Yoh 8

1Yesus nyè akëlë a nkol bile bi mbòn. 2Eyòṅ kidi engadugan lende, akëlë a tempel, bod bësë bëngazu abë nyè, ndò atòbò a si, angayëgëlë bò. 3Ndò bësaṅa bëkalara ai bëfarisea bazu ai mininga ya bëngadilan aboo ai fam, ndò batele nyè a zaṅ, 4bò ai nyè na: A ṅyëgëlë, e mininga nyò adiliban aboo ai fam a si. 5A mvende dzaan, Moses angabende na bëwoe kan mininga te ai ngòg. Mfag woe, wadzo ya? 6Bëngabë hm të bëdzoo e mam ma na babobolo nyè, asu yë na bëbi akalëga ya asòman nyè. Ndò të Yesus alumbu a si, angatil a mëtsò ai onyu. 7Mbol hm bëngabë bëyaag ai minsili, ndò anyoan, nyè ai bò na: E mod anë të ai nsëm abë mina, ṅnyè atarigi nyè lum ngòg. 8Ndò adugan lumbu, angatil a mëtsò. 9Eyòṅ e bod ba bëngawog nala, bëngasolan mbòm mbòg, atarigi ai minnom, ndò angaligi nyè etam ai e mininga nyò atëlë a zaṅ. 10Ndò Yesus anyoan, nyè ai nyè na: A mininga, bënë ve? Dze, yë mod andzëki wa kpè a nkat? 11Nyè na: Kokoa, a Nti. Yesus nyè ai nyè na: Tò ma, makpè ki wa a nkat. Këlëg, ndò hm, atarigi ana, të fë wabad sëm#8,11Yesus akpèè ki mininga a nkat, anë nnëm ngòl. Dzam da ayen na e dzam ahë bò anë abe..

Ma, mënë mfyè si-ndon

12Ndò Yesus adugan dzo ai bò na: Ma mënë mfyè si. E mod abye ma, ayi ki wulu a dibi. 13Bëfarisea bò ai nyè na: Mbòòlan woe osëki sosoo, ṅnyie anë wamen obòòlò wamen. 14Yesus nyè ai bò na: Tò a ki mabòòlò mamen, mbòòlan wama onë ete, amu mayëm mfag masò ai mfag makë. 15Mina miadzòs ai ntsogan nyòl, ma madzòs ki tò mod. 16Ndò hm ki, ngë matsig ntol, ntol wama onë ete mfaṅ, amu masëki etam; mënë ai e nyò angalom ma, Tara. 17A mvende dzaan, anë ntilan na: mbòòlan bod bëbè onë bëbëla. 18Mabòòlò mamen, e Tara angalom ma abòòlò fë asu dama. 19Ndò bakad nyè na: Esoa anë ve? Yesus nyè na: Tò ma, tò Tara, miayëm ki. Ngë miyëmë ma, ngë miayëm fë Tara. 20Angakòbò e mam ma a etun-nda ya banyie akuma, ayëgëlë a tempel. Mod ziṅan dzëki nyè bi, amu hala awola die abë ki kui.

Miasëki dzam sòṅ mfa ya makë

21Ndò adugan bò kad na: Ma, makë, ndò miayi ma dzëṅ; miayi fë wu a nsëm waan. Mfag makë, miasëki dzam sò. 22Yuden bëngadzo na: Dze, yë ayi woe emen, eyòṅ adzo di na « mfag makë, miasëki dzam sòṅ »? 23Nyè ai bò na: Mina, minë bod ya si, ma, mod ya yob. Mina, minë bod ya e si-ndon nyi, ma, masëki mod ya e si-ndon nyi. 24Mëkad mina na miayi wu a minsëm mian. Amu, ngë miayëbë ki na ma mënë, miayi wu a minsëm mian. 25Bò ai nyè na: Wa onë za? Yesus nyè ai bò na: Dze ben mawuwu ndzug akòbò ai mina? 26Mëbëlë abui mam ya mayean kòbò asu daan, mëtsigi ntol, dzam da, e mod angalom ma anë bëbëla, ndò e mam mëngawog abë nyè, mmò makad si-ndon. 27Bò tègè yëm na akòbò ai bò adzo esya. 28Yesus nyè ai bò na: Eyòṅ miayi yen mòn mod, eyòṅ te miayi yëm na ma mënë, ndò fë mabò ki dzom ziṅ ai ngul dzama, dzam da makòbò e kan ya Tara angayëgëlë ma. 29Ndò fë, e mod angalom ma anë ai ma; andzëki ma lig etam, amu mabò e dzi yanyëb nyè a nnëm kòm esë. 30Abui bod angayëbë nyè ai nkòban akobògò e mam ma.

