Mt 23

Yesus akòṅan ai bësaṅa bëkalara ai bëfarisea

Mk 12,37-40; Lk 5,34-37. 11,39-52. 13,34. 20,45-47

1Abog te, ndò Yesus angadzo ai minkunda mi bod ai bëyègè boe na: 2Bësaṅa bëkalara ai befarisea bëhaman ya etoa Moses#23,2Etoa Moses engabë etoa mëkòg ya engabë a mënda bikoan; bësaṅa bëkalara bëkarëga tòbò etere eyòṅ batimi mvende Moses. Etoa te engabë ndëm edzoe Zamba.. 3Boan e di asë bënkad mina, mibaala fë dò, dzam da, të miabie mëfulu maban, amu bënë hë nkòbò, tègè ai mimboan. 4Bafa adid mimbëgë#23,4Adid mimbëgë anë e mëmvende mësë ya bësaṅa bëkalara bëdzoo na matye a mvende Moses. Abog Yesus anyii a si, mëmvende mëte mëngabë nala mintèd misaman ai awom ai milè (613)., bëbedëge miè bod a bitul, hë da, bò bëben bayi ki miè namba tò ai onyu. 5Mimboan miaban misë minë asu yë na bod bëyen bò. Banene e bifus bi mvende bëbëgë a mësu#23,5Mvende Moses yabende na man Yuden osë abòd bibug bi mvende ya biadaṅ mfi abui a binam, a asu, abaè fë biè a mbè nda. Bibug ya ete binë na: (Em 6,4-5) Vogolo, a Israel, Nti Zamba waan anë Nti hë nyè etam. Asu te wayean diṅ Nti Zamba woe ai nnëm woe osë, ai nsisim osë, ai ngul dzoe esë., bëbòò fë biyie biaban mënen, 6badiṅ bitoa bi osu a mëbog, ai bitoa bi osu a mënda-bikoan; 7Badiṅ na bod bësug bò a minsëṅ mi angara, ai na bod bëloe bò na «Rabbi#23,7Rabbi anë dzoe ya bavë ṅyëgëlë mvende. ». 8Mfa waan, të baloe mina na Rabbi, amu ṅyëgëlë waan anë hë mbòg, mina bësë mitoa babënyaṅ. 9Të mialoe tò mod na Tara a si mu, amu mibëlë hë esya mbòg, e nyò ya yob. 10Mod abë mina loe na «asu zoa» amu asu zoa anë mina hë mbòg, Kristus. 11E mod anë mina ntëbë osu, abò mina etuga; 12E mod ayi bede emen, ayi dzòdiban, e nyò ki adzòdi emen, ayi bedëban. 13Amala ai mina, a e bod bë dzongo ba, mina miatsig bod zen ya edzoe ya yob. Mina bëben të nyian, tò e ba banyian, mitsigi bò zen.#23,13.14 Amala ai mina, bëfarisea ai bësaṅa bëkalara, bod be dzongo, amu miamana dian ai mënda minkus ndò fë miakogëlan mintòṅ mëngogëlan hë asu yë na bod bëyen mina. Asu te miayi bi nkat otoa alèd abui. 15Amala ai mina, mina bësaṅa bëkalara ai befarisea, bod bë dzongo, amu miawulu tò a maṅ, tò a nkot si na miavëṅan tò të hë efadag mod dzia, ṅnyie hm fë anë avëṅan ya, mingabò na ayenan ai ebe ndoan alodo mina bëben. 16Amala ai mina, a minë bëlëdë bë zen, mitoa ndim, a miadzo na: e mod osë akani sòṅ a dzoe tempel, nala osëki nguma etòm; he da, ngë mod akani sòṅ e mvòt ya tempel, eyë atii etere. 