Mak 14

Yudamm nba lor a bin kpi Yisa biaŋinba

(Matiu 26.1-5; Luk 22.1-2; Jɔɔnn 11.45-53)

1Tɔn, daa ŋannlee din biar nan yukitgar tiaru jaamm nan daa nba ki bi di boroboro nba ki bi din tuu ki tee datiŋ na-n piin, ki Yennu jiantu yudamm nan sennu wannteeb loon sɔnu a bin bɔr soor Yisa ki kpiu, ki yeen a 2“Ti daa sou jaamm na daa na ni, kimaan li pasiar ki kpikpiruk-n tan fiir.”

Poosɔɔ nba din but tulaarii Yisa yur paak biaŋinba

(Matiu 26.6-13; Jɔɔnn 12.1-8)

3Tɔn, ki Yisa din be Betani, jɔɔ nba din tuu tee gbaatir, ki bi yiu Simon na ŋaak ni, ki di jeet. Li yoo ki poosɔɔ tan kɔɔ nan salenŋann, ki li gbee nan tulaarii nba mɔk nubiru bonchiann nawa, ki li daauk bia paar bonchiann, ki bi yir naade na. Ki poo maŋ biit salenn na ki but tulaarii maŋ Yisa yur paak. 4Ki nisiab nba din be leŋ na piak nan wutoa ki yeen a “Bee teen ki u biir tulaarii na nna? 5Bi bo sa fit kɔir ki la likirii ki lin gar pɔŋ kobii ŋanntaawa, ki bo jiir somm talasdamm.” Ki bi jii poo maŋ nan mɔduŋ bonchiann.

6Ki Yisa yetib a “Nyikin poo na! Bonŋanne ki u tun ki turin maŋ; ki bee ki i kpirimɔ nna? 7Talasdamm sii yɔɔ be i boor ni yoo kura, ki i sa fit sommib yoo nba kur ki i loon; ŋaan min ŋanin kii yɔɔ be nna kaa. 8Poo maŋ tun wa sa fit tun linbae ki turin. Wa but tulaarii nba n gbanant paak na, u teen n kuun piinu siire. 9Barmɔniie ki n beeri na, siaminba kur ki bi sa mɔɔnt n barŋanii na tingbouŋ na ni, bi bia sa mɔɔnt poo maŋ nba tun linba na, ki lii tee tiarue ki turɔ.”

Judas nba din sak nyii Yisa poor biaŋinba

(Matiu 26.14-16; Luk 22.3-6)

10Ŋanne ki Yisa poorpoweiteeb piik nan bannlee na yenɔ, wunba ki bi yiu Judas Iskariot na, din saan Yennu jiantu yudamm boor ni a wun kɔi Yisa. 11Ki bi para penn wa yaa wun yetib linba Yisa po na, ki bi senn mɔsonn a bi sa turɔ likirii li paak. Ki u ji piin loon sɔnu nba ki u sa jii Yisa ki kubinɔ bi nuu ni.

Yisa nan u poorpoweiteeb nba dii yukitgar tiaru jaamm biaŋinba

(Matiu 26.17-25; Luk 22.7-14, 21-23; Jɔɔnn 13.21-30)

12Tɔn, li daar nba din tee dasinsinn nba ki bi tuu di boroboro nba ki bi din tuu ki tee datiŋ na, li yoo ki bi din tuu kpi pebis ki teen yukitgar tiaru jaamm jeet na, ki Yisa poorpoweiteeb boiɔ a “A loon ki tin saan lee ki saa teen jaamm maŋ jeet siir ki turani?”

13Ki u tun bi ni bannlee ki betib a “I saa doo na ni man. I sa saa la jasɔɔ ki u jii nyunsɔɔr. I waau man 14nan ŋaak nba ki u sa saa kɔɔ na ni, ki bet li ŋaak daanɔ a ‘Wanntɔɔ na yaa a ti boia a saamm diiuk nba ki ŋɔɔ nan u poorpoweiteeb sa di yukitgar tiaru jaamm jeet na be lee?’ 15Ki u sa wanni ditɔɔtuk nba yab ki poŋ teen bonsia kur siira; ki yin teen jeet maŋ leŋ.”

