Mak 15
15
Ba jii Yisa ki saan Pailat boor biaŋinba
(Matiu 27.1-2, 11-14; Luk 23.1-5; Jɔɔnn 18.28-38)
1Ki Yennu jiantu yudamm, nan tiŋ na ni saakab, nan sennu wannteeb, nan Juu teeb saakab kur lakin sanyapob ni, ki lor lora, ki baan Yisa bant ki jiiu saan nanɔ tiŋ yudaanɔ nba ki bi yiu Pailat na boor. 2Ki Pailat boiɔ a “Fine set tee Juu teeb Kpanbar na-aa?”
Ki Yisa jiin a “Fine yeen nna.”
3Ki Yennu jiantu yudamm maŋ lek bia dia sɔnii bonchiann ki fikitir Yisa paak. 4Ki Pailat bia boiɔ a “A kan jiin siarii? Gbiintir ba waa-a biaŋinba.”
5Ŋaan ki Yisa lek yêt jiinu; ki li ji bakit Pailat.
Pailat nba din chab a bin kpi Yisa biaŋinba
(Matiu 27.15-26; Luk 23.13-25; Jɔɔnn 18.39–19.16)
6Tɔn, yukitgar tiaru jaamm dinu yoo kur, ki Pailat tuu nyinn niyenɔkɔɔe dansarik ni, wunba ki bi loonɔ, ki ŋaau. 7Li yoo maŋ ki jasɔɔ din kɔɔ dansarik, ki u sann yi Barabas. Ŋɔɔ nan nisiab din kɔɔ dansarik kimaan bi bigbabisin nba ki bi daan tee doo na ni ki kpi niib na paak. 8Ŋanne ki nibur maŋ din lakin ki mei Pailat a wun tun u burchint yaann. 9Ki u boib a “I loon ki n nyinn Juu teeb bat nee-ee?” 10Kimaan u mi fanu nan Yennu jiantu yudamm naŋ paak te ki bi jii Yisa ki teen u nuu ni.
11Ŋanne ki Yennu jiantu yudamm maŋ ŋamm tur nibur na a bin betɔ ki wun nyinn Barabase turib. 12Ki Pailat bia ŋamm boib a “Ki wunba ki i yiu Juu teeb kpanbar na, i loon ki n teenɔ nlee?”
13Ki bi tian jiin sanpaapowa a “Kpaamɔ dapunpunn paak.”
14Ki Pailat boib a “Bee paaki? U biit mantik tee lannpoe?”
Ki bi bia ŋamm tian sanpaapowa a “Kpaamɔ dapunpunn paak.”
15Ki Pailat loon wun penn nibur maŋ para, li paak ki u nyinn Barabas turib, ŋaan te ki bi boo Yisa, ki jiiu turib a bin kpaau dapunpunn paak ki wun kpo.
Lanjimanba nba din sukii Yisa biaŋinba
(Matiu 27.27-31; Jɔɔnn 19.2-3)
16Ki lanjimanba jii Yisa ki kɔɔ nanɔ tiŋ na yudaanɔ Pailat ŋaadundɔuŋ ni, ki yiin bi tɔknanleeb kur. 17Ki bi jii baanmuŋ nna ki lannɔ, ŋaan jii kunkonii ki luu naan fokirik ki yirimɔ, 18ŋaan ji foontɔ kaman nan ba tuu foont bi bat biaŋinba na, ki yeen a “Juu teeb Bat, naa! naa!” 19ŋaan jii lanbann ki faa u yur paak, ki siin mɔsant u paak, ki gbaa bi duna paak u tɔɔnn ni. 20Ba daanɔ nyatuk ki gbenn yoonba, ki bi liat baanmuŋ na, ŋaan jii u mɔŋ mɔŋ tiat na ki lannɔ, ki jiiu ki nyii nanɔ a bin saan kpaau dapunpunn paak ki wun kpo.
Ba din kpaa Yisa ki tabinɔ dapunpunn paak biaŋinba
(Matiu 27.32-44; Luk 23.26-43; Jɔɔnn 19.17-27)
21Ba din be sɔnu ni ki saa yoonba ki bi chet jasɔɔ nna ki u sann yi Simon. Ki lanjimanba maŋ miau a wun gaar Yisa kuun dapunpunn na kii saa. (Li jɔɔ din tee Sairene jɔɔe, ki nyii digbanbik ni ki baat Jerusalem. U din tee Aleksander nan Rufus baae.) 22Ki bi jii Yisa ki saa nanɔ siaminba ki bi yir Golgota, ki li paak tee “Yukpabuk na boor.” 23Leŋe ki nisiab din loon bin turɔ daan nba ŋmat nan nyɔksɔu nba ki bi yir mir na, ŋaan ki u yêt li nyunu. 24Ŋanne ki bi kpaau dapunpunn na paak, ŋaan tor bi leeb u tiat na, ki ji tɔ tiatia a bin chent chent u tiat maŋ. 25Bi din kpaau sanyiɔk nie, kut munnyia yoo. 26Ki bi din sɔb ba la u biit nba na ki tabin u dapunpunn na paak, ki li yaa a “Juu teeb Kpanbar maŋe na.” 27Bi bia din kpaa fatiteeb bannlee dapunpuna paak ki pukin u po, ki yenɔ din be u nuudiitu po, ki lɔɔ na mun din be u nuugaŋ po. 28Ki li gbeen linba sɔb Yennu gbouŋ ni a “Bi jiiu teen biitdamm sinsuuk ni.”
