Mak 10
10
Pooyêtu labaar
(Matiu 19.1-12; Luk 16.18)
1Ki Yisa nyii leŋ ki saan Judea tiŋ ni nan Jɔɔdann mɔk-pootir po; ki nigbouŋ bonchiann ji lakin u boor ni, ki u yaan wantib Yennu maan kaman nan wa poŋ tuu wantib biaŋinba na.
2Ki Farisiinba baar u boor ni, ki loon bin bikinɔ, ki boiɔ a “Sennu na chabit nan jɔɔ-n yêt u ŋaapoo amii?”
3Ŋanne ki u mun jiin buboit ki gatib a “Moses din turi sennu nlee ki jiin li po?”
4Ki bi jiin a “Moses din chab yaak a jɔɔ sa fit sɔb pooyêtu gbouŋ ŋaan yêt u ŋaapoo.”
5Ki Yisa betib a “I tubkangbata paake din te ki Moses sɔb sennu maŋ ki turi. 6Ŋaan Yennu nba din naan dunia pinpiik ni, ‘U din nan jɔɔ nan pooe.’ 7Linba na paak ki jɔɔ nan u ŋaapoo tuu sa nyik bi baanba nan bi naanba ŋaan kɔɔn leeb, ki bi niib bannlee-n taan ki teen gbananyenɔkɔɔ. 8Li paak, bi ji ki tee niib bannlee kaa, ŋaan bi ji tee niyenɔkɔɔe. 9Li paak, binba ki Yennu jii ki taan nan leeb, nisaarik-ii mi ki wun bɔkitib.”
10Ba din tan jen ŋaak ni yoonba, ki u poorpoweiteeb boiɔ barii maŋ paak nba tee biaŋinba. 11Ki u jiin yetib a “Jɔɔ nba yêt u ŋaapoo ŋaan kɔɔn pooganɔ, u tun bonchonchonn toonn, wa yêt poo nba ŋaan kɔɔn lɔɔ biaŋinba nawa. 12Nnee mun biak, poosɔɔ-i yêt u sɔrɔ ŋaan saan kun jaganɔ, u mun tun bonchonchonn toonna.”
Yisa nba senn mɔsonŋann waas paak biaŋinba
(Matiu 19.13-15; Luk 18.15-17)
13Tɔn, ki nisiab din tan baat nan bi waas Yisa boor ni a wun tan yii u nii bi paak; ŋaan ki u poorpoweiteeb tian bi paak. 14Ŋaan wa bann ba tian bi paak biaŋinba na ki u wutoor doo, ki u betib a “Ŋaant man ki waas maŋ-ii baat n boor ni na, ki daa tiammi, kimaan bi boorue yen Yennu naan. 15Barmɔniie ki n beeri na, wunba ki gaar Yennu naan kaman nan bik na, u kan mi kɔɔ li ni fabaa,” 16ŋaan gaar waas maŋ u nii ni, ki yii u nii bi paak, ŋaan senn mɔsonŋann bi paak.
Mɔkitsɔɔ po
(Matiu 19.16-30; Luk 18.18-30)
17Yisa nba din nyii leŋ ki saa maŋ, ki jasɔɔ tin ki chetɔ ki tan gbaan u tɔɔnn ni, ŋaan boiɔ a “Wanntɔŋanɔ, n sa teen nlee ki tan la manfoor nba kaa gbennu?”
18Ki Yisa jiin boiɔ a “Bee ki a yin niŋanɔ? Niŋansɔɔ kaa see Yennu kuukɔɔ. 19A poŋ mi Yennu sennii nba want biaŋinba, a ‘Daa kpi nirɔ; daa tuun bonchonchonn toona; daa jaami; daa tee faaksiara; daa ŋmab nirɔ; i baakit a baa nan a naa.’ ”
20Ki jɔɔ na yetɔ a “Wanntɔɔ, n poŋ sak linba na kur n bisin niewa.”
21Ki Yisa gotɔ sirrr nan loomm, ŋaan betɔ a “Ŋaan bonyennkɔɔe pɔta; i kun ki saa kɔi linba ki a mɔk, ki jii li likirii maŋ ki tur talasdamm, ki a tan sa la mɔkint sanpaapo; li poorpo ki a jenna kii waan.” 22Jɔɔ na nba din gbat linba na ki u par ni biir bonchiann, ki u ŋmat kun nan parbiir, kimaan u din mɔk mɔkint bonchiann.
23Ki Yisa ŋmant got u poorpoweiteeb na ki lint, ŋaan yetib a “Li sii paar bonchiann nan mɔkita-n kɔɔ Yennu naan ni.”
24Ki u barii maŋ yaar ŋaan litib; ki u bia ŋamm yetib a “N waas, li lek paar nan nirɔ-n kɔɔ Yennu naan ni. 25Li paar nan mɔkitɔɔ-n kɔɔ Yennu naan ni kaman nan lagumii nba kan fit kɔɔ kparpeenu miar ni nae.”
26Ki barii maŋ yaar ŋaan litib bonchiann, ki bi boi bi leeb a “Li-i tee nnaie, ŋmee ji sa fit ki la tinnu?”
27Ki u kpaa u nunii bi paak, ŋaan tan betib a “Linba na paar ki tur nisaarike, ŋaan li ki paar Yennu yaa boor ni, kimaan Yennu sa fit tun bonsiar kura.”
