Toona 7

Stiifen pinpauk

1Ŋanne ki Yennu jiantu yudaanɔ boi Stiifen a “Li set tee mɔniiee?” 2Ki Stiifen yaa a

“Chanbaanba nan n naa waas, gbiintir man, yoo nba ki ti yeja Abraham din be Mesopotamia yakir po, Kaldea tiŋ ni na, li yoo ki u din daa ki saan Haran na, ki paŋ daanɔ Yennu na dɔkit u paak, 3ki yetɔ a ‘Fiit ki nyik a tiŋ nan a niib, ŋaan saan siaminba ki n sa wanna na.’ 4Li yoo na ki u fiir ki nyik Kaldea tiŋ maŋ, ŋaan saan ki saa kar Haran doo ni. U baa kuun poorpoe, ki Yennu bia te ki u fiir, ki baar tiŋ nba ki ti be na ni. 5Ŋaan Yennu daa din ki turɔ tiŋ na nan bonmintika a wun yenti, ŋaan senn mɔsonn a u tan sa turɔ tiŋ nna, ki ŋɔɔ nan u yaaboona-ii yen. Yennu nba din senn mɔsonn nna yoonba na, ki sɔɔ ki Abraham daa ki mɔk biki. 6Ki Yennu din yetɔ a ‘A yaaboona tan sa saan ki be tingaŋ niewa, ki tan sii tee daaba leŋ, ki bi tan sa la muksuk leŋ bonchiann, ki tan jaŋ bina kobiinna. 7Ŋaan tiŋ maŋ niib nba ki bi sii tuun ki teemm na, n tan sa dat bi tuba, ki li poorpo, a yaaboona maŋ tan sa nyi tiŋ maŋ ni, ki baar tiŋ na ni, ki jiantin.’

8“Li poorpo ki Yennu din senn mɔsonn ki tur Abraham, ki bia din wannɔ mɔsonn maŋ nyinn, a ŋɔɔ nan u yaaboona-ii porii puna. Ki Abraham din tan mar Aisak, ki li daa ŋanniin daar ki u potɔ; ki Aisak mun din tan pot u bik Jakɔb; ki Jakɔb mun din tan pot u waas piik nan bannlee binba tee ti yabint yejateeb. 9Ki Jakɔb waas maŋ din tan mɔk punponn nan bi waarɔ Josef, ki din tan soorɔ ki kɔiɔ, ki nisiab daau ki saan nanɔ Ijipt tiŋ ni, ŋaan Yennu din be nanɔ, 10ki din nyinnɔ fara kura ni, ki bia turɔ yan ki te ki Ijipt kpanbar Faro nianɔ ki jiiu teenɔ yudaanɔ Ijipt tiŋ ni, ki bia te ki u tee yudaanɔ u ŋaak ni.

11“Li poorpo ki kon tan baa Ijipt tiŋ nan Israel tiŋ Kenann ni kura, ki kon soor niib bonbiir, ki ti yejamm kɔŋ jeet. 12Jakɔb nba din gbat a dii be Ijipt yoonba, ki u tun u waas leŋ. Ŋannii din tee bi sinsinn saanu.

13“Bi saanu taar munnlee nie, ki Josef ji din te ki u naa waas na bannɔ. Ŋanne ki Faro ji din bann Josef booru. 14Ki Josef ji din tumm a bin ŋmat kun u chanbaa Jakɔb boor, ki saa jii ŋɔɔ nan u ŋaateeb kur ki jen namm Ijipt na; ki bi din tee niib piinnlore nan baŋŋmu.

15“Ŋanne ki Jakɔb nan u ŋaateeb maŋ fiir saan Ijipt ki saa kar; ki li poorpo, ŋɔɔ nan u waas din tan kpo gbenn leŋe. 16Jakɔb nba din kpo na, ki bi jii u gbanant ki kun nann Shekem nba be Kenann tiŋ ni na, ki saa piiu kakur nba ki Abraham din daa nan likirii Hamor nibooru boor ni na; ki li poorpo Jakɔb waas nba din tan kpo na, ki bi mun din tan jii ŋamm yaa kpaba ki kun nann, ki saa pii leŋ biak.

17“Yoo nba din tan per nan Yennu-n gbeen u mɔsonn nba ki u din senn Abraham na, li yoo maŋ, ti niib Israel teeb nba be Ijipt na ji yabit bonchiann. 18Li poorpoe ki sɔɔ din dii Ijipt naan, ŋaan ŋɔɔ din ki mi Josefi. 19Ki kpanbar maŋ din dia ti niib diabiiuk, ki din tuu ton namm bonchiann, ki bia din tuu miab a bin nyinn bi sanpantii bi ŋei ni ki lub ki bin kpo.

