Lukas 2
2
Wi na wiini Yesu
Mat. 1.18-25
1War mefeŋ ni ɗa, miɗi a halasi sini Sezar Ogustus par buri e piɵiɗi ɗai na midiɗi yai ɗa paŋ, 2Piɵi n'avut hanɗa, a za won hlai na Kiriniyus a na aŋ lawaŋ war Siriya. 3Ɗai paŋ e hili mini pɵi hanɗa, asiya asiya paŋ war fuŋni n'abai n'a wa woni, a wa woni. 4Yosef lai a halasi a Galileya par war fuŋni n'abai na Nazaret aŋ hala amai a Yudiya war fuŋ n'abai na wiini David, na yikini ɓa: Betlehem, buri ni a na war pinzibani David lai. 5A hala kapai yikini a ɗo azumai gaiɗi Maria, munini n'a giɓiti ɗa, na te na fu aŋ ziya.
6Won hlai n'e ɗa aŋ biyi ɗa, sartiɗi zi pûkû a cosi, 7Te wa ahiɗi n'avut, te faaɗaŋ war sapa, te fanaŋ warni hlai n'e si simi mini farai woni, buri dalam na buri morkokai n'e simni woni aŋ kai.
Ɗif zi ɵeŋ na warni fuŋ-n'Alaw ktai a siŋka sini arɗi ɗai zi giɗimi farai
8Ɗai si giɗimi farai e ɗi fu midini afti hanɗa lai, nagai e fini ɗa edi war basga aŋ giɗimi faraiɗi duvuk duvuk. 9Ɗif zi ɵeŋ na war fuŋ-n'Alaw na wiini Epiɗ-ɗai a ɗiya wuzaɗi zaw, abai na wiini Epiɗ-ɗai, te ŋala, won hlai n'e ɗa woni gaini na ɵimaɗi paŋ, nagai e hûni gara. 10Amma ɗif zi ɵeŋ na war fuŋ-n'Alaw a miɗiɗi: Ki hûni kai, buri mu kikisi ɗa a labar na pɗem na firiyi abai pini, n'aga a za siɗi ɗaiki paŋ. 11Girna, warni fuŋ n'abai na wiini David, ɗif zi kûri a wa li buriki, hanɗa a Kristu Epiɗ-ɗai. 12Wala n'aga a siŋkiŋki ɗa a hanɗa: Aga ki nivi arwagwi gaini fiɗi gaini fini warni hlai n'e si simi wiini farai woni.
13War hlai ni tizaw, firi n'abai na wiiɗi ɗai zi ɵeŋ na war fuŋ-n'Alaw par e tipi sini ɗif zi ɵeŋ na war fuŋ-n'Alaw, e kûli Alaw e miɗi:
14Kol sini Alaw warni Hlai n'Amai
azumai midini afti ɗa,
ɵeɗ midiɗi ɗai n'a diriɗi gara ɗa lai.
Ɗai zi giɗimi farai aha warɗi Betlehem
15Won hlai na ɗai zi ɵeŋ na warni fuŋ-n'Alaw e hiniɗi, e wiyi amai warni fuŋ-n'Alaw li, ɗai zi giɗimi e miɗi arbaɗi marɗi: Hulumu a Betlehem tiyana, aŋ tulumu wala n'a za ɗa, wala n'EPIƊ-ƊAI a suŋkuŋmu armu ɗa,
16E hili witaw, e gi woni, e niviti Mariya gaini Yosef gaini arwagwi gaini fini warni hlai n'e si simi wiini farai warni woni ɗa. 17Won hlai n'e tili arwagwi ɗa, nagai e miɗiɗi seŋ na e miɗiŋɗisi burini arwagwi hanɗa. 18Nagai paŋ n'e ɵini hanɗa e bindi hiyak burini wala na ɗai zi giɗimi farai e miɗiŋ ɗa. 19Amma Mariya te yima seŋ hanɗa paŋ, te hiina miɗini warɗi agulɗi. 20Ɗai zi giɗimi farai ɗa e wiyi, e si kol sini Alaw, e kûlûŋ gaini yama lai, buri wazagai paŋ n'e ɵiniŋ, n'e tiliŋ lai, maini n'a muɗasi siɗi ɗa nɵa.
E ki Yesu warni tempel
21Won hlai na mefeŋ mitwis a vada li, hlai n'e diri e ɵini gûrgûle wiini arwagwi, e sini yiki ɓa: Yesu. Yiki na ɗif zi ɵeŋ na war fuŋ-n'Alaw a siŋni, hlai n'emini maa te tika felni kai hai.
22Won hlai na mefeŋ na wiini zi n'edi hilu na wiiɗi Mariya gaini Yosef a cosi li, pini gadai na wiini Musus a za li ɗa, e hili gaini Yesu a Yeruzalem buri e kiŋ wuzani Epiɗ-ɗai. 23Maini n'aŋ gaini ɗû war seŋ zi gadai na wiini Epiɗ-ɗai nɵa, ahi na wus n'emini te waŋ avut paŋ aga a sa edi aŋ wiini Epiɗ-ɗai. 24Aŋ zi ɓaka gaini muguɵuwi sulu, zaw ali dere sulu, pini wala n'a muɗa war gadai na wiini Epiɗ-ɗai ɗa.
