Toona 1

1Chanbaa Teofilus:

N sinsinn sɔbu na ni min Luk din sɔb bona bonchiann nba ki Yisa din tuun ŋaan bia want niib, u toonn pinpiin yoo na ni mɔkmɔk nan Yennu nba din tan donnɔ Yendɔuŋ ni. 2Ŋaan sinsinn daann, wa din daa ki doo na, Yennu Seyeeŋ yaak nie ki u din wann wa din gann binba ki teemm u toomiinba na, ba sii tuun biaŋinba. 3U kuun poorpoe ki u din jii dapiinna ki yɔɔ want u mɔŋ ki teemm, ki li want nan birsuk kaa ki u set jen u manfoor niwa, ki bi din tuu yɔɔ laatɔ, ki u piak namm ki jikit saa Yennu naan po.

4Yosau yaann ki u din tan lakin be namm, ki din tan turib mɔb a “I daa nyi Jerusalemi, ŋaan kii be kii guu wunba ki n Baa Yennu senn mɔsonn yaa wun turi na, ma din poŋ beti u po na. 5Jɔɔnn ŋanin din wuur niib nan nyume, ŋaan daa ŋannlelee na ni Yennu Seyeeŋ sa gbee yenti.”

Biaŋinba ki Yisa doo Yendɔuŋ ni

6Toomiinba nba din lakin nan Yisa yoonba, ki bi din tan boiɔ a “Ti Yomdaanɔ, yoonba nee ki a yaa a fat timm Israel teeb yent ki jiint amii nlee?” 7Ki Yisa yetib a “Li ki laini nan ki i bann jinjaŋ yoo nba ki n Baa Yennu senn yaa lin tan teeni; ŋɔɔe mɔk u mɔŋ yaak ki senn u yoo. 8Ŋaan yoo nba ki u Seyeeŋ sa sik i paak ki yenti na, i sa la paŋ, ki tan sii tee n siara damm Jerusalem, nan Judea tiŋ kur ni, nan Samaria tiŋ ni, nan tingbouŋ na lokir kur po.”

9Wa pak maan maŋ ki gbenn yoonba, ki bi la ki Yennu te ki u do sanpaapo, ki bi goriiɔ, ki sanpagbann saa dɔkin u paak ki u bot, ki bi ji ki lau. 10Ŋaan ba lek bia see ki kpaa bi nunii ki gorii sanpaapo na, li taakpaak ni ki sɔɔ malakanba bannlee see ki lia tapeenii ki naan nan jab, 11ki boib a “Yimm Galilee teeb, bee ki i see nna ki gorii sanpaapo nna? Yisa na nba nyii i boor ni ki doo Yendɔuŋ ni biaŋinba na, u bia tan sa nyi Yendɔuŋ maŋ ni ki jen sik kaman nan ya goriiɔ ki u do sanpaapo biaŋinba nee.”

Wunba gaar Judas yiar labaar

12Li yoo na ki Yisa toomiinba na nyii Olif Tiinii kunkonn na paak ki ŋmat Jerusalem. Leŋ maŋ nan Jerusalem din tee kaman nan maar jinn nee. 13Ba baar Jerusalem yoonba ki bi saan kɔɔ ŋaak nba ki bi tuu be na ni ki doo ditɔɔtuk paak. Binba din kɔɔ maŋ din tee Piita nan Jɔɔnn nan Jems nan Andru nan Filip nan Tomas nan Batolomiu nan Matiu nan Jems wunba din tee Alfeus bik, nan Simon Nikakitik, nan Judas wunba tee sɔɔ nna ki bi yiu Jems na bik; 14ki bi kura tuu yɔɔ lakint nan bi leeb ki din pukin poosiab nan Yisa naa, Mari, nan Yisa waarii, ki bi pik mei Yennu nan dudukyent kuukɔɔ ki ki naki.

15Ŋanne ki daa ŋannlee nna tan gar, ki Yisaweira kaman nan kobik nan piinnlee na taan tikir kar, ki Piita tan fiir ki set 16ki yet a “N naa waas, linba ki Yennu Seyeeŋ din te ki David din sint bunt buntir ki jikit saa Judas po, ki li sɔb Yennu gbouŋ ni na, li tee talase ki li set tan teen ki gbee na. Judas maŋe tee daanɔ nba daan wann niib ki bi soor Yisa na. 17Ŋaan Yisa din gann timm nan ŋɔɔe a tii tuun Yennu toonn nba ki ti tuun na, ki u din tee ti kann ni niyenɔ.

18(“Judas toonbiit nyɔɔt likirii nba ki u la nee, ki u jii ki daa kpaab; leŋe ki u bia baa ki put poor, ki u nɔɔt kur nyii. 19Ki Jerusalem teeb kur gbat nna maŋ, ki pur kpaab maŋ sann bi mɔŋ maan ni a Akeldama, ki li paak tee “Sɔnkpaab.”)

20“Tɔn, li sɔb yanii gbouŋ nba be Yennu gbouŋ nɔɔk ni a

‘Ŋaant ki u ŋaak-n set langbouŋ ki sɔɔ daa kɔɔ leŋi.’

Ki li bia jen sɔb a

‘Li ŋan ki sɔɔ-n gaar u toonn yiar na.’

21-22“Li paak amii ti loon ki tin gann niyenɔe ki pukinɔ ti po, ki wun teen Yisa kuunfiiru siara daanɔ, ki li ŋan ki wuu tee timm nba daan tuu yɔɔ lin nan ti Yomdaanɔ Yisa na ni yenɔ, yoo nba ki Jɔɔnn din wurɔ Yennu nyunwuru mɔkmɔk ki tan baar yoo nba ki Yisa nyii ti boor ni, ki Yennu donnɔ Yendɔuŋ ni na.”

23Ŋanne ki bi nyinn jab bannlee; Josef wunba ki bi din yiu Basabas na (bi din bia yi ŋɔɔe Justus na), nan Matias, 24ŋaan ji miar Yennu a “Ti Yomdaanɔ, fine mi sɔɔ kur par ni, ki li paak, ti Yomdaanɔ, wantit jab bannlee na ni, wunba ki a gann, 25ki wun teen toomii ki gaar a toonn na yiar nba ki Judas nyik ŋaan saan saa be siaminba ŋan nanɔ na.” 26Ba miar Yennu ki gbenn yoonba, ki bi tɔ tiatia, a bin gann bi bannlee maŋ ni yenɔ, ki Matias dii, ki bi jiiu ki pukinɔ toomiinba piik nan yenɔkɔɔ na ni.

Currently Selected:

Toona 1: BIM

Highlight

Copy