Lk 22

Babui mëfëg na bawoe Yesus

Mt 26,1-5.14-16; Mk 14,1-2.10-11; Yoh 11,45-53

1Hala te abog bëmbaṅëla të ai saṅ, a baloe na Paska ongasubu ya. 2Bëfada bënen ai bësaṅa bëkalara bëngadzëṅ mbol bawoe Yesus, amu bëmbarëga nnam. 3Ndò Satan anganyian Yudas anë mëbëdan na Iskariot, mbòg ya bë awom ai bëbèè, a nyòl. 4Yudas akëlëg, angakë yili ai bëfada bënen, ai bëzimbi e kan anë bò dzam kuan ai nyè. 5Ndò batag ai dò, bëyëbë na bayi nyè vë mòni. 6Ndò ayëbë, angadzëṅ mbëmbë abog anë dzam kuan ai nyè, nnam të yëm.

Ngomëzan bidi bi Paska

Mt 26,17-25; Mk 14,12-21; Yoh 13,21-30

7Ndò amos bëmbaṅëla të ai saṅ ongasò, a bayean tuni Paska. 8Ndò alom Petrus ban Yohannes nyè na: Kaṅan bia komëzan Paska na bidi. 9Bò ai nyè na: Eyë wayi na bikomëzan nyè ve? 10Nyè ai bò na: Eyòṅ miayi kui a tisòn, miayi toban ai mod abëgë emvaṅ mëndim. Toṅan nyè akëlë kui e nda ayi nyian, 11abog te miayi dzo ai nti-nda na: ṅyëgëlë adzo ai wa na: E nda bëyëṅ mayi di Paska ai bëyègè bama enë ve? 12#22,12Yënë Mk 14,14, afëb 139. Ṅnyè ayi mina lëdë mod etun-nda a nda yob ai e hom batòbò a badi. Eyë komëzan Paska etere. 13Ndò bakë, bëkòbò anë angakad bò, bëkomëzan Paska.

Yesus atye bidi bi ngoge (Mfufub Mès)

Mt 26,26-30; Mk 14,22-26; 1Kor 11,23-25

14Eyòṅ awola angakui, ndò akom etoa a tëbëlë, apostel bënë ai nyè ha. 15Nyè ai bò na: Së hm anë mëngayi të du na madi e Paska nyò fufulu ai mina osusua yë na mabi mintye! 16Amu makad mina na mayi ki nyè dugan di akëlë kui anë adzalëban a edzoe Zamba. 17Ndò anòṅ kòb, avëë ngaṅ, nyè na: Nòṅan ha, mikaban mina mina. 18Amu makad mina na: mayi ki dugan nyu ebuma ya ele wayn akëlë kui anë edzoe Zamba yazu. 19Ndò anòṅ mbaṅëla, avëë ngaṅ, abëgë, avëë bò, nyè na: E dzi enë nyòl dzama ya yakaban asu dan. Boan dò, mitsogo ma. 20Ndò fë dzam dëda ai kòb a mvus bidi, nyè na: E kòb nyi enë mkpamaṅ elad a mëki mama ya masoeban asu dan. 21Hë da, wò e nyò akab ma onë ai ma a tëbëlë ha. 22Amu mòn mod akë fò e kan enë etilga, dzam da, amala ai mod te, e nyò akab nyè. 23Bëkèè hm na badzëṅ a zaṅ dzaban, e mod ya abë bò ayiigi bò adzo te.

Za adaṅ mfaṅ a bui?

24Ndò nkòbò wabò bò ha, bësuṅu e mod ayean bò nkoṅ anen. 25Nyè ai bò na: Minkukuma ya mëyòṅ miadzoe mëyòṅ, ndò fë e bod badzoe bò, baloe bò na bëbò bë mbëṅ. 26Mfa waan, dzom yasëki nala. E nyò anë nkoṅ ayob abui ayëyean bò anë man mòngò, e nyò ki adzoe abò anë e nyò asye. 27Za hm anë nkoṅ a yob, yë e mod atoa a tëbëlë bidi, yë e nyò asye? Së e nyò atoa a tëbëlë a? Ma mënë hm a zaṅ dzan anë e mod asye. 28Mina mingabò azombo ai ma a mindzug miama. 29Ndò hm ma mayi mina komëzan edzoe e kan tara angakomëzan ma edzoe 30asu yë na midi, minyu a tëbëlë wama a edzoe dzama, mitòbò fë a bitoa bi edzoe, mitsigi ntol mënda më bod më Israel awom ai mëbè.

Petrus ayi sie Yesus

Mt 26,31-35; Mk 14,27-31; Yoh 13,36-38

31A Simun, a Simun, Satan asili ya mina, asu yë na asëgëzë mina anë basëgëzë oles. 32Ndò hm mëkogëlan asu doe, asu yë na të ṅyëbë woe watëg. Mfa woe, eyòṅ wayi wome nyòl, owonëṅe babënyòṅ. 33Nyè ai nyè na: A Nti, mënë a ngomëzan na makë ai wa tò a mbog, tò a awu. 34Yesus nyè na: Makad wa, a Petrus, nnom kub ayi ki lòṅan a, së na osoo na wayëm ma. 35Nyè ai bò na: Eyòṅ mëngalom mina të ai mfëg mòni, të ai mfëg, të ai ngob, yë mingayaṅan ai dzom ziṅ? Bò na: Kokoa. 36Nyè ai bò na: Etoa dzi hm, e mod abëlë mfëg mòni, anòṅò wò, dzam dëda ai mfëg. E mod abëlë ki, akuan ai ewòman dzie, akus nyamëla. 37Amu makad mina na e dzam anë ntilan di layean toban abë ma na: Bëngalaṅ nyè a taṅ bizilngan. Amu e dzi bëngatil ebëbëgë ma engatoban ya. 38Bò na: a Nti, yënë, bibëlë nyamëla ebè ha. Nyè ai bò na: Nala wayean.