16Ki Yisa poorpoweiteeb bannlee maŋ saan doo maŋ ni, ki set saa la ki siar kura tun li biaŋini nan wa betib biaŋinba na. Ki bi teen jaamm maŋ jeet siir.

17Ki Yisa nan u poorpoweiteeb piik nan bannlee na tan baar dajouk. 18Ba kar ki di jeet yoonba, ki u tan betib a, “Barmɔniie ki n beeri na, min nan i yenɔ nba di jeet na, li yɔɔ yaa wun nyi n poore.”

19Ki li biir bi para ni; ki bi boiɔ yenɔ yenɔ a “A yeen minee?”

20Ki u jiin betib a “Li lek tee i piik nan bannlee na ni yenɔ nba ki min nan ŋɔɔ lakii tuun senyeŋ ni ki di jeet nee. 21Min nisaarik Bik set sa kpo kaman nan la sɔb Yennu gbouŋ ni biaŋinba nae, ŋaan bonbiir sii be daanɔ nba yaa wun nyi n poor na paak. Bi-i diŋŋi bo-i kii mar li daanɔ gbaa, li bo din sii sɔ u po.”

Ti Yomdaanɔ jeet dinu labaar

(Matiu 26.26-30; Luk 22.14-20; 1 Kor. 11.23-25)

22Ba kar ki di jeet maŋ yoonba ki Yisa jii boroboro ki tur Yennu niipoouk li paak, ŋaan ŋmitir ki tur u poorpoweiteeb, ki betib a “Gaat man. Nee tee n gbanant.”

23Ŋanne ki u bia jii nyunyuŋmaŋ nan tilɔɔna nyun ki tur Yennu niipoouk li paak, ki jii ki turib. Ki bi kura nyuu. 24Ki u yetib a “Linba nee tee n sɔn nyinn; ki n sɔn na sa nyi n gbanant ni nisaarii bonchiann paak, ki wann nan Yennu senn mɔsonpaann. 25Barmɔniie ki n beeri na, n ji kan mi ki nyu tilɔɔna nyun na see daar nba ki n tan sa nyu li nyunpaann Yennu naan ni na.”

26Ŋanne ki bi yin Yenjiantu yanii, ŋaan nyii ki saan Olif Tiinii kunkonn paak.

Yisa nba yet a Piita sa nɔi a u ki miu biaŋinba

(Matiu 26.31-35; Luk 22.31-34; Jɔɔnn 13.36-38)

27Ki Yisa betib a “I kura na tan sa tin ki nyikima, kimaan li sɔb Yennu gbouŋ ni a ‘Yennu tan sa kpi pekpaarik na, ki pei na tan sa tin yat.’ 28Ŋaan mi-i taŋŋi fiir kuun ni, li poorpo n sa dɔŋ ki gar i tɔɔnn ki saan Galilee.”

29Ki Piita jiin yet a “N leeb na kur-i lekii nyika, ŋaan min ŋanin kan nyikani.”

30Ki Yisa betɔ a “Barmɔniie ki n beera na, nyiɔk na, a sa nɔi a a ki min taar munntaaewa ki kojouk-n bui leer taar munnlee.”

31Ki Piita ŋamm yet nan nunmɔnn a “Li-i lekii tee a min nan fin-n lakin kpo gbaa, ŋaan n kan mi ki nɔi a n ki miani.”

Ki u leeb na mun bia yet nna.

Yisa nba din miar Yennu nan nunmɔnn biaŋinba

(Matiu 26.36-46; Luk 22.39-46)

32Li poorpo ki bi saan siaminba ki bi yi Getsemane na. Leŋe ki Yisa bet u poorpoweiteeb a “Karin nna man ŋaan ki n saan ki saa miar Yennu.” 33Ŋanne ki u jii Piita nan Jems nan Jɔɔnn ki saan. Ki u par biir ki li tee kaman nan u yaa wun kpoe na; 34ki u yetib a “Parbiir booru nba soorin na per lin kpima. Biat nna man kii nyɔi.”

