Sdaɗi Apostelai 6
6
E viri ɗai muguzak aŋ zini piɗi Apostelai
1War mefeŋ ni, won hlai na ɗai zi hitri e tiki piɗi e bindi viya ɗa, Yudiyakai n'e miɗi ɗa a grek ɗa e tiki piɗi e ŋûriyi siɗi nagai n'e miɗi Hebre ɗa, buri ɓa war ɓrawni wazagai zi simi ɗa, falakaiɗi na war greŋ ɗa e ɗa nivi wala pɗem kai. 2Nɵa na doogo pi sulu, e yikiɗi voɗi ɗai zi hitiri ɗa, e miɗi: Mi hini seŋni Alaw ta buri mi si simi miɗi ɗai ɗa a juva kai. 3Arbaki par ɗa, tawalakai, a pɗem ɓa ki viri ɗai muguzak, na ɗai e zi zaida na pɗem midiɗi, n'e vi gaini Seze-sɗik gaini yel lai, kapai mu tukuɗumu midini sda hanɗa. 4Amma tiyi kapai mi si siyi kûreɗ-kûreɗ mini siiwa, mini ɓikini-seŋ lai. 5Seŋ hanɗa a sa firiyi wiiɗi ɗai paŋ, e viri Stefanus ɗif na yimini abai, na gaini vi gaini Seze-sɗik lai, gaini Filip gaini Prokor, gaini Nikanor, gaini Timon, gaini Parmanas, gaini Nikola ɗif na a Antiyokiya par na a yima pini yimi na wiiɗi Yudiyakai. 6E kiɗisi wuzaɗi Apostelai, asakal n'e siiwi midiɗi ya, e tiki tiɗi midiɗi lai. 7Seŋni Alaw a wa tini edi, piɵiɗi ɗai zi hitri ɗa a riya amai wuzani sek sek aha warɗi Yeruzalem, paakai zi ɓaka viya e yimi pini yimi na war Yesu.
Ɗai e yimi Stefanus
8Stefanus ɗa a ɗif na Alaw a za pɗem sini gara, a ɗif zi spak gara lai, a za wazagai zi hiila gaini wazagai zi siŋki arbaɗi ɗai. 9Ɗai zamai na war Sinagogne n'e yikiŋ ɓa: Sinagogne na wiiɗi nagai n'e bindi kempekai gaiɗi ɗai na Kirene par, gaiɗi ɗai na Alekzandriya par, gaiɗi na Silikiya par, gaiɗi na Aziya lai e yimi sispai gaini Stefanus. 10Gdaŋɗi a sɗa a ɗiya mini yelni na a miɗiɗisi gaini kai. 11Nɵa e ziɗi piɗi ɗai aŋ miɗi maini nɵa: Tiyi mi niviŋ a na muɗa seŋ na meefeŋ sini Musus, sini Alaw lai. 12E tipiɗisi ɗai lai, n'abakai n'arbaɗi ɗai gaiɗi ɗai zi ɗû wazagai ɗa lai, e hilisi e yimiŋ, e kiŋ wuzaɗi ɗai zi kiti seŋ. 13E piyi zaidakai na jrekai kai e miɗini e miɗi: Ɗif hanɗa a yiva na aŋ muɗa seŋ na meefeŋ sini tempel gaini gadai zi ɗû ɵa. 14Tiyi mi ɵini mini par ɓa: Yesu na Nazaret hanɗa, aga a tuura tempel hanɗa edi, aga a bunda gadai zi ɗiyi na Musus a suŋmu ɗa lai. 15Won hlai na nagai n'e simni warni kitini-seŋ ɗa, e mili arɗi sini aŋ tiliŋ ɗa, wuzani arni a bunda arɗi maini wuzani arni ɗif zi ɵeŋ na war fuŋni Alaw nɵa.
Currently Selected:
Sdaɗi Apostelai 6: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
