Matiu 23
23
Sennu wannteeb nan Farisiinba binbeŋ labaar
(Mak 12.38-39; Luk 11.43, 46; 20.45-46)
1Ŋanne ki Yisa din piin ki piak teen niburchiauŋ na nan u poorpoweiteeb a 2“Sennu wannteeb nan Farisiinba nee ki bi turib yaak nan bii sɔkint Moses sennu na. 3Li paak, li ŋan ki yii saak kii waa ba wanti linba na kura, ŋâan ki i mi man ki yin gaar bi binbeŋ, kimaan bi ki tuun ba want linba maŋi. 4Bi jint niib jikikpiata linba paar nan bin jii, ŋaan kan sak ki bin jii bi niibir gbaa ki babir sɔɔ ki wun jii. 5Linba kur ki bi tuun na, bi tuun a niib-n la ki pakibe. Gotir ba jii Yennu sennu waaminna nba sɔb gbanbis paak na ki lor lor bi gbanant paak ki li gbeŋ gbeŋ biaŋinba; bia gotir bi liatbaant mɔgbana nba fɔk fɔk ki yarin yarin biaŋinba. 6Bi-i saan jaamm ni, bi tuu loon bii kar yudamm kinkaanii paak; bi-i kɔɔ Yenjiantu diit ni, bi bia loon nijaana kaanii boae. 7Bi bia tuu loon ki niib-n foontib nan burchinfoontii dai ni, kii yib a ‘Wannteeb.’ 8Ŋaan yimm ŋanin, i daa te ki bi yi-i ‘Wannteebi,’ kimaan i kura tee naa waase nan leeb, ki mɔk i Wanntɔɔ yenɔkɔɔ. 9I daa yi sɔɔ i ‘Baa’ tingbouŋ na ni, kimaan i mɔk Baa yenɔkɔɔe; ŋɔɔe tee Yennu wunba be sanpaapo na. 10I bia daa te ki niib yi-i bi ‘Yomdammi,’ kimaan i mɔk Yomdaanɔ yenɔkɔɔe; ŋɔɔe tee min Yisa Masia. 11Wunba tee nijaann i ni, wun teen u mɔŋ i kura toontunnɔ. 12Ŋaan wunba dont u mɔŋ, Yennu tan sa sikinɔwa; ŋaan wunba sikint u mɔŋ, Yennue tan sa donnɔ.”
Kpinkpannii damm kpaanii po labaar
(Mak 12.40; Luk 11.39-42, 44, 52; 20.47)
13Ki Yisa bia din yet a “Yimm sennu wannteeb nan Farisiinba nba tee kpinkpannii damm na, li sii bi i paak, kimaan yimme loo Yennu naan tammɔb a niib daa kɔɔ. I mɔŋ mɔŋ kan kɔɔ, ŋaan dɔk binba loon bin kɔɔ tammɔb na. 14Yimm sennu wannteeb nan Farisiinba nba tee kpinkpannii damm na, li sii bi i paak, kimaan i gaan pakɔi ŋei, ki mei Yennu ki yukii ki kpann nan i tee yentinae. Li paak, i tubdatu tan sii bi bonchiann.
15“Yimm sennu wannteeb nan Farisiinba nba tee kpinkpannii damm na, li sii bi i paak, kimaan i duuk mɔkgbeŋŋa ki pootir kpenii ki kɔɔ digbangbeŋŋa ni ki loon wunba sa kpint u binbeŋ kii waa i poorpoe, ki li-i tee ki i taŋŋi la sɔɔ ki u waaini, i tuu te ki u biit nba jikitɔ saa Sintaanii muu ni na-n ŋamm pukin taar munnlee-e nan i yar na.
16“Yimm jɔɔndat teeb na, li sii bi i paak. I want niib na a ‘Sɔɔ-i por Yennu diiuk, li kaa biiti, a ŋaan li-i tee ki sɔɔ por likirii nba be diiuk maŋ ni na, a see ki u gbeen wa por biaŋinba na.’ 17Yimm jɔɔndat teeb na, bona ŋannlee na ni, lannpoe kpaa barkpaanni, likirii na amii Yennu diiuk nba te ki likirii na tee Yennu yar na? 18Ki i bia yet a ‘Li-i tee ki sɔɔ por mannu binbintiri, li kaa biiti, a ŋaan li-i tee ki sɔɔ por mannu bonkobuk nba paa binbintir na paak na, see ki u gbeen wa por biaŋinba na.’ 19I set tee jɔɔniie nan barmɔnii. Bona ŋannlee na ni, lannpoe kpaa barkpaanni, mannu bonkobuk na amii binbintir nba te ki li tee Yennu yari? 20Li paak, li-i tee ki sɔɔ por mannu binbintiri, li want nan u por binbintir na nan linba kur paa li paak nee mun. 21Li-i tee ki sɔɔ bia por Yennu diiuk, li want nan u por diiuk maŋ nan Yennu nba be leŋ nee mun. 22Li-i bia tee ki sɔɔ por Yendɔuŋ, u por Yennu naangbouŋ nan wunba kar li paak maŋe.
