Luka 8

Amamǝna mana à pe Yesu gbasha ka

1Tu anzǝm man ngga Yesu gya arǝ ala mǝgulke andǝ amuna-là ɗàngɗáng aban hamnǝ Cau Amsǝban mala Domurǝm mala Ɓakuli. Alaggana male man lum-nong-ɓari ka, à nda ate. 2#8:2 Ɓalli gbal aɓa: Mat 27:55,56; Mar 15:40,41; Luk 23:49. Aɓea mamǝna mǝnana à pusǝ akukwar a rǝia sǝ à twalia wia ban arǝkwana ka, à nda gbal ate. Amǝnia yì amamǝna ka à ndaka Maryamu (mǝnana à tunǝki ama Ɓwa Magdala), mana à pusǝ akukwar tongno-nong-ɓari a rǝì ka, 3andǝ Joana mālá Kuza, mǝnana kǝ ɗenyi nǝ ɓala mala Murǝm Hirǝdus ka, sǝ Suzana andǝ acilia pas. À kǝ pakki Yesu andǝ alaggana male gbasha nǝ girkuma malea.

Kanicau arǝ mǝɓeale

(Matiu 13:1-9)

4Lang ɓwabunda na arǝ rambǝa sǝ aɓwana na rǝ purki arǝ ala ɗàngɗáng aban yiu aban Yesu ka, Yesu pǝlǝa nea wia mǝnia yì kanicau ka:

5 Ɓe mǝ'rya wario a ɓeale. Nda ban kok mǝsǝɓeale ka, aɓea sukkio amur njargula. Aɓwana parkia a ɓakusǝia sǝ amuna-nyal mana a kuli ka à yì tarkia. 6Aɓea sukkio amur tali, lang à purna ka kara à ime, acemǝnana à kum banpwala ɗang. 7Aman sukkio aɓalǝ azwe, sǝ à gulo andǝia ka, kara zwe sorǝkia. 8Sǝ aman ngga à sukkio amur nzali mǝɓoarne. À puro, à gulo, à kya ɓǝla, ko mǝyani ka pusǝ ɓǝle kuti mǝnana à ɓeali ka kusǝ gbǝman.

Yesu bangŋǝna mǝnia yì cau ka, pǝlǝa loasǝ gi na ama, “Ɓwa mǝnana ndanǝ kir okban ngga ɓǝ̀ o.”

Yesu mǝnggi ɓa kanicau mala mǝɓeale

(Matiu 13:10-12,18-23; Markus 4:13-20; 13:18-23)

9Alaggana mala Yesu ɗi ama, mana nda ɓa mǝnia yì kanicau ka. 10Pǝlǝa nea wia ama:

Wun ngga à pana wun surǝ gir ɓa sǝmbǝrǝa mala Domurǝm mala Ɓakuli. Sǝ mala acili aɓwana ka, ǝn nggǝ nea wia nǝ kanicau ace mǝnana ɓǝa lumsǝ cau ɓa Malǝmce mǝnana ama:

“À nǝ̀ sǝnban,

sǝ à pà nǝ̀ sǝn kǝgir ɗang;

À nǝ̀ okban,

sǝ ce pà nǝ̀ kpakia wia ɗang.” # 8:10 Ɓalli gbal aɓa: Isha 6:9 .

11 Mǝnia ka ndà ɓa man yì kanicau: Mǝsǝɓeale ka nda cau mala Ɓakuli. 12Amǝsǝɓeale mǝnana à kpa mur njargula ka, à ndaka aɓwana mǝnana a o, sǝ Shetan yiu yi pwan cau mǝnana a ɓabumia ka, ace mǝnana ɓǝa kǝa pà ɓamuria ɓǝa kum auwa ɗang. 13Amǝnana amur tali ka, à ndaka aɓwana mǝnana à ok cau ka, à é nǝ bumpwasǝa, sǝ cau kum kutio a ɓabumia ɗang. Paɓamuru malea ka banì sau ɗang, pwari karǝkiban yiu ka kara à kpa. 14Amǝsǝɓeale mǝnana à kpa aɓalǝ azwe ka, à ndaka aɓwana mǝnana à ak cau mala Ɓakuli, sǝ nǝ nzǝmo ka aɗenyicau mala doɓanza andǝ alta kume, sǝ bumpina arǝ kum banɓoarnado mala gir ɓanza, yi tsǝa ko à ɓǝl ɗang. 15Sǝ amǝsǝɓeale mǝnana a nzali mǝɓoarne ka, à ndaka aɓwana mǝnana à ok cau sǝ à bwali nǝ ɓabum mǝɓoarne mǝɓafoe ka. À lidǝmbǝa aɓa gandǝrǝu, sǝ cau pusǝ ɓealǝu mǝɓoarne aɓalǝia.

