Sdaɗi Apostelai 7
7
Seŋ na Stefanus a muɗaŋ
1Nɵa pai n'abai zi ɓaka a zilbaŋ: A na ɵa ɗi? 2Stefanus a waya seŋ a muɗa: Tiki tawalakaya, tiki tamaya, ɵini pɗem, Alaw na Epiɗi abai ɗa a siŋka sini arni Abraham na tiyimu won hlai n'aŋsi war Mezopotamiya par, wuzani na a halasi a sumna war Haraŋ kai hai, 3a miɗini: Niyasi edi midini aftiku par, arbaɗi pinzibaku par, hala midini afti n'aga mu suŋkuŋku. 4Nɵa Abraham a niyasi edi midini afti na wiiɗi ɗai na Babilon ɗa par a sumna war Haraŋ, woni par, asakal na epini a mra li ɗa, Alaw a kaŋsi midini afti na ki simni woni tiyana na ɗa. 5A sini afti ktai aŋ bulum woni kai, koo n'agwi na a tika ezini woni ta nɵa maa aŋ kai. Amma a za ha ɓa aga a sini afti hanɗa aŋ bulum wiini ni gaini pinzibani n'asakal sek lai. Won hlai ni Abraham ahini aŋ kai. 6Alaw a muɗa maini nɵa: Pinzibani aga e simni aŋ jak midini afti na wiiɗi kai, aga e bindiɗi aŋ bagakai, aga e siɗiɗi gir arɗi haa buza miya puɗu. 7Amma Alaw a muɗa pra: Pinziba n'aga e ziɗi aŋ bagakai ɗa, aga mu zitiɗi sariya mu ta. Asakal par ɗa aga e niyisi edi aŋ siiwiŋa war hlai hanɗa. 8Asakal par Alaw a sini bonu na wiini ɵini gûrgûle, nɵa won hlai na Abraham a wa Isaak ɗa a ɵini gûrgûle war mefeŋ n'ag'aŋ mitwis. Isaak a za gaini Yakob nɵa lai, Yakob a za gaiɗi tiyakaimu na doogo pi sulu nɵa lai.
9Tiyakaimu ɗa e zi sile sini Yosef, e wûriŋ edi kapai e kiŋ war Egipte, amma Alaw a za gaini, 10A plaŋ edi mini gir na a za sini paŋ, a hinaŋ aŋ nava pɗem gaini yel wuzani Faraw pai n'Egipte na a tikaŋ aŋ ɗif n'abai midiɗi Egipte gaini dalamni paŋ. 11Nɵa wiyamai n'amai te za midini afti n'Egipte gaini na Kanaan ɗa lai, gir ni ɗa a na fu abai gara, haa tamaimu ɗa wala na e simiŋ aŋ kai. 12Yakob a ɵina ɓa algama a na war Egipte, a ɵiniɗi tamaimu warni azi n'avut. 13Azi n'ag'aŋ sulu ɗa Yosef a siŋka sini arɗi tawalakaini, pinzibani Yosef ɗa a siŋka edi arni Faraw lai. 14Asakal par Yosef a ɵina miɗini Yakob n'epini gaini pinzibani paŋ, piɵiɗi paŋ e zi ɗai doogo doogo muguzak pi ɵim. 15Yakob a halasi azumai war Egipte, a mra woni, tamaimu nɵa lai. 16E libiɗi a Sikem e miliɗi warni waŋ na Abraham a wuraŋ tiɗi alini Hamor war Sikem.
17Sarti na ɵinini-ha na Alaw a ziŋni wiini Abraham a ŋa aŋ va amai ɗa, ɗaimu e riyi, e bindi viya war Egipte. 18E riyi amai haa pai ktai n'a sɗa Yosef kai a suma midiɗi Egipte, 19pai ni ɗa a za yel siɗi ɗaimu ɗa, a ziɗi gir wiiɗi tamaimu, a ziɗi dewele midiɗi buri e hiniɗi aliɗi n'e wi hahakai edi kapai e simni karɗi kai.
20War sarti ni ɗa, Musus a wa, a na fu arni Alaw juf gara, tamaini e giɗimiŋ tile hu. 21Won hlai n'e kiŋ li edi ɗa, ahini Faraw te tikaŋ, te wulaŋ amai aŋ ahiɗi. 22Musus a wula amai war yel na wiiɗi ɗai n'Egipte, spak gara war seŋ zi miɗi, war sdani lai.