35Ŋanne ki u chat ki saan tɔɔnn po waaminna, ki gbaan tiŋ ni, ki mei Yennu, a li-i bo-i sa fiti, Yennu-n ŋaan ki fara nba baat u paak na-n yakirɔ, ki yet a 36“N Baa, n Baa, siar ki paar a boor ni. Daa ŋaant ki n kɔɔ bonbiir nba baat n paak na ni; ŋaan daa te ki li tee ma loon biaŋinba kaa, ŋaan te ki lin teen fa loon biaŋinbae.”

37Ŋanne ki u tunn ki jen u poorpoweiteeb banntaa na boor ni, ki sɔɔ ki bi taan gɔɔna. Ki u boi Piita a “Simon, a gɔɔntee? A kan fit kii nyɔi waamii?” 38ŋaan betib a, “I nyɔi man ŋaan kii mei Yennu ki i tan daa kɔɔ jinjammii ni. I sei ŋanin loon lin tun linba ŋan, ŋaan ki i gbanant kaa yaaki.”

39Ki u bia saan Yenmiaru ki saa mei kaman nan wa bo miar biaŋinba sinsinn na, 40ŋaan bia ŋmat ki saa baar sɔɔ ki u poorpoweiteeb na bia gɔɔna, kimaan gɔɔn mɔkib bonchiann. Ki bi ki mi ba sa yetɔ linba li yoo maŋi.

41Wa tan jen taapauŋ munntaa ni, ki u boib a “I bia lek daa dɔɔ gɔɔnte ki foi-ii? Li jaŋa man. Yoo maŋ baar na. Bi jii min nisaarik Bik na ki teenin biitdamm nuu niwa. 42Fiit man ki tin saan. Gotir man, wunba nyii n poor na pera.”

Ba din soor Yisa biaŋinba

(Matiu 26.47-56; Luk 22.47-53; Jɔɔnn 18.3-12)

43Yisa nba daa piak na, ki u poorpoweiteeb piik nan bannlee na ni yenɔ, wunba ki bi din yiu Judas na, baar nan niburchiauŋ; ki bi siab dia jukbanjai, ki siab mun dia gbajara; ki Yennu jiantu yudamm nan sennu wannteeb nan saakab tumm. 44Ki mɔlanfikirɔ Judas maŋ poŋ wannib nyinsiara a “Mi-i sai foont wunba ki mɔɔt u tankpinn, yi mi nan ŋɔɔe na. Yin soorɔ kii guu-u kii saa nanɔ man.”

45Judas nba tan baar yoonba, li taakpaak ni ki u saan Yisa boor ni ki yetɔ a “Chanbaa!” ŋaan mɔɔt u tankpinn. 46Ki niib na ji soor Yisa ki kubɔ ken ken. 47Ŋaan ki u poorpoweiteeb ni yenɔ nba see leŋ tan nɔɔt u jukbanjiak ki chɔɔ Yennu jiantu yudaanɔ daabir tubir ki lu. 48Ŋanne ki Yisa boib a “I baar nan jukbanjai nan gbajara na a i tan soorin kaman nan n tee fatitɔɔe na-aa? 49N daan tuu be i boor Yennu jiantu ŋasaakak ni daar kura ki want niib Yennu maan, ki i tuu ki somi; ŋaan li kpaa talas nan Yennu gbouŋ sɔbu maŋ-n teen gbeen.”

50Ki u poorpoweiteeb na kur ji chiar ŋaan nyikɔ.

51Ki naasinbisɔɔ nna din gbab chinchenn kuukɔɔ ki waa Yisa poorpo. Ki bi tan bibɔ ki soor u chinchenn, 52ki u nyik u chinchenn maŋ bi nuu ni, ŋaan chiar yann.