Simeyon gaini akoɗokoi Yesu
25Ɗif ktai a na fu a Yeruzalem yikini Simeyon, ɗif hanɗa jre gara, a huna Alaw lai, a na fu aŋ baya n'Alaw aga a kûrɗiɗi Izrayel edi ɗa, seze sɗik a na fu miɗini lai. 26Alaw a zini zaida gaini Seze sɗik ya ɓa aga a tala mri kai, haa a tala Kristu na wiini Epiɗ-ɗai gaini arni. 27Seze a hogoŋsi amlai warni tempel, won hlai ni tamaini akoɗokoi Yesu e kiŋsi amlai buri e zi sini gaini pini de na wiini gadai zi ɗû. 28Simeyon a tikaŋ amai war tini a kola Alaw a muɗa: 29Tiyana ɗa, Epin-geza,
ku hina begeku a hala edi warɗi yai par
gaini ɵeɗ pini seŋku
30buri ara a tala kûri na wiiku li,
31na tuku ku zizinaŋ wuzani arɗi ɗai paŋ;
32a gaglai n'a siŋka wala zi ŋoyai edi siɗi ɗai na kadai,
kol na wiiɗi Izrayel na wiiku lai.
Seŋ na wuze na wiini Simeyon
33Epini gaiɗi emini e bindi hiyak burini wazagai na ɗai e ɗa miɗiŋ miɗini ɗa. 34Simeyon a ɓikiɗi a muɗa siɗi Mariya n'emini: Arwagwi hanɗa a na burini kɵi-n'azumai gaini fiki-n'amai na wiiɗi ɗai viya war Izrayel, a wala zi siŋki n'aga a glasi sispai. 35Tuku lai, kaɵkar aga a bula suŋfaɗi-agulku, nɵa hiini na warɗi agulɗi ɗai viya aga a siŋkasi edi.
Anna, muni na mini Alaw
36Muni na mini Alaw ktai te na fu lai, yikiɗi ɓa: Anna, t'ahini Fanuwel, war pinzibani Azer, te za amai gara ta, e tikiti ɗaw ɗa, te sumna gaini mofaɗi buza muguzak. 37Asakal hanɗa te hina warni greŋ haa te za buza doogo doogo mitwis pi puɗu, te ɓurwa gaini tempel kai zaŋ, te hala warni hlai zi siiwa duvuk gaini girvudi paŋ te tika sai lai, te siiwa lai. 38Na lai te cosi warni sarti ni ɗa te kola Alaw, te muɗa gaini arwagwi wiiɗi nagai paŋ n'e ɗa biyi pli n'edi na wiiɗi Yeruzalem ɗa.
Niyi na war Nazaret: Hlai na Yesu a na agwi hai
39Won hlai n'e zi wazagai na gadai na wiini Epiɗ-ɗai a muɗa miɗini paŋ li ɗa, e wiyi a Galileya war fuŋɗi n'abai na yikini ɓa: Nazsaret.
40Amma arwagwi a wula amai sek sek, a bunda gdaŋ lai, a va gaini yel, yum na wiini Alaw a sumna miɗini lai.
Yesu a sumna warni tempel, won hlai n'a za buza doogo pi sulu
41Buza buza paŋ ɗa, tamaini e hili a Yeruzalem miɗi fet na wiiɗi Paska.
42Won hlai na Yesu a za buza doogo pi sulu ɗa, e hili amai woni maini n'e ɗa ziŋ mini fet kûreɗ-kûreɗ nɵa; 43Won hlai na mefeŋɗi fet a vada li, e ɗa wiyisi aha ɗa, arwagwi Yesu a hinasika a Yeruzalem, amma tamaini e siɗi ɵa kai. 44Nagai e hiini ɓa a na gaiɗi marni zi morkoi ɗa; e hili haa yuvai dam, e tiki piɗi aŋ piyiŋ arbaɗi zagalakaiɗi gaiɗi nagai n'e siɗiɗi ɗa, 45amma e niviŋ kai, e wiyisi a Yeruzalem aŋ piyiŋ. 46War mefeŋ n'ag'aŋ hu ɗa, e niviŋsi amlai warni tempel arbaɗi n'abakai zi hitri gadai ɗa dam, a ziɓiriɗi lai, a zilbiɗi lai. 47Nagai n'e ɵini seŋni paŋ ɗa, e bindi hiyak buri yelni gaini wiyini seŋ n'a siŋɗi ɗa. 48Won hlai n'e tiliŋ, e bindi hiyak, emini te miɗini: Ahiya, ku ziyi ɵa ɗa a ma ɗa? Ta gaini apuku mi piyuku na ɗa gaini hunai gara. 49A waya seŋ a miɗiɗi: Ki piyiŋa buri ma ɗa? Ki siɗi ɓa m'aŋ gaini sɗa ta war Dalam na wiini apa, ki siɗi hanɗa kai ɗi? 50Amma e ɵini ezini n'a miɗiŋɗi kai. 51Asakal par, a fakasi gaiɗi, e hilisi a Nazaret, a gada piɗi gara. Emini te ŋoya seŋ hanɗa warɗi agulɗi.
52Yesu a wula amai wuzani warni yel, warni wili ni ɗa, a nava yum gara arni Alaw, arɗi ɗai lai.
Currently Selected:
Lukas 2: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