23Won hlai na buzani a va amai doogo doogo puɗu ɗa, hiini ktai a cosi midini ɓa, a hala a ɗûgûliɗi tawalakaini, ɗai na Izrayel ɗa. 24A navasi ktai tiɗi aŋ zini gir, a zina pini ɗif n'aŋ war gir ɗa, a fuɗa ɗif n'Egipte ɗa. 25A hiina ɓa tawalakaini aga e siɗi ɓa Alaw a dara a siɗi pli n'edi gaini ni, amma e ɵiniŋ ɵa kai. 26Dawaini ɗa a ɓlasi blaŋ, a niviɗisi Israyelekai sulu e ɗa dibi was, a paya aŋ tûyiɗi gaiɗi marɗi, aŋ za ɵeɗ arbaɗi lai, a muɗa: Tiki ki ɗi tawalakai, ki zi gir wiiɗi marki arbaɗi marki lai buri maɗa? 27Amma ni n'a na zini gir wiini maini ɗa a hogoŋ a miɗini: N'a tukuku midiyi aŋ pai lai, aŋ ɗif zi ɗûklûti sariya lai ɗa asiya ɗa? 28Ku firiya ku fuɗaŋa maini na ku fuɗa ɗif n'Egipte eɗibi ɵa zaw? 29Won hlai na Musus a ɵina seŋ hanɗa a pra edi, a hala a ŋoya edi midini afti na Madiyan, woni a wa ali na maɵagai sulu.
30Buza doogo doogo puɗu asakal par, ɗif zi ɵeŋ na war fuŋni Alaw a siŋka sini arni edi war basga na ɵimaɗi huwuŋ Sinaï arni elesni afu na wiini kukuɓ n'a na ya. 31Won hlai na a tala hanɗa, Musus a bunda hiyak burini wala na a siŋka arni hanɗa, won hlai n'a na torosi gobi aŋ talaŋ ɗa, wulani Epiɗ-ɗai a wasi, a muɗa: 32Ta m'Alaw na wiiɗi tiyakaiku ɗa, Alaw na wiini Abraham, na wiini Isaak, na wiini Yakob lai. Musus a tika pini a ziriya, arni a yima amai kai. 33Nɵa, Epiɗ-ɗai a miɗini: Wa harabak n'azuku edi buri hlai na ku ɗiya woni ɗa a hlai na sɗik. 34Mu tala gir n'aŋ siɗi ɗaiŋa n'e ɗa war Egipte ɗa, mu ɵina nûûmi n'e ɗa nûûmi lai, mu niyasi azumai ya aŋ piliɗi edi, tiyana halasi, mu dara mu ɵunuku war Egipte.
35Musus na nagai e miɗi ɓa e sɗiŋ kai ɗa, n'e miɗini ɓa a tukuku aŋ pai lai, aŋ ɗif zi ɗûklûti sariya lai ɗa asiya ɗi ɗa? A ni na Alaw a ɵinaŋsi aŋ ɗif n'abai, aŋ ɗif n'a piliɗisi edi lai gaini zinai na wiini ɗif zi ɵeŋ na a siŋka sini arni kukuɓ ɗa. 36A miliɗisi edi ɗa a ni, a za wazagai zi hiila, zi siŋki lai aha warɗi Egipte, a agoɗom war yem ra n'abai na mekele, edi war basga na kaɗataŋ lai haa buza doogo-doogo puɗu. 37Musus ni ɗa, a ni na a miɗiɗi wiiɗi aliɗi Izrayel ɗa ɓa: Alaw aga a ɵinikisi arbaɗi tawalakaiki par ɗif na mini Alaw ktai na maya ta ɵa, 38a ni n'arbani vok na a na ka edi warni basga na kaɗataŋ ɗa, a na ka gaini ɗif zi ɵeŋ na a muɗa gaini amai midiɗi huwuŋ Sinaï par lai, gaiɗi tamaimu lai, a ni na a navasi seŋ zi suŋfa aŋ suŋmu lai. 39Tamaimu e diri e ɵini mini kai, haa a hû giŋ edi, warɗi agulɗi ɗa e bindi arɗi ɗa aha war Egipte sek. 40E miɗini wiini Aaron ɓa: Ziziniyi alawai na kapai e ɵi wuzayi, buri ɓa Musus na a miliyisi edi war Egipte par ɗa mi siɗi wala na a za sini kai. 41War mefeŋ ni ɗa, e zizini ahi ɵe, e kinisi ɓaka wiini Alaw n'e rgiŋ gaini tiɗi ɗa. 42Nɵa Alaw a bunda arni edi siɗi par, a hiniɗi aŋ siiwi ɗa tini wazagai zi rgi n'arbani hlai n'amai maini n'aŋ gaini ɗû warni maktuɓ na wiiɗi ɗai na mini Alaw nɵa ɓa:
Tiki aliɗi Izrayel, buza doogo-doogo puɗu edi war basga na kaɗataŋ ɗa
ki fiɗi wazagai ɗa wiya ɗi? Ki ziŋa ɓaka ɗa wiya ɗi?
