Апостолдордыҥ керектери 19

Павел Ефесте

1Аполлос Коринфте болгон ӧйдӧ Павел тӧҥ јерлерди ӧдӧлӧ, Ефеске келди. Анда бир канча ӱренчиктерди табала, 2олордоҥ сурады:

– Кудайга бӱделе, Агару Тынды алындыгар ба?

– Агару Тын барын укпадыс та – деп, олор каруу јандырдылар.

3Айдарда, Павел сурады:

– Слер канайда креске тӱшкенигер?

– Бис Иоанныҥ крезине тӱшкенис – деп, олор каруу јандырдылар. 4Павел айтты:

– Иоанн улуска кинчектеригерди алынып, Кудайга баштаныгар деп айдып, олорды креске тӱжӱрген. Олорго кийнинеҥ келип јатканга – Христос Иисуска бӱдигер деген.

5Олор мыны угала, Иисус Кайраканныҥ адында креске тӱштилер. 6Павел колын салып алкаарда, олорго Агару Тын тӱжӱп, ӧскӧ тилдерле эрмектенип, јарлыктай бердилер. 7Олор бастыразы он эки кире кижи болгон.

8Павел синагогага кирип, Кудайдыҥ Каандыгы керегинде сӧс блаажып ла бӱдӱндирип, ӱч айга коркыбай јарлыктаган. 9Је кезик улус катурканып, бӱтпей барып, јуун алдында Кайраканныҥ јолын јамандап турдылар. Айдарда, Павел олордоҥ јӱре берди. Ӱренчиктерди бойыла кожо алып, Тиранныҥ сургалында кажы ла кӱн эрмек-куучын ӧткӱрер болды. 10Анайып эки јылдыҥ туркунына болды, оныҥ учун Асияда јаткан ончо иудейлер де, еллиндер де Иисус Кайраканныҥ сӧзин уктылар.

11Кудай дезе Павел ажыра саҥ башка кайкамчылу ийде-кӱчтӱ керектер јайаар болды. 12Керек дезе, ол кийген арчуулдарды ла курларды алып, оору улуска тийгискенде, олор јазылып, кара јелбистер чыгып тургандар.

13Оноҥ болгой неме билер бир кезик тенибер иудейлер де Иисус Кайраканныҥ адын адап, ӧзӧк-буурында кара јелбистер бар улустыҥ алдында айдар болдылар:

– Павел јарлыктап турган Иисустыҥ адын адап, слерге јакарып турубыс!

14Олор иудей укту Скева деп улу абыстыҥ јети уулы болгон. 15Је кара јелбис олорго айтты:

– Иисусты билерим, Павел де меге таныш, а слер кемдер?

16Ӧзӧк-буурында кара јелбистӱ кижи олорго чурап барала, ончозыныҥ той-токпогын берди, олор ол айылдаҥ куу-јылаҥаш ла каны-јини јайраган чыга јӱгӱрдилер.

17Бу болгоны Ефесте јаткан ончо иудейлерге де, еллиндерге де угуларда, ончозы коркый бердилер, Иисус Кайраканныҥ ады улуркадылды. 18Кудайга бӱткендердеҥ кӧп улус келип, бойыныҥ керектерин ачып ла јарлап турдылар. 19Илбизиндеп јӱргендердиҥ тапту кӧбизи тӱрбектерин чогуп, ончо улус кӧзинче ӧртӧдилер. Баазын чотоп кӧрӧрдӧ, бежен муҥ мӧҥӱн акчага турар болды.

20Кайраканныҥ сӧзи анайып элбеде јайылып, кӱч алынып турды.

21Мыныҥ кийнинде Павел Македония ла Ахаияны ӧдӧлӧ, Иерусалимге барар деп, тынга баштадып шӱӱп, айтты:

– Анда бололо, меге Римди де кӧрӧр керек.

22Болушчыларыныҥ экӱзин – Тимофей ле Ерастты Македония јаар ийип, бойы кезек ӧйгӧ Асияда артып калды.

Ефестеги тӱймеен

23Бу ӧйдӧ Кайраканныҥ јолына удура јаан тӱймеен болды. 24Мӧҥӱн эдимдердиҥ узы Димитрий деп кижи мӧҥӱннеҥ Артемиданыҥ байзыҥыныҥ сомдорын эдип, устарга јакшы иштеп алар арга берип турган. 25Ол олорды ла андый ок ӧскӧ дӧ устарды јууйла, айтты:

– Најылар! Бу иштеҥ аргалу јадыныс камаандузын билеригер. 26Кижиниҥ колыла эдилгени кудайлар эмес деп айдып, бу Павел бойыныҥ ӱредӱзиле јаҥыс та Ефесте эмес, је Асия ичинде кӧп улусты јаман керекке баштап алганын кӧрӱп ле угуп јадыгар. 27Биске оныҥ јеткер-чочыдузы јаҥыс та ижибисти кыйа кӧрӱп баштаарында эмес, је улу абакай кудай Артемиданыҥ ӧргӧӧзин неге де бодобой баргылаар, бастыра Асия ла телекей бажырган кудайыс улу болгон учурын јылыйтар.

28Мыны угала, олор казырланып,

– Ефестиҥ Артемидазы улу! – деп, кыйгырыжа бердилер.

29Кала кӱйбӱреп, Павелдиҥ эки јолдожын – Македонияныҥ улузын Гаий ле Аристархты тудуп, улус јуулатан јер јаар ончозы бир кижидий јӱгӱрдилер. 30Павел улустыҥ ортозына барып кирейин деерде, ӱренчиктер оны божотпой турдылар. 31Анайда ок Асияныҥ кезик јаандары, Павелдиҥ најылары, ого улус ийип, јуунга барбазын деп сурадылар.

32Ол ӧйдӧ бирӱзи бир, экинчизи эки деп кыйгырыжып турды, нениҥ учун дезе јуунныҥ аайы-бажы јок болгон. Не керектӱ јуулганын кӧбизи билбес те болгон. 33Ол тушта иудейлер Александр деп кижини ичкери чыгаргандар. Кезиктери улус ортодоҥ ого јӧп айдып турдылар. Александр колыла јаҥып, улуска сӧс айдарга сананды. 34Је ол иудей кижи болгонын билеле, ончозы бир ӱнле: «Ефестиҥ Артемидазы улу!» – деп, кыйгырыжып чыкты. Мынайда эки саат кире кыйгырдылар. 35Каланыҥ качызы олорды токунадала, айтты:

– Ефестиҥ улузы! Ефес кала улу Артемиданыҥ ла теҥеридеҥ тӱшкен оныҥ сӱр-кебериниҥ коручызы болгонын ак-јарыкта кем билбес? 36Мында блааш-тартыш јок болзо, слерге токыналу болор, изӱ тарыйын неме этпес керек. 37Слер дезе байзыҥды да тонобогон, абакай кудайыгарды да јамандабаган бу эр улусты экелдигер. 38Димитрий ле оныла кожо ӧскӧ дӧ устар кемге-кемге комыдалду болзо, јаргы ла проконсулдар бар: бой-бойына комыдазын. 39База кандый-бир неме бедиреп турган болзогор, ол учурлу јуунда кӧрӱлер. 40Бу јуун учун актанып болбозыс, бир де шылтак јокко бӱгӱн болгон тӱймеен учун бисти бурулаар чочыду бар.

Мынайда айдала, ол јуулган улусты божодып ийди.

Currently Selected:

Апостолдордыҥ керектери 19: AltNTBC

Highlight

Copy