Mak 8
8
Yisa nba dinn niib tusa ŋanna biaŋinba
(Matiu 15.32-39)
1Linba na poorpo, li din ki yukiri ki niburchiauŋ yaan lakin leeb Yisa boor ni; ki bi ki mɔk jeet; ki Yisa yiin u poorpoweiteeb na u boor ni, ki tan betib a 2“Ninbaauk soorin bonchiann nibur na paak, kimaan daa ŋanntaae na ki bi be nanin, ŋaan ki ki mɔk jeet ki di. 3Mi-i muni kunnib nan komi, bi sa saa fib sɔnu niwa, kimaan bi siab sɔnii fɔka.”
4Ki u poorpoweiteeb na boiɔ a “Ti sa la jeet lee muuk na ni ki lin jaŋ nibur na kuri?” 5Ki u boib a “Boroboro kuna ŋaŋŋae be i boor ni nna na?” Ki bi betɔ a “Ŋannlore.”
6Li yooe ki u te ki nibur na kur kar tiŋ ni. Ŋanne ki u jii boroboro kuna ŋannlore na, ki tur Yennu niipoouk li paak, ŋaan ŋmit ŋmit ki tur u poorpoweiteeb na a bin tor nibur maŋ. 7Bi bia din mɔk janbis waan bi boor ni; ki u bia tur Yennu niipoouk li paak, ŋaan bet u poorpoweiteeb maŋ a bin jii torib biak. 8-9Ki sɔɔ kur din dii wa loon biaŋinba. Bi din tee kaman nan niib tusa ŋanna. Ki u poorpoweiteeb tikir jeet nba tenn na, ki li gbee kpanchubit ŋannlore. Ki u ji chab niib maŋ, 10ŋaan ki ŋɔɔ nan u poorpoweiteeb kakit ki kɔɔ burgbetir ni, ki saan Dalmanuta tiŋ ni.
Farisiinba nba loon bakitnauŋ nyinn biaŋinba
(Matiu 16.1-4)
11Li poorpoe ki Farisiinba siab baar Yisa boor ni ki tan tee serimii, a bin bikinɔ ki la u mɔbonkpetir, ki tan yetɔ a wun teen nyinn ki lin wann nan Yennu set mi u po. 12Li yoo ki u kurint u yan ni ŋaan boib a “Bee teen ki mɔtana nibooru na loon nyinni? Barmɔniie ki n beeri, n kan tun nyinn ki tur mɔtana niib na.”
13Li poorpo ki u nyikib, ŋaan ŋmat kɔɔ burgbetir na ni, ki poot mɔkgbeŋŋir pootir na po.
Farisiinba nan Bat Herod datiŋ labaar
(Matiu 16.5-12)
14Tɔn, Yisa poorpoweiteeb din tamm ki ki dia jeet ki li yabi. Bi din dia boroboro kunn yennkɔɔe burgbetir na ni. 15Ki Yisa kpaanib a “I mi man, kii guu i mɔŋ nan Farisiinba nan Herod datiŋ na man.” 16Ŋanne ki bi ji piak bi leeb sinsuuk ni a “Ta ki dia boroboro nee ki u piak linba na.”
17Ŋaan ki u bann ba piak linba na, ki boib a “Bee ki i piak ki yaa a i ki dia boroboro? I daa ki bann siar biakii? I dudukit ni bia daa ki yentii? 18I mɔk ninbina, ŋaan bee ki i ki laati? I bia mɔk tuba, ŋaan bee ki i ki gbia? 19I tian yoo nba ki n ŋmit ŋmit boroboro kuna ŋaŋŋmu ki dinn niib tusa ŋaŋŋmu na-aa? Kpanchubit ŋaŋŋae ki i tikir boroboro nba tenni?”
Ki bi jiin a “Piik nan ŋannlee.”
20Ki u boib biak a “Ki yoo nba ki n ŋmit ŋmit boroboro kuna ŋannlore ki dinn niib tusa ŋanna na, kpanchubit ŋaŋŋae ki i tikiri?”
Ki bi jiin a “Ŋannlore.”
21Ŋanne ki u boib a “Ŋaan ki i bia lek daa ki bann siarii?”