43Tiki ɗa ki kiɗa ki libi ɗa a gumu na wiini Malok
gaiɗi maɵiki na wiini Alaw Refan lai,
wazagai na hanɗa, ki ziziniŋ buri ki hûrgû azumai wuzani,
nɵa ɗa, aga mu kiki edi duɓaɗi Babilon par.
44Tamaimu ɗa, edi war basga ɗa, e ɗi ka gaini Tabernakel zi zaida tiɗi, maini na Ni n'a muɗa gaini Musus ɗa, a miɗini ɓa: a zaŋ ɗa nɵa kal kal maini na a siŋkiŋni arni ɗa ɵa. 45Asakal na e yimiŋ ya ɗa, tamaimu gaini Yosva e kiŋ midini afti na wiiɗi pinzibaɗi ɗai na zamai na Alaw a birgiɗi edi wuzaɗi ɗa, hanɗa ɵa haa sini mefeŋ na wiini David ta. 46Ni na a nava pɗem wuzani arni Alaw, na a zilba buri a sa hlai zi simni wiiɗi pinzibani Yakob ɗa lai. 47Amma na a rgini dalam ɗa a Salmun. 48Paŋktai Alaw n'amai ɗa a sumna war dalam na ɗai e rgiŋ gaini tiɗi kai, maini na ɗif na mini Alaw a muɗaŋ ɗa ɵa.
49Hlai n'amai ɗa a paramai zi pai na wiya,
yai n'azumai a hlai na mu mula aza midini.
Epiɗ-ɗai a muɗa maini nɵa: Dalam na ki rgiŋa ɗa a na wota ɗa?
Dalam na mu kiɗa mu sumna warni a na maɵa ta ɗa?
50Wazagai hanɗa paŋ ɗa mu rgaŋ mu ta gaini ta kai ɗi?
51Ɗai na midiki gdaŋ, na agulki gaini dûgû duk, ɵimaki gaini tiki tek lai, ki ɵini wulani Alaw kai, tiki ɗa, kureɗ ki hitimi Seze-sɗik maiɗi tamaiki ɵa lai. 52Ɗif na mini Alaw na tamaiki e zini gir kai ɗa a na wata ɗa? E fiɗiɗi nagai n'e miɗi edi wuzani hlai miɗini gizini na Jre, na tiki tiyana ki siŋ edi, ki fiɗiŋ edi lai na ɗa. 53Tiki na ki nivi gadai na ɗai zi ɵeŋ na war fuŋni Alaw par e siŋki, amma ki zi pini kaalai.
Mrini Stefanus
54Seŋ na e ɵiniŋ ɗa a limiɗi agulɗi gara, e hirɗi sesiyeŋɗi sini. 55Amma Stefanus a va gaini Seze-sɗik, a mula arni amai war fuŋni Alaw, a tiliti abai na wiini Alaw, gaini Yesu gaini ɗiyi zaw war hlai zi hormo na wiini Alaw zaw lai. 56A muɗa: Mu tala hlai n'amai gaini mili edi mal, Ahini ɗif gaini ɗiyi warni hlai zi hormo na wiini Alaw zaw lai. 57Amma e ɗûûli gaini gdaŋɗi, e tiki ɵimaɗi tek tek, gaini hlaiɗi paŋ e fikisi miɗini, 58e birgiŋ edi war fuŋ n'abai ɗa par, e fiɗiŋ edi gaini kriyit, zaidakai ɗa e hini ka sapaɗi tini gawla ktai n'e yikiŋ ɓa: Sawlus. 59Won hlai n'e ɗa fiɗiŋ edi ɗa, Stefanus a siiwa a muɗa: Epiɗ-ɗai Yesu, yima suŋfaŋa war tuku. 60Asakal par a pa kurnaini azumai, a ɗuula a muɗa: Epiɗ-ɗai, ku pɵa tuwur hanɗa midiɗi kai. Asakal na a muɗa hanɗa ɗa ya, a niya warni weseŋ zi mri.
Currently Selected:
Sdaɗi Apostelai 7: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
