Jɔɔnn 21

Biaŋinba ki Yisa dɔkit u poorpoweiteeb ni bannlore paak

1Li poorpoe ki Yisa ŋamm dɔkit ki wann u mɔŋ ki tur u poorpoweiteeb, mɔkgbeŋŋir nba ki bi yir Taiberias na ni. Wa dɔkit biaŋinbae na: 2Simon Piita nan Tomas (wunba ki bi din yiu Jaak na) nan Natanael (ŋɔɔe din nyii Kana nba be Galilee tiŋ ni na), nan Sebedee waas, nan Yisa poorpoweiteleeb bannlee din lakin be Taiberias mɔkgbeŋŋir maŋ ni. 3Ki Simon Piita tan bet u leeb a “N sa sik ki soor janiiwa.”

Ki bi betɔ “Timm nan fine sa sik.” Ki bi saan kɔɔ burgbetir ni, ki lubin bi janlaauŋ nyun ni, ŋaan li nyiɔk maŋ bi din ki fit soor siari. 4Li din tan yent sanyapob ni ki Yisa see nyunkpiŋ, ŋaan ki u poorpoweiteeb ki mi a ŋɔɔe. 5Ki u yiimm boib a “Ŋaajab, i soor siarii?”

Ki bi jiin a “Aaii.”

6Ki u betib “Lun i janlaauŋ i niidiitu po, ki i sa soor janii.” Ki bi lu bi janlaauŋ na, ki ji gbar donnu, kimaan janii nba ki bi soor na kpiatu din paaka.

7Ŋanne ki Yisa poorpoweitɔɔ nba ki u mantik loonɔ na yet Piita a “Ti Yomdaanɔe!” Simon Piita nba gbat a u tee bi Yomdaanɔe na, ki u lia u liatir nba ki u poŋ liat bir na, ŋaan yukir sik nyun ni ki baar Yisa peŋ. 8Leŋ din ki fɔk nan nyunkpiŋ na; li fɔkint din tee kaman nan taapauŋ kobiinntaae; ki Yisa poorpoweiteleeb ji kan burgbetir na ki li daar janlaauŋ na, ki li gbee nan janii, ki baar nyunkpiŋ na boor.

9Ba nyii burgbetir ni yoonba ki bi la sankɔɔna muu, ki jaŋ nan boroboro paa li paak ki beet. 10Ki Yisa betib a “Jiin janii nba ki i soor na siar, ki baar nann nna.” 11Ki Simon Piita kɔɔ burgbetir na ni, ki dat janlaauŋ na ki doo nann kunkonn, ki li gbee nan jangbeŋŋa; ki bi kan, ki li tee janii kobik nan piiŋŋmu nan ŋanntaa. Li din yab bonchiann, ŋaan janlaauŋ na lek ki pati.

12Ŋanne ki Yisa betib a “Saana man ki tan ŋman.” Ŋaan nan bi yenɔkɔɔwa lek ki mɔk par nan wun boiɔ a u tee ŋmee, kimaan bi mi nan u tee bi Yomdaanɔe. 13Ki Yisa jii boroboro na ki turib, ki bia jii jaŋ na ki turib.

14Linba nee din tee taar munntaa ni ki Yisa jii u mɔŋ ki wann u poorpoweiteeb, Yennu nba din fiinɔ kuun ni na poorpo.

Biaŋinba ki Yisa pak nan Piita

15Ba din dii jeet maŋ poorpoe, ki Yisa boi Simon Piita a “Simon, wunba tee Jɔɔnn bik, a loonin ki gar ŋammii?”

Ki u jiin a “Nn, n Yomdaanɔ, a mi nan n loona.”

Ki u yetɔ a “I dint n pebis.” 16Ki taar munnlee ni ki Yisa boi Simon Piita a “Simon, wunba tee Jɔɔnn bik, a loonimii?”

Ki u jiin a “Nn, n Yomdaanɔ, a mi nan n loona.”

Ki u betɔ a “I kpaar n pei.” 17Ki taar munntaa ni biak ki Yisa boiɔ “Simon, wunba tee Jɔɔnn bik, a loonimii?”

Ki Piita par ni ji biir, kimaan Yisa nba boiɔ taar munntaa ni a “A loonimii?” na. Ki u yetɔ a “N Yomdaanɔ, a mi bonsiar kur. A mi nan n loona.”

Ki Yisa betɔ “I dint n pei. 18Barmɔniie ki n beera na, fa din daa tee naasimɔ na, a din tuu lia a tiat, ki saa siaminba po ki a loon; ŋaan a-i taŋŋi kpet yoonba, a sa tant a nii, ki sɔɔ sa lanna tiat, ki mukisa ki a saan siaminba po ki a ki looni.” 19Yisa nba yet linba maŋ, li din want biaŋinba ki Piita tan sa kpo ki te ki Yennu sann-n la dontir. Li poorpo ki Yisa yetɔ a “I biakii waan.”

20Ki Piita tan jiant ki la Yisa poorpoweitɔlɔɔ nba ki u mantik loonɔ na, ki u waa; ŋɔɔe tee wunba din kar ki kpia Yisa yoo nba ki bi din lakin di jeet na, ki u din dɔnn ki nakinɔ ki boiɔ a “Ŋmee yaa wun tan nyi a poor maŋ na?” 21Piita nba lau yoonba na, ki u boi Yisa, “N Yomdaanɔ, ŋaan ki jɔɔ na ŋarimi?” 22Ki Yisa jiin yetɔ a “Mi-i loon ki wuu be nan ma tan sa jen, li ki laani. Fin-ii waan.”

23Li paake teen ki Yisa poorpoweiteeb din yeen a Yisa poorpoweitɔɔ maŋ kan kpo. Ŋaan Yisa ŋarin din ki pak yaa a u kan kpo kaa. U din yet a “Mi-i loon wuu be nan ma tan sa jen, li ki laani.”

Wunba sɔb gbouŋ na po

24Tɔn, Yisa poorpoweitɔɔ maŋe tee wunba yeen niib barii maŋ, ki bia sɔbir gbouŋ na ni; ki ti mi nan wa yeen linba na tee barmɔniie.

25Ŋaan bona bonchiann din be ki Yisa din tun ki pukin linba sɔb gbouŋ maŋ paak. Bi-i bo-i sɔb linba kur ki u din tun maŋ, n dukin nan gbant nba ki bi bo sa sɔb na bo kan la yiar tingbouŋ na ni kii be.

Currently Selected:

Jɔɔnn 21: BIM

Highlight

Copy