Yoh 7

Babënyaṅ bë Yesus bayëbë ki nyè

1A mvus hala, Yesus angakë awulu a Galilea. Angabë ayii ki na akë awulu a Yudea, mbol Yuden bëmbë dzëṅë na bawoe nyè. 2Abog Bibëm#7,2Abog Bibëm anë mfaṅ a bog nen asu Yuden. Mëbog mënen mëngabë na: Abog Paska, abog Pentekoste, abog bibëm. Abog bibëm angabë na Yuden bakaṅ Zamba asu mëkoe bibuma ai wayn. Bëkarëga loṅ bibëm, bëntoa ete e kan fë bëngatòbò a nkod-nnam eyòṅ bëbolëge a nnam Egipten. Yuden angabë babi. 3Ndò babënyaṅ badzo ai nyè na: Kodogo ha, okë a Yudea, asu yë na bëyègè boe bëyen e mimboan wabò. 4Amu mod ziṅ abò ki dzom a asoe, eyòṅ ayi na bëyem nyè. Ngë wabò e mam ma, bò na si-ndon eyëm wa. 5Amu babënyaṅ bëngabë ki bëyëbëgë nyè. 6Yesus nyè ai bò na: Abog dama abë ki kui, hë abog daan ndò lakui abog asë. 7Si-ndon esëki mina dzam fëm, dzam da, yafëm ma asu mabòòlò dzò na mimboan mie minë abe. 8Mina, kaṅan a abog. Mayi ki bed a abog dili, amu abog dama abë ki dzie. 9Ai nkòban akòbògò nala, ndò angaligi a Galilea.

Yesus abed a Abog Bibëm a Yerusalem

10Eyòṅ babënyaṅ bëngabed a abog, ndò fë nyè abed, hë da, së ki a ngëëṅ, (angabed) hë anë asoe. 11Yuden#7,11-13Yohannes abëlan ai ebug Yuden kan ebè; Yuden atyan na bod ya bëtoa a efas nnam Yudea. Yuden atyan fë abë nyè na: Bënyia-bod-mvia, bëtëbë bë osu bë Yuden ya bafëm Yesus. bëngabë dzëṅë nyè a abog, bëdzoo na: Eyë anë ve? 12Enyënyam entoa a minkunda hë etòm dzie. Bëvòg bëdzoo na: anë mbëmbë mod, bëfë bëdzoo na: Kokoa, adug bod. 13Tò hm nala, tègè ai e mod akòbò adzo die a yob, ai e wòṅ bëmbarëga Yuden. 14Abog angayi kui anë a zaṅ hali, ndò Yesus angabed a tempel, angayëgëlë. 15Yuden bëngakam, bò na: Eyë e nyò ayëm kalara he, tègè ai na angayègè? 16Yesus nyè na: ṅyëgëlan wama wawoge ki ai ma; onë e hi e nyò angalom ma. 17Ngë mod ayi na abò ṅyian woe, ayi yëm ngë ṅyëgëlan wasò abë Zamba, ngë ki na makòbò ai ngul dzama mamen. 18E mod akòbò ai ngul dzie, adzëṅ duma die. E nyò adzëṅ duma e mod angalom nyè, e nyòlò te anë sosoo, ndò fë ebom-kama esëki abë nyè. 19Së Moses ṅnyè angavë mina mvende a? Hë da, tò mbòg ya abë mina abaala ki mvende. A dze miadzëṅ na miawoe ma? 20Ndò nkunda ongayalan na: Onë ai mbë nsisim. Za adzëṅ na awoe wa? 21Yesus nyè ai bò na: Maabò hë mboan mbòg#7,21Mboan mbòg hi onë asimba ya Yesus angabò mbombog mvoè., ndò mina bësë miakam. 22Asu te Moses angavë mina akele, -së ki na lasò abë Moses, lasò a bëtara- ndò miakele bod a sabbat. 23Ngë bakele bod a amos sabbat asu yë na të mvende Moses yasole, ma miawog ai nyè olun, mbol mëbò nguma mod mvoè a sabbat nga? 24Të miabëbë bod a asu eyòṅ miatsig ntol; mitsigi ntol sosoo.

Yë Kristus nyò ana nga?

