Mak 9

1Tɔn, ki Yisa bia yet linba na poorpo a “Barmɔniie ki n yaa n beti, siab be nna ki daa kan kpo see ki bi tan la Yennu naan baaru nan paŋ.”

Yisa gbanant lebitu labaar

(Matiu 17.1-13; Luk 9.28-36)

2Li poorpoe ki li tan teen daa ŋannloob, ki Yisa jii Piita nan Jems nan Jɔɔnn ki doo namm jɔɔr nba fɔk bonchiann paak, bi kuukɔɔ. Li yoo ki bi la ki u lebit; 3ki u tiat nyirik ki peen par par. Ki sɔɔ kaa tingbouŋ na ni ki sa fit penn tiat kaman nan ŋann na. 4Ki bi la ki Elaija nan Moses lekit yomm ki piak nanɔ. 5Ŋanne ki Piita yet Yisa a “Chanbaa, li ŋan nan ta be nna na. Ti sa faa lanbont ŋanntaae, ki yenn-ii tee a yar, ki leer-ii tee Moses yar, ki leer mun-ii tee Elaija yar.” 6Jaŋmaanii nba din soor Piita nan u leeb maŋ bonchiann na paak te ki u din ki mi wa yeen linba.

7Li yoo ki sanpagbouŋ dɔkit ki tan piimm; ki bi gbat kunkɔr sanpagbouŋ na ni, ki li yet a “N Bilonkakii na; gbiintir u mɔb man.” 8Ki bi jiant got, ŋaan ji ki la sɔɔ bi boor, see Yisa kuukɔɔ.

9Ba nyii jɔɔr maŋ paak ki siik, ki Yisa kpaamm a bi daa beer sɔɔ linba ki bi la na nan yoo nba ki ŋɔɔ nisaarik Bik tan sa fiir kuun ni.

10Ki bi sak u kpaanii maŋ, ki dia labaar maŋ bi sinsuuk ni; bi bia boi bi leeb a “ ‘Kuun fiiru’ na paak tee bee?” 11Ki bi tan boiɔ a “Bee te ki sennu wannteeb yaa a see ki Yennu sɔkinii Elaijae baar Masia sinsinni?”

12Ki Yisa betib a “Elaija set baar sinsinn na a wun tan ŋamm bonsiar kur fanu. Ŋaan li bia sɔb nlee Yennu gbouŋ ni? Li sɔb a see min nisaarik Bik lek tan dii fara bonchiann, ki niib bia tan sa siannin. 13N beerie, Elaija poŋ baar na, ki niib diau gbaka gbaka nna ba loon biaŋinba, kaman nan la sɔb Yennu gbouŋ ni biaŋinba na.”

Yisa nba din nyinn narinbiiuk naasinbik ni biaŋinba

(Matiu 17.14-21; Luk 9.37-43a)

14Tɔn, Yisa nan Piita nan Jems nan Jɔɔnn nba din tan baar u poorpoweiteleeb boor ni yoonba ki bi la niburchiauŋ lakin; ki sennu wannteeb bia nɔi namm mɔniɔk. 15Nibur maŋ nba la Yisa yoonba ki li teemm bakitnauŋ, ki bi tin baar foontɔ. 16Ŋanne ki u boi u poorpoweiteeb na a “I nɔi namm lannpo paake?”

17Ki jasɔɔ nna nyii nibur maŋ ni ki jiin a “Chanbaa, mine bo baat nan n bija a boor ni, kimaan narinbiiuk be u ni ki li te ki u ki fit piaki. 18Siaminba kura ki narinbiiuk maŋ fiir, li tuu lu-u tiŋ nie, ki mɔsankunkouŋ nyi u mɔb ni, ki u nyana-n sar nan leer, ki u gbanant kur-n wakir ken ken; ki n barin a poorpoweiteeb na a bin nyinn narinbiiuk maŋ, ŋaan ki bi gbar.”

19Li yoo ki Yisa ji yakii ki yeen a “Yimm mɔtana niib yada mantik pɔɔr hei; n sa yukir nani nlee? Nlee yooe ki n sa di sukuru naniini? Baat nan bik maŋ nna.” 20Ki bi baar nanɔ Yisa boor. Narinbiiuk na nba la Yisa yoonba ki li fiir bik na ni ki lu-u tiŋ ni, ki u dɔɔ ki birin, ki mɔsankunkouŋ nyi u mɔb ni. 21Ki Yisa boi u baa a “Nlee yooe ki li piin ki teeu nna?”

Ki u jiin a “Li piinɔ u bisin niewa. 22Yoo bonchianne ki narinbiiuk na tuu te ki u baa muu ni, nan nyun ni, a wun lek kpiu. Li-i tee ki a sa fit teen siari, a lek tint ninbaauk ki sommit.”

23Ki Yisa sak a “Nn, a mɔŋ-i sa fit teenin yadaie, bonsiar ki paar wunba teen yada na boor ni.”

24Ki jɔɔ na yikin sanpaapowa a “N teena yadawa, ŋaan sommitin ki n teena yada ki pukin.”

25Yisa nba la ki nibur na ŋammit tut baat bi paak na, ki u tian narinbiiuk na paak a “Fin narinmu-tuukpaar na, mine tura mɔb, nyimin u ni ki ji daa mi jent u ni.”

