Luk 1

1-4Chanbaa Teofilus:

N loon ki a bann nan maan nba ki bi poŋ daan wanna na, li tee barmɔnii mɔniie.

Li piinu ni, nisiab din la linba piin ki teen maŋ ti leeb sinsuuk ni, nan bi ninbina. Ŋamme din tee binba din mɔɔntir maan maŋ po, ki niib bonchiann kot bi mɔŋ paak ki sɔb linba ki bi wannib na. Li paak, n mɔŋ mɔŋ boi ki fiitir bonŋann ki la nan li bonsiar kur nba tee biaŋinba li piinu ni, nan la saa biaŋinba, ki n dukin nan li ŋan n po nan ki n sɔb ki lii tɔɔk sɔnu, ki tura.

Jɔɔnn wunba din wuur niib Yennu nyunwuru na maaru betu

5Yoo nba ki Herod din tee Judea tiŋ batsaakɔɔ na, ki Yennu mantɔsɔɔ din be ki u sann yi Sekaria, ki u din tee Abia booru ni nirɔ, ki bi din bɔkit manteeb toona, ki u be Abija paabu ni ki tuun; ki u ŋaapoo mun din tee mantɔɔ Aron yaaboonne, ki u sann yi Elisabet. 6Bi bannlee maŋ binbeŋ din ŋan Yennu boor ni, ki bi din saak u mɔb sennu kur nyiknyik; 7ŋaan bi din ki mɔk biki, kimaan Elisabet din tee pookanmatire, ki bi kur bia poŋ din kpet nan maarua.

8Ŋanne ki dasiar ki Sekaria toontunyoo tan baar u paabu ni, ki u din tan yaa wun tun u toonn ki tur Yennu kaman nan wa tuu mann ki teen Yennu biaŋinba na. 9Li yoo na ki bi din tan tɔ naatɔɔt kaman nan bi manteeb kaar nba din tee biaŋinba, a bin gann wunba sii kɔɔ ti Yomdaanɔ Yennu ŋaak ni kii sai wubint Yennu bonnunubit. Ba tan tɔ ki Sekaria dii. Li paak ki u tan saan kɔɔ ŋaak maŋ ni, 10ŋaan ki niburchiauŋ na kur din biar see nanyer ki mei Yennu, yoo nba ki u daa wubint bonnunubit na.

11Li yoo na ki ti Yomdaanɔ Yennu malaka dɔkit Sekaria paak ki set bonnunubit boor na diitu po. 12Sekaria nba din tan lau yoonba, ki u yan put ŋmat, ki jaŋmaanii soorɔ. 13Ŋaan ki malaka maŋ betɔ a “Sekaria, daa tiin jaŋmaanii. Yennu poŋ dɔŋ gbat a miaruwa, ki a ŋaapoo Elisabet tan sa mar bonjabik ki tura, ki a tan sa pur u sann Jɔɔnn. 14Ki li tan sa maŋa ki a par-n penn, ki niib bonchiann para mun tan sa penn u maaru maŋ paak. 15U tan sii tee nijaanne ti Yomdaanɔ Yennu tɔɔnn, ki bia tan kii nyu daami amii dapaarimi. U tan sa gbee nan Yennu Seyeeŋ ŋaan daa be u naa poor ni. 16U tan sa te ki Israel teeb bonchiann-n ŋmat ki jen bi Yomdaanɔ Yennu boor ni. 17U sii mɔk Yennu Seyeeŋ nan paŋ kaman nan Yennu sɔkinii Elaija nba din mɔk biaŋinba na, ki tan sa dɔŋ liit ti Yomdaanɔ, ki tunn mɔtana nigbouŋ na yan ki bin jen gaar bi yejamm danbont, ki bia tunn mɔyêtdamm yan ki bin bann yentinu, ki u bia tan sa te ki niib-n teen siir kii guu bi Yomdaanɔ.”

18Ki Sekaria ji din bet malaka maŋ, “N sa teen nlee ki bann nan linba na tee mɔnii? kimaan n kpeta, ki n ŋaapoo mun bia kpeta.” 19Ki malaka maŋ jiin betɔ a “Mii tee Gabriel wunba kar Yennu tɔɔnn na; ki u tumin a boor, a n tan yeta ŋaan wanna barŋanii na. 20Ŋaan a sa muu ki kii fit piaki nan li yoo nba tan sa baar ki lin teen mɔnii na, kimaan a ki teen n maan nba sa teen mɔnii na yada.” 21Tɔn, ki niib nba din biar see nanyer ki guu Sekaria, ki li bakitib kimaan wa yukir Yennu jiantu ŋasaakak ni biaŋinba na. 22Wa ji din tan nyii yoonba, u din ki fit piaki, ki bi ji din bann nan u la yerintue Yennu jiantu ŋasaakak na ni; ki u ji piak nan muutir ki labin nii ki teemm. 23Ki yoo nba ki u toona din tan gbenn Yennu jiantu ŋasaakak nna ki u kun ŋaak ni.

