Mk 10

Adzo yë na wasoe nyò ngal

Mt 19,1-12

1Ndò angakodo hala, asòò a nkòṅ nnam Yudea, a Yordan ayat, minkunda mi bod mingadugan nyè zu a nyòl, angadugan bò yëgëlë mbol ongabë nyè fulu. 2Ndò bëfarisea bëngasubu nyè babi, bëngasili (bëbobolo nyè) ngë fam ebëlë ngul ya asoe ngal. 3Ndò angayalan bò na: Moses angabende mina ya? 4Bò na, Moses angavë ngul yë na bëtil kalara maan, bësoe nyè#10,4Em 24,1.3. 5Yesus nyè ai bò na: Kë asu alèd nnëm daan ngò angatil mina mvende te a! 6Atarigi a abonde yob ai si, angakom bò fam ai mininga#10,6Ab 1,27; 5,2.. 7Asu te ndò fam yakad lig esya ai nyia, akë lad ai ngal, 8bò bëbè bëntoa nyòl dzia#10,8Ab 2,24. Antoa hm na, basëki fë bëbè, hë nyòl dzia. 9Ndò hm, të mod akandi e dzi Zamba angalad. 10Eyòṅ bëngadugan a nda, ndò bëyègè basili nyè adzo te. 11Nyè ai bò na: Ngë mod asoe ngal, alugu mfë, andaman alug osu. 12Ngë mininga nyè ki asoe nnom, alugu mfë, anyiṅ a bisog.

Yesus afubu ban bòngò

Mt 19,13-15; Lk 18,15-17

13Ndò bëngasò ai nyè ban bòngò na anamba bò. Bëyègè bëngakòṅan ai bò. 14Ayen Yesus angayen nala, aliṅan, nyè ai bò na: Dzogan ban bòngò bëzu abë ma, mibë kaman ai bò, amu edzoe Zamba yawoge ai e bod bënë anë bò. 15Makad mina bëbëla na: E mod ayi ki soan ai ayòṅ Zamba anë man mòngò, angânyian ki ete. 16Angabëgë bò a mò, afubugu bò, abedëge bò mò.

Nlaṅ mod abëlë byem bi mò

Mt 19,16-30; Lk 18,18-30

17Akui angakui a ndzòṅ, ndò mod ziṅan gazu toban ai nyè mbil, akudu nyè mëbòṅ osu, asili nyè na: A mbëmbë ṅyëgëlë, mëbò ya na mëbëlë enyiṅ kòm? 18Yesus nyè ai nyè na: A dze waloe ma na mbëṅë? Mod mfë asëki mbëṅ, hë Zamba etam. 19Kë wayëm mëmvende! Të wawoe, të waandaman alug, të wadzib, të watsig mbë ntol, të waanòṅ edzi esëki endzoe, olugu esoa ban nyoa#10,19Mb 20,16-16. 20Nyè ai nyè na: A ṅyëgëlë, mazuzu ya mabaala e mam mësë mala, atarigi mòngò. 21Yesus angafòmbò nyè, adiṅi nyè a mis, nyè ai nyè na: Dzom dzidzia eligi ya wa; Këlëg, okë kuan ai e dzi esë obëlë, ovë mimbubua, (eyòṅ te wayi bi etòg-akuma a yob) ozu hm fë watoṅ ma. 22E mod nyò atindi fò asu ai nkòbò vi, akëlëg ai mëlunga a nnëm, amu angabë abëlë abui byem bi mò. 23Ndò Yesus angakilan abëbë na, abëbë na, nyè ai bëyègè boe na: Layi hm bò aye na e mod abëlë akuma anyian a edzoe Zamba! 24Bëyègè bëngakam nkòbò woe vi. Yesus adugan bò kad na: A bòngò, anë hm të fò aye na mod waanyian a edzoe Zamba. 25Anë ebugbu abui na kamele alod a alòṅ ondondò, alodo ai na nkukuma mod onyian a edzoe Zamba. 26Bëngafëdan kam, bëdzoo bò bò na: Za hm anë dzam kodeban? 27Yesus angafòmbò bò, nyè na: Adzo te lakad bod, lakad ki Zamba. Amu Zamba anë ngul-bò-mësë. 28Ndò Petrus angakèè na akad nyè na: Tam bëbë na, bingalig dzom esë na biazu biatoṅ wa. 29Yesus nyè na: Makad mina bëbëla na, mod ziṅ asëki dzam lig nda, ngë babënyaṅ, ngë bëkal, ngë nyia, ngë esya, ngë bòn, ngë mëfub asu dama ai asu mbëmbë foe, 30së na abi mënda, ai babënyaṅ, ai bëkal ai bënyia, ai bòn ai mëfub, ai mintye biyòṅ ntèd a si mu, akë fë bi enyiṅ kòm a enyiṅ yazu. 31Abui bod bëtëlë osu, bayi bò bod bë mvua, bod bë mvua bëntoa bod bë osu.