26Ki narinbiiuk na yikin ki tɔkir bik maŋ ki lu-u tiŋ ni gbab, ŋaan nyii u ni; ki bik maŋ ji naan nan u kpoe na, ki niib na ni bonchiann fabin a “U kpoe na.” 27Ŋaan ki Yisa soor bik maŋ nuu ki sommɔ ki u fiir set. 28Yisa nba din tan kɔɔ ŋaak na ni yoonba, ki u poorpoweiteeb boiɔ, bi kuukɔɔ, a “Bee ki timm ŋanin bo ki fit nyinn narinbiiuk na?”

29Ki u betib a “I kan fit nyinn narinbiiuk na booru see ki i lor mɔi ki mei Yennu.”

Yisa nba ŋamm pak u kuun po biaŋinba

(Matiu 17.22-23; Luk 9.43b-45)

30Ki Yisa nan u poorpoweiteeb maŋ nyii leŋ ki tɔkin Galilee tingbouŋ po. Ŋaan u din ki loon sɔɔ-n bann wa be siaminba, 31kimaan u din want u poorpoweiteeb na ki beerib a “Bi tan sa jii min nisaarik Bik ki teenin niib nuu ni ki bin kpin, ŋaan li daa ŋanntaa daar ki n tan sa fiir kuun niwa.”

32Ki u poorpoweiteeb maŋ din ki bann barii maŋ paaki, ŋaan mun tiin jaŋmaanii nan bin boiɔ.

Ŋmee tee nijaanni?

(Matiu 18.1-5; Luk 9.46-48)

33Tɔn, ki Yisa nan u poorpoweiteeb nba din baar Kapenaum ki tan kɔɔ ŋaak ni yoonba ki u boib a “I bo dia labalannpoe sɔnu ni na?”

34Ŋaan ki bi ŋmina, kimaan sɔnu ni bi nɔi nan bi leeb yudantuk paake bi sinsuuk ni. 35Ŋanne ki u ŋmant ki kar, ŋaan yiin u poorpoweiteeb piik nan bannlee na, ki betib a “Wunba kur loon wun teen yudaanɔ, see ki wun kpint u mɔŋ ki teen tarik i kur ni, ki bia teen i kur daabir,” 36ŋaan jii bik nna ki sennɔ bi sinsuuk ni, ki puur u nii ki wɔb bik maŋ, ŋaan betib a 37“Wunba kur gaar bik na booru n sann paak, mine ki u gaarin; ki wunba gaarin, u ki gaar n kuukɔɔ kaa, ŋaan u gaar wunba tumin nee na mun biak.”

Wunba ki kɔn nant, u see ti poore

(Luk 9.49-50)

38Tɔn, ki Jɔɔnn bet Yisa a “Wanntɔɔ, ti la ki jasɔɔ nna mun taan a sann ki nyint narinbiit niib ni, ki ti yakii nanɔ a wun nyik, kimaan u ki tee ti ni yenɔ.”

39Ki Yisa betib a “I daa beerɔ mani, kimaan wunba sa taa n sann ki tun bakitnauŋ toonn, li poorpo u ji kan fit pak siar ki biirimi. 40Wunba kur ki kɔn nant, u see ti poore. 41Barmɔniie ki n beeri na, wunba kur got lai ki turi nyun, a ya tee n yab na paak, li daanɔ tan kan mi kɔŋ u paauko.”

Jinjammii labaar

(Matiu 18.6-9; Luk 17.1-2)

42Ki Yisa bia ŋamm ki yet a “Wunba te ki waas maŋ nba teenin yada na yenɔkɔɔ tun toonbiit, bi-i bo-i lann naar li daanɔ turu ni ki tutɔ nann ki lu-u mɔkgbeŋŋir ni gbaa, li bo sii sɔ ki turɔ. 43-44Li paak, a nuu-i te ki a yaa a tun toonbiit, fan potir ki lu. Li sɔ ki nirɔ-ii mɔk nuu yennkɔɔ ki la manfoor nba kaa gbennu, ki gar wun tan kɔɔ muu nba kan mi kpeen na ni nan u nii kur. 45-46A taapauŋ-i te ki a yaa a tun toonbiit, fan potir lu. Li sɔ ki nirɔ-ii mɔk taayenn ki la manfoor nba kaa gbennu, ki gar wuu mɔk taa ŋannlee ŋaan Yennu-n tan kɔɔnɔ muu maŋ ni. 47A ninbinn-i te ki a yaa a tun toonbiit, fan kpakir ki lu. Li sɔ ki fan tan kɔɔ Yennu naan ni nan ninbinn yennkɔɔ ki gar fan tan kɔɔ muu maŋ ni nan ninbina ŋannlee. 48Leŋe ki ‘nanwuba nba ki kpenn na be ki dib. Ki muu nba bia ki kpeent na be ki dib.’

49“Yennu tan sa jii muue ki ŋamm sɔɔ kur kaman nan ba tuu jii yaarin ki ŋammit marouŋ nant biaŋinba na.

50“Yaarin man; ŋaan yaarin manu-i nyii, nlee ki a ji sa jiin li manu?

“Yii ŋaan ki i binbeŋ-ii tee kaman nan yaarin manu na i sinsuuk ni, ki laafia-ii be yimm nan i leeb sinsuuk ni.”

Currently Selected:

Mak 9: BIM

Highlight

Copy