23“Yimm sennu wannteeb nan Farisiinba nba tee kpinkpannii damm na, li sii bi i paak. I jikit baarii nan bukuŋ nan narii nan li bonlia piik nɔɔk ni yennkɔɔ ki teen Yennu, ŋaan nyik linba tee barkpaana u sennu ni; ŋanne tee barbunu nba took, nan ninbatinu, nan yada teenu. Linba na nbae bo ŋan nan yii tuun, ki daa nyikit li yenninba tumu. 24Yimm jɔɔndat teeb na, i tuu lot kpajuuk nyun ni ki lue, ŋaan nak lagumii nan nyun!
25“Yimm sennu wannteeb nan Farisiinba nba tee kpinkpannii damm na, li sii bi i paak, kimaan i sokii nyunyuŋmanii nan senii poorpoe, ŋaan ki nɔɔk ni gbee nan fatu nan jawuuk. 26Yimm Farisiinba nba tee jɔɔnii na, sokit man nyunyuŋmanii nan senii nɔi ni sinsinn, ki li poorpo sa nyiwa.
27“Yimm sennu wannteeb nan Farisiinba nba tee kpinkpannii damm na, li sii bi i paak. I tee kaman nan kaat nba ki bi maa ki pent senne, ki li poorpo fane, ŋaan ki li nɔɔk ni gbee nan kpaba nan pɔyuu. 28Nnee ki niib gorii i nanyer po ki i fan, ŋaan i para ni gbee nan fai nan biit.
Yisa nba piak bi tubdatu po biaŋinba
(Luk 11.47-51)
29“Yimm sennu wannteeb nan Farisiinba nba tee kpinkpannii damm na, li sii bi i paak. I maa Yennu sɔkiniinba kaat, ki jabib, ki sent, ki li tee linba sa tiar niib yentina kuun po, 30ŋaan yeen a ‘Ti-i diŋŋi bo-i be ti yejamm yoo, ti din bo kan tun ba din tun linba ki kpii Yennu sɔkiniinba na.’ 31Li paak, linba na want nan i set sak nan i tee binba din kpii Yennu sɔkiniinba na yaaboonae. 32Li paak, i yejamm nba din piin ki tun toonbiit biaŋinba na, tontir man. 33Yimm wai; yimm walabirii waas na, nlee ki i tan sa nyi tubdatu muu nba kan mi kpeen na ni? 34Li paak te ki n beeri na, n tan sa tun Yennu sɔkiniinba nan yandamm nan wannteeb i boor ni, ŋaan i tan sa kpi bi siabe, ki kpaa siab kuun dapunpunn paak, ki boo siab Yenjiantu diit ni, ki bia wei tɔkii bi taa ki nyi doyenu ni ki tɔɔtir doleu ni. 35Li paak, ba din kpii yentina nba na kura tubdatu be i yura paak, la nyii nipeemɔ Abel paak, ki saa tuu Berakia bija Sekaria paak, wunba ki bi din kpiu Yennu diiuk nan mannu binbintir sinsuuk ni na. 36Barmɔniie ki n beeri na, mɔtana nigbouŋ na tan sa la tubdatu toonbiit maŋ kur paake.
Yisa nba loon Jerusalem niib biaŋinba
(Luk 13.34-35)
37“Nbaayoo, Jerusalem teeb, yimm nba kpi Yennu sɔkiniinba, ki bia jaat u toomiinba nba ki u tumm i boor ni na tana, bikinu bikinu taar muŋŋae ki n gbaa ma n lakini yomm kaman nan korik nba tuu lakin u kobis u kpinkpant ni na, ki i ki saki. 38Gotir man, Yennu nyik i jiantu ŋaak nee na, ki li nyint ŋayann. 39N beerie, la nyii dinna ki jii saa i kan mi ki la min ki saa tuu daar nba ki i tan sa yet a ‘Yennu mɔsonŋann be wunba baat nan ti Yomdaanɔ sann ni paak.’ ”
Currently Selected:
Matiu 23: BIM
Highlight
Share
Copy
Want to have your highlights saved across all your devices? Sign up or sign in