Yesus akad eyòṅ lala na ayi wu, akui fë a sòṅ

Mt 20,17-19; Lk 18,31-34

32Bëtoa a zen, bëbëdë a Yerusalem, ndò Yesus angakë bò osu, bëngakam, e ba ki bëtoṅo nyè bëngambara. Ndò Yesus adugan nòṅ b'awom ai bëbè, akèè na akad bò e mam mazu yënan ai nyè, 33nyè na: Mbëdan biabed a Yerusalem vi, mòn mod ayi kuan#10,33Badiṅ bëlan ai bibug bi na bakuan ai Yesus amu e dzam ya Yudas angabò angabë fò hë anë wakuan ai nyò mvoe a mò bëdzin. Afyaṅan bò na Yesus abò ṅyian esya, hë da Yudas akuan ai nyè. a mò bëfada bënen, ai bësaṅa bëkalara; bayi tsig na akyëbë ai awu, bëkaba nyè a mò bëhaiden, 34bayi nyè kpëgëlë, bëtuigi nyè mëndèn a nyòl, bëyidi nyè, bëwoe fë nyè, hë da, ayi kui a sòṅ a mvus mëlu mëlè.

Bòn bë Zebede bayi bitoa bi osu

Mt 20,20-28

35Ndò Yakob ai Yohannes, bòn bë Zebede, basubu nyè babi, bò ai nyè na: A ṅyëgëlë, biayi të na obò bia anë biayi wa sili. 36Nyè ai bò na: Dze endzò miayi na mebò mina? 37Bò ai nyè na: bò të na bitòbò wa, e nyò a mbo-nnomo, e nyò mbòg a mbo-ngala a duma doe. 38Yesus nyè ai bò na: Miayëm ki e dzom miasili dzili. Yë mibëlë azombo ya anyu e kòb mayi nyu, ngë aduban ṅduan mayi duban? 39Bò na: Bibëlë azombo te. Yesus nyè ai bò na: Miayi a hm fò nyu e kòb mayi nyu, miduuban fë ṅduan mayi duban, 40hë da mfa ya ntòban a mbo-nnomo wama ai a mbo-ngala wama, mabëlë ki ngul ya abò dò. Mam mëte mënë ai e bod ya Zamba angatòb. 41Awog b'awom bëvòg bëngawog adzo di, bëngaliṅan ai Yakob ban Yohannes. 42Ndò Yesus aloe bò, nyè ai bò na: miayëm na e bod badzoe mëyòṅ badzoe mò ai ngul esë; E bod bënë mimfaṅ batoan bad e ba bëvòg. 43Nala wayean ki ai mina. Dzam da, e mod ayi na abò mod nen a zaṅ dzan abò ṅsye bod bësë. 44E nyò ayi na abò mod osu abë mina, abò olò bësë. 45Amu tò mòn mod andzëki sòṅ na bësye nyè, angasò na asye, avë fë enyiṅ dzie a eban asu abui bod.

Yesus abò Bartimeo (ndindim) mvoè

Mt 20,29-34; Lk 18,35-43

46Ndò basuan a Yeriko. Abog akodogo a Yeriko ai bëyègè boe, ai mod nkunda bod, ndò Bartimeo, mòn Timeo, atoa ndim, adzaaga mòni, angabë atoa a ndzòṅ. 47Angayi wog na Yesus man Nazaret nyòlò, akèè fò na akòbò a yob ete na: A man David, a Yesus, kudu ma ngòl. 48Abui bod bëngasog ai nyè ha, bò na atòbò evol. Hë avaa kiṅa yob, nyè na: A man David, yënë ma ngòl. 49Ndò Yesus akom etoa, nyè na: loegan nyè. Ndò baloe ndindim, bò ai nyè na: Tòbògò ai ndi, kodogo a si; aloe wa. 50Ndò asamza eyie dzie, ayoge, angakë abë Yesus. 51Ndò Yesus adzo ai nyè na: Dze wayi na mëbò wa? Ndindim wò ai nyè na: Rabbuni#10,51Rabbuni anë olugu abui alodo Rabbi. Atyan fë na ṅyëgëlë., bò na mëyen. 52Yesus nyè ai nyè na: Këlëg, ṅyëbë woe onyii wa. Etye etye te, angadugan yen mbëṅ, ṅnyè akë atoṅ Yesus a zen nyò.

Currently Selected:

Mk 10: NTE12

Highlight

Copy