20“Ŋanne ki bi din tan mar Moses, ki u fan bonchiann, ki be u baa ŋaak ŋmaarii ŋanntaa. 21Ba din tan nyinnɔ ŋaak ni yoonba, ki kpanbar na sapaamɔ din lau, ki gaarɔ ki jiiu ki wubiiɔ; ki u ji tee u mɔŋ bik. 22Ki bi din wann ŋɔɔ Moses yan kur nba ki Ijipt teeb mɔk, ki u din tan teen wunba mi pinpauk bonchiann, ki bia tuun paŋ toona.

23“Moses nba din tan teen binpiinna Ijipt niib ni yoonba, ki dasiar ki u tan dukin a wun gɔn u mɔŋ mɔŋ booru Israel teeb. 24Wa lin gɔntib na, ki u tan la ki Ijipt nirɔ boo Israel teeb ni yenɔ; ki u baar a wun fatɔ, ki tan kpii Ijipt nirɔ maŋ. 25(U din mi a u naa waas na sa bann a Yennu tan sa te ki ŋɔɔ-n tan nyinnib daabsin ni, ŋaan bi din ki bann nna.) 26Ki li yent sanyiɔk, ki u bia la Israel niib bannlee ki bi kɔn; ki u loon ki wun taamm ki bin maŋ nan bi leeb, ki yetib a ‘Gotir man, i tee naa waase, ki bee teen ki i boo i leeb ki teen i leeb danii?’ 27Ki wunba tur u lɔɔ daŋ na pii Moses, ŋaan betɔ yaa a ‘Sɔɔ ki ganna a a teen ti yudaanɔ amii ti barbuurɔ. 28A yaan loon ki a kpin kaman nan fa won kpii Ijipt nirɔ na amii?’ 29Moses nba gbat nna yoonba, ki u chiar nyii Ijipt tiŋ ni, ki baar Midian tiŋ ni ki be leŋ, ki din tan kɔɔn poo ki mar bonjabis bannlee.

30“Bina piinna nba din tan gar, li poorpo, ki u din tan saan muuk ni dasiar, ki saa baar Sainai jɔɔr boor ni, ki la mupeuŋ, ki li di ki lenii kunkonjagotuk paak, ki malaka dɔkit muu maŋ ni.

31“Moses nba din la nna maŋ ki li teenɔ yaarlituk. Ki u chat nakin a wun ŋamm got, ki ji gbat ki ti Yomdaanɔ Yennu kunkɔr ki u beerɔ ki yaa a 32‘Mine tee Abraham Yennu na, ki bia tee Aisak Yennu nan Jakɔb Yennu. Mine tee a yejamm maŋ Yennu.’ Moses nba gbat nna yoonba, ki jaŋmaanii ji kɔɔu, ki u ji see ki jekir ki ji ki mɔk par nan wun goti. 33Ki ti Yomdaanɔ Yennu betɔ a ‘Pitir a taasaat nba ki a pir na, kimaan siaminba ki a see na tee boyeenne. 34Tɔn, n got ki la Ijipt teeb nba dint n mɔŋ niib Israel teeb farchiauŋ Ijipt tiŋ ni biaŋinba, ki n gbia bi fabinii. Ŋanne ki n sik ma n fat nyinnib. Li paak n sa tuma Ijipt.’ ”

35Ŋanne ki Stiifen bia lek piak ki saa a “Moses nba nee ki Israel teeb din yêtɔ na, ki bi din betɔ yaa a ‘Sɔɔ ki ganna a a teen ti yudaanɔ amii ti barbuurɔ,’ ŋaan ŋɔɔ nee ki Yennu mun din gannɔ a wuu tee bi yudaanɔ nan bi fatitɔɔ biak; ki ŋɔɔ Yennu din te ki malaka pak nanɔ ŋaan tumɔ. Malaka maŋe ki Moses din lau kunkonjagotuk paak muu na ni na. 36Ŋɔɔ Moses din tee daanɔ nba din nyinnib Ijipt tiŋ nna, ki din bia tuun bakitnauŋ toonjaana Ijipt tiŋ ni, nan ba bia din saa poot Mɔkgbeŋmuŋ na, nan ba bia din be muuk ni binpiinna na. 37Li Mosese din yet Israel teeb a ‘Yennu tan sa tun sɔkiniisɔɔ i boor ni kaman nan wa tumin biaŋinba na, ki u sii tee i booru ni yenɔ.’

38“Li bia din tee Moses maŋe din be nan ti niib Israel teeb lakinu ni, muuk ni na. Leŋe ki u din tan doo Sainai jɔɔr paak, ki saa be nan Yennu malaka, ki malaka maŋ din piak ki teen Moses, a Moses-n sɔkin tur ti yejamm Israel teeb. Li yooe ki Moses din gaar Yennu manfoor maan ki tur ti yejamm nan timm. 39Ŋaan ti yejamm din ki loon ki bin sakɔ. Li paak ki bi din yêtɔ, kimaan bi yan tunn Ijipta; 40ŋaan din bet Aron a wun maa pata, ki bii tee bi ŋmakit damm ki bii waab, ki bia yetɔ a ‘Ŋaan Moses ŋarin, wunba nyinnit Ijipt na, ti ki mi linba teenɔ.’ 41Ŋanne ki bi maa patir ki nannɔ naajabik, ŋaan mann marouŋ li paak, ki teen jaamm a bin mantik donnɔ, linba ki bi maa nan bi mɔŋ nii na.