Yisa nba din te ki jɔɔŋ nyɔɔnt biaŋinba
22Ki bi din tan baar Betsaida; ki nisiab din jii jajɔɔnsɔɔ nna ki baar nanɔ Yisa boor ni, ki tan barimɔ a wun siiu. 23Ki Yisa soor u nuu ki nyii nanɔ doo kpiŋ po, ki siir mɔsant jɔɔ na ninbina ni, ki jii u nii ki yii u paak, ŋaan boiɔ a “A laat siarii?”
24Ŋanne ki jɔɔ maŋ got sanpaapo, ŋaan yet a “Nn, n laat niib, ŋaan bi naan nan tiinii nee ki somm.”
25Ki Yisa bia jii u nii ki yii jɔɔ maŋ ninbina paak; li yoo na ki jɔɔ maŋ ji got sirrr, ki sɔɔ ki u ninbina mɔk laafia, ki u ji laat bonsiar kur pur pur pur. 26Ki Yisa te ki jɔɔ maŋ kun u ŋaak ni, ŋaan ki u kpaanɔ a “I mi ki a ŋmat doo maŋ ni jik.”
Piita nba din pak barjaann ki jiin Yisa po biaŋinba
(Matiu 16.13-20; Luk 9.18-21)
27Ŋanne ki Yisa nan u poorpoweiteeb din yaat ki saa Siisarea Filipi tingbouŋ ni. Ba daa be sɔnu paak ki saa na ki u boib a “Betirin man, niib na yaa a n tee ŋmee?”
28Ki bi betɔ a “Nisiab yeen a a tee Jɔɔnn wunba daan wuur niib Yennu nyunwuru nae, ki siab mun yaa a tee Elaijae, ki siab mun bia yaa a tee Yennu sɔkiniinba yenɔe.”
29Ŋanne ki u boib a “Ŋaan ki yimm ŋanin yaa a n tee ŋmee?”
Ki Piita jiin ki yetɔ a “Fine tee Yennu Niganntɔɔ Masia na.”
30Ŋanne ki Yisa kpaamm a bii mi ki bin bet sɔɔ labaar maŋ.
Yisa nba din pak u fara dinu po biaŋinba
(Matiu 16.21-28; Luk 9.22-27)
31Ki Yisa ji want u poorpoweiteeb a “See ki min nisaarik Bik dii fara bonchiann, ki saakab nan Yennu jiantu yudamm nan sennu wannteeb-n tan yêtin, ki bia kpin; ŋaan li daa ŋanntaa daar ki n sa fiir kuun ni biak.” 32U din pak linba na ki yent bi kura nummpoe fanu. Ŋanne ki Piita yiinɔ ki nyii nanɔ kpiŋ po ki saa yakii nanɔ a u ji daa mi ki yeen nna. 33Ki Yisa gbia jiant got u poorpoweiteeb na, ki ji mun yakii nan Piita a “Fin Sintaanii nba na, seetir nna na. A ki dukii linba tee Yennu yar po kaa, ŋaan dukii linba tee nisaarik yar poe.”
34Ŋanne ki Yisa yiin u poorpoweiteeb nan nibur nba waau na, ki tan betib a “Wunba-i loon wun wein, see ki u likin u saaŋmaŋ, ki jii u kuun dapunpunn kii waan, 35kimaan wunba ki saak wun jii u manfoor ki turin, ŋɔɔe tan sa kɔŋŋir, ŋaan wunba likin u saaŋmaŋ, min nan barŋanii na paak, ŋɔɔe tan sa la u manfoor nan barmɔnii. 36Nirɔ-i la tingbouŋ na mɔkint kura ŋaan kɔŋ u manfoor, nyɔlantpoe ki u sa la? 37amii nirɔ sa fit jii bee ki kpent u manfoori? 38Ki wunba-i tiin fei ki jiin min nan n wannu na po tingbouŋ na biitdamm nan tubkangbata damm paak, min nisaarik Bik-i taŋŋi jen nan n Baa Yennu paŋ nan u malakanba, n tan sa tinɔ fei nan man jiiu ki pukin n niib niwa.”
Currently Selected:
Mak 8: BIM
Highlight
Share
Copy
Want to have your highlights saved across all your devices? Sign up or sign in