25Bod bëziṅ ya Yerusalem bëngadzo na: Së e mod nyò ṅnyè badzëṅ na bawoe a? 26Bëbëgë, akòbò a ngëëṅ, bò tègè nyè fèd. Dze, yë bëdzoe bëyëm ya ana na anë Kristus nga? 27Dzam da, biayëm mfag asò. Eyòṅ Kristus ansòò, mod ayi ki yëm mfag asò. 28Ndò Yesus angabam eyòṅ ayegëlë a tempel, nyè na: Miayëm fò ma, miyëmë fë mfag masò. Hë da, mandzëki sòṅ ai mamen; e nyò angalom ma anë sosoo, ṅnyè miayëm ki. 29Ma mayëm nyè, amu masò abë nyè, ndò fë, ṅnyè angalom ma. 30Bëngadzëṅ hm na babi nyè, hë tègè ai e mod afudi nyè wò a nyòl, amu hala awola die abë ki sò. 31Abui dzam ya nkunda ha bëngayëbë nyè bëngadzo na: Yë Kristus ayi fò bò mam alodo e mod nyò eyòṅ ayi sò nga?

Balom bod na bëkë bi Yesus

32Eyòṅ bëfarisea bëngawog nkunda olaṅëdan ai e mam ma asu die, ndò bëfada bënen ai bëfarisea bëngalom bod bisye na bëbi nyè. 33Yesus nyè na: Mëngënë ai mina etun abog, abog te mëdugan abë e nyò angalom ma. 34Miayi ma dzëṅ, tègè ma yen, ndò fë, mfag mayi tòbò, miasëki dzam sò. 35Yuden bëngadzo bò a bò na: E nyò ayi na akë ve, e kan ya biasëki nyè dzam sòm? Dze yë ayi na akë a mbole bë Grek#7,35Yuden bëziṅ bëngabole a nnam Palestina, ndò bëngakë batòbò a yob yob. Mbol hm angabë eyòṅ te na edzoe Grek endzò etoa, bod bëkòbògò fë nkòbò Grek, bëngaloe Yuden bëte na Yuden ya mbole Grek. Awe ngò hm e bod ba batsog na Yesus ayi kë yëdan mbëmbë foe., akë yëgëlë bëgrek? 36Ebug ahë dzo dzi na: Miayi ma dzëṅ, hë tègè ma yen, ndò fë, mfag mayi tòbò, miasëki dzam kë we, nala watyan ya?

Asoe e mëndim ya mëvëë

37Amos mvua ya abog #7,37 Abog bibëm akarëga tòbò mëlu zamgbal. A amos zamgbala, “amos nen”, bëfada bëkarëga kë a etam Siloam, bëkëë lè mëndim we, bëngamiam mò a alatar. Eyòṅ ziṅ na asu te Yesus adzo na emen ayi vë bod mëndim ete. , ndò Yesus angakom etye, angakòbò a yob ete na: ngë mod awog ekode, azaag abë ma, anyu. 38E mod ayëbë ma, anë Mfufub Ntilan ongadzo, “Asoe layi nyè so a abum, lësoege e mëndim mëvëë”. 39Angabë adzoo ai nsisim ya e bod bëngayëbë nyè bëyiigi bi. Amu hala nsisim wabë ki sò, tègè ai na Yesus abëlë ya duma.

Bod bënë kiṅ mëndzaṅ

40Bod bëziṅ ya nkunda bëngayi wog e bibug bi, bò na: E mod nyò anë profet mfaṅ. 41Bod bëfë bò na: E nyò anë Kristus; bëfë bò na: Dze, yë Kristus ayi sò a Galilea? 42Nga Mfufub Ntilan wadzo na a mvòṅ David, ai a Betleem a dzal David, ngò Kristus ayi sò? 43Nkunda bod ontoa hm kiṅ mëndzaṅ etòm dzie. 44Bëvòg bëziṅ ya ete bëngayi na bëbi nyè, dzam da mod tègè nyè fudi mò a nyòl.

Bëdzoe bayëbë ki Yesus

45Ndò bod bisye bakë a bëfada bënen ai bëfarisea, bò ai bò na: Asu dze mibò të sòṅ ai nyè? 46Bod bisye bò na: Mod ziṅ abë ya ki kòbò e kan nyi. 47Bëfarisea bò na: Dze, yë mia mikë ya a ndzaṅ? 48Za ya a bëdzoe ngë ki bëfarisea atam ya nyè ṅyëbë hala? 49Nkunda bod ya wayëgan mvende hi onë ṅyoan. 50Nikodemus nyè ai bò na: (Ṅnyè angatari nyè sò yen osusua; angabë mbòg ya abë bò) 51Yë mvende dzaan yakpèè mod ngë bandzëki tari wog nkat woe, bëyëmë fë e dzam abò? 52Bò ai nyè na: Dze, yë wa onë fë mod ya Galilea? Këlë tsas, wayi yen na profet ziṅ atye ki a Galilea.

Nlaṅ e mininga bëngabi aboo ai eza fam

53Ndò bëngadugan, anë mod a nda dzie.

Currently Selected:

Yoh 7: NTE12

Highlight

Copy