29Tɔn, ki binba somm gaar leŋ na pakin bi yura ŋaan sukiiɔ, ki yeen a “Fini! A tuu yaa a sa fit bet Yennu jiantu diiuk na ŋaan bia maar daa ŋanntaa sinsuuk ni. 30Tɔn, fan nyi dapunpunn na paak ki sik ki tinn a mɔŋ.”
31Nnee ki Yennu jiantu yudamm nan sennu wannteeb mun bia sukiiɔ, ŋaan yeen teen bi leeb a “U tuu tint leeb, ŋaan tan kan fit ki tinn u mɔŋi. 32Juu teeb Bat nba tee Yennu Niganntɔɔ Masia na-n nyi dapunpunn na paak ki sik nna mɔtana, ki tin la ki teenɔ yada.”
Ki binba ki bi pukin u po ki kpaab na mun sukiiɔ.
Yisa kuun labaar
(Matiu 27.45-56; Luk 23.44-49; Jɔɔnn 19.28-30)
33La din tan baar yensuuk ni yoonba, ki tingbouŋ na kur ji din bɔnn ki saa baar kut munntaa. 34Kut munntaa yooe, ki Yisa yikin sanpaapowa nan kunkɔsaakar, ki yet a “Eloi, Eloi, lema sabaktani?” ki li paak tee a “N Yennu, n Yennu, bee ki a nyikimi?”
35Ki binba see leŋ na nba gbat u yiini maŋ, ki bi siab yet a “Gbiintir man, u yi Elaijae.” 36Ŋanne ki bi ni yenɔ tin ki saa jii saapo ki suunt damiituk nna ni, ki jii sakin daauk paak, ŋaan donn ki turɔ a wun nyu, ki bia yet a “Yii ŋaan ki tii guu ki laan Elaija baat a wun sikinɔ dapunpunn na paaki.”
37Ki Yisa ŋamm yikin nan kunkɔsaakar, ŋaan ji kpo li yoo.
38Li yoo na ki chinchenn nba tuu jɔɔn ki puun Yennu diiuk sinsuuk ni na ji bɔkit li yur paak ki tan sik tiŋ ni. 39Ki lanjimanba yudaanɔ nba din see dapunpunn maŋ boor na, wa la biaŋinba ki Yisa kpo na, ki u ji yet a “Barmɔniie, jɔɔ na set tee Yennu Bijae.”
40Tɔn, Mari Magdaliin nan Mari wunba din tee Joses nan Jemsbik naa na, nan Salome, ki bi din pukin poosiab po ki see banfɔkira ŋaan gorii. 41Bi poŋ din waa Yisa yoo nba ki u din be Galilee niewa ki sommitɔ. Pooleeb bonchiann nba wei Yisa ki baar Jerusalem na mun bia din be leŋ.
Yisa gbanant piinu labaar
(Matiu 27.57-61; Luk 23.50-56; Jɔɔnn 19.38-42)
42-43Li daar dajouk ki Arimatea doo ni jɔɔ nba sann din yi Josef na din baar. U din tee Juu teeb loralakin saakɔɔ yenɔe, ki din tee burchimɔ nan barmɔnii, ki din tuu guu Yennu naan baaru. Ki li daar sanyafannuk din tee foon daar; li paak, ki u din saan yet Pailat a wun chabɔ Yisa gbanant, ŋaan u din ki tiin jaŋmaanii. 44Pailat nba din gbat a Yisa poŋ kpowa na, ki li ji yaar ŋaan litɔ; ki u yiin lanjimanba yudaanɔ na ki tan boiɔ a wun laan Yisa nba kpo li yukiraa? 45Yoo nba ki u gbat yudaanɔ maŋ mɔb ni na, ki u yiin Josef maŋ ki tan chabɔ a wun jii Yisa gbanant na. 46Ki Josef poŋ din daa katiŋ, ki kpaat Yisa gbanant dapunpunn na paak, ki pɔbinɔ leŋ, ki jiiu ki pii kaauk nba ki bi poŋ din jiar tanpiiuk, ki bikit katangbeŋŋir, ki biin li mɔb na. 47Ki Mari Magdaliin nan Mari wunba din tee Joses naa na din la siaminba ki bi pii Yisa gbanant maŋa.
Currently Selected:
Mak 15: BIM
Highlight
Share
Copy
Want to have your highlights saved across all your devices? Sign up or sign in
