Matiu 24

Yennu jiantu ŋasaakak biiru labaar

(Mak 13.1-2; Luk 21.5-6)

1Yisa nba din nyii Yennu jiantu ŋasaakak ni ki saa na, ki u poorpoweiteeb din baar u boor ni ki tan wantɔ jiantu ŋaak maŋ diit. 2Ŋanne ki u boib a “I la linba na nba kuraa? Barmɔniie ki n beeri na, ŋaan bi tan sa tut li kur, ki lu tiŋ niwa, ki li tann yennkɔɔ tan kan biar ki paa leer paaki.”

Muksuk nan fara labaar

(Mak 13.3-13; Luk 21.7-19)

3Yisa nba din tan saan ki saa kar kunkonn nba ki bi yir Olif Tiinii kunkonn na paak na, ki u poorpoweiteeb tan baar u boor ni, bi kuukɔɔ, ki boiɔ a “Betirit, bee yooe ki linba na kura tan sii tee? Bee tan sii tee a baaru nyinn nan dunia gbennu nyinni?”

4Ki u jiin ki betib a “I mi man ki sɔɔ-n tan kpanni, 5kimaan niib bonchiann tan sa jii n sanne ki baar ki yeen a ŋamme tee min Masia na, ki kpann niib bonchiann. 6I tan sa gbat tɔb fuut i kɔɔnn ni, nan li labaar banfɔka, ŋaan i daa jee, kimaan li kpaa talase nan linba na kur-n tun, ŋaan li ki want nan dunia gbennu baare na. 7Nibooru nan nibooru tan sa kɔn nan leeb, ki kpanbara nan kpanbara mun tan sa took ki kɔn nan leeb. Ki kon nan tiŋ jijekit tan sii be loka kur po. 8Linba na nba kur tan sii tee kaman nan matyiaru pinpiik nee.

9“Li yoo maŋ ki bi tan sa soori ki dinni fara biak, ki kpi-i, ki booru kur tan sii nami kimaan ya waan na paak. 10Li yoo maŋ, niib bonchiann tan sa yêt n weiu, ki bia fikisir leeb, ki bia nan leeb. 11Ki faak sɔkiniinba tan sa nyi ki kpann niib bonchiann. 12Biit nba tan sa mantik yabit tingbouŋ na ni na paak, ki niib bonchiann loomm tan sa maak. 13Ŋaan wunba tan gubin nan fara yoo na joontu tan sa la tinnuwa. 14Ki bi tan sa mɔɔnt Yennu naan barŋanii mɔɔntii na tingbouŋ na kur po, a nibooru kur-n gbat, ki dunia gbennu-n yen fit baar.

Jaŋmaanbiiuk labaar

(Mak 13.14-23; Luk 21.20-24)

15“I tan sa la bonbiirkar nba ki Yennu sɔkinii Daniel din yet li po na, a linba ki Yennu kɔɔ na, ki li tan sii see Yennu jiantu ŋasaakak ni.” (Wunba kur tan karin sɔbu na, wun bann la want linba.) 16“Li yoo maŋ, binba tan be Judea tiŋ ni, bin chiar kii do jɔɔt, 17ki wunba tan be u ditɔɔtuk paak wa daa gbaa kɔɔ u diiuk ni a wun saa jii u siari, 18ki wunba tan be u kpaab ni, u daa ŋmat a wun saa jii u liatiri. 19Li yoo maŋ, podamm nan binba dia walai tan sa di fara bonchiann. 20Yii mei man Yennu ki u daa te ki fara na baat wonfufuk yoo, amii foon daari. 21Kimaan li yoo maŋ, farchiauŋ sii be; Yennu nba nan duniawa nan dinna, li fara booru daa ki mi baari; li booru mun bia ji kan mi ki baari. 22Yennu-i taŋŋi kii wat daa maŋ yabinti, sɔɔ tan kan tinni; ŋaan u nigannkab paak ki u tan sa wat daa maŋ yabint.

23“Li yoo maŋ, sɔɔ-i taŋŋi beti a ‘Gotir man, Masia be nna,’ amii ‘U be leŋe,’ i daa teeu yada, 24kimaan li yoo maŋ, faak Masianba nan faak sɔkiniinba tan sa nyi ki tuun nyina nan bakitnauŋ toonjaana a bin kpann niib; ki li-i taŋŋi fit gbaa, bi tan sa kpann Yennu nigannkab tiauŋɔ gbaa. 25Gbiintir man, n poŋ dɔŋ betiewa, ki yoo maŋ daa ki baari.

26“Li paak, bi-i taŋŋi beti a ‘Gotir man, u be muuk ni,’ i daa saa; amii bi-i beti a ‘Gotir man, u be diiuk ni,’ i daa tee yada, 27kimaan min nisaarik Bik na baaru tan sii tee kaman nan saak nba tuu nyikint ki nyi yendo po ki saa sik yenbaa po nee.

28“Siaminba ki bonkpeenn be, leŋe ki juut tikii.

