Lk 21

Efaè nkus mininga

Mk 12,41-44

1Ndò atye mis, angayen e minkukuma mi bod mifudigi bifaè biaban a nkòb. 2Ndò ayen nkus mininga ziṅ, ya ongabë mëbua, owoaga ban minsaṅ mibè, 3nyè na: Makad mina bëbëla na, mbubua nkus mininga hi ofudi efaè alodo bod bësë. 4Amu yë na, bò bësë bëhë vë hë mëbuga ya akuma daban, mfa woe, avë enyiṅ dzie esë a mëbua moe ete.

Tempel ayi siliban a si. Mëndëm ai ziṅ

Mt 24,1-14; Mk 13,1-13

5Mbol bod bëvòg bëkama tempel, bëkama abëṅ mëkòg, bëkama mëtunëṅa, nyè na: 6E ma miayen mala, mëmos mayi sò hala: Akòg ziṅ layi ki ligi lëbëdë e di avòg a yob, së na amana sili. 7Ndò hm basili nyè na: a ṅyëgëlë, mam mëte mayi bòban oden, ndò ki ndëm fe yayi lëdë na mam mëte mazu bòban? 8Nyè na: Boan okala na të miadimi. Amu abui bayi sò a dzoe dama, bò na: Mamen, ai na: Abog asubu ya babi. Të miakë miatoṅ bò! 9Eyòṅ miayi wog na bita ai bindugëlan binë, të miasaṅan. Amu mam mëte mayean tari bòban, dzam da, së ki mëmana mala etye etye. 10Ndò fë adzo ai bò na: Ayòṅ layi luman ai ayòṅ, edzoe elumëṅan ai edzoe, 11si engatigëdan abui, ndò fë anë e hom hili, zie ai akòn biayi bò. Mam mësis ai abui mëndëm biayi bò a yob. 12Osusua e mam mësë ma, bayi mina fudi mò a nyòl, bëngatibili mina, bëkuan ai mina a mënda bikoan ai a mimbog, bëtele mina a mis minkukuma ai bëdzoe etòm dzoe dama. 13Nala wayi bò na mibòòlò ma. 14Yëman a minnëm mian na miayean ki komëzan mbol miadzòs. 15Amu mamen mayi mina vë anyu ai fëg a tò mod ziṅ ayi ki bi ngul ya afèd, ngë ki na mod atoe mina biboṅ. 16Bëbonde ban ai babënyaṅ ban, ai bivuvuman ai bëmvoe ban bayi kuan ai mina, bëwoe fë bëvòg ya abë mina, 17ndò bod bësë bayi mina fëm etòm dzoe dama. 18Dzam da, kòṅ esil ya nlo waan yayi ki dzaṅ. 19Miayi kyëbë ai enyiṅ dzan a mban a yob.

Yerusalem ayi siliban a si

Mt 24,15-21; Mk 13,14-19

20Eyòṅ miayi yen na minkunda bita mimana ya loṅ Yerusalem edinga a nyòl, eyòṅ te miyëmë na mbole woe antoa ya babi. 21Eyòṅ te, e bod ya bënë a Yudea bëtubu a minkol, e ba ya a zaṅ Yerusalem bëkui a nsëṅ, e ba ya mvus nnam, të bazu nyian ete 22amu mëmos mëte mënë mëmos bivudëga asu die, a e mam mësë mëngatilban madzalëban. 23Amala ai e bininga bënë mëbum ai e ba bayi nyie bòn mëlu mëte. Amu mintye abui miayi bò a nnam, olun oyënan ai ayòṅ di, 24ndò hm bayi wu ai nyamëla, bëkëlë a mëkaban a minnam misë; bëhaiden bayi kòrò Yerusalem ai mëkol, akëlë kui anë abog bëhaiden latoban.

Asò-lë mòn mod

Mt 24,29-35; Mk 13,24-31

25Ndëm yayi kui a nlo-dzobo ai a ngòn ai a atitie. Mfa ya si, mësis mayi sus bod a nyòl, të yëm mbol babò ai minsum ai eduṅ maṅ; 26bod bayi wu ai wòṅ, ai ṅyangan bayanga e mam mayi yënan a si esë, amu ngul esë ya yob yayi tigëdan. 27Eyòṅ te hm bayi yen mòn mod azaag a nkut#21,27Da 7,13 ai ngul, ai abui duma. 28Eyòṅ e mam ma mayi kèè na mabòban, mivaa nnëm, mitele minlo a yob, amu akode dan asubu ya babi. 29Ndò aku bò nkana na: Yënan ele sa ai bile bisë. 30Etye etye ya bingasam ya, miyënë nala, mingayëm na mëkoe mëntoa ya babi. 31Dzam dëda fë ai mina: eyòṅ miayi yen e mam ma mëbòban, yëman na edzoe Zamba entoa ya babi. 32Amen, makad mina na, e ngongo bod nyi yayi ki lod, së na mam mëte mësë mëbòban. 33Yob ai si biayi lod, dzam da bibug biama biayi ki lod.

Boan okala

34Mibò okala na minnëm miza vob mina ai ebamba ai mëyòg, ai mam më si, amos te ongavol mina sòṅ ku a yob 35hë anë olam. Amu wayi ku e bod bësë bëtoa a si-ndon esë a yob. 36Boan okala abog asë, mikogëlan asu yë na mibi ngul ya atub e mam mësë mayi bòban mala, mitëbë mòn mod osu. 37Angabë na, ai amos, ayëgëlë a tempel, ai alu, akui, akë bombo a nkol baloe na nkol bile bi mbòn. 38Ndò nnam osë okunëṅi kad sòṅ a bë nyè a tempel, bazu nyè vogolo.

Currently Selected:

Lk 21: NTE12

Highlight

Copy