24Li poorpoe ki u ŋaapoo Elisabet din tan soor poor, ŋaan bɔrii u mɔŋ ŋaak ni tatata nan ŋmaarii ŋaŋŋmu, 25ki din tan yet u mɔŋ a nna, “Nnee ki n Yomdaanɔ Yennu tun turin ki tinin ninbaauk ki nyinnin fei ni.”

Yisa maaru betu

26Tɔn, Elisabet poor sooru ŋmaarii ŋannloob nie, ki Yennu din tun u malaka Gabriel a wun saan doo nba be Galilee tiŋ ni, ki bi yi doo maŋ Nasaret, 27ki saa pak tur sapaamunn wunbae sann din tee Mari na. Sapaamɔ maŋ din tee jasɔɔ sarkpeŋe, ki u sann din tee Josef. U din tee Kpanbar David yaaboonne. 28Ki malaka na din tan baar Mari boor ni ki foontɔ a “Foontiila. Ti Yomdaanɔ Yennu par mei a paak, ki u bia be nana.” 29Wa yet biaŋinba na, ki Mari yan ji din put ŋmat bonchiann ki saa baa nɔɔk ni, ki u ji dukii maan maŋ paak. 30Ki malaka na bia betɔ, “Mari, daa tiin jaŋmaanii, kimaan Yennu par mei a paak. 31A tan sa soor poor ki mar bonjabik, ki a bia tan sa pur u sann Yisa. 32U tan sii tee nijaanne, ki bi tan sii yiu Yabint Yennu Bija. Ti Yomdaanɔ Yennu sa te ki wun di u yeja David naan, 33ki u tan sii tee Jakɔb yaaboona ni kpanbar yoo nba kaa gbennu, ki u naan maŋ bia tan kan mi gbenni.”

34Ŋanne ki Mari boi malaka maŋ, “N daa tee sapaamunne, ki nlee ki n sa soor poori?” 35Ki malaka na yetɔ, “Yennu Seyeeŋ sa sik a paak, ki Yabint Yennu paŋ sa sik bakin a paak; li paak, bik nba ki a tan sa marɔ maŋ tan sii tee popeendaanɔ, ki bi sii yiu Yennu Bija. 36Ŋaan bant nan a niipoo Elisabet, wunba kpeta na, mɔtana u soor poora ki sa mar bonjabik, ki u ŋmaarii ŋannloobu na, ŋɔɔ nba ki bi din yiu pookanmatir; 37kimaan siar kaa ki Yennu kan fit tumi.” 38Ki Mari betɔ, “Tɔn, n tee Yennu daabire. Ŋaant ki lin teen nan fa betin biaŋinba na.” Ki malaka na ji din yaat ŋaan nyikɔ.

Biaŋinba ki Mari din saan gɔn Elisabet

39Li poorpo ki Mari din tan fiir ki saan yian yian ki saa kunkona nba be Juda tingbouŋ ni boor, ki saa baar dosau ni, 40ki kɔɔ Sekaria ŋaak ni ki foont Elisabet. 41Yoo nba ki Elisabet gbat Mari foontu na, ki bik nba daa be Elisabet poor ni maŋ ji din kpir kutib. Li yoo na ki Yennu Seyeeŋ gbee nan Elisabet, 42ki u yikin sanpaapowa, “Wuiwuia! Yennu mɔsonŋann be a paak ki gar pooleeb kura, ki u mɔsonŋann bia be bik nba be a poor ni na paak. 43Li teenin nlee na ki n Yomdaanɔ naa tan baar n boor nna? 44Ma gbat a foontii yoonba na, ki bik nba be n poor nna ji kpir kutib nan parpeenn. 45Fin nba teen yada nan Yennu maan nba ki u pak tura na tan sa teen mɔnii, parpeenn tee a yare.”

Mari nba din pak Yennu biaŋinba

46Ŋanne ki Mari ji din yet a

“N piak Yennu n par ni,

47ki mɔk parpeenn Yennu wunba tee n Tinntɔɔ na paak,

48kimaan u tin min nba tee u sapaandaabir na ninbaauk,

ŋaan ki n poŋ ki tee siari.

La jii dinna ki saa, nigbouŋ kur tan sii yeen

a n tee parpeenn daanɔe,

49kimaan paŋ daanɔ Yennu tun toonjaana ki turin,

ki u sann tee sanyeenn.