Kanicau arǝ pitǝla

(Markus 4:21-25)

16 Ɓwa pà nǝ̀ tsǝk bǝsa a pitǝla sǝ nǝ̀ kùmsǝi wi nkenye amuri, ko nǝ̀ oasǝi a tǝta gado ɗang. Nǝ̀ gyari a kuli ace aɓwana mǝnana à nǝ̀ kuti ka ɓǝa sǝn tǎlaban. # 8:16 Ɓalli gbal aɓa: Mat 5:15; Luk 11:33.

17 Kǝgir pà kàm a sǝmbǝrǝa mǝnana à pà nǝ̀ pusǝ ce raka, sǝ kǝgir pà kàm mǝnana à nǝ̀ gir ce, mǝnana à pà nǝ̀ surǝì ko tè pà nǝ̀ pur raka. # 8:17 Ɓalli gbal aɓa: Mat 10:26; Luk 12:2.

18 Wu tsǝkiru arǝ gir mǝnana wu kǝ ok ka. Ɓwa mǝnana ndanǝi ka, à nǝ̀ tsǝki wi ɓe amuri. Sǝ ɓwa mǝnana pànǝi raka, ko mǝnana kǝ sǝni kǝla ndanǝi ka, à nǝ̀ é a rǝì. # 8:18 Ɓalli gbal aɓa: Mat 25:29; Luk 19:26.

Nggea Yesu andǝ amǝ'eambǝi

(Matiu 12:46-50; Markus 3:31-35)

19Pǝlǝa nggea Yesu andǝ amǝ'eambǝi yiu abani, sǝ ace lakki mala aɓwana ka à bwal bani ɗang. 20Pǝlǝa ɓeɓwa ne Yesu ama, “Nggo andǝ amǝ'eambǝo ka, à nda ban came a nza, à kǝ earce sǝno.”

21Yesu nea wia ama, “Nggem andǝ amǝ'eambǝam ngga, à ndaka ɓwana mǝnana à kǝ ok cau mala Ɓakuli sǝ à kǝ tsǝi aɓa turo ka.”

Yesu tamsǝ nggea gung

(Matiu 8:23-27; Markus 4:35-41)

22A ɓe pwari mwashat Yesu ne alaggana male ama, “Wu fani sǝm nǝ̀ eauwe a ɓe nkaring nggeamur.” Pǝlǝa à eauwe a waru aban ká. 23À nda rǝ o ka, Yesu koa ntulo. Kara nggea gung mǝcande longŋǝna ɓua a nggeamur, ɓǝ́ kongsǝna waru. Yia ka à nda aɓa nggea tanni mǝgule.

24Alaggana wario à kya loasǝkì a ntulo ama, “Ɓwamǝgule, Ɓwamǝgule, sǝm ndo sǝm nǝ̀ ko!”

Yesu lo pǝlǝa sà arǝ gung andǝ mur mǝnana gung kǝ loasǝki ka. Kara gung kur kǝkǝs, ban nyare pwal ɗǝong. 25Yesu pǝlǝa ɗi alaggana male ama, “Guliarui ma'wun na ke?”

Ɓangciu pakkia wia, à ndali pǝlǝa à ɗi rǝarǝia ama, “Ya ɓwa nda man, mǝnana sa arǝ gung andǝ mur, pǝlǝa à oki wi ka!”

