Mak 13

Yennu jiantu ŋasaakak biiru labaar

(Matiu 24.1-2; Luk 21.5-6)

1Yisa nba nyii Yennu jiantu ŋasaakak ni yoonba, ki u poorpoweiteeb yenɔ yetɔ a “Wanntɔɔ, gotir digbeŋŋa na, nan tangbeŋŋa nba ki bi din jii ki maa li diit maŋ.”

2Ki u jiin a “I la digbeŋŋa maŋaa? Ŋaan bi tan sa tut li kur ki lu tiŋ niwa, ki li tanyennkɔɔ tan kan biar ki paa leer paaki.”

Muksuk nan fara labaar

(Matiu 24.3-14; Luk 21.7-19)

3Ki Yisa din tan saan kar Olif Tiinii kunkonn paak, ki li be Yennu jiantu ŋasaakak tɔɔnn po; ki Piita nan Jems nan Jɔɔnn nan Andru tan baar u boor ni, bi kuukɔɔ, ki boiɔ a 4“Betirit, bee yooe ki linba na kur tan sii tee? ki bee tan sa tun ki wann nan li yoo maŋ per na ki li kura-n tan teeni.”

5Ki u betib a “I chek i mɔŋ paak man, ki daa te ki sɔɔ-n kpanni mani. 6Niib bonchiann tan sa baar ki taan n sann ki kpannii a ŋamme tee min Masia, ki kpann niib bonchiann. 7I tan sii gbia tɔbii dammir nna, nan banfɔka; ŋaan i daa tiin jaŋmaanii. Li bonbooru tan sa fabira li tun, ŋaan li kan wann a li joontue na.

8“Nibooru nan nibooru tan sa kɔn nan leeb; ki kpanbar nan kpanbar mun tan sa took ki kɔn nan leeb. Tiŋ jijekit tan sii be tingbouŋ na loka kur po. Ki kon baak tan sii be. Linba na tan sii tee kaman nan matyiaru pinpiik nee.

9“I chek i mɔŋ paak man. Bi tan sa soori ki saan nani buutdamm boor ni, ki booi Yenjiantu diit ni. I tan sa set tinii yudamm nan kpanbara tɔɔnn ni, n sann paak, ki yin betib n barŋanii na. 10Bi tan sa mɔɔnt barŋanii na tur nibooru kura, ki yoo maŋ-n baar. 11Bi-i taŋŋi soori ki saan nani buut boor ni yoonba, ya daa te ki li daamiini nan ya sa pak linba na; li yoo-i taŋŋi baar, yin pak linba ki Yennu sa wanni li yoo maŋ, kimaan barii nba ki i tan sa pak na tan kii tee i mɔŋ mɔŋ barii kaa, li tan sii nyi Yennu Seyeeŋ boor nie. 12Li yoo maŋ, nirɔ tuu tan sa fikis u mɔŋ mɔŋ ninja ki bin kpiu; ki baanba mun tan sa tun nnee ki tur bi mɔŋ mɔŋ waas; ki waas mun bia tan sa kɔn nan bi damm, ki chabib nan kuun. 13Ki sɔɔ kura tan sii nami kimaan ya waan na paak, ŋaan wunba tan gubin nan fara yoo maŋ joontu tan sa la tinnuwa.”

Jaŋmaanbiiuk labaar

(Matiu 24.15-28; Luk 21.20-24)

