Mareko 5

PENE V - 5

Te aronga demoni i te aere anga ki roto i te anana puaka: e te tamaine a Iairo, e te vaine i mate i te atekeria i te akaora angaia.

1E #Mata 8:28; Luka 8:26TAPAE atura ratou ki tetai pae i taua roto ra, i te enua i to Gadara. 2E kia akaruke aia i te pai ra, kua aravei maira iaia i reira ra, tetai tangata i uruia e te vaerua viivii, no roto mai i te au tanumanga ra; 3E noo tamou aia ki roto i taua au tanumanga ra; e kare rava e tangata e tika kia tapeka iaia, kare rai oki i te pirianganaoa: 4I tapeka putuputuia na oki aia i te auri e te pirianganaoa, kua motu te pirianganaoa, e kua atiati te auri iaia: e kare ua e tangata e rarataʼi. 5E noo tamou aia i te maunga i te po e te ao, e i roto i te au tanumanga ra, kapiki aere uaʼi ma te kotikoti iaia uaorai ki te toka. 6E kia akara mai aia ia Iesu i te atea ke ra, kua oro maira, e akatopa maira, kapiki nui maira, na ko maira, 7Eaa taau iaku nei, e Iesu, e te Tamaiti a te Atua teitei? Te pati atu nei au ia koe i te ingoa o te Atua, auraka koe e akamamae iaku. 8I tuatua na oki aia kiaia, Ka aere koe ki vao, e tenana vaerua viivii, i tenana tangata. 9Kua ui atura aia kiaia, Koai toou ingoa? Kua tuatua maira aia, na ko maira, Ko Manotini toku ingoa, e manganui oki matou. 10Kua maata ua maira tona kaku iaia, auraka aia e tuaru ke atu ia ratou i te reira enua. 11E anana puaka maata tei reira, i te kai anga i te kai, i runga i te maunga. 12Kua kaku maira te au demoni ravarai iaia, na ko maira, E tuku koe ia matou kia tomo ki roto i tera ra anana puaka. 13Kua tuku aturā Iesu ia ratou i reira. Aere atura te au vaerua viivii ra ki vao, tomo atura ki roto i te au puaka: oro ua atura taua anana, e rua katoa tausani, na te mato, e raro rava i taua roto ra; mate takiri atura i roto i te vai. 14Ati atura te aronga i angai i te au puaka ra, akakite aere atura i roto i te oire e te au kainga ra. Kua aere maira oki to reira ki vao e akara i taua mea ra. 15E tae maira ratou kia Iesu ra, kite maira iaia i tei uruia e te demoni ra, tei iaia oki te manotini ra, i te noo marie anga, kua kakau oki i te kakau, e ma tona ngakau tikai; mataku akera ratou. 16E kia akakite atu te aronga i kite ia ratou i tei raveia i taua tangata demoni ra, e i te anana puaka ra oki, 17#Mata 8:34; Anga 16:39Kua akateni atura oki ratou iaia i reira ra, kia aere ke atu aia i to ratou ra ngai. 18E tei te aereanga mai aia ki runga te pai, #Luka 8:38kua pati ua maira te tangata i uruia e te demoni ra e, ei vaitata katoao aia iaia. 19Kare rā Iesu i akatika atu, kua na ko atura kiaia, Ka aere i to ngutuare i toou au taeake, e akakite atu kia ratou i taua mea maata ta te Atua i rave io nei i te aroa ia koe. 20Aere atura aia, akakite aere atura i #5:20 Nga oire okotai ngauru.Dekapoli katoa ra, i te maata o ta Iesu ravenga kiaia; umere anake iora te tangata ravarai.

