Mk 12

Nkana afub wayn ai bënòni

Mt 21,33-46; Lk 20,9-19

1Ndò akèè na akòbò ai bò a minkana, nyè na: Mod ziṅan gabè afub wayn, amana loṅ ongola, amana kom ofèd, aloṅo nkum, avëë bod bisye mëfub, akëlë a dulu. 2A abog mëkoe, ndò alom olò woe mbòg a bod bisye na akë nòṅ mëkoe ya afub wayn. 3Bod bisye bëbii nyè, bëmana yit, bësoe nyè mò mò. 4Ndò adugan bò lom olò mfë. E nyòlò te, bëbaa mëvëṅ a nlo, bëmana nyè kub osama a nyòl. 5Adugan lom mfë. Bëwoe e nyòlò te, ai abui bëfë; bëyidi bëvòg, bëwoe bëvòg. 6Hala aligi ya va hë ai mbòg, hë mbaṅ mòn woe. Ndò akëan nyè bò lom, adzoo na: Bayi kòn mòn wama wòṅ. 7Ndò bod bisye bëngadzo a zaṅ bò bò na: Mòn elig nyòlò! Ṅwoan nyè, elig ewoge ai bia. 8Ndò bëngabi nyè, bëwoe, bëwoa nyè a ongola afub a nsëṅ. 9Mod afub ayi hm fò bò ya? Ayi sò, adzèè bod bisye a ekoa, avëë bod bëfë afub wayn. 10Miandzë ya laṅ ebug ntilan dzi na: Akòg ya bëloṅo bë nda bëngawoa a fyè, ndò avëṅan ya nnom-akògò. 11Nti ṅnyè abò adzo te, anë eyëṅ dzam a mis man#12,11Sal 118,22-23. 12Bëngadzëṅ na babi nyè, hë da bëmbarëga bod, amu bëngabii mbëṅ na nkana te otyan ai bò. Ndò bëngalig nyè, bëkodo hala.

Miyaan Kaiser toya

Mt 22,15-22; Lk 20,20-26

13Ndò balom nyè bod bëziṅ ya esamba bëfarisea ai e ba ya ngam Herodes#12,13Ngam Herodes engabë e bod ya bëtsogo na Herodes anë Messias. asu yë na bëlam nyè a nkòbò. 14Ndò bazu nyè kad na: A ṅyëgëlë, biayëm na onë sosoo ai na wabisi ki tò mod; amu onë ha të fial bod a mësu, hë oyëgëlë zen Zamba a bëbëla. Yë biayean yaan Kaiser toya, yë biayean ki yaan? Yë bivë, yë bibò të vë? 15Mbol ayëmë mëdugan maban, nyè ai bò na: Dze miabobolo ma? Zaan ai ma nsaṅ mòni, mëyen. 16Ndò bazu ai nyè wò. Nyè ai bò na: Evëgëlë za dzi, za ki anë ai nsanan? Bò ai nyè na: Kaiser. 17Yesus nyè ai bò na: Vaan Kaiser e dzi yawoge ai Kaiser, mivaa hm fë Zamba e dzi yawoge ai Zamba. Bëngakam adzo te abui.

Yë akui-lë sòṅ anë fò bëbëla?

Mt 22,23-33; Lk 20,27-40

18Ndò bësadukea bazu abë nyè ha (ba badzo na akui-lë-sòṅ a sëki), ndò basili nyè na: 19A ṅyëgëlë, Moses angatil bia na: Ngë manyaṅ mod ziṅ awu, aligi mininga, të lig mòn, manyaṅ anòṅò ngal, abonde manyaṅ elig ai nyè#12,19Ab 38,8; Em 25,5 20Antoa hm na: Bod bëngabë babënyaṅ zamgbal. Ndò e nyò osu angalug mininga, awuu, të lig mvòṅ. 21E nyò bèè alugu nyè, awuu të lig mvòṅ. E nyò lala hë dzam dëda. 22Bò bësë zamgbal, tègè lig mvòṅ. 23Abog akui-lë sòṅ (ngë bayi kui a sòṅ), ayi bò mininga za? Amu bò zamgbal bëngalug nyè! 24Yesus nyè ai bò na: Miasë a ndimi abui a, të yëm mintilan, të yëm ngul Zamba? 25Amu eyòṅ bayi kui a sòṅ, fam yayi ki lug, bininga të lugëban; bënë anë benglès ya yob. 26Mfa mimbim, na miakui a sòṅ, miandzë laṅ a kalara Moses, e hom balèè adzo ele edigi#12,26Nlaṅ ele edigi onë Nlaṅ ya Zamba angaloe Moses osusua yë na alom nyè a Egipten na akë nyè kode ayòṅ die., anë Zamba adzo ai nyè na: Mënë Zamba Abraham, Zamba Isaak ai Zamba Yakob#12,26Em 3,6.15.16? 27Asëki Zamba bëwu, anë Zamba bënyiṅ. Minë a ndimi eyëgan.