14“I tan sa la ki bonbiirkar see la bo kii ŋan nan lii see siaminba.” (Wunba tan karin sɔbu na, wun bann la want linba.) “Li yoo maŋ, binba tan be Judea tiŋ ni, bin chiar ki do jɔɔt. 15Nisɔɔ nba taŋŋi be u ditɔɔtuk paak, u ji tan daa sik kɔɔ u diiuk ni a wun jii siari. 16Ki nisɔɔ nba tan sii be kpaab ni, u daa ŋmat a wun jii u liatiri. 17Li yoo maŋ, podamm nan binba dia walai tan sa di fara bonchiann. 18I mei Yennu man ki u daa te ki fara na baat wonfufuk yoo; 19kimaan Yennu nba din nan dunia na pinpiik niwa mɔkmɔk nan mɔtana, sɔɔ daa ki mi la nunbɔŋ ki li bi ki baar nunbɔŋ nba tan sii be daa maŋ ni biaŋinba. Ki nunbɔnsiak mun ji kan mi be kaman nan ŋann na. 20Ŋaan ti Yomdaanɔ wat daa maŋ yabinta. Li-i tee ki u bo ki watiri, sɔɔ bo tan kan tinni, ŋaan u nifogannkab paak ki u wat daa maŋ yabint.

21“Li yoo maŋ, sɔɔ-i taŋŋi beti a ‘Gotir man, Masia be nna;’ amii ‘U be leŋe,’ i daa teeu yada, 22kimaan faak Masianba nan faak sɔkiniinba tan sa baar ki tuun nyina nan bakitnauŋ toona, a bin kpann niib. Ki li-i taŋŋi sa fit gbaa, bi tan sa kpann binba tee Yennu nifogannkab tiauŋɔ gbaa. 23N poŋ beti bonsiar kure sinsinna, ki yoo maŋ daa ki baari. I chek man fanu.

Yisa jenu labaar

(Matiu 24.29-31; Luk 21.25-28)

24“Fara na poorpoe, ki yennu na tan sa bɔnn, ki ŋmaarik ji kan yenti, 25ki ŋmaabira tan sa nyi sanpaapo ki baa, ki linba kur be sanpaapo tan sa damm ki ŋmat ŋmat. 26Li yoo maŋ ki min nisaarik Bik tan sa dɔkit sanpagbana ni nan paŋ bonchiann nan yentsaakar. 27N tan sa tun malakanba tingbouŋ na loka ŋanna na kur po ki bin tikir Yennu nifogannkab ki lakimm.

Sinsabik nyinn labaar

(Matiu 24.32-35; Luk 21.29-33)

28“Yi jii sinsabik ki tumii yan man; ya tuu la ki tiik maŋ bintir yoonba na, i ji tuu mi nan siɔk pere na. 29Nnee mun, yoo nba ki i tan laat ki linba na nba kur tuun, yin bann nan n jenu maŋ pere na, li ji kan yukiri. 30Barmɔniie ki n beeri na, mɔtana nigbouŋ na kan kpo ki gbenn kaawa ki linba na-n tumii. 31Sanpaapo nan tiŋ tan sa gara, ŋaan n maan ŋanin kan mi ki gar fabaa.

Sɔɔ ki mi Yisa jenu daar

(Matiu 24.36-44)

32“Ŋaan sɔɔ ki mi li daar maŋ amii yoo nba ki n sa jeni; malakanba nba be Yendɔuŋ ni ki mi; min Yennu Bik bia ki mi; n Baa Yennu kuukɔɔe mi. 33I gorii man, kii mi man, kimaan i ki mi yoo nba ki n sa jeni. 34Li tan sii tee kaman nan jasɔɔ nba yaa wun nyi u ŋaak ni ki yaatir saa sɔnbanfɔkir, ki chab u ŋaajab yaak a bii dia u ŋaak, ki bia chent bi kura toona, ŋaan bet u ŋaguurɔɔ a wun guu, ŋaan saan. 35I mun-ii guu man, kimaan i ki mi yoo nba ki min i Yomdaanɔ sa jen; li pasiar dajouko, amii tansuuniie, amii sanyafaare, amii sanyiɔk nie. 36Li-i tee ki n jen yiama, li ki ŋan ma n lai ki i gɔɔnti. 37Li paak, ma beeri linba na, n beer sɔɔ kure, i guu man.”

Currently Selected:

Mak 13: BIM

Highlight

Copy