50U bia mɔk ninbatinu nan nigbouŋ kur nba tiinɔ.

51U tant u nuu ki tun paŋ toona,

ki yat karinbaandamm ki biir bi lora,

52ki liat kpanbara bi kpanbarisuk ni,

ŋaan donn tatimm,

53ki gboon komma nan jeŋant,

ŋaan te ki mɔkita ŋmat nan niikoonii.

54Wa din senn mɔsonn ki tur ti yejamm Israel teeb

nba tee u toontunna na,

u tian li po ki sommib.

55U bia tian ki tin Abraham nan u yaaboona ninbaauk yoo nba kaa gbennu.”

56Tɔn, li din teen kaman nan ŋmaarii ŋanntaa na ki Mari daa be Elisabet boor ni ki tan ŋmat kun.

Jɔɔnn nba din wuur niib Yennu nyunwuru na maaru

57Li poorpoe ki Elisabet matuk yoo din tan baar, ki u mar bonjabik. 58Ki bi ŋakpiasinba nan u ninjamm din gbat biaŋinba ki ti Yomdaanɔ Yennu tinɔ ninbaauk bonchiann na, ki bi kur ji din mɔk parpeenn nanɔ.

59Tɔn, ki li daa ŋanniin daare ki bi din baar a bin pot bik maŋ punn, ŋaan loon bin pur u sann Sekaria, kaman nan u baa sann na; 60ŋaan ki u naa gatib, “Aaii, u sanne sii yi Jɔɔnn.” 61Ki bi yetɔ a “Ti ŋaak na ni, sɔɔ sann ki yi Jɔɔnni.” 62Ŋanne ki bi pak muutir ni nan bik maŋ baa, a bin boi ki laan u loon bii yi u bik maŋ sann a bee; 63ki u wann muutir ni a bin jii dapɔk turɔ. Ba jii ki turɔ ki u sɔb a “Bik maŋ sanne tee Jɔɔnn.” Ki li ji din bakit bi kura.

64Li taakpaak ni na ki Sekaria muut ki ji din piin maanpaku ki piak Yennu. 65Ki jaŋmaanii din soor bi doo niib kura. Ki labaar na din mɔɔnt yat digbana kur nba be Judea kunkona paak, 66ki li tur binba kur din gbat nna maŋ dudukit, ki bi boi bi leeb, “Bik na tan sii tee niboor bee na?” kimaan bi poŋ la nan Yennu paŋ be nanɔ.

Biaŋinba ki Sekaria din sɔkint Yennu maan

67Li yoo na ki Yennu Seyeeŋ din gbee bik maŋ baa Sekaria, ki u sɔkint Yennu maan ki yet a:

68“Ŋaant man ki tin pak ti Yomdaanɔ wunba tee timm Israel teeb Yennu na,

kimaan u baar a wun somm u niib ki fatib ŋaab.

69U turit Tinntɔɔ wunba mɔk paŋ

ki tee Yennu toontunnɔ David yaaboonn na.

70Yaayoo ni ki Yennu din pak maan u popeenn sɔkiniinba mɔi ni ki turit,

71ki yeen a u tan sa nyinnit ti datai nii ni,

ki bia tan sa nyinnit binba kur namit na nii ni.

72U din bia yet a u sii mɔk ninbatinu nan ti yejamm,

ki kan mi ki tamm u mɔsonyeenn

73nba ki u din senn ki tur ti yeja Abraham na.

74U din senn a u sa nyinnit ti datai nii ni,

ki tin fit jiantɔ ki jaŋmaansai sii kaa,

75ki ti sii tee popeendamm nan niburchimm u boor ni nan ti manfoa gbennu.

76N bik na, bi tan sii yia ‘Yabint Yennu sɔkiniie.’

A sa liit ti Yomdaanɔ tɔɔnn ki sa ŋamm u sɔnii ki turɔ,

77ki wann u niib ki bin bann nan u tan sa tinnib

yoo nba ki u tan sa nyik chab bi biit na.

78Barmɔniie, ti Yennu mɔk ninbatinu nan burchint,

ki ti tinnu daar maŋ tan sii tee nan yendoor nee,

79ki li tan sa yent sanpaapo

ki tur binba be bunbɔnn ni nan binba per kuun;

ki li bia tan sa yent ti taa ni ki tin tɔkin parmaasir sanjouk ni.”

80Li poorpoe ki bik maŋ din tan kpaatir ki pukii nan Yennu bannu, ki u din tan kɔɔ muuk ni ki saa be tatata nan yoo nba tan baar nan wun dɔkit Israel teeb paak.

Currently Selected:

Luk 1: BIM

Highlight

Copy