Ba jii Yisa ki saan nanɔ buut boor ni biaŋinba

(Matiu 26.57-68; Luk 22.54-55, 63-71; Jɔɔnn 18.13-14, 19-24)

53Ki bi jii Yisa ki saan nanɔ Yennu jiantu yudaanɔ ŋaak, siaminba ki jiantu yudamm, nan tiŋ na ni saakab, nan sennu wannteeb din lakin. 54Ŋaan ki Piita din be Yisa poorpo ki waa banfɔkira mɔkmɔk nan ba tan kɔɔ Yennu jiantu yudaanɔ maŋ ŋaak ni. Ki Piita saan kar ki pukin toontunna na po ki bi nanii muu. 55Ŋanne ki Yennu jiantu yudamm nan saakab maŋ kur yabir bi mɔŋ paak a bin la siaradamm mɔb ni linba ki bi sa jii Yisa biit ki kpiu, ŋaan kɔŋ u bisiat. 56Siaradamm bonchiann din fa fai ki teenɔ, ŋaan ki bi fai maŋ din ki wei leeri.

57Li yoo ki jasiab fiir set ki faar faak turɔ a 58“Ti gbat ki u yet a u sa bet Yennu jiantu ŋasaakak nba ki niib din maa nan bi nii na, ŋaan li daa ŋanntaa sinsuuk ni ki u sa jii ki maar, ki li tan kii tee nirɔ nii kaa maa nanni.” 59Ŋaan li kur yann; bi fai maŋ lek bia din ki wei leeri.

60Ŋanne ki Yennu jiantu yudaanɔ na fiir ki boi Yisa a “Barii nba ki jab maŋ piak ki teena na po, li paak tee bee? A ki mɔk li jiinu-uu?”

61Ŋaan ki Yisa lek ŋmina, ki ki jiin siari. Ki u bia ŋamm boiɔ a “Fine set tee Yennu Niganntɔɔ Masia wunba tee ŋɔɔ Yennu Bija na-aa?”

62Ki Yisa jiin a “Nn, mine na. I tan sa la min nisaarik Bik ki n kar Yabint Yennu nuudiitu po, ki bia tan sa lan ki n be sanpagbana ni ki siik.”

63Ŋanne ki Yennu jiantu yudaanɔ maŋ soor u mɔŋ tiat ki pat, ŋaan yet a “Ti poŋ ji ki loon siarsia. 64I mɔŋ gbat wa yekint u mɔŋ nan Yennu biaŋinba. I dukii nlee?”

Ki bi kur sak a u biira, ki u kpan ŋan nan kuume.

65Ki bi siab siin mɔsant u paak; ki bi piit u numm po, ŋaan pebitɔ ki betɔ a “Buntir wunba peba na.” Ki toontunna na soorɔ, ki jakɔ nan tanpakii.

Biaŋinba ki Piita din nɔi a u ki mi Yisa

(Matiu 26.69-75; Luk 22.56-62; Jɔɔnn 18.15-18, 25-27)

66Tɔn, Piita lek daa din be nanyer po ki nanii muu, ki Yennu jiantu yudaanɔ ŋaasapaantoontunyenɔ tan baar lau, 67ki gotɔ sirrr, ki tan yetɔ a “A mun tuu waa Nasaret nirɔ Yisa maŋ.”

68Ki Piita nɔi ki yet a “Min ki miu, min ki mi barbooru nba ki a piak na paaki;” ŋaan fiir nyii. Li taakpaak ni na ki kojouk bui.

69Ki sapaamɔ na bia lau leŋ ki ŋammit beer nisiab nba see leŋ na a “Jɔɔ na mun tee u poorpoweiteeb na yenɔe.” 70Ŋaan ki Piita bia ŋamm nɔi.

Ki li bia yann waaminna ki binba see leŋ maŋ ŋamm jak Piita a “A set tee niib na ni yenɔe, kimaan a mun nyii Galilee-e.”

71Ŋanne ki Piita por mɔb a “Li-i tee ki n faar faakie, Yennu-n dat n tubir, min ki mi ya yeen jɔɔ nba na po.”

72Li yoo maŋ ki kojouk bui ki pukin taapauŋ munnlee ni; ki Piita ji tiar biaŋinba ki Yisa betɔ na a “A sa yet a a ki min taar munntaaewa, a ki kojouk-n tan fit lian ki bui leer taar munnlee ni.” Li yoo ki dudukit ji baar Piita, ki u mɔ.

Currently Selected:

Mak 14: BIM

Highlight

Copy