Mak 16

Yisa kuun fiiru labaar

(Matiu 28.1-8; Luk 24.1-12; Jɔɔnn 20.1-10)

1Foon daar nba din tan gar na, ki Mari Magdaliin, nan Salome, nan Mari wunba din tee Jems naa na, din saan ki saa daa tulaarnunubit a bin saan but Yisa gbanant paak. 2Lasir daar sanyayendaanne ki bi din saan kaauk maŋ boor ni. 3-4Ba daa din be sɔnu ni yoonba, ki bi faa nan leeb sawara a “Ŋmee sa saa birint katanu kaauk maŋ mɔb ki turiti?” (Li katanu din gbeŋ bonchiann.) Ŋanne ki bi tan per leŋ, ki got la ki katanu maŋ poŋ birint ki dɔɔ li kɔɔ. 5Li yoo ki bi kɔɔ kaauk maŋ ni, ki saa la naasinbik nna, ki u lia baanpiouŋ ki kar nuudiitu po. Ki li teemm jijeet bonchiann.

6Ki naasinbik maŋ yetib a “I daa jee siar mani. N mi nan i loon Nasaret nirɔ Yisa nba ki bi kpiiu dapunpunn paak nee. U kaa nna; u fiir kuun niwa. Gotir man ba daan birɔ siaminba na. 7Yi ŋmat ki saa bet u poorpoweiteeb nan Piita a u gar bi tɔɔnn po ki saan Galileewa; leŋe ki bi sa saa lau kaman nan wa poŋ daan betib biaŋinba na.”

8Ki li yaar ŋaan lit poob maŋ, ki bi gbanant jek bonchiann, ki bi nyii kaauk na ni, ki chiar, ŋaan lek ki faa sɔɔ li labaari, kimaan jaŋmaanii din soorib bonchiann.

Yisa nba din dɔkit Mari Magdaliin paak biaŋinba

(Matiu 28.9-10; Jɔɔnn 20.11-18)

9Tɔn, Yisa nba din fiir kuun ni lasir daar sanyiɔk ni na, u din dɔŋ dɔkit Mari Magdaliin paake, wunba ki u din nyinn narinbiit bannlore u ni na. 10Ki poo maŋ saan saa bet Yisa weinanleeb nba mɔ ki fabin na; 11ŋaan ba gbat ki u yaa a Yisa jen u manfoor ni ki u lau na, bi ki sak teenɔ yada.

Yisa nba din dɔkit u poorpoweiteeb bannlee paak biaŋinba

(Luk 24.13-35)

12Linba na poorpoe ki Yisa poorpoweiteeb bannlee siab din tan nyii doo na ni ki somm sɔnu ni. Ki u lebit u mɔŋ ki dɔkit bi paak. 13Ki bi ŋmat jen doo na ni ki tan yet bi leeb, ŋaan ki bi lek ki teemm yada.

Yisa nba din dɔkit u poorpoweiteeb piik nan yenɔkɔɔ paak biaŋinba

(Matiu 28.16-20; Luk 24.36-49; Jɔɔnn 20.19-23; Toona 1.6-8)

14Li poorpoe biak ki Yisa poorpoweiteeb piik nan yenɔkɔɔ na din kar ki di jeet, ki u tan dɔkit bi paak, ki sarikitib bi yada pɔɔrin paak, nan bi tuba nba kpaa biaŋinba na paak, kimaan bi ki teen binba lau ki u fiir kuun ni na yada. 15Ki u bia yetib a “Yii saa kii mɔɔntir barŋanii na ki tur sɔɔ kur tingbouŋ na kur saaka po. 16Wunba kur teenin yada, ki bi wurɔ Yennu nyunwuru, u sa la tinnu; ŋaan wunba kur ki teenin yada, Yennu sa bu u buut ki biirɔwa. 17Ŋaan binba teenin yada sa tun yaarlituk toona nee: bi sii taan n sann ki nyint narinbiit niib ni; ki bia pak barganii nba ki bi tuu ki mi piakii; 18ki nyik nna, bi-i taŋŋi soor wai, amii bi-i taŋŋi nyu nyɔkbiir, ki li kan teemm siari; bi bia sa yii bi nii baatib paak, ki bin la laafia.”

Yisa nba din doo sanpaapo biaŋinba

(Luk 24.50-53; Toona 1.9-11)

19Tɔn, ti Yomdaanɔ Yisa nba pak barii na ki gbenn yoonba, ki Yennu te ki u doo sanpaapo ki saa kar ŋɔɔ Yennu nuudiitu po. 20Ŋanne ki u poorpoweiteeb saan ki saa mɔɔntir u barŋanii lokir kur po, ki ti Yomdaanɔ din be namm, ki te ki bi tuun yaarlituk toona, ki li toona na din wann siara a bi mɔɔntii maŋ set tee barmɔniie.

Currently Selected:

Mak 16: BIM

Highlight

Copy