42“Li paak ki Yennu ji ki goriibi, ŋaan chabib, ki bi ji jiantir ŋmaabira, kaman nan la sɔb biaŋinba Yennu sɔkiniinba gbouŋ ni na, a Yennu yet a

‘Israel teeb, ya din kpi bonkobit

ki mann marouŋ muuk ni bina piinna na,

i din ki mann marouŋ maŋ ki tee min kaa.

43I din tuu jikit patir Molok lanbouŋo,

ki bia din tuu jikit ŋmaabir Refan naauŋo,

ki lii tee patir, ki saa namm.

Ŋamm tee yenn-nante ki i maa ki jiantir na.

Li paak, n sa te ki i datai-n nyinni i tiŋ ni

ki saan nani siaminba fɔk ki gar Babilɔnn.’ ”

44Ŋanne ki Stiifen bia piak a “Ti yejamm din faa Yennu lanbouŋ muuk ni, ki li want a Yennu be namm. Yennue din wann Moses ba sii faa lanbouŋ maŋ biaŋinba, ki bi faa. Li din tee kaman nan Moses nba din lar biaŋinba yerintu ni nee.

45“Li poorpo, ki ti yejamm ji din tan jii lanbouŋ maŋ ki tur bi waas, ki bi gaar ki mun jikit ki saa nann, ki ŋamm nan Joshua din tan baar nna, ki fat tiŋ nba ki niboorganii daa din yen li yoo na. Yennue din ber nyinn niib maŋ ti yejamm tɔɔnn po, ki lanbouŋ na ji din be nna dik dik dik nan David yoo mun. 46David maŋ dudukit din gboot Yennu numm, ki u din tan miar Yennu a wun chabɔ ki wun maa ŋaak ki tur ŋɔɔ Yennu nba din tee u yeja Jakɔb Yennu na. 47Ŋaan ŋɔɔ David bija Solomone din tan maa ŋaak maŋ.

48“Ti lek mi nan Yabint Yennu ki kaar ŋei nba ki niib maa ni kaa. Li tee kaman nan Yennu sɔkinii nba din yet a

49‘Ti Yomdaanɔ Yennu yet a

Sanpaak tee n naangbouŋo,

a ki tingbouŋ na mun tee n taakpaktir.

I kan fit maa ŋaak nba jaŋ ki turin,

ki n foi leŋi.

50Min kaa din nan bona na kurii?’ ”

51Ŋanne ki Stiifen lek bia piak ki saa a “I mantik tee nigbaba hei, ki i dudukit bia fɔk nan Yennu bonchiann, ki i ki sak ki yin gbat Yennu maan. I kpan mun yêen nan ki i sak Yennu Seyeeŋ kaman nan i yejamm nba mun din yêt biaŋinba nae. 52Yennu sɔkinii sɔɔ din kaa ki i yejamm din ki mukisɔ. Bi bia din kpii binba din poŋ sɔkint a Yennu Popeendaanɔ Masia tan sa baar nawa. Tɔn, ki mɔtana yimme tee damm nba nyii u poor ki bia tee u kpiira. 53Yimme bia tee damm nba din gaar Yennu sennu nba ki i yejamm din gaar malakanba nuu ni, ŋaan bia lek ki sakiri na.”

54Tituk kaanu damm na nba gbiint Stiifen maan maŋ ki bi donn wutoor bonbiir ŋaan gbab mɔgbaba.

55Ŋanne ki Yennu Seyeeŋ fiir Stiifen ni, ki u yaat ki got Yendɔuŋ ni, ki la Yennu yentsaakar, ki Yisa see ŋɔɔ Yennu niidiitu po; 56ki u yet a “Gotir, n la ki sanpaapo loot ki nisaarik Bik see Yendɔuŋ ni, Yennu niidiitu po.” 57Ŋanne ki tituk teeb na yikin sanpaapo, ŋaan pii bi tuba; ki bi kura tan lakin wuur baar ki kpirɔ, 58ki berɔ ki nyinnɔ doo maŋ ni, ŋaan liat bi liata ki bir naasimɔ nba ki bi yiu Sɔɔl na boor ni, a wuu guu, ŋaan jaat Stiifen tana. 59Bi din jaatɔe dik dik dik; ki u din tan yiin ti Yomdaanɔ a “N Yomdaanɔ Yisa, gaat n seek na;” 60ŋaan gbaan ki yikin sanpaapowa a “N Yomdaanɔ, daa jikit bi biit na ki biiribi.” U yet nnee ŋaan ji kpo.

Currently Selected:

Toona 7: BIM

Highlight

Copy