Yoh 2

Abog alug ya Kana

1A amos lala, alug angabë a Kana ya Galilea, nyia Yesus nyè angabë we. 2Yesus ai bëyègè boe bò fë bëngabë mbandan a alug. 3Ndò mëyòg mëngaman ha, nyia Yesus nyè ai nyè na: Babëlë ki mëyòg. 4Yesus nyè ai nyè na: Dze enë a zaṅ bia wa? Awola dama andzë ya kui a. 5Nyia nyè ai bod bisye na: E dzi esë ankad mina ana, hë mibòò. 6Bimvaṅ mëkòg bingabë hala bisaman, asu esob-nyòl Yuden, bitoa, anë emvaṅ mëbom mëbè ngë mëlè. 7Yesus nyè ai bò na: Dzalëgan mëndim a bimvaṅ. Ndò bëngadzala biè akui a nkòṅ a yob. 8Nyè ai bò na: Biedan hm, mikë vë ndzoe abog. Mbò bakë ba. 9A ndzoe abog akiègè e mëndim mëngavëṅan wayn ma, të yëm mfag asò, dzam da e bod bisye bëngabied mëndim bëyemë të, ndò ndzoe abog aloe nlug, 10nyè ai nyè na: Mod osë atari kad vë e wayn anë mbëṅ; eyòṅ bod bëbili ya wayn, bëngavë e nyò adaṅ ki mbëṅ. Mfag woe, obaala e wayn anë mbëṅ nyò azaag kui etoa dzi. 11Yesus angabò mëtari më ndëm a Kana ya Galilea, ndò angakuli duma die, bëyègè boe bëyëbë nyè. 12A mvus te, ndò angasigi a Kafarnao, ai nyè ai nyia woe, ai babënyaṅ boe, ai bëyègè boe, ndò bëngatòbò we, dzam da tègè tòbò kòm.

Yesus afubu tempel

Mt 21,12-13; Mk 11,15-17; Lk 19,45-46

13Paska Yuden angasubu ha, ndò Yesus angabed a Yerusalem. 14Ndò akòb a tempel na, bëkuan bë nyag ai mintomba ai abëṅ ai e bod batsende mòni, 15ndò akom nkas ai minkòl, angatsidan mintomba ai nyag a tempel, akubu mòni e bod batsende mòni a si, avundugu bëtëbëlë a si, 16nyè ai bëkuan bë abëṅ na: Vaagan e byem bi ha, mibë vëṅan nda Tara na ebò nda makit. 17Ndò bëyègè boe bazu tsog na anë ntilan na: Mvam asu nda dzoe yayi ki ma dzoge a miëëṅ#2,17Sal.69,9. 18Ndò Yuden bayalan, bò ai nyè na: Za ndëm walëdë bia asu yë na obò e kan nyi? 19Yesus nyè ai bò na: Bugan e nda-ngogëlan nyi, mëdugan dzò loṅ a taṅ mëlu mëlè. 20Yuden bò na: E nda-Zamba nyi engaloṅëban a taṅ mimbu mëwom mënyii ai misaman, ndò wayi dzò loṅ hë a taṅ mëlu mëlè nga? 21Ndë nyè angabë akòbògò adzo nda ya nyòl dzie. 22Eyòṅ hm angakui a sòṅ, ndò bëyègè boe badugan tsog na angakad nala, ndò bëngayëbë ntilan ai ebug Yesus angakòbò.

Yesus ayëm mod osë

23Mbol angabë a Yerusalem a abog Paska, ndò abui bod angayëbë a dzoe die ai ṅyënan bëyënë e ndëm angabë abòòg. 24Mfa woe, Yesus andzëki bi afidi ai bò, mbol angabë ayëmë bò, 25ai mbol angabë ki ayaṅan ai na mod atye nyè ndòṅ mod. Amu emen angabë ayëmë e dzi engabë a nnëm mod.

Currently Selected:

Yoh 2: NTE12

Highlight

Copy