21 # Mata 9:1; Luka 8:40 E kia oki aturā Iesu i tetai pae na runga i te pai, e urupu maata tei uipa mai kiaia ra, i te pae rai o taua roto ra. 22#Mata 9:18; Luka 8:41E i na, te aere maira tetai tutara o te sunago, ko Iairo te ingoa, e kite maira aia iaia, kua akatopa iora ki te vaevae o Iesu ra, 23Kua tuatua meitaki maira kiaia, na ko maira, Kua vaitata taku tamaine iti i te mate, ka aere maira koe, e tuku i to rima ki runga iaia, kia meitaki aia, e ka ora ïa aia. 24Aere atura aia raua katoa; e te tangata oki e manganui, te ototitoti maira i muringao iaia. 25#Levi 15:25; Mata 9:20E tetai vaine, raungauru ma rua akera ona mataiti, i te mate ua anga i te atekeria. 26I rapakauia na oki aia e te aronga rapakau ra e manganui, kua pou rava tona apinga, kare rava i ora, te maata ua ra tona maki. 27E kite akera aia ia Iesu, kua na muri maira i te aere, na roto i taua aereanga tangata ra, kua akatukia atura tona kakau. 28Na ko akera, Kia akatukia ua atu au i tona kakau, ka ora ïa au. 29Mao iora taua atekeria ra i reira, e kite iora aia iaia uaorai, kua ora aia i taua maki nona ra. 30Kite akerā Iesu #Luka 6:19; 8:46e mana tei riro atu no roto iaia i reira, kua ariu akera i te aerenga tangata ra, na ko akera, Koai tei akatukia mai i toku kakau nei? 31E kua na ko maira tana au pipi kiaia, Te kite mai nei koe i te tangata tini nei te ototi anga atu ia koe, e ka ui mai oki koe e, Naai i akatukia mai kiaku? 32Kua akarau aturā Iesu, kia kite aia iaia i tei pera maira. 33Kua aere maira taua vaine ra ma te mataku e te rutetetete, kua kite iora i te tu ke i akatupuia i roto iaia, kua tipapa iora ki raro ki mua iaia, kua aaki ua maira i te tuatua-mou. 34E kua karanga atura aia kiaia, E taku tamaine, #Mata 9:22; Mare 10:52; Anga 14:9kua ora koe i toou akarongo, ka aere koe ma te au, e ma te ora i to maki. 35#Luka 8:49Kare i mutu taua tuatua ra, ko te karere maira no ko i te tutara o te sunago ra, na ko maira, Kua mate rava to tamaine; eaa koe e tamanamanata atu e i te Orometua? 36E kite akerā Iesu i taua tuatua ra, kua na ko atura i taua tuatua ra, Auraka e mataku, ka akarongo ua mai koe. 37E kare atura i tika iaia kia aru mai te tangata, mari ra ko Petero, ko Iakobo, e te taeake o Iakobo ra ko Ioane. 38E tae atura aia ki te are o taua tutara ra, kite atura aia i te aue, e te tangi maata o te aronga i ea ra. 39E kia tomo atura aia ki roto ra, kua na ko atura kia ratou, Eaa kotou i eaʼi, e i maataʼi to kotou aue? Kare te tamaine nei i mate, #Ioa 11:11kua moe ra. 40Kua taitoito maira ratou iaia. #Anga 9:40Kua tuku atura aia ia ratou ravarai ki vao, arataki atura i te metua tane e te metua vaine o taua tamaine ra, e te aronga i aru mai iaia ra, tomo atura ki roto i te pia, tei reira taua tamaine ra i te vai ua anga. 41Kua rave atura i te rima o taua tamaine ra, na ko atura iaia, Talita kumi: tera te akatau anga, E maine, ka tu ki runga, te akaue atu nei au ia koe. 42Kua tu maira taua tamaine ra ki runga i reira, aaere iora, raungauru ma rua oki ona mataiti; va maata ua iora ratou. 43#Mata 8:4; 9:30; 12:16; 17:9; Mare 3:12; Luka 5:14Kua ako ua atura aia kia ratou e, auraka rava e akakite atu ki te tangata: kua akaue atu oki i te manga na taua tamaine.

Currently Selected:

Mareko 5: CIMB

Highlight

Copy