E mvende osu

Mt 22,34-40; Lk 10,25-28

28Ndò nsaṅa bëkalara mbòg angasubu babi, mbol angawog bò bëdoan: ayen angayen na angayalan bò mbëṅ, ndò asili nyè na: Mvende fe yalod e nyi esë fòg? 29Ndò Yesus ayalan nyè na, e mvende osu enë na:#12,29Man Yuden osë ayean kogëlan e ngogëlan nyi amos osë. Baloe ngogëlan te na «Shëma, Israel» mbol yatari ai ebug yë na «Vogolo, a Israel». «Shëma» atyan na «Vogolo». Vogolo, a Israel, Nti Zamba waan anë hë Nti mbòg, 30ndò odiṅi Nti Zamba woe ai nnëm woe osë, ai nsisim woe osë, ai fëg dzoe esë, ai ngul dzoe esë#12,30: Em 6,4-5. 31E nyi bèè nyi: Odiṅi e mod mbòg anë wamen#12,31Bl 19,18. Mvende fë yalod ki e nyili. 32Ndò nsaṅa bëkalara adzo ai nyè na: Anë ete, a ṅyëgëlë, okòbò bëbëla na anë mbòg, ndò fë mfë asëki, hë nyè etam#12,32Em 6,4; Em 4,35., 33ai na adiṅ nyè ai nnëm osë, ai nsisim osë, ai ngul esë#12,33Em 6,5 ai adiṅ e mod mbòg anë mod wadiṅ wamen#12,33Bs 19,18, nala onë abui alodo bifaè ai mëtunëṅa mësë. 34Mbol Yesus angayen na angayalan ai fëg, nyè ai nyè na: Wasëki oyab ai edzoe Zamba. Tègè fë ai e mod azombo nyè sili nsili.

Yë Kristus anë mòn David?

Mt 22,41-46; Lk 20,41-44

35Yesus angayëgëlë a tempel, nyè na: Eyë bësaṅa bëkalara badzo ya na Kristus anë mòn David? 36David emen angadzo ai ngul Mfufub Nsisim na: Nti adzo ai Nti wama na: tòbògò ma a mbo-nnomo, akëlë kui anë mafudi wa minziziṅ mie a mëkol a si#12,36Sal 110,1. 37David emen aloe nyè na Nti, ndò eyë anë nyè mòn ve? Abui bod avogolo nyè a miëëṅ.

Yesus akòṅan ai bësaṅa bëkalara

Mt 23,1-36; Lk 20,45-47

38Eyòṅ ayëgëlë va, ndò adzo na: Mikalëga bësaṅa bëkalara a badiṅ bakë bawulu ai mindzòmbò biyie, bëdiṅi na bod bësug bò a minsëṅ mi angara. 39Badiṅ bitoa ya osu a mënda-bikoan ai bitoa ya osu a mëbog bidi, 40bamana sa mënda minkus, bëkogëlan kòm hë asu miṅyene. Bayi bëlë mbë nkad.

Efaè nkus mininga

Lk 21,1-4

41Ndò akë tòbò babi ai nkòb almosen, angafòmbò anë bod bëfudigi mòni a nkòb. Abui minkukuma bëfudigi abui mòni#12,41E hom bod bafudi mòni ongabë a nsëṅ tempel, e hom fam ai bininga bëngabë dzam nyian fufulu. Bëfada bëmanëṅa tsas, bëlaṅa fë mòni, osusua yë na bakë nyè fudi a nkòb.. 42Ndò nkus mininga ziṅ, otoa mbubua, wakë sòṅ hala, ofudi sifen ebè, nala onë anë dòlò etan#12,42Zamba ayen mod a nnëm. E kan mod wavë enë ai mfi alodo abim ya wavë.. 43Ndò aloe bëyègè boe, nyè ai bò na: Makad mina bëbëla, e man mbubua nkus nyò afudi a nkòb alodo e bod bësë bëhë fudi mòni ete. 44Amu bod bësë bëvë hë abui akuma anë bò mvug, hë da mfa woe, avë e dzom esë ahë bëlë a mëbua moe ete, avë enyiṅ dzie esë.

Currently Selected:

Mk 12: NTE12

Highlight

Copy