Yesu pusǝ kukwar arǝ ɓeɓwa

(Matiu 8:28-34; Markus 5:1-20)

26Yesu andǝ alaggana male samsǝa à yàllî nggeamur Galili à kya kpasha a bu-nzali mala amǝ Gerasin. 27Lang Yesu nǝ̀ eauwe anza ka, kara ɓe ɓwabura nia, mǝnana nǝ́ akukwar a rǝì ka. Ɓwabure pur amǝno yì la ka. Ɓwabure ka banì sauwuna oasǝ agir-nggurǝu a rǝì ɗang, sǝ dukiyi a ɓala ɗang, akiyi rǝì aɓalǝ aɓembe. 28Lang nǝ̀ sǝn Yesu ka, kara mak zwalo bang-bang, yi kpa a ɓadǝmbǝi, loasǝ gi kǝrkǝr ama, “Mana ǝn pakko, Yesu, Muna mala Ɓakuli mana Karban kat ka? Ən nggǝ zǝmbǝo, kǝa pam tanni ɗang!” 29Ne anggo acemǝnana Yesu angŋǝna dǝmbǝa sàrǝ̀nà amǝnia yì akukwar ka ɓǝa purî rǝ mǝnia yì ɓwa ka. Kusǝ pas ka abangŋo mǝɓane man kǝ lo a rǝì. Sǝ kat andǝ amani ama aɓwana nǝ̀ taka akusǝi andǝ abui nǝ anko andǝ ansolo, sǝ à nǝ̀ tamsǝ aɓwana ɓǝa yallí ka, nǝ̀ kasǝki ansolo, nǝ̀ ɓunggia anko. Pǝlǝa akukwar nǝ̀ um nǝi a ɓabondo.

30Yesu ɗi ama, “Lullǝo a mana?”

Pǝlǝa eare ama, “Lullǝam nda Pas.” Bangŋa anggo acemǝnana akukwar pas sǝ à kutia rǝì. 31Akukwar nì camarǝ zǝmbǝi Yesu ama ɓǝ̀ kǝa tasǝia aɓa tuli-tàtǝkǝtè#8:31 tuli-tàtǝkǝtè: Tuli mǝnana lime male ka masǝlǝate pà kàm ɗang. Nda ban mǝnana à kǝ kasǝ kun akukwar kam à kǝ pea wia tanni ka., yì tuli-bǝsa ɗang.

32A girǝi bania anggo ka, nggea domwan mala atǝmbǝrǝm-ɓala nakam, aban likiali a bum-nkono. Akukwar nì zǝmbǝi Yesu ama ɓǝ̀ earia wia ɓǝa kya kutio arǝ atǝmbǝrǝm-ɓala mǝno, pǝlǝa earia wia ɓǝa kyane. 33Lang akukwar purî rǝ mǝnia yì ɓwa ka, à kya kutio arǝ atǝmbǝrǝm-ɓala. Kara domwan man kat giɓi nǝ mire a pal nkono à kya ɓunno a kun gwanyi mǝdāre, à sukkio aɓa anggeamur, à ko kat à wu mbǝtǝp.

34Lang amǝyal atǝmbǝrǝm-ɓala sǝn gir mǝnana kumban ngga, à sarǝa mire aban o, à kya bangce a la andǝ acilia ban aɓa bu-nzali mǝno. 35Ɓwabunda puro aban ká sǝn gir mǝnana kumban ngga. Lang à yina aban Yesu ka, à yì kum mǝnia yì ɓwa mǝnana akukwar purî rǝì ka, aban do a ɓadǝm Yesu nǝ agir-nggurǝu a rǝì, ɗenyicau male nyarǝna a rǝì, sǝ ɓangciu pakkia wia.

36Aɓwana mǝno à sǝn gir nî nǝ mǝsǝia ka, à kanî aɓwana ce pusǝo mǝnana à pusǝ akukwar arǝ mǝnia yì ɓwa ka. 37Ɓwabunda kat mǝnana a bu-nzali mǝno mala amǝ Gerasin ngga, à zǝmbǝi Yesu ama ɓǝ̀ upi nzali malea, acemǝnana ɓangciu pakkia wia kǝrkǝr.

Lang Yesu eauwe a waru, nǝ̀ nyare nǝ̀ o ka, 38ɓwa mǝnana akukwar purî rǝì ka zǝmbǝi wi ama, nǝ̀ o a te. Sǝ Yesu ɓine, ne wi ama, 39“Nyare a la ma'wun kya na ce nggea gir mǝgule mǝnana Ɓakuli pakko wi ka.”

