Yoh 3

Yesus ban Nikodemus

1Mod ziṅ ya bëfarisea, dzoe na Nikodemus, nyia-modo-mvia#3,1Nikodemus angabë mod mbòg ya « ekoan nnam ». Angabë fë a edzëb-mbim Yesus. ya Yuden, 2angasò abë nyè ai alu, ndò adzo ai nyè na: A Rabbi, biayëm na wasò abë Zamba a etye ṅyëgëlë, amu mod ziṅ asëki dzam bò e kan ndëm wabò nyi ngë Zamba asëki ai nyè. 3Yesus nyè ai nyè na: Amen, amen, makad wa na, e nyò andzëki byali a yob, asëki dzam yen edzoe Zamba. 4Nikodemus nyè ai nyè na: Eyë mod anë dugan byali ya, eyòṅ antoa ya nnom? Yë anë dzam dugan nyian a abum nyia, adugan byali? 5Yesus nyè ai nyè na: Amen, amen, makad wa na: e nyò andzëki dugan byali a mëndim ai nsisim, asëki dzam nyian a ayòṅ Zamba. 6E dzi enë mbyalan a nyòl enë nyòl, e dzi enë mbyalan a nsisim enë nsisim. 7Obë kam na makad wa na, miayean dugan byali a yob. 8Evundu yafëbëlë e hom yayi, ndò wawog eduṅ dzie, hë da otëgë yëm e hom yasò, ngë e hom yakë. Nala ngò hm fë e nyò osë anë mbyalan abë nsisim anë. 9Ndò Nikodemus afèd, nyè ai nyè na: Eyë nala onë dzam yënan ya? 10Yesus nyè ai nyè na: Wa onë ṅyëgëlë a Israel, ndò wayëm ki e mam ma nga? 11Amen, amen, makad wa na: biakòbò e dzi biayëm, bibòòlò fë e dzi bingayen, hë da miayëbë ki mbòòlan waan. 12Ngë mam më si mmò mëhë kad mina ana ma, mina të yëbë, eyë miayi ṅyëbë eyòṅ mënkad mina mam më yob ya? 13Ndò fë, mod ziṅ abë ya ki bed a yob sësala hë e nyò angasus, asòò a yob, mòn mod. 14Ndò hm fë, akyaè ya Moses angabede nyò a nkod-nnam, nala ngò mòn mod ayean bedëban, 15asu yë na e nyò osë abëlë afidi abë nyè, abëlë enyiṅ kòm. 16Amu yë na, Zamba angadiṅ si-ndon e kan yë na avëë mbaṅ mòn woe, asu yë na e nyò osë ayebë nyè, abë kë a ndzaṅ, hë da abëlë enyiṅ kòm. 17Amu Zamba andzëki lom mòn a si na atsig ntol ya si, dzam da asu yë na si-ndon ekodeban abë nyè. 18E nyò ayëbë nyè, atëbë ki a nkat. E nyò ayëbë ki nyè, atëbë ya a nkat, amu andzëki ṅyëbë dzoe mbaṅ mòn Zamba. 19Nkat onë na, mfyè ongasò a si-ndon, ndò bod bëngadiṅ dibi alodo mfyè; amu mimboan miaban mingabë abe. 20Amu, e nyò osë abò abe, afëm mfyè, ndò fë akë ki a mfyè asu yë na mimboan mie miza kulan. 21E nyò abò sosoo azu a mfyè, asu yë na mimboan mie mikulan, amu minë mboan abë Zamba.

Yesus ban Yohannes Ndu-bodo

22A mvus te, ndò Yesus ai bëyègè boe bazu a si Yudea, ndò atòbò ai bò hala, angadu bod. 23Yohannes nyè angabë aduu a Ainon, babi ai Salim, amu mëndim mëngabë etere abui, bod bëngazu duuban. 24Amu, hala te Yohannes abë ki woaban a mbog. 25Ndò minlaṅëdan miakui a zaṅ bëyègè bë Yohannes ai man Yuden, mityan ai esob nyòl. 26Ndò bakë abë Yohannes, bò ai nyè na: A Rabbi, e mod angabë ai wa a Yordan ayat, a ongabòòlò, ṅnyè nyò angadu ya bod, ndò bod bësë bakë abë nyè. 27Yohannes nyè na: Mod asëki dzam nòṅ tò dzom ziṅ dzidzia, ngë andzëki dzò vëëban a yob. 28Mina bëben miabòòlò ma na mëngadzo na: sëki ma mënë Kristus, dzam da mënë nyè nloman a osu. 29E mod abëlë mininga ṅnyè anë nlugu; mvoe nlugu, a etëlë, ewogo kiṅ dzie, yatag abui asu kiṅ nlugu. Mintag miama mite midzie ya. 30Nyè ayean bugëban, ma ki mayean dzòdiban.

E mod asò a yob

31E nyò asò a yob, alod bod bësë. E nyò anë mod ya si-ndon, asò a si-ndon, ndò fë akòbò mam ya si. E nyò asò a yob, alod bod bësë. 32E mod angayen, awogo fë dò, abòòlò, dzam da, tò mod ayëbë ki mbòòlan woe. 33E nyò ayëbë mbòòlan woe, amëm na Zamba anë sosoo. 34E nyò ya Zamba angalom, akòbò mam më Zamba, amu avë ki nsisim a mëlanga. 35Esya adiṅ mòn, ndò angavë nyè dzom esë a mò. 36E nyò ayëbë mòn, abëlë enyiṅ kòm. E nyò ki abyandi mòn, ayi ki yen enyiṅ, dzam da, olun Zamba obaa nyè a nyòl.

Currently Selected:

Yoh 3: NTE12

Highlight

Copy