Апостолдордыҥ керектери 20

Павел Македония ла Елладада

1Тӱймеен токтоордо, Павел ӱренчиктерди алдырып, олорды ӱредип јакыйла, јакшылажып, Македония јаар атанды. 2Андагы јерлерди ӧдӱп, бӱдӱп тургандарды кӧп сӧстӧрлӧ тыҥыдып, Елладага келди. 3Анда ӱч ай јӱрӱп, Македонияла бурылар деп шӱӱди, нениҥ учун дезе ол Сирия јаар јӱзӱп баратса, иудейлер оны ӧлтӱрерге тургандар. 4Оны Верияныҥ кижизи, Пиррдиҥ уулы, Сосипатр, Фессалоникадаҥ Аристарх ла Секунд, Дервияныҥ кижизи Гаий, Тимофей, Асиядаҥ Тихик ле Трофим Асияга јетире ӱйдежип јӱргендер. 5Олор озолоп барала, бисти Троадада сакыгандар. 6Бис дезе, ачытпаган калаш быжырып јийтен кӱндердиҥ кийнинде Филиппыдаҥ јӱзӱп чыгала, беш кӱннеҥ олорго Троадага једип бардыс. Анда јети кӱн јӱрдис.

Павел уулды тиргискени

7Суббот кӱнниҥ кийнинде ӱренчиктер калаш сындырарга јуулышты. Эртезинде атанар деп, Павел олорло эрмектежип, тӱн ортозына јетире сӧс айтты. 8Бис јуулган ӱстиндеги кыпта кӧп јарыткыштар кӱйӱп турган. 9Павелдиҥ эрмек-куучыны удап барадарда, кӧзнӧктӧ Евтих деп бир уул ӱргӱлеп отурган. Учында уйкуга јыга соктырып, ӱчинчи каттаҥ јерге јыгылган. Оны јердеҥ кӧдӱрерде, ол божоп калтыр. 10Павел тӱжӱп, оныҥ ӱстине јаба јадып, айтты:

– Тӱймешпегер, ол тирӱ.

11Ӧрӧ чыгып, калаш сындырып, ажанды; таҥ атканча тапту эрмектежеле, чыгала, јӱре берди. 12Бу ортозында уулды эзен-амыр бойын экелип, айдыжы јок сӱӱнип, токынап калдылар.

Троаданаҥ Милет јаар јорыктаганы

13Бис дезе керепле Асс јаар озо јӱстис. Павелди анда отургызып аларга турганыс, ол бойы оноор јойу барар деп шӱӱп, анайда јакарган. 14Биске ол Асста туштаарда, оны керепке алып, Митилинага келдис. 15Оноортынаҥ јӱзӱп чыгала, эртезинде Хиоско теҥдештис, соҥы кӱн дезе Самоско јеттис, Трогиллияда бололо, база бир кӱннеҥ Милетке келдис. 16Асияда саадап калбаска, Павел Ефеске тӱшпес деп шӱӱген. Ол, аргалу болзо, Беженинчи дейтен кӱнде Иерусалимде болорго бачымдап турган.

Серкпедеги јаандарла айрылышканы

17Павел Милеттеҥ Ефес јаар улус ийип, серкпедеги јаандарды бойына алдырды. 18Олор једип келерде, айтты:

– Асияга келгели, баштапкы кӱннеҥ ала слерле кожо кажы ла кӱн канайда јӱргенимди билеригер: 19бастыра бойым јобожып, кӧстиҥ јажын тӧгӱп, иудейлердиҥ кара санаазынаҥ улам меге једишкен ченелтелерди ӧдӱп, Кайраканга иштедим. 20Слерге не де керегинде јарлыктагамда, слерди ончо улус алдында ла айылдар сайын неге де ӱреткемде, тузалу бир де неме божотподым. 21Кудайга баштанатаны, Иисус Христос Кайраканыска бӱдетени керегинде канайып иудейлерге, анайып еллиндерге де кереледим. 22Је бат, эмди Тынныҥ кӱӱнине багып, Иерусалим јаар барып јадым, анда меге не туштаарын билбей јадып. 23Билетеним јаҥыс: мени кынјы ла ачу-корон сакып јат деп айдып, Агару Тын ончо калалар сайын меге керелейт. 24Је мен јӱрӱмимди эмеш те баалабай јадым, Иисус Кайраканнаҥ алган ижимди ле керегимди – Кудайдыҥ улу јакшылыгыныҥ Сӱӱнчилӱ Јарын сӱӱнип јарлыктайтанын бӱдӱрип божодотон ло болзом. 25Кудайдыҥ Каандыгын јарлыктап, ортогордо базып јӱрген бойымныҥ чырайымды кемигер де база кӧрбӧс деп, эмди мен билерим. 26Оныҥ учун бӱгӱн слерге керелеп турум: ончозыныҥ канынаҥ мен ару, 27нениҥ учун дезе, бир де јажырбай, Кудайдыҥ амадузын слерге јарлыктагам.

28Бойыгарды ла ончо ӱӱрди чеберлеп корыгар! Кӱдӱчилер ӱӱрин кичеегени чилеп, слер де Бойыныҥ каныла Ол јӧӧгӧн Кайраканныҥ ла Кудайдыҥ Серкпезин – Агару Тын слерди ондо јааны эдип туткан Серкпени кичеегер. 29Јӱре берзем, слерге казыр бӧрӱлер кирип, ӱӱрге килебезин билерим.

30Ӱренчиктерди баштап алып, бойыныҥ кийнинеҥ апарарга, кӱн-тескери неме айдар улус слердиҥ де ортогордоҥ табылар. 31Оныҥ учун ойгу болыгар! Ӱч јылдыҥ туркунына кажыгарды ла кӧзимниҥ јажы акканча тӱн-тӱш токтобой ӱреткенимди ундыбагар.

32Эмди слерди, карындаштар, Кудайга ла Оныҥ сӧзиниҥ јакшылыгына берип јадым. Ол слерди тыҥыдар, бойын Кудайга агарулаган улус ортодо энчи берер аргалу. 33Мен кемнеҥ де мӧҥӱн де, алтын да, кийим де алайын дебедим. 34Меге ле мениле кожо јӱрген улуска керектӱ немелерди бу кызыл колымныҥ кӱчиле иштеп алганымды бойыгар билеригер. 35Мынайда иштеп, арга-чыдал јок улусты јӧмӧӧр керек, Иисус Кайраканныҥ Бойыныҥ «Алып турганы эмес, берип турганы оноҥ артык кежиктӱ» деген сӧзин ундыбас керек деп, слерге ончо јанынаҥ кӧргӱстим.

36Мынайда айдала, ол тизеленип, олорло кожо мӱргиди. 37Ончозы ыйлап, Павелдиҥ мойнына артылып, оны окшоп турдылар. 38Анчада ла «мени база кӧрбӧзигер» дегенине санааркадылар. Оноҥ оны керепке јетире ӱйдежип койдылар.

Currently Selected:

Апостолдордыҥ керектери 20: AltNTBC

Highlight

Copy