Nisaarik Bik na jenu labaar

(Mak 13.24-27; Luk 21.25-28)

29“Fara na poorpo ki yennu tan sa bɔnn, ki ŋmaarik ji kan yenti; ki ŋmaabira tan sa nyi sanpaapo ki baa, ki linba kur be sanpaapo tan sa damm ki ŋmat ŋmat. 30Li yoo maŋ ki niib tan sa la min nisaarik Bik jenu nyinn sanpaapo, ki nibooru booru nba be tingbouŋ na kur tan sii fabin, ki ji la min nisaarik Bik ki n be sanpagbana ni ki siik nan paŋ nan yentsaakar. 31Gatgaak tan sa bui, ki n tun n malakanba ki bin saan ki saa tikir n nigannkab nba be tingbouŋ na loka ŋanna na kur po ki baar.

Sinsabik nyinn labaar

(Mak 13.28-31; Luk 21.29-33)

32“Yi jii sinsabik ki tumii yan man; ya tuu la ki tiik maŋ bintir yoonba, i ji tuu bann nan siɔk pere na. 33Nnee mun, yoo nba ki i tan laat ki linba na nba kur tuun, yin bann nan n jenu maŋ pere na, li ji kan yukiri. 34Barmɔniie ki n beeri na, mɔtana nigbouŋ na kan kpo ki gbenn kaawa ki linba na kur-n tumi. 35Sanpaapo nan tiŋ tan sa gara, ŋaan n maan ŋanin kan mi ki gar fabaa.

Sɔɔ ki mi Yisa jenu daar

(Mak 13.32-37; Luk 17.26-30, 34-36)

36“Ŋaan sɔɔ ki mi daar maŋ amii yoo nba ki n sa jeni; li sanpaapo malakanba, amii min Yennu Bija mɔŋ ki mi, see n Baa Yennu kuukɔɔe mi. 37La din teen biaŋinba Nowa yoo na, li mun bia tan sii tee nnee min nisaarik Bik jenu yoo. 38Nowa yoo maŋ, yoo nba ki nyunchiauŋ din daa ki baari, ki niib din di jeet ki nyu, ki kɔɔnt poob, ki jikit bi waas ki teemm jab, ki tan tuu daar nba ki Nowa din kɔɔ ŋarungbeŋŋir ni. 39Ki niib maŋ din bia daa ki bann linba tuumi ki tan tuu daar nba ki nyunsaakan din baar ki tan dii bi kur saaka. Li bia tan sii tee nnee yoo nba ki min nisaarik Bik tan sa jen. 40Li daar maŋ, jab bannlee tan sii bɔɔ kpaab ni ki ko, ki n tan sa jii yenɔ ŋaan nyik lɔɔ. 41Poob bannlee tan sii lakin bɔɔ naan dii, ki n tan sa jii yenɔ ŋaan nyik lɔɔ.

42“Li paak, yi chekin i mɔŋ paak man, kimaan i ki mi daar nba ki min i Yomdaanɔ sa jeni. 43Ŋaan bant man nan li-i tee ki ŋaadaanɔ poŋ mi yoo nba ki nanyukɔɔ yaa wun baar u ŋaak ni nyiɔku, u sii kare ki guu; u kan sak ki nanyukɔɔ-n tan kɔɔ ki jamɔ. 44Li paak, li ŋan ki i mun-ii teen siir yoo kura, kimaan min nisaarik Bik mun bia tan sa jen yoo nba ki i ki dukii n jenu na po nee.

Daabir nba sa sak u yomdaanɔ mɔb biaŋinba

(Luk 12.41-48)

45“Daabilannɔe tee yandaanɔ ki tuun u yomdaanɔ nba wantɔ biaŋinba? Ŋɔɔe tee wunba ki u yomdaanɔ sa teenɔ daabiyudaanɔ a wuu gorii u daabileeb, kii teemm mann nan li sɔnu. 46Li-i tee ki u yomdaanɔ tan kpen ki la ki u tuun nna, parpeenn sii tee daabir maŋ yare. 47Barmɔniie ki n beeri na, ŋaadaanɔ maŋ sa jii u mɔkint kur ki teen daabir maŋ nuu ni, a wuu gorii. 48Ŋaan li-i tee ki daabir maŋ tee daabiyoonn ki dukin u par ni a u yomdaanɔ kan kpen yiami, 49ŋaan piin ki boo u daabileeb, ki ŋɔɔ nan danyuura bia lakin ki nyu ki di, 50u yomdaanɔ maŋ tan sa kpen daar nba ki u ŋaa u kpenu tamae, nan yoo nba ki u ki mi. 51U yomdaanɔ na sa dat u tubir bonbiir, ki teenɔ kaman nan wa tuu teen kpinkpannii damm biaŋinba na. Leŋ maŋe ki u ji sii fabin mɔn ki junt u nyana.

Currently Selected:

Matiu 24: BIM

Highlight

Copy