ahini Semeyin, n'ahini Yosef, n'ahini Yuda, 27n'ahini Yohanan, n'ahini Resa, n'ahini Zorobabel, n'ahini Seyaltiyel, n'ahini Neri, 28n'ahini Melki, n'ahini Addi, n'ahini Kosam, n'ahini Elmadam, n'ahini Er, 29n'ahini Yesu, n'ahini Eliyezer, n'ahini Yorim, n'ahini Matat, n'ahini Levi, 30n'ahini Simeyon, n'ahini Yuda, n'ahini Yosef, n'ahini Yonam, n'ahini Eliyakim, 31n'ahini Meliya, n'ahini Menna, n'ahini Matata, n'ahini Natan, n'ahini David, 32n'ahini Yesai, n'ahini Obed, n'ahini Bowas, n'ahini Sala, n'ahini Nason, 33n'ahini Aminadab, n'ahini Admin, n'ahini Arni, n'ahini Hesron, n'ahini Peres, n'ahini Yuda, 34n'ahini Yakob, n'ahini Isaak, n'ahini Abraham, n'ahini Tarah, n'ahini Nakor, 35n'ahini Seruk, n'ahini Regaw, n'ahini Peleg, n'ahini Eber, n'ahini Salah, 36n'ahini Kenan, n'ahini Arpaksad, n'ahini Sem, n'ahini Nowa, n'ahini Lamek, 37n'ahini Matusalah, n'ahini Enok, n'ahini Yared, n'ahini Maleleel, n'ahini Kainam, 38n'ahini Enos, n'ahini Set, n'ahini Adam, n'ahini Alaw.
Currently Selected:
Lukas 3: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
