Mt 21

Yesus anyian a Yerusalem ai duma

Mk 11,1-11; Lk 19,28-40; Yoh 12,12-19

1Eyòṅ angakui babi a Yerusalem#21,1-11 Messias anyian a Yerusalem e kan ya profèt Zakarias angadzo. Azu anë mbubua, abëdë ozele a yob. Minkukuma miabed a bikabëli!, ndò angakë a Betfage, a nkol bile bi mbòn, ndò Yesus angalom beyègè bëbè, 2nyè ai bò na: Kaṅan e dzal anë mina osu dili, miayi yen ngal ozele atii a nkòl ai mòn osë. Tiigan, mizu ai ma nyè. 3Ngë bësili mina dzom, kadan na: Nti waban ayaṅan ai bò. Ndò angalom bò. 4Nala ongabòban asu yë na nkòbò profet okpaèn na: 5Kadan ngòn Sion na: Yënë, nkukuma woe azu wa a zen, anë edzòdi nyòl, abëdë ozele ai mòn a mvus, tsid mimbëgë#21,5 Is 62,11; Zak 9,9. 6Ndò bëyègè bëngakë, bëbòò anë Yesus angabende bò, 7bësòò ai ozele ai mòn, bëmana bò tè biyie a mvus, ndò Yesus angabed, atòbò bò a yob. 8Abui bod angatè biwòman biaban a zen, bëvòg bëbugu mëbui bile, bëdzoge a zen. 9Abui bod di akëlë nyè osu, ai e ba ki bëzaa batoṅ nyè a mvus bëngayedan na: Osanna#21,9 Yënë Bs 118,25... «Osanna» atyan na: Zaa ai akode, kodëge të! ai man David, Maa abò ai e nyò azu a dzoe Nti, Osanna a yob etere. 10Ndò anganyian a Yerusalem, tisòn esë engamlan, bò na: Za nyò? 11Nkunda bod bò na: kë Yesus a, e profet asò a Galilea!

Yesus atsidan bëkuan bë byem ya tempel

Mk 11,15-19; Lk 19,45-48; Yoh 2,13-16

12Ndò Yesus anganyian a tempel, angatsidan bëkuan ai bekus bë byem ya tempel#21,12 Asu yë na mod wavë mëtunëṅa a tempel, wayean kus eyëm a nsëṅ tempel hala, ngë ki na watsende mòni, amu mòni ya nsëṅ angabë mòni ya edzoe Roma, mòni bëhaiden!, afëṅan bëtëbëlë bë e bod bëtsendege mòni a si, ai bitoa bëkuan ai abëṅ, nyè ai bò na: 13Anë ntilan na: Bayi loe nda dzama na nda-ngogëlan#21,13 Is 56,7, ndò mivëṅan ya dzò eboga miwuwub#21,13 Ye 7,1. 14Ndò mindindim ai biyeyëm bëngasubu nyè babi a tempel. Amana bò bò mvoè. 15Ayënë bëfada bënen ai bësaṅa bëkalara bëngayen e mësimba angabë abòò, ai mbol bòngò bëngabë yedëgan a tempel na: Osanna ai man David, bëmana hm laṅ, 16bò ai nyè na: Yë wawog fò e dzam badzo di? Yesus nyè ai bò na: Owe, mawog. Dze yë miabë ya ki la na: Ongakomëzan wamen olugu a anyu ban bòngò ai bibobòg#21,16 Bs 8,3? 17Ndò angalig bò hala, akodo a tisòn, akëlë a Betania, abombo we.

Yesus ayòg ele bibuma

Mk 11,12-14. 11,20-25

18Ai ndib kidi, a adugan a tisòn ha, angawog zie. 19Ndo angayen ele bibuma#21,18-22 Ele bibuma dzi enë ndëm ayòṅ ya Zamba angatòb, ndò layëbë ki mbëmbë foe Yesus. a mgbag ndzòṅ, asubu na afad, tègè ai ebuma, hë kie. Nyè ai ele na: ebuma engabad ki wum abë wa tò eyòṅ. Ele emana fò kot etye etye te. 20Bëyègè bëyënë adzo di, bò na: Dze ele dzi yamana kot etye etye na? 21Yesus nyè ai bò na: Makad mina bëbëla na, ngë mibëlë ṅyëbë, tègè soo, miayi bò mam alodo anë e di ele dzi, mitoa dzam dzo ai nkol hi na: Kodogo, owoaban a maṅ, hë abòban nala. 22Ndò fë e dzi esë miayi dzaè a ngogëlan, ai afidi, miayi dzò bëlë.