28Ŋanne ki Piita tɔr yetɔ a “Gotirii, timm ŋanin nyik ti bonsiar kure ŋaan waa-a.” 29Ki Yisa betib a “Barmɔniie ki n beeri na, wunba kur nyik u ŋaak, amii u ninjamm, amii u niipoob, amii u naanba, amii u baanba, amii u waas, amii u kpaant, n sann paak nan barŋanii na paak, 30u tan sa bia la bona ki lin gar wa nyik linba na. U tan sa la ŋei, nan ninjamm, nan niipoob, nan naanba, nan waas, nan kpaant, kobii-kobiie tingbouŋ na ni, ki bia gaar muksuk ki pukin; ki yoo nba baat na ki u bia tan sa la manfoor nba kaa gbennu. 31Ŋaan niib bonchiann nba dɔŋ tɔɔnn mɔtana na, bi tan sa jir poora, ki bonchiann nba mun bia joont poor mɔtana na tan sa dɔŋ gar tɔɔnn na.”
Yisa nba ŋamm pak u kuun po taar munntaa ni biaŋinba
(Matiu 20.17-19; Luk 18.31-34)
32Li yoo na ki Yisa nan u poorpoweiteeb din nyii sɔnu ni ki doo Jerusalem, ki u gar bi tɔɔnn po; ki li yaar ŋaan litib, ki jaŋmaanii bia soor nibur nba waa na kura. Ŋanne ki u yaan nyii nan u poorpoweiteeb piik nan bannlee na kpiŋ po, ki betib linba sa teenɔ, 33a “Nnara, ti do Jerusaleme, siaminba ki bi sa jii min nisaarik Bik ki kɔɔn Yennu jiantu yudamm nan sennu wannteeb nii ni a bin bu n buut ŋaan kpin, ki jii-n tur binba ki tee Juu teeb na; 34ki bi sa sarikin, ki siin mɔsant n paak, ki boon kpaasir, ki bia tan kpin, ŋaan li daa ŋanntaa daar ki n sa fiir kuun ni.”
Jems nan Jɔɔnn nba miar Yisa yudaantuk paak biaŋinba
(Matiu 20.20-28)
35Li yoo ki Jems nan Jɔɔnn, binba din tee Sebedee waas na, baar Yisa boor ni ki tan yetɔ a “Wanntɔɔ, ti loon ki a tun siare ki turit.”
36Ki u boib a “I loon ki n tun bee ki turiini?”
37Ki bi jiin a “Yoo nba ki a tan sa di a naan nan paŋ na, a tan ŋaan ki ti yenɔ-n kar a nuudiitu po, ki lɔɔ mun-n kar a nuugaŋ po.”
38Ki u jiin betib a “I ki mi ya mei linba po. I sa fit jii jikpiatir nba ki n yaa n jii nawa-aa? amii i sa fit di fara kaman nan ma sa di biaŋinba nawa-aa?”
39Ki bi jiin a “Ti sa fita.”
Ki u betib a “I set sa jii n jikpiatir nawa, ki bia di fara kaman nan ma sa di biaŋinba nawa. 40Ŋaan n ki mɔk yaak nba sa gann wunba tan sa kar n nuudiitu po nan n nuugaŋ po. Yennue gann binba tan sa kar li kinkaanii paak.”
41Ki Yisa poorpoweiteleeb piik na nba gbat nna yoonba, ki bi wutoa doo Jems nan Jɔɔnn paak. 42Ki Yisa yiin bi kura ki lakimm u boor, ŋaan betib a “I mɔŋ mi nan tingbouŋ na teeb yudamm binba bo guurib, bi dont bi mɔŋ; ki nijaana mun bia dia bi niib nan nunmɔnne; 43ŋaan yimm ŋanin, li daa tee nna kaa i sinsuuk ni. I sɔɔ-i loon wun teen nifojaann, see ki wun teen u mɔŋ sɔɔ kura toontunnɔ; 44ki wunba mun loon wun teen yudaanɔ, see ki wun teen sɔɔ kura daabir; 45kimaan min nisaarik Bik, n ki baar ma niib-n tun turin kaa, ŋaan n baar ma n tun ki tur niibe, ki bia kpo a n te ki niib bonchiann-n la tinnu.”
Yisa nba nyɔɔnt jɔɔŋ ninbina biaŋinba
(Matiu 20.29-34; Luk 18.35-43)
46Tɔn, ki Yisa nan u poorpoweiteeb din baar Jeriko ki tan nyii, ki ŋamm nan niburchiauŋ tɔk saa; ki jɔɔnsɔɔ din be ki tee miatɔɔ, ki kar sɔnjokpiŋ, ki u sann yi Batimeus, wunba tee Timeus bija na. 47Wa tan gbat a Yisa wunba tee Nasaret nirɔ na be yoonba, ki u yikin sanpaapowa a “Yisa, David yaaboonn, tinimin ninbaauk.”
48Ki niib bonchiann tian u paak a wun ŋmin. Ŋaan ki u bia ŋamm yikin sanpaapowa a “David yaaboonn, tinimin ninbaauk.”
49Ki Yisa set ki yet a “Yiintɔ na man.”
Ki bi yiinɔ, ki betɔ a “Cheen a par. U yiia. Fiit ki set.”
50Ŋanne ki jɔɔŋ maŋ gbabit u chinchenn bir, ŋaan fiir ki set, ki baar Yisa boor ni. Ki Yisa boiɔ a “A loon ki n tun bee ki turani?”
51Ki jɔɔŋ maŋ jiin a “Chanbaa, n loon ki a nyɔɔnt n ninbina nae ki turin.”
52Ki Yisa betɔ a “Tɔn, i saa. Fa teenin yada nee te ki a ninbina na nyɔɔnt.”
Li taakpaak ni ki u ninbina nyɔɔnt, ki u ji laat, ki waa Yisa, ki bi saa.
Currently Selected:
Mak 10: BIM
Highlight
Share
Copy
Want to have your highlights saved across all your devices? Sign up or sign in
