Sdaɗi Apostelai 8
8
1Sawlus a firiya pini mri na wiini Stefanus.
Gir n'avut na a za siɗi zi yimi
War mefeŋ ni ɗa, gir n'abai na a za siɗi Eklesiya n'e ɗa war Yeruzalem. Nagai paŋ e ɵiri edi war Yudiya gaiɗi Samariya. E hini ɗa e ɗi Apostelai tar. 2Amma ɗai zamai n'e hûni pini Alaw e pi Stefanus, e tûwiŋ gara lai. 3Sawlus a ziɗi gir wiiɗi zi yimi ɗa gara. A niya aha war dalam piɗi, a yimiɗisi maɵagai gaiɗi falakai gaini gdaŋ, e miliɗisi war daŋgai.
4Nagai n'e ɵiri edi ɗa, hlai n'e vigi woni paŋ ɗa e ɓiki seŋ ɗa maini labar na pɗem nɵa.
Filip a ɓaka labar na pɗem war Samariya
5Filip a hala azumai war fuŋ n'abai ktai na Samariya, a ɓaka labar miɗini Kristu woni. 6Firiɗi ɗai paŋ hiiniɗi a tapa ktai, e tiki hangalɗi sini seŋ na Filip a na ɓakaŋ ɗa. Won hlai n'e tili, n'e ɵini wazagai zi siŋki n'a na za ɗa lai ɗa. 7Buri seze na haharai viya a niyasi edi warɗi ɗai par, a ɗuula gaini gdaŋni, ɗai na höyökai, na daŋlaŋai viya e nivi zûûli. 8Firiyi n'abai a za war fuŋ n'abai hanɗa.
9Ɗif ktai yikini Simun, na a na fu haa ɗipar war fuŋ n'abai hanɗa, a mula hunai piɗi ɗai na Samariya gaini wazagai zi hiila, a yika sini ba a ɗif n'abai. 10Ɗai paŋ n'agogoi gaiɗi n'abakai e firiyi seŋni gara e miɗi: Ɗif hanɗa a spak na wiini Alaw n'e yikiŋ ɓa n'abai. 11E firiyi seŋni ɗa buri ɓa mefeŋ viya a na miliɗi hunai piɗi gaini wazagai zi hiila n'a na zaŋ ɗa. 12Amma won hlai n'e yimi pini Filip na a ɓikiɗi labar midiɗi pay na wiini Alaw gaini yikini Yesu kristu ɗa e nivi baptisme, na falakai gaiɗi na maɵagai paŋ. 13Simun gaini midini dama lai a yima a nava baptisme lai, a ɓurwa gaini Filip ɗa kai. Wazagai zi siŋki gaini zi hiila na Filip a zaŋ ɗa, won hlai na a talaŋ a bunda hiyak. 14Won hlai na Apostelai n'e ɗa a Yeruzalem e ɵini ɓa ɗai na Samariya e yimi seŋni Alaw ya ɗa, e ɵiniɗi Peter gaini Yohana. 15Won hlai na Apostelai na sulu hanɗa e cû war Samariya ɗa, e siiwi buriɗi kapai e nivi Seze-sɗik, 16buri ɓa Seze-sɗik a cosi miɗini ktai arbayi kai hai, e nivi ɗa a baptisme na war yikini Epiɗ-ɗai Yesu bas. 17Nɵa Peter gaini Yohana e mili tiɗi midiɗi, nagai e nivi Seze-sɗik lai.
18Won hlai na Simun a tala ɓa, Apostelai e mili tiɗi li midiɗi ɗai ɗa e nivi Seze-sɗik ɗa, a kiɗisi sulai a muɗa: 19Siŋa spak hanɗa lai, kapai ni na mu tika ta li miɗini ɗa, a nava Seze-sɗik. 20Amma Peter a miɗini: Tuku gaini faraiku paŋ aga ki bi edi, buri ku hiina ɓa e kiɗi e wûri like na wiini Alaw gaini farai. 21Buri na wiiku, gaini gal na wiiku warni wala hanɗa kai, buri agulku te na ɗikat wuzani Alaw kai. 22Nɵa ku wayasi hiiniku, siiwa Epiɗ-ɗai kapai a sɗa aŋ za ɗa, a suku ni burini hiini n'aŋ warɗi agulku ɗa. 23Buri mu tuluku na ɗa, gir na ɗewek, gaini jaɓ na wiini meefeŋ a na ruɓtuku. 24Simun a waya seŋ a muɗa: Tiki dama ki siiwi Alaw buriya, kapai wazagai na ki miɗi miɗini na ɗa, a sɗa aŋ za sa kai.