Bëbëla ayi bò na mibò fili

31Ndò Yesus adzo ai e Yuden bëngayëbë nyè na: Ngë mialaṅan ai ebug dzama, minë bëyègè bama mfaṅ. 32Miayi yëm bëbëla, bëbëla abò fë mina fili. 33Bò ai nyè na: Binë mvòṅ Abraham, ndò biabë ya ki bò mod ziṅ olò, tò eyòṅ. Eyë onë dzam dzo ya na: « Miayi bò fili »? 34Yesus nyè ai bò na: Amen, amen, makad mina na: E mod osë asëm, anë olò nsëm. 35Olò watòbò ki kole a nda, mòn ṅnyè atòbò ete kole. 36Ngë mòn ayi mina bò fili, miayi bò fili mfaṅ. 37Mayëm na minë mvòṅ Abraham. Dzam da, miadzëṅ na miawoe ma, amu ebug dzama yanyian ki abë mina. 38Makòbò e mam mëngayen abë tara. Mina fë, boan e mam mingawog abë tara.

Satan ṅnyè anë esoa

39Bò ai nyè na: Esya waan ṅnyè anë Abraham. Yesus nyè ai bò na: ngë mitoa bòn bë Abraham, ngë miabò mimboan mie. 40Etoa dzi, miadzëṅ na miawoe ma, e ma ya mëkad mina e bëbëla mëngawog abë Zamba. Abraham andzëki bò nala. 41Mina, miabò mimboan mi esya waan. Bò ai nyè na: Biandzëki byali a ngòbinda. Bibëlë esya mbòg, Zamba. 42Yesus nyè ai bò na: Ngë Zamba atoa esya waan, ngë miadiṅ ma, amu mëngasò abë Zamba, ndò fë madugan we. Amu, mandzëki sòṅ ai mamen, ṅnyè angalom ma. 43Asu dze miawog ki ayëgëlë dama? Kë amu miasëki dzam vogolo ebug dzama. 44Mina, miasò abë esya waan, Satan, ndò miadiṅ na miabò ṅyian waan. Ṅnyè anë hm ṅwoe bod atarigi a mëtari, ndò atëlë ki a bëbëla, amu bëbëla asëki abë nyè. Eyòṅ akòbò minnal, akòbò mam moe, amu anë mod minnal, atoa fë esya minnal. 45Mfag ya abë ma, miayëbë ki ma mbol makòbò bëbëla. 46Za ya abë mina ayi ma tam sama etòm nsëm? Ngë makòbò bëbëla, asu dze miayëbë ki ma? 47E mod asò abë Zamba avogolo bibug bi Zamba. Asu te miavogolo ki, amu miasëki bod bë Zamba.

Osusua Abraham, ma, mënë

48Yuden bò ai nyè na: Biandzë toan dzo na: Onë man Samaritan#8,48Yuden bayen na Yesus alugu ki Zamba mfaṅ, asu te badzo na anë man Samaritan. ai na obëlë fë mbë nsisim a? 49Yesus nyè na: Mabëlë ki mbë nsisim, dzam da, makam Tara. Mina miabyandi ma. 50Ma madzëṅ ki duma dama. E mod adzëṅ, atsigi ntol, anë. 51Amen, amen, makad mina, ngë mod abaala ebug dzama, ayi ki yen awu tò eyòṅ. 52Yuden bò ai nyè na: Bingayëm ya fò na obëlë mbë nsisim. Abraham angawu, bëprofet bëwuu fë, wa na: Ngë mod abaala ebug dzama, ayi ki wodan awu tò eyòṅ. 53Dze, yë walod e Tara waan Abraham ya angawu? Bëprofèt bëngawu fë. Wavëg na onë za ben? 54Yesus nyè na: Ngë mavë mamen duma, duma dama lasëki dzom. Esya wama ṅnyè avë ma duma, ṅnyè miadzo na anë Zamba waan, 55dzam da, miayëm ki nyè. Ngë madzo ana na, mayëm ki nyè, mëntoa mod minnal anë mina. Ndò hm, mayëm nyè, ndò fë mabaala ebug dzie. 56Esya waan Abraham angabë ataag na ayen amos wama, ndò angayen, afono fë. 57Yuden bò ai nyè na: Wasëki tò mimbu mëwom mëtan, ndò ongayen ya Abraham nga? 58Yesus nyè ai bò na: Amen, amen, makad mina na: Osusua yë na Abraham abyali, ma mënë#8,58«Ma mënë» anë dzoe Zamba a nnomo amvoe a nkòbò ebrea.. 59Ndò babodo ngòg na balum nyè. Ndò Yesus asòbò, akuig a tempel.

Currently Selected:

Yoh 8: NTE12

Highlight

Copy