Toona 6

Biaŋinba ki bi gann sommteeb bannlore

1Li poorpoe ki Yisaweira ŋammit yabitir ki pukii, ki bunburimii tan baar Juu teeb nba piak Griik maan, nan Juu teeb nba piak bi mɔŋ maan na sinsuuk ni; kimaan binba piak Griik maan na din yet a bi-i toor jeet daar kur, bi pakɔi ki laat bi tora nan leeb na. 2Ŋanne ki toomiinba piik nan bannlee na yiin Yisaweira maŋ kura, ki tan yetib a “N naa waas, li ki ŋan ki tin nyik Yennu maan mɔɔntii ŋaan biar jeet toru ni. 3Li paak, gotir ki gann jab bannlore i sinsuuk ni, binba ki i mi nan bi binbeŋ ŋan, ki bi bia mantik gbee nan Yennu Seyeeŋ nan yanfantir, ki tin teemm toona na yudamm; 4ŋaan ki timm-n jii ti mɔŋ yoo ki teen Yenmiaru ni, nan Yennu maan wannu ni, ki daa naki.” 5Ki mɔtaauk niib na kur ji din mɔk parpeenn nan toomiinba maan maŋ paak. Ŋanne ki bi gann Stiifen, wunba mantik gbee nan Yennu Seyeeŋ nan yada na, nan Filip, nan Prokorus, nan Nikanor, nan Timon, nan Pamenas, nan Nikolaus, wunba din nyii Antiok, ki ki tee Juu nirɔ, ŋaan din kpint u jiantu ki waa Juu teeb jiantu na. 6Mɔtaauk niib na nba gannib yoonba, ki bi te ki bi saan set toomiinba na tɔɔnn po, ki toomiinba maŋ miar Yennu ki turib ŋaan jii bi nii ki yii bi paak.

7Li poorpoe ki Yennu maan ŋammit ki yat kɔɔ niib ni, ki Yisaweira mun bia yabitir ki pukii bonchiann Jerusalem, ki Yennu manteeb niburchiauŋ sak Yisa barŋanii ki teenɔ yada.

Stiifen sooru labaar

8Ki Stiifen din la Yennu sommir nan yikoo bonchiann, ki din tuun bakitnauŋ toonjaana niib na sinsuuk ni. 9Ŋaan nisiab din ki sakɔ. Binba din nɔi nan Stiifen maŋ din tee Juu teeb nba din tee daaba, ki bi ŋaab bi daabsin ni. Ki bi nyii Sairene nan Aleksandria nan Silisia nan Asia nie. Bi mun din mɔk bi mɔŋ Yenjiantu diiuko. 10Ki Yennu Seyeeŋ din tur Stiifen yanfantir bonchiann, ki bi ki fit nyannɔ nan u maan maŋi. 11Ba din ki fit nyannɔ na, ki bi din kɔɔ nisiab a bin yet a nna, “Ti gbat ki u piak bonbilankant ki biir Moses nan Yennu.” 12Ba yet nna maŋ yoonba, ki niib na nan saakab nan sennu wannteeb wutoa doo, ki bi fiir ki soorɔ, ki saan nanɔ bi yudamm tituk boor ni; 13ki bi tan baar nan nisiab nna biak a bin faar faak, ki yet a “Yoo kur jɔɔ na yɔɔ piak ki biir Yennu jiantu ŋasaakak maŋ, nan Moses sennu nee, 14kimaan ti gbat ki u yet a Yisa nba tee Nasaret nirɔ na sa bet Yennu ŋasaakak na, a ŋaan lebit Moses kaar nba ki u din senn na.” 15Binba kur din lakin kar tituk maŋ ni din kpaa bi ninbina ki gorii Stiifen, ki tan la ki u nummpo lebit ki ji naan nan malaka nummpo na.

Currently Selected:

Toona 6: BIM

Highlight

Copy