Mak 11

Yisa nba baat Jerusalem ki bi dontirɔ biaŋinba

(Matiu 21.1-11; Luk 19.28-40; Jɔɔnn 12.12-19)

1Tɔn, ki Yisa nan u poorpoweiteeb nba din tan per Jerusalem ki baar doi nba ki bi yi Betfej nan Betani na, ki doi maŋ biak kunkonn nba ki bi yir Olif Tiinii kunkonn na, ki u tun u poorpoweiteeb na ni bannlee, ki yetib a 2“I saa doo nba be tɔɔnn po na ni man. I-i sai baar, i sa la bonsar nba ki sɔɔ daa ki mi ki jakɔ, ki u lor nanyer po. Yin lotɔ ki baar nanɔ n boor nna. 3Sɔɔ-i boi-i a bee ki i lot boŋ maŋi, yin betɔ a i yomdaanɔe loonɔ, a ŋaan u sa jiinɔ mɔtana.”

4Ŋanne ki bi din saan ki set saa la ki bonsar lor ŋasiak nna nanyer po. Ba set lotɔ yoonba 5ki nisiab nna see leŋ ki boib a “I tee bee, i lot bonsar maŋee?”

6Ki bi betib kaman nan Yisa nba bo yaa bin yet biaŋinba na; ki niib maŋ biar ŋmin, ki bi lotɔ ki saan. 7Ba din baar nan bonsar maŋ Yisa boor ni yoonba, ki bi jikit bi tiat ki paa boŋ maŋ bɔɔnn paak, ki Yisa jak. 8Ki niib bonchiann jikit bi chinchena ki lat sɔnu ni, ki siab mun ŋat faamaasa ki lat sɔnu ni. 9Binba din gar Yisa tɔɔnn po, nan binba din waa u poor po kura din yikin ki yeen a “Ti Yomdaanɔ, hosana, tintit mɔtana. Yennu mɔsonŋann-ii be wunba baat nan ti Yomdaanɔ Yennu sann ni na paak. 10Yennu mɔsonŋann-ii bia be ti yeja David naan nba baat na paak. Hosana, Yennu wunba be sanpaapo na, tintit mɔtana.”

11Ki Yisa baar Jerusalem ki kɔɔ Yennu jiantu ŋasaakak ni, ki lin got bonsiar kura; ŋaan nyiɔk nba din tan bɔnt na paak, ki ŋɔɔ nan u poorpoweiteeb piik nan bannlee na nyii ki ŋmat saan Betani.

Yisa nba yet kinkaŋ biaŋinba

(Matiu 21.18-19)

12Li sanyafannuko ki Yisa nan u poorpoweiteeb nyii Betani ki jent Jerusalem; ki kon tan soorɔ. 13Ki u la kinkaŋ nba mɔk faamaasa, ki li see banfɔkira. Ki u saan tiik maŋ nyakir ni a wun sa la siar li paak ki di; ŋaan wa baar leŋ ki u ki la siari see faat kuukɔɔ, kimaan kinkana yoo daa ki baari. 14Ŋanne ki u yet tiik na a “Sɔɔ ji kan mi di a lɔɔna la nyii dinna ki saa.” Ki u poorpoweiteeb gbat u mɔmaan maŋ.

Yisa nba ŋamm Yennu jiantu ŋasaakak biaŋinba

(Matiu 21.12-17; Luk 19.45-48; Jɔɔnn 2.13-22)

15Tɔn, ki bi tan baar Jerusalem; ki Yisa saan kɔɔ Yennu jiantu ŋasaakak ni, ki beer kɔiteeb nan daateeb kur ki nyintib, ki tut likikpenta teebura ki lubin, ki tabit binba kɔi ŋmana na kokii ki lubin, 16ki lek ki sak ki sɔɔ-n jii bonsiar gar nann Yennu jiantu ŋasaakak na barintir ni. 17Ŋanne ki u want niib na ki betib a “Li sɔb Yennu gbouŋ ni a ŋɔɔ Yennu yet a ‘Bi sii yi n ŋaak Yenmiaru ŋaake ki tur nibooru kura,’ ŋaan yimme kpintir ki teen fatiteeb kinkar boor.”

18Ki Yennu jiantu yudamm nan sennu wannteeb gbat wa tun biaŋinba na; ki bi ji loon sɔnu nba ki bi sa kpiu, ŋaan daa tiinɔ jaŋmaanii, kimaan u wannu din teen nibur na kura yaarlituk bonchiann.

19Dajouk nba tan baar yoonba ki ŋɔɔ nan u poorpoweiteeb nyii Jerusalem.

Kinkaŋ maŋ kooru labaar

(Matiu 21.20-22)

20Li saanyafannuko biak ki bi somm sɔnu ni ki gaar, ki la ki kinkaŋ na koor nan jiina niwa ki see. 21Piita nba tiar Yisa nba won yet linba na, ki u betɔ a “Chanbaa, gotir, fa won yet kinkaŋ nba Yennu mɔtomm na koora.”

22Ki Yisa betib, “Teent Yennu yada man. 23Barmɔniie ki n beeri na, wunba kur yet jɔɔr na a lin fikit ki saa baa mɔkgbeŋŋir ni, ŋaan ki ki mɔk birsuk u par ni, ki teen yada nan wa yet linba maŋ sa tuma, li set sa tun turɔwa. 24Li paake ki n beeri, li-i tee ki i mei Yennu ki boiɔ siar po, yii mɔk yada i para ni nan i poŋ gaar bont maŋa, ki i set sa lawa. 25Li-i tee ki i yaa yin miar Yennu, ŋaan tiar nan sɔɔ tun biit ki biiri, yin nyik chabɔ, ki i Baa Yennu nba be sanpaapo na mun sa nyik i biit nba ki i tun ki chabi. 26Ŋaan li-i tee ki i ki nyikit chabit i leeb bi biit, i Baa Yennu nba be sanpaapo na mun kan nyik chab i biiti.”

Nisiab nba boi Yisa u yikoo po biaŋinba

(Matiu 21.23-27; Luk 20.1-8)

27Tɔn, ki Yisa nan u poorpoweiteeb maŋ yaan din tan jen Jerusalem, ki u kɔɔ Yennu jiantu ŋasaakak ni ki somm lin. Ki jiantu yudamm, nan sennu wannteeb, nan tiŋ maŋ ni saakab, baar u boor ni, 28ki tan boiɔ a “Yikoo lannpoe ki a mɔk ki tuun linba na kuri? Ŋmee chaba li yikoo?”

29Ki u yetib a “Ŋaant ki n boi-i buboit yennkɔɔ sinsinn. Li-i tee ki i sa fit turin li gatu, tɔn, n sa wanni yikobooru nba ki n la ki tuun linba na kura. 30Jɔɔnn wunba daan wuur niib Yennu nyunwuru na, Yennue chabɔ li yikoo amii nisaarikee? Betirin man!”

31Ki bi ŋmant faa bi leeb labaar ki yeen a “Ti-i yet a Yennue chabɔ li yikoo, u sa boit a ki bee te ki ti ki teenɔ yada; 32ki ti sa fit yet a nisaariie chabɔ-ɔɔ?” (Bi tiin niib na, kimaan sɔɔ kur sak nan Jɔɔnn maŋ set daan tee Yennu sɔkiniie nan barmɔnii.) 33Li paak, ki bi jiin ki yet Yisa a “Ti ki mi.”

Ki u mun betib a “Tɔn, n mun kan beti wunba chabin li yikoo ki n tuun linba na.”

Currently Selected:

Mak 11: BIM

Highlight

Copy