25Asakal n'e zi zaida ya, n'e miɗi seŋ na wiini Epiɗ-ɗai ya lai, Peter gaini Yohana e wiyi a Yeruzalem, e ɓiki labar na pɗem war fuŋ viya na Samariya.
Filip gaini ɗif zi sɗa n'abai na war Etiyopiya par
26Ɗif zi ɵeŋ na wiini Epiɗ-ɗai a miɗini wiini Filip ɓa: Hala war gal n'amai sek warɗi futi na te halasi amai a Yeruzalem par a Gaza sek edi war basga ɗa. 27A faka amai a hala, kapai na ɗa, ɗif ktai na Etiyopiya par na kɓir, a ɗif zi sɗa n'abai na wiini Kandas na pai na muni na wiiɗi Etiyopiya, a abai na midini wazagai paŋ lai, a nasi fu a Yeruzalem aŋ siiwa Alaw. 28A na waya aha sek miɗini Saretni dam, a na ŋa maktuɓ na wiini ɗif na mini Alaw Esaya gaini wulani amai. 29Seze a miɗini wiini Filip: Hala wuzaku haa siɗi saret ɗa ta. 30Filip a lawa siɗi, a zuɓura ɗa, ɗif na Etiyopiya par a na ŋa maktuɓ na wiini ɗif na mini Alaw Esaya, a zilbaŋ a muɗa: Ku na ɵina wala na ku na ŋaŋ na ɗa tiɓ ɗe? 31A waya seŋ a miɗini: Mu ɵina maɵa maɵa ɗa, na ɓa ɗif a ɵa wuza kai ɗa. A miɗini wiini Filip buri a niyasi amai gaini. 32Ɗû n'a na fu aŋ talaŋ ɗa a hanɗa:
E kiŋ maiɗi adumi n'e kiti aŋ fiɗi nɵa,
maini ahini adime na mini a mala amai kai, n'a ɗiya wuzani ni n'a ɵini yirni edi nɵa,
a mala mini amai kai.
33War hûsini-si n'azumai ɗa, jreni a vada edi,
vuna na wiini ɗa aga a muɗa gaiɗi ɗa asiya ɗa?
E fiɗiŋ edi warɗi yai par buri hanɗa.
34Ɗif na kɓir ɗa a zilba Filip ɓa: Za barka, muɗaŋa haw, ɗif na mini Alaw ɗa a muɗa na ɗa miɗini a siya ɗa? A muɗaŋ miɗini ni dama zaw, midini ɗif zamai ɗi? 35Nɵa Filip a tika seŋ, sini ɗû hanɗa par a tika pini aŋ ɓikini labar na pɗem miɗini Yesu. 36Won hlai n'e ɗa hili wuzaɗi sek warɗi futi, e cû sini hlai zi yem ktai, ɗif na kɓir a muɗa: Yem ɗa aŋ na, wala na a ɗalaŋa zamai buri mu nava baptisme kai ɗa a maɗa? 37-38A sa miɗi buri e ɗiyi Saret ɗa, nagai sulu paŋ e niyi agoɗom arni yem, Filip gaini na kɓir ɗa e sini baptisme lai. 39Won hlai na e niyisi agoɗom arni yem par li ɗa, Seze na wiini Epiɗ-ɗai a tika Filip, ɗif na kɓir a talaŋ kir kai gamai, a tikiti futini gaini firiyi. 40Amma Filip a navasi sini a Azot, a ɓaka labar na pɗem war fuŋ n'abakai paŋ na a vuga woni haa a cosi a Sezariya.
Currently Selected:
Sdaɗi Apostelai 8: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
