Mk 13

Yerusalem ayi ku mimboṅ asi

Mt 24,1-2; Lk 21,5-6

1Ndò angakodo a tempel, mbòg ya bëyègè boe nyè ai nyè na: A ṅyëgëlë, yënë akyaè abëṅ mëkòg ai abëṅ mëloṅ! 2Yesus nyè ai nyè na: Wayen e bod mëloṅ bala a? Tò akòg da layi ki ligi lëbëdë e di avòg a yob, së na lëmana bugi.

Mindzug miayi yene a si

Mt 24,3-14; Lk 21,7-19

3Ndò angakë tòbò a nkol bile bi mbòn, abëbëgë tempel nali, ndò Petrus ai Yakob ai Yohannes basili nyè a omomoa na: 4Kada bia, e mam mala mayi yënëban abog afe, ndëm fe ki yayi lëdë na mam mëte mëngazu ya yenan? 5Ndò Yesus angatari na akad bò na: Mibò okala na mod aza dug mina. 6Abui dzam layi sò a dzoe dama, bëdzo na: Ma mënë nyè, bëngadug abui bod. 7Eyòṅ miayi wodan bita ai mëfoe bita#13,7Abui mindzug layi yene a si, amu nala ngò bëprofèt balëdë na Zamba akuli ngul dzie., të miadzèè fëg. Nala wayean yënëban, dzam da mëmana mabëki kui. 8Ayòṅ layi luman ai ayòṅ avòg, edzoe nkukuma eluman ai e dzi evòg, si yayi kë yatigëdan mëboda mëziṅ, zie entoa: mëtari mintye mi nkogolo mili. 9Mibò okala. Bayi kuan ai mina a mënda mëdzo, bëyidi mina a mënda-bikoan, abog te miayi bò bëbòòlò bama a mis bëdzoe ai minkukuma. 10Amu mbëmbë foe ayean tari yëdan a mëyòṅ mësë. 11Eyòṅ ki bayi kuan ai mina nala, të miasaṅan na miayi kòbò ya? Hë mbol osë Zamba ayi bò na mikòbò, eyë kòbògan nala. Amu, sëki mina miayi kòbò, Mfufub Nsisim ṅnyè ayi kòbò. 12Mod ayi kuan ai manyaṅ a awu, esya akuan ai mòn, bòn bëngaluman ai bëbonde, bëwoe bò. 13Miayi bi efëma a bod bësë asu dzoe dama. E mod ayi bò azombo akui a mëmana, ṅnyè ayi kodeban.

Bidim

Mt 24,15-28; Lk 21,20-24

14Eyòṅ miayi yen bidim bili ai amala biyenëban e hom wayean ki, a e mod walaṅ, wogo! E bod bënë a Yudea abog te, bëtubu a minkol a yob, 15e nyò anë a ndil abë sus ngë akë nòṅ dzom ziṅ a nda dzie; 16e mod anë a afub, abë dugan ai mvus na akë nòṅ ewòman. 17Ngòl ai e ba bënë mëbum ai mindzindzie ya mëmos mëte. 18Kogëlan na të layenan a abog oyon. 19Amu, mëmos mëte, amala layi bò e kan yabë ya ki bò atarigi anë Zamba angakom si, azaa kui ana, ai akyaè langâbad ki bò. 20Ngë Nti abò të tsig mëlu mëte etun, tò mod mbòg ayi ki nyiiban, dzam da, ayi tsig mëlu asu e ba ya angatòb. 21Eyòṅ te, ngë mod akad mina na: Kristus nyò anë ha, ṅnyè nyòli anë ali, të miayëbë. 22Amu abui bëkristus ai bëprofet mëdugan bayi tëbë a nnam, bëbò mësimba ai biyëṅ bi mam asu yë na badug e ba bënë ntòban, ngë anë ebugbu. 23Mfa waan, mibò okala. Mamana mina bende mësë osusua.

Asò-lë mòn mod

Mt 24,29-31; Lk 21,25-28

24Mëlu mëte, a mvus e bidim bili, nlo-dzobo ayi yimbi a nkut, ngòn të bad fyè mial, 25Atitie lëngadabëda a yob, minkan ya yob minga tigëdan, 26eyòṅ te bayi yen mòn mod azaa a minkut ai abui fim ai duma#13,26Da 7,13-14. 27Abog te ayi lom benglès, angakoan e ba bënë ntòban a mëbug më si mënyii, atarigi a abug si, akëlë kui a abug yob.

Mvulna ele tòli

Mt 24,32-35; Lk 21,29-33

28Nòṅan ayègè ai mvulna ele tòli. Ṅnyie anë ntëm wasòman kye, kye ekui, mingayëm na esëb entoa ya babi. 29Dzam dëda, mfa waan, eyòṅ miayi yen e mam mala mëyenëṅan, miyëmë na (Mòn mod) antëlë ya a mbè. 30Makad mina bëbëla na, e ngongo bod nyi yayi ki wu së na e mam mala mëyenëban. 31Yob ai si biayi lod, bibug biama biangalod ki.

Mod ayëyëm tò amos, tò awola

Mt 24,36-44

32Mfa awola te ai amos te, mod ayëyëm dò, tò benglès ya yob, tò mòn; hë Tara etam ṅnyè ayëm. 33Boan okala, tòbëgan evie, amu miayëm ki abog. 34Anë anë mod ya angakë a dulu, aligi nda dzie ai bod bisye boe, avë bò ngul, anë mod esye dzie, abende nnòni na abò evie. 35Tòbëgan hm evie; amu miayëm ki abog nti dzal ayi sò, tò ngongogële, tò ai zaṅ, tò ai ndib, tò ai mëlende më kidi, 36amu, eyòṅ ayi sò mbumlëna, ayean ki mina kòb oyò. 37Ndò fë e dzam madzo di anë asu mod osë: tòbëgan a ngomzëna.

Currently Selected:

Mk 13: NTE12

Highlight

Copy