Yoh 9

Yesus asye mod ya angabyali ndim

1A alodo na, antala mod ya angabyali ndim. 2Ndò bëyègè boe basili nyè na: A Rabbi, za angasëm, yë nyè, yë bëbonde boe na azu byali ndim#9,2Asu Yuden, okòn osë wazu mod a nyòl asu nsëm ziṅ.? 3Yesus nyè na: tò nyè, tò bëbonde boe, mod andzëki sëm; anë fò hë asu yë na mimboan mi Zamba mikulan a ngëëṅ a bë nyè. 4Biayean bò esye enyò angalom ma ntye amos ongënë. Alu angazu ya, tègè ai e mod anë dzam bò esye ete. 5Ntye mënë a si, mënë mfyè si-ndon. 6Akòbògò nala, ndò atui a si, abòò mbòdòg ai e mëtè angatui, angasii nyè mis ai wò, 7nyè ai nyè na: Këlë wòbò a etam Siloam (nala watyan na enyò anë nloman). Ndò hm angakë, awòbò, asòò, angayen. 8Bëbonde boe ai e bod bëyenë nyè osusua a angabë nzëzaa, bò na: Së enyò ṅnyè akadëga tobò, adzaègi a? 9Bëvòg bëdzoo na: Ṅnyè, bëvòg bò na: Tègè, afulan fò ai nyè. Emen nyè na: Mamen. 10Ndò hm bakad nyè na: Eyë hm mis mëyaaban wa ya? 11Nyè na: E mod baloe na Yesus abò mbòdòg, ndò asii ma a mis, nyè ai ma na: Këlëg wòbò a Siloam. Ndò mëkë, mëwòbò, mëngayen. 12Ndò badzo ai nyè na: Eyë anë ve? Nyè na: Mayëm ki. 13Ndò bakë ai e mod angabë ndim osusua nyò a bëfarisea. 14Amos ya Yesus angabò mbòdòg hi, ayaè e mod nyò mis ongabë amos sabbat. 15Ndò bëfarisea bò badugan nyè sili akyaè angayaaban mis. Nyè ai bò na: Awòbò ma mbòdòg a mis, ndò mëwòbò, ndò mayen di. 16Bod bëziṅ ya bëfarisea bëngadzo na: E mod nyòlò asò ki abë Zamba, amu abaala ki sabbat. Bëvòg ki bò na: Eyë nsëmë minsëm anë dzam bò e kan ndëm nyi ya? Bëntoa kiṅ mëndzaṅ. 17Ndò badugan dzo ai ndindim na: Wa wayen ya atyan ai nyè, mbol ayaè wa mis? Nyè na: anë profèt. 18Yuden bò të ṅyëbë na angabë ndim, ndò angayen ya; akëlë kui anë bëngalom loe bëbonde bë e mod angabë angayen ya nyò, 19ndò basili bò na: Yë e mod nyò ṅnyè anë e mòn waan miadzo na angabyali ndim? Eyë anë ya na angayen ya etoa dzi? 20Ndò bëbonde boe bayalan na: Biayëm na mòn waan nyò, ai na angabyali ndim. 21Eyë angayen ya ya etoa dzi? Biayem ki, tò ki e mod ayaè nyè mis, biayëm ki. Siligan nyè, nga antoa ya nyia-modo! Emen ayi kòbò asu die emen. 22Bëbonde boe bëngakòbò nala mbol bëmbarëga Yuden. Amu hala Yuden bëvë ya abende na ngë mod ziṅ amëm Kristus, bëkuligi nyè a nda-bikoan a nsëṅ. 23Asu te bëbonde boe bëdzoo na: Antoa ya nyia-modo, siligan nyè emen. 24Ndò hm badugan loe e mod angabë ndim nyò eyòṅ bèè, bò ai nyè na: Vaa Zamba olugu. Bia, biayëm na e mod nyòlò anë nsëmë minsëm. 25Ndò hm e mod nyò akad bò na: Tò anë nsëmë minsëm o, mayëm ki. Mayëm hë dzom dzia, na mëngabë ndim, ndò mëngayen ya. 26Bò ai nyè na: Dze abò wa? Eyë ayaè wa mis ya? 27Nyè ai bò na: Mëkad ya mina, mina të wog. Dze mingënë yi na miwog? Dze, yë mina fë miayi na miabò bëyègè boe? 28Bëngasog ai nyè, bò na: Wa, onë ṅyègè woe, bia, binë bëyègè bë Moses. 29Biayëm na Zamba angalèè ai Moses; enyò, biayëmyem ki mfag asò. 30Ndò e mod nyò ayalan, nyè ai bò na: Eyë eyëṅ esë enë ete na, miayëm ki mfag asò, dzam da ayaè ma mis. 31Biayëm na Zamba awog ki bësëm, dzam da, ngë mod ziṅ ambara Zamba, abòò fë ṅyian woe, Zamba awog nyè. 32Akèègè koba, babë ya ki wog na mod ziṅan gayaè mis më e mod angabyali ndim. 33Ngë mod te tègè sòṅ a bë Zamba, ngë asëki dzam bò tò dzom. 34Bò ai nyè na: Hë wa, wa, obyali a nsëm ete, ndò ongazu ya bia yëgëlë nga? Ndò bëngakuli nyè a nsëṅ. 35Ndò Yesus angawog na bëkuli nyè a nsëṅ; atoban angatoban ai nyè, nyè ai nyè na: Yë wayëbë mòn mod? 36E mod nyò nyè na: A Nti, ṅnyè anë za; mayi nyè yëbë. 37Yesus nyè ai nyè na: Oyenyen ya nyè, ndò enyò akòbò ai wa, ṅnyè nyòlò. 38Nyè na: Mayëbë, a Nti. Angalugu nyè. 39Yesus nyè na: Mëngasò a e si-ndon nyi asu nkat, asu yë na e ba bayen ki bëyen, e ba bayen bëbò ndim. 40Bëfarisea bëziṅ ya bëngabë ai nyè ha bò ai nyè na: Dze, yë bia binë ndim nga? 41Yesus nyè ai bò na: Ngë mitoa ndim, ngë miabëlë ki nsëm ziṅ. Ndò hm miadzo na: Biayen. Nsëm waan wakanga.

Currently Selected:

Yoh 9: NTE12

Highlight

Copy