Yesus akogëlan a nkol bile bi mbòn

Mt 26,36-46; Mk 14,32-42

39Ndò akui, akëlë a nkol bile bi mbòn, anë fulu engabë nyè, bëyègè boe bëbiege nyè ha. 40Eyòṅ angakui hom te, nyè ai bò na: Kogëlan, asu yë na miza ku a mëbobëla. 41Ndò angakë nyè etam, aligi bò, akëlë abim ntye ya mod onë dzam woa ebaṅ, ndò akud mëbòṅ, angakogëlan, 42nyè na: a Tara, ngë wayi, vaaga ma e kòb nyi ha. Dzam da, së ki ṅyian wama, ṅyian woe ngò obòban. 43Ndò englès angayene nyè asò a yob ha, angawone nyè. 44Mbol wòṅ ongabi nyè, angafëdan kogëlan. Edudug dzie entoa hë anë bibaṅ mëki, ekpaa a si. 45Ndò akodo a ngogëlan, akëlë a bëyègè bëngabë, akòbò bëtoa oyò etòm mëlunga, 46nyè ai bò na: Dze miakë oyò ai dzò? Tëbëgan, mikogëlan, asu yë na miza ku a mëbobëla.

Bazu bi Yesus

Mt 26,47-56; Mk 14,43-50; Yoh 18,3-11

47Angënë akòbògò nala, ondzi na, mod nkunda ahama, e nyò anë dzoe na Yudas, mbòg ya bë awom ai bëbèè awulugu bò osu; ndò angasubu Yesus babi, awuban ai nyè. 48Yesus nyè ai nyè na: A Yudas, wakab mòn mod ai mëwuban nga? 49Mbol e bod bëngabë ai nyè bëngayen e dzam ayean bòban, bò na: a Nti, yë bibaè bò nyamëla? 50Ndò mbòg ya abë bò abaè man olò fada nen nyamëla, atsigi nyè alò ya mbo-nnomo. 51Yesus nyè na: Dzogan abim te. Ndò anamba alò, abò dò mvoè. 52Ndò Yesus adzo ai e bod bëngazu nyè a nyòl: bëfada bënen, bëzimbi ya tempel, ai bënyia-bodo-mvia, nyè na: Misò ai bënyamëla, ai mëkëg, hë anë miazu bi ezilngan nga? 53Mëngabë ai mina a tempel amos osë: miandzëki ma fudi mò a nyòl; dzam da, awola dan ai ngul dibi hm bi.

Petrus asie Yesus

Mt 26,57-58.69-75; Mk 14,53-54.66-72; Yoh 18,12-18.25-27

54Ndò banòṅ nyè, bëkë nyian ai nyè a nda fada nen, Petrus azaa abie nyè oyab. 55Bod bëngakoe ndoan a zaṅ nsëṅ, bëtòbò a si fufulu; ndò Petrus atòbò ai bò ha. 56Ndò man mininga bisye ziṅ ayen nyè atoa a ndoan, ndò atoan nyè fòmbò, nyè ai nyè na: E mod nyò nyè fë ahë bë ai nyè. 57Angasoo, nyè na: A mininga, mayëm ki nyè. 58Eban të kog, ndò mod mfë ayen nyè, nyè na: Wa fë onë mbòg ya ete. Petrus nyè na: A mod, masëki ai bò esamba! 59A mvus dzam bò nguma awola, mod mfë angayag fò ha, nyè na: A bëbëla emen, e mod nyò ahë bë ai nyè esamba; anë ben fë man Galilea! 60Petrus nyè na: a mod, mayëm ki e dzam wadzo dili. Etye etye te, angënë akòbògò nala, ndò nnom kub alòṅ. 61Ndò Nti avëṅan, abëbë Petrus, ndò Petrus adugan tsog ebug Nti angakad nyè na: Osusua yë na nnom kub alòṅan a, wayi ma sie biyòṅ bilè. 62Ndò angakui a nsëṅ, angayon fò abui.

Bakpëlë Yesus, bëyidi nyè. Bakë ai Yesus a ekoan nnam

Mt 26,59-68; Mk 14,55-65; Yoh 19,19-24

63Ndò e bod bëngabë bëbëlë nyè ha bakèè na bakpëlë nyè, bëyidi nyè, 64ndò batindi nyè efus eyie a mis, bëngasili nyè na: Bò mvigi, za abimi wa? 65Bëngamgbali nyè, ai abui mam mëfë fë. 66A kidi engalende, ndò bënyia-bodo-mvia bë nnam bëngakoan, ai bëfada bënen, ai bësaṅa bëkalara, ndò bakë ai nyè a nda bikoan nen dzaban, 67bò na: Ngë wa onë Kristus, kada bia. Nyè ai bò na: Tò mëkad mina, miayi ki yëbë. 68Ngë mësili ki nsili, miayi ki yalan. 69Akègè etoa dzi, mòn mod ayi tòbò a mbo-nnomo ngul Zamba#22,69Bs 110,1. 70Bò bësë bò na: Dze yë wa hm onë mòn Zamba? Nyè ai bò na: Mina miadzo na mënë nyè. 71Bò na: Dze fë biayaṅan ai sòman? Amu bia bëben biwog a anyu die.

Currently Selected:

Lk 22: NTE12

Highlight

Copy