17A mëkut ai mindindim, dze yadaṅ ai mfi abui, yë mvòt, yë e tempel afubu mvòt? 18Miadzo fë na: Ngë mod akani sòṅ a dzoe alatar, atii ki; hë da, e nyò akani sòṅ a dzoe efaè ebëdë etere a yob, eyë atii ete. 19A mindindim, dze yadaṅ ai mfi, yë efaè, yë alatar ya afubu efaè? 20E mod akani sòṅ a dzoe alatar, akani sòṅ ete ai a dzoe e dzom esë ebëdë ete. 21E nyò ki akani sòṅ a dzoe tempel, akani dzò a dzoe tempel, ai a dzoe e mod atoa ete, 22e nyò ki akani sòṅ a dzoe yobo, akani dzò a dzoe etoa ati Zamba ai a dzoe e nyò atoa ete. 23Amala ai mina, mina bësaṅa bëkalara ai bëfarisea, bod bë dzongo, mina ya miatuni efas awomo bikidiga bisë y'afub, dzam da, mibyandigi mimfa mi mam ya mvende, sosoo, ai nnëm ngòl, ai ṅyëbë. Wayean fò bò e di, hë tègè tëgelan e di avòg. 24A mindindim bëlëdë bë zen! Mina ya miabindi man otsitsit, mimini kamele nguma! 25Amala ai mina, mina bësaṅa bëkalara ai bëfarisea, bod bë dzongo, amu miamana fubu kòb ai esoa hë a nsëṅ, hë da, bitoa ntud ai wub waan ai bëbe bë mam ban. 26A ndindim man farisea, tarigi sob kòb a nnëm ete, asu yë na ezu bò mfuban a nyòl. 27Amala ai mina, mina bësaṅa bëkalara ai bëfarisea, bod bë dzongo, miafulan ai e mësòṅ ya bëmana fen; mfa ya nsëṅ a ten ten, zaa hm kë kui a nnëm ete, a tud ai bives mimbim ai ebòl esë engakë. 28Nala ngò bod bayen mina a nsëṅ hë bësosoo, bësosoo, dzam da, mitoa ndzalan ai dzongo ai nsëm a nnëm etere! 29Amala ai mina, a bësaṅa bekalara ai bëfarisea, bod bë dzongo, amu miakom bëprofet mësòṅ, mifënë mësòṅ bësosoo bë bod. 30Midzoo fë na: Ngë bitòbò eyòṅ bëtara bëngabë, ngë biandzëki nòṅ ngab a awu bëprofet. 31Nala ngò miakpaè mina bëben a nkat, amu minë bòn bëwoe bëprofet. 32Kë mialod besoa a! 33A e mvog nyòò ba, ayòṅ mëkpë di, eyë mingatub nkat ndoan wayanga mina ya? 34Asu te, yënë sik, malom mina bëprofet ai mimfëfëg. Miwoe bëvòg, e ba bëvòg mibomo a klos, miyidi ai nkas a mënda-bikoan man, mikëlë miatoṅ bò a mal mal. 35Kë ndò hm bësosoo mëki mëngasoeban a si atarigi a mëki më Abel, sosoo mod, akui e ma më Zakarias, mòn Barakia, a mingawoe a zaṅ tempel ai alatar mayi mina soeban a nyò. 36Makad mina bëbëla na, mam mëte mësë mayi yenëban e mvòṅ bod nyi#23,36Yesus ayi sò ai biyëṅ bi mam (akui-lë sòṅ) a e mvòṅ bod nyi..

Yesus ayon Yerusalem a nyòl

37A Yerusalem, a Yerusalem, wa ya wawoe bëprofet, e bod balom wa, olumu bò ngòg, abim anë mëngayi du biyòṅ biyòṅ na makoan bòn boe anë nyia kub akoan bòn a mëfab a si, ndò miandzëki yëbë! 38Yënë sik, nda dzan yayi ligi ekudi. 39Amu makad mina na, miayi ki ma dugan yen, akui anë mayi dzo na: Maa ai e nyò azu a dzoe Nti#23,39Bs 118,26.

Currently Selected:

Mt 23: NTE12

Highlight

Copy