E ngul nyi yasò Yesus ve?

Mk 11,27-33; Lk 20,1-8

23Ndò anganyian a tempel, bëfada bënen ai bënyia-bod-mvia ya nnam bësubu mfa angabë ayëgëlë, bò na: Wabò e mam ma ai ngul fe? Za ki angavë wa ngul te? 24Ndò Yesus angayalan bò na: Ma fë mazu mina sili nsili mbòg. Ngë miyalan ma, ma mëkad mina mfa e ngul mabò e mam ma yasò ma. 25Ṅduan Yohannes ongabë osò ve? Yë a yob, yë a si? Bëngabindi ha, bò na: ngë biadzo na a yob, ayi dzo ai bia na: Asu dze miandzëki nyè yëbë? 26Ngë bidzo a hm ki na: A bod, biayean mbara nkunda bod vi, amu bësë bayëbë na Yohannes anë profet. 27Ndò hm bayalan ai Yesus na: Biayëm ki. Nyè ai bò na: Ma, makad ki mina e hom ngul te yasò ma.

Za atoan bò ṅyian esya?

28Miayen adzo di ya? Mod ziṅan gabë abëlë bòn bëbè. Ndò angakë abë e nyò osu, nyè na: A mòn, këlë ma sye a afub wayn ana. 29Mòn nyè na: mayi ki. A mvus te, ndò angabindi, akëlë esye. 30Esya akui abë e nyò mbòg, akòbò fë hë dzam dëda. Mòn nyè na: A nti, ma nyò makë, dzam da, tègè kë. 31Za ya abë bò bëbè angabò yian esya? Bò na, e nyò osu. Yesus nyè ai bò na: Makad mina bëbëla na, bënòṅò bë toya ai bininga bë ebamba bayi mina tëbë osu a edzoe Zamba. 32Amu Yohannes angasò abë mina, awulugu a zen sosoo, ndò miandzëki nyè yëbë, dzam da, bënòṅò bë toya ai bininga bë ebamba bëngayëbë nyè. Mfa waan, miyënë të nala, hë da, tègè singi, na miyëbë nyè.

Nkana afub wayn ai bënòni bë afub

Mk 12,1-12; Lk 20,9-19

33Vogëlan mvulna fë: Mod dzal ziṅan gabè afub wayn, aloo ongola, afaga ebe ya batos wayn, amana fë loṅ nkum.#21,33-46 Afub wayn anë Israel Zamba. Yënë fë Is 5,1.. Ndò angavë bod bisye afub, akëlë a dulu. 34Eyòṅ abog mëkoe angakui, ndò angalom bod na bëkë nyè nòṅ mëkoe moe. 35Bod bisye bëbii e bod ba, e nyò bëmana yit, e nyò mbòg bëwoe, e nyò ki, bëmana lum ngòg. 36Ndò angadugan lom bod bëfë abui alodo e ba bë osu. Bëbò fë ai bò dzam dëda. 37A mvus te, ndò hm azu bò lom mòn woe, adzoo na: Bayi kam mòn wama. 38Ayen bod bisye bëngayen mòn, bò na: Mòn elig nyòlò, ṅwoan nyè, binòṅ elig dzie. 39Ndò bënganòṅ nyè, bëwoa nyè a afub ayat, bëwoe nyè. 40Eyòṅ nti afub ayi sò, ayi bò ai e bod bisye ba ya? 41Bò ai nyè na: Ayi mana bëbe bë bod bëte ai si, avëë bod bëfë afub die, a bayi nyè vë mëkoe a abog layean. 42Yesus nyè ai bò na: Nga mingalaṅ a ntilan na: E ngòg ya bod mëloṅ bëngawoa a fiè, endzò evëṅan ya nnom ngòg. Nti nyè abò esye te, ndò anë eyëṅ dzam a mis më bod#21,42 Bs 118,22? 43Asu te makad mina na: Bayi mina vaa edzoe Zamba a mò, bëvëë dzò ayòṅ layi wum bibuma bie. 44E mod aku a akòg di a yob, ayi mana nyaṅëlan; ngë akòg aku ki nyè a yob, layi nyè mana fid. 45Bëfada bënen ai bëfarisea, awog bëngawog minkana mie, bëyëmë na akòbògò ai bò. 46Bëngadzëṅ na babi nyè, hë da, bëmbarëga minkunda mi bod, amu bëdzoo na anë profet.

Currently Selected:

Mt 21: NTE12

Highlight

Copy