Mt 20

Bëbò bisye ya afub wayn

1Amu edzoe ya yob yafulan ai mod dzal ya angakui ai ndib kidi na ayoe bod bëkë nyè sye a afub wayn. 2Ndò angayili ai bëbò bisye taṅ mòni asu amos, alomo bò a afub wayn die. 3Ndò angakui, dzam bò a awola lala, ayënë bod bëfë bëtëlë a nsëṅ angara, tègè ai e dzom babò. 4Nyè ai bò na: Mina fë kaṅan a afub wayn dama, mayi yaan ai mina mbol wayean. 5Bò fë bëkëë. Ndò angadugan kui, dzam bò a awola samëna, ai awola ebulu, abò fë hë dzam dëda. 6Abog awola awomo ai da, ndò angakui, ayënë bod bëfë bëtëlë, nyè ai bò na: Asu dze mitëlë të bò tò dzom ha nguma amos? 7Bò ai nyè na: Amu tò mod andzëki bia yoe#20,7Azaa kui a amos ya ana, a nnam Yesus, abui bod latëbë a mindzòṅ kikidigi, bëyanga na mod azu bò yoe na bëkë nyè bò nguma esye ziṅ hili. Basye nala tò nguma amos, tò nguma sòndò, bëngayaan ai bò a mvus hala.. Nyè ai bò na: Kaṅan a afub wayn. 8A ngoge ekëlë vin, ndò nti afub akad nkala byem woe na: «Loege bod bisye, ovë bò maan, akaègè ai e ba bë mvua, akëlë kui e ba bë osu». 9Bod ya awola awomo ai da bësòò, bënòṅò anë mod nsaṅ woe. 10A bod bë osu bëzaa va, bëdzoo na bayi bi alodo nala. Ndë ave, ba bëbii fë hë nsaṅ mbòg. 11Abog bënòṅò nsaṅ vi, bëwomëṅan ai mod dzal, 12bò na: E bod bë mvua ba bësye hë awola da, ndò otele bia ai bò etye dzia, e bia ya bihë dzugi ai esye, binyamiṅi a vian. 13Ndò angayalan mbòg ya abë bò, nyè ai nyè na: A moe, mandzëki wa di maan. Biandzë yili nsaṅ mbòg a? 14Nòṅò engoe, okë. Mamen mëyi na mavë enyò mvua anë wa. 15Nga mënë fë na mëbòò ai akuma dama mbol madiṅ? Dze yë wawog abe mbol mënë dzam mbëṅ? 16Nala ngò hm bod bë osu bayi vëṅan e ba bë mvua, bod bë mvua bëvëṅan e ba bë osu.

Yesus akad eyòṅ lala na ayi wu, akui fë a sòṅ

Lk 18,31-34

17Yesus angabed a Yerusalem ha, ndò angaloe bawom ai bëbè a mgbag, angakad bò a zen ha na: 18Bëbëgan, bia ba biabed a Yerusalem; Mòn mod ayi vëëban a mò bëfada bënen ai bësaṅa bëkalara, bayi tsig na ayean ai awu, 19abog te bayi nyè vë a mò bëdzin asu yë na bëkpëlë nyè, bëyit nyè, bëbom fë nyè a klos, hë da, ayi kui a sòṅ a mos lala.

Nyia bòn bë Zebede ayi etoa osu asu bòn boe

Mk 10,35-45; Lk 22,24-27

20Abog te, ndò hm nyia bòn bë Zebede angasò ai bòn boe abë Yesus, angadzaè nyè dzom ziṅ. 21Yesus nyë ai nyè na: Wayaan ai dze? Nyè na: Bendëge të na, e bòn bama ba bëtòbò, mbòg a mbo-nnomo e nyò mbòg a mbo-ngal woe a etoa nkukuma dzoe. 22Yesus nyè na: Miayëm ki e dzam miadzaè dili. Yë minë dzam nyu e kòb mayi nyu? Bò na, owe. 23Nyè ai bò na: Miayi hm fò nyu kòb dzama; dzam da, mfa yë na miatòbò ma a mbo-nnomo ai mbo-ngala, së ki ma makab bitoa bite; Tara angamana ya tòb bod. 24B'awom bëvòg bëngayi wog, bëliṅan ai e babënyaṅ bëbè ba. 25Ndò Yesus angaloe bò nyè na: Miayëm na bëdzoe ya mëyòṅ badzoe mëyòṅ, eyë fë mimfaṅ mi bod miadzoe nala. 26Të layenan nala abë mina, dzam da, ngë mod ayi na abò mfaṅ mod, avëṅan mina olò. 27E nyò ayi na abò e mod osu a zaṅ dzan, asye mina. 28Nala hm fë ngò mòn mod andzëki sòṅ na bësye nyè, angasò na asye, alig fë enyiṅ dzie eban asu abui bod.

Yesus abò mindindim mibè mvoè

Mk 10,46-52; Lk 18,35-43

29A bëkodogo a Yeriko, abui bod angabie nyè. 30Mindindim mibè mitoa a mgbag ndzòṅ; bëngayi wog na Yesus alod, bëngayon, bò na: Yënë bia ngòl, a man David. 31Nkunda bod ongasog ai bò va na bëtòbò bivol, hë bò bëbama na: A Nti, a mòn David, yënë të bia ngòl. 32Ndò Yesus angatëbë, aloe bò, nyè na: Miayi na mëbò ai mina ya? 33Bò na: Biayi na oyaa bia mis. 34Ndò Yesus angayen bò ngòl, anamba bò mis, etye etye te, bëngadugan yen, mbò bakë babie nyè ba.

Currently Selected:

Mt 20: NTE12

Highlight

Copy