Pǝlǝa mǝnia yì ɓwa ka nyare o a la malea, camarǝ bang ce gir mǝnana Yesu pakki wi ka.

Muna Jarus andǝ mɓwama mǝ rǝkwana

(Matiu 9:18-26; Markus 5:21-43)

40Lang Yesu nyarǝna ka, ɓwabunda gingsǝi, acemǝnana à nda aban kundǝe. 41Pǝlǝa ɓeɓwa, lullǝi ama Jarus, ɓwamǝgule mala Ndakpapi, yiu yi kpa a ɓadǝm Yesu, kǝ ɓuakia rǝì ama ɓǝ̀ yiu ate a ɓala male, 42acemǝnana kǝ mǝɓoarnsarile mwashat ɓǝrɓǝr, mǝnana ndanǝ apǝlǝa lum-nong-ɓari ka, kuni mala nǝ̀ kumsǝo.

Yesu bwalǝna njargula aban ká, ɓwabunda mǝnana lo a te ka nggiki kǝrkǝr. 43Ɓe mɓwama na aɓalǝia, mǝnana pak apǝlǝa lum-nong-ɓari nkila na aban sukkio a rǝì. Mal girkuma male aban amǝ sonzǝo, sǝ kǝɓwa gandǝ sonzǝe ɗang. 44Ɓwama man kar nǝ nzǝm Yesu, je kun daura male, anggo ka kara sukkio mala nkila male came.

45Yesu ɗiban ama, “Yana ɓwe jem?”

Koyan ngga na ama ndà ɗang. Pǝlǝa Bitǝrus na ama, “Ɓwamǝgule, ɓwabunda kārǝio aɓalǝu, sǝ à kǝ ramnggio, sǝ a kǝ ɗiban ama, ‘Yana ɓwe jem?’ ”

46Sǝ Yesu ka bangŋa ama, “Ɓe ɓwa jenam, ǝn sǝlǝa, acemǝnana ǝn ok rǝcandǝa puro a rǝam.”

47Lang mɓwama man sǝnǝni te no nǝ̀ pur ka, puro rǝì kǝ ɓǝla, yi kpa a ɓadǝm Yesu. A ɓamǝsǝ ɓwabunda kat, bang tǝr gir mana tsǝi sǝ je Yesu, andǝ kumo mǝnana kum rǝpwala àkǝ̀ banì ka. 48Sǝ Yesu ne wi ama, “Ɓoarnsarilem, guliarǝu mo twalǝno ban rǝkwana mo, o aɓa rǝpwala.”

49Yesu na arǝ na cau piu ka, ɓeɓwa pur nǝ ɓala mala Jarus, yì ɓwamǝgule mala Ndakpapi. Yi ne Jarus ama, “Ɓoarnsarileo pangŋǝna lú. Kǝa pe Malǝm tanni ɓà ɗang.”

50Lang Yesu ok ce ka, ne Jarus ama, “Ɓangciu ɓǝ̀ kǝa pakko ɗang, we ka tamsǝ ɓabumo, rǝ munio nǝ̀ malâ.”

51Lang à yì bwalǝna ɓala mala Jarus ka, Yesu eari kǝɓwa kutio ate ɗang, she kǝ Bitǝrus, sǝ Yohana andǝ Jemis, sǝ tár muna andǝ ngge. 52Anggo ka ɓwapǝndǝa kat à nda rǝ ɓua sǝ à kǝ keban ace. Yesu nea wia ama, “Wu kǝa ɓua ɗang, muna ka wu ɗang, nda a ntulo!”

53Kara à oali oalo kyauwikiban, acemǝnana à sǝlǝna ama muna ka wu na. 54Pǝlǝa Yesu bwal muna a garabui, sǝ na ama, “Munem, lo!” 55Yilǝmi muna kara nyare, sǝ par bui lo cam nǝ came. Yesu pǝlǝa nea wia ama, ɓǝa pe wi girlina ɓe li. 56Atár muna andǝ ngge ndali kǝrkǝr. Pǝlǝa Yesu nunkiria, ama ɓǝa kǝa ne kǝɓwa ce gir mǝnana kumban ngga ɗang.

Currently Selected:

Luka 8: mbu

Highlight

Copy