Jako 5

Tawnang saite na tea sädi py pa

1Nang ce tawngnang saite na ä, kai üng thui saite lo tea tängai ö. Nang ce lä ätüng käleng hai raw ö. Ätephüng-a mei nädylä, Säthaw ma nang ce tea bälung mawng saite na hai mätang bälai saite na tyng hai ö ai te phüng-a vi. 2Nang ce üng tawngnang saite na lä pra king ö vi ai. Nang ce üng aekhu aena saite na la khawraw ma ca king ö vi ai. 3Nang ce üng sui hai tangkae na lä süngei ma ca ö vi ai. Hini süngei ma ca saite sui hai tangkae na lä nang ce tea cy kha nang ce lä khimi kangtang na tea säbawng y te mätü te vi. Honi eica saite na lä nang ce üng ätabung na tea la mai kätyng kang vi ai. Kangkhüng üng Käni tyng te tähang mäteng ma nang ce lä nang ma ce tähang mätung ö mang te vi dy. 4Nang ce lä nang ma ce üng la-a caw ae saite khimi na tähang ävang na py y käla awng ö te vi. Äni ce üng hang saite tüng tea tängai ö. Tukha äte angxynlyng na sa haw saite Säthaw lä caw ae saite khimi na üng hang te ätüng tea thai vi dy. 5Nang ce lä hini älawngpre-a tengxyng y anghawtho kha nang ma ce ngai te kätyng awng ö te vi dy. Säthaw ma khimi ce tea tärae cei ai te kätü-a, nang ce lä nang ma ce üng ngaiphi saite bälung na qaitä kätyng awng ö te vi. 6Nang ce lä khimi käcüng na tea tärae cei hai kha bädü ö te vi dy. Äni lä nang ce tea tärawitha te y vi.

Änawngsa kha yng khi saite

7Yng saite kangby jä-ai na ä, tukätephüng-a Areng ly haile te khytä aering ö. Lai sa saite na lä älawng üng ävang ting saite äthai na dang te khytä, angcü hai kangkhüng üng khö tui na tea khung kha aering te phüng aedawng ö. 8Nang ce lä mä-ai üng Areng ly haile hethang kätü lä aenai te phüng-a cakhi-a änawngsa ö.

9Yng saite kangby jä-ai na ä, nang ma ce tingtawi khimi phüng aethui ö hang. Hokä y dylä, Areng lä nang ce tea tärae cei vi ai. Tärae cei saite kung lä thokhae teng-a aedaw te vi dy. 10Yng saite kangby jä-ai na ä, mä-ai üng Areng üng Angthang thui saite buisaw na aeme aeqa te na phüng tea dawng ö lawi. Äni ce lä mätang bälai kha khung ö te vi dy. Nang ce la äni ce täthei awng hethang kae ö te by vi. 11Änawngsa kha khung saite khimi na tea Säthaw ma tähang kähawi py vi näkha thui te nang ce ma mäny ö te vi. Nang ce lä Joba üng änawngsa saite phüng thai ö pyng te vi dy. Areng ma kangkhüng-a äni tea säbawng saite phüng nang ce lä thai ö pyng te vi dy. Areng lä bälung äkäneng hai khimi ce tea bäheng te vi.

12Yng saite kangby jä-ai na ä, kai thui saite na tea tängai ö! Nang ce lä älo aely kälengky-a aedo te kätü-a, täking ö hang. Känipre hai, y dylä älawngpre hai, y dylä ätete hae haetä hai la täking ö hang. Nang ce ma “üng” näkha thui hethang ngai dylä, “üng” näkha thui ö. Nang ce ma “y” näkha thui hethang ngai dylä, “y” näkha thui ö. Y dylä, Säthaw ma nang ce tea tärae cei ai.

Yng saite hai aetang saite

13Nang ce thung-a khimi lawngtä lä mätang bälai te awng mei. Äni lä aetang sy. Anghawtho saite lawng lawngtä awng mei. Äni lä Säthaw tea ae-awi na hai bälaw sy. 14Nang ce thung-a lawng lawngtä lä känaw käsaw awng mei. Äni lä kangkawng üng mätawngky na bung ka kha känaw käsaw awng saite khimi tea Areng üng ämüng hai-a situi kälo ea äni ce ma aetang pa ö vi. 15Yng saite hai aetang te phüng-a, Areng lä Khimi känaw käsaw bung hawi sa pa vi ai. Tukha Areng ma äni bung mätha pa vi ai. Äni hunghö sa dylä, Areng lä äni üng hunghö na tea bälawi vi ai. 16Tukätephüng-a nang ma ce üng hunghö na lawng lawngtä tea aethui kha lawng lawngtä tähang aetang ö. Tudylä nang ce üng känaw käsaw lä hawi king ö vi ai. Khimi käcüng lawngtä üng aetang saite lä tengxyng y haidae awng kha mawcawng te vi. 17Elijae lä mä-ai kätyng khimi by kae. Äni ma khöne y hethang yng khü kha aetang pyng-a lä khö reng pa vi. Tukha hini älawng qawng-a khö reng te lä säning thungtä hai law tärutä awng pa te vi dy. 18Honi pyng-a äni lä mä-ai üng Areng tea khöne hethang aetang haile tyng pa be vi dy. Tukha Säthaw lä khöne hai kha cawbi cawthai na hai angti angjang na tho hai pa vi dy.

19Yng saite kangby jä-ai na ä, nang ce thung üng khimi lawngtä ma lo mitang tea tängai y dylä, khimi kälang lä äma üng kangby jä-ai tea ae-ui haile hai hethang äni tea säbawng vi dy näkha nä ö maisi. 20Hunghö sa saite khimi tea äma sa tämang saite lang üng aekö haile tyng hai saite khimi lä hini hunghö sa saite khimi bung dü saite thung üng aeqang vi ai näte mäny ö. Tukha Säthaw lä honi khimi üng hunghö awng mang saite na tea bälawi pa vi ai.

Currently Selected:

Jako 5: cekNT

Highlight

Copy