Luka 9
9
Yesu tur alaggana male lum-nong-ɓari
(Matiu 10:5-15; Markus 6:7-13)
1Yesu tunǝ amǝ'mishan male mǝnana lum-nong-ɓari ka, sǝ pea wia rǝcandǝa andǝ gara amur akukwar kat sǝ ɓǝa twalban rǝkwana. 2Pǝlǝa tasǝia ɓǝa kya hamnǝ ce Domurǝm mala Ɓakuli, sǝ ɓǝa twali aɓwana ban rǝkwana. 3#9:3 Ɓalli gbal aɓa: Luk 10:4-11; Aturo 13:51. Nea wia ama, “Wu kǝa twal kǝgir a bu wun ace gya ma'wun ɗang. Wu kǝa twal gara-gya, ko luru, ko girlina, ko boalo, ko aɓea agir-nggurǝu ɗang. 4Koya ɓala wu sulǝ kam ngga, wu kǝa ɗeki ɓalae ɗang, she ɓǝ̀ wu nyingŋǝna le ka. 5Sǝ ɓǝ̀ aɓwana ak wun raka, ɓǝ̀ wu nǝ̀ nying le ka wu kǝtǝri tu mǝnana a kusǝ wun ngga, acemǝnana ɓǝ̀ nakun wun amuria.”
6Pǝlǝa à lo à ara arǝ amuna-là aban hamnǝ Cau Amsǝban andǝ twali aɓwana ban rǝkwana a koya ban.
Hirǝdus ndali nǝ acau mana oki ka
(Matiu 14:1-12; Markus 6:14-29)
7Hirǝdus, murǝm Galili ok ce agir mǝnana à kǝ pak kat ka, muri zurǝì, acemǝnana aɓea aɓwana kǝ̀ na ama, Yohana na à loasǝi a ɓembe ka. 8Aɓea ɓwana ka à kǝ na ama Iliya mǝɓangna mala Ɓakuli na yi pusǝrǝi ka, nyare aɓea ka ama, ɓe kǝ mǝɓangna mala Ɓakuli mǝnana a pwaryan ngga nda long nǝ yilǝmu ka. 9Hirǝdus ka bangŋa ama, “Yohana ka ǝn tsǝa à kasǝ meali, sǝ yana ɓwe nda mǝnia ɗǝm ǝn nggǝ oki amǝnia yia acau amuri ka?” Pǝlǝa alta sǝn Yesu.
Yesu li nǝ aɓwana á-tongno
(Matiu 14:13-21; Markus 6:30-44; Yohana 6:1-14)
10Lang amǝ'mishan nyarǝna ka, à yì banggi Yesu agir kat mǝnana à pak ka. Pǝlǝa umia, yia nǝmurǝia, a ɓe la mǝnana à kǝ tunǝi ama Beseda ka. 11Ɓwabunda ok ce, kara à pwan rǝia à o ate. Yesu gingsǝia, sǝ nea wia cau amur Domurǝm mala Ɓakuli, sǝ aɓwana mǝnana à yiu sǝ à nda aɓa rǝkwana ka, twalia wia ban arǝkwana malea.
12Lang pwari mala nǝ̀ kpa ka, alaggana mala Yesu man lum-nong-ɓari ka, à sung abani à yì ne wi ama, “Ɗeki ɓwabunda ɓǝa o arǝ amuna-là, ɓǝa kya alta girlina andǝ ban nongŋo, acemǝnana ban mǝnia sǝm ndakam ngga ɓabondo na.”
13Sǝ Yesu ka nea wia ama, “Wu pea wia girlina ɓǝa li.”
Pǝlǝa à ne Yesu ama, “Kǝgir mǝnana sǝm ndanǝi ka, kǝ bǝredi tongno na andǝ amǝnji ɓari. She ɓǝ̀ do ama ɓǝ̀ sǝm kya kur girlina ace ɓwabunda man kat ka.” 14Aburana mǝnana abanì ka à bwal á-tongno.
Pǝlǝa Yesu ne alaggana male ama, “Wu tsǝia ɓǝa do mbop-mbop lumi-tongno-tongno.”
15Anggo sǝ alaggana tsǝia, koyana le ka dum nǝ do. 16Yesu twal abǝredi mǝnia tongno andǝ anji ɓari ka, pǝlǝa loasǝ muri a kuli pak yàwá, sǝ ɓwanggia, pe alaggana male ɓǝa gaki ɓwabunda. 17Ya kat à li à ɗǝmnggya. Alaggana pwan cili aɓwanggine mǝnana à ueo ka arǝ ago lum-nong-ɓari.
Cau mǝnana Bitǝrus na amur Yesu ka
(Matiu 16:13-19; Markus 8:27-29)
18Ɓe pwari nakam Yesu ka nda ban pak hiwi nǝmurǝì, sǝ alaggana male yiu ate, pǝlǝa ɗia ama, “Ɓwabunda kǝ na ama, Mǝ nda yana?”
19À eari wi ama, “Aɓea ɓwana ama a nda Yohana Mǝbatisǝma, aɓea ka ama a nda Iliya, mǝɓangna mala Ɓakuli, sǝ aɓea ka ama a nda ɓe mǝɓangna mala Ɓakuli ata mǝnana a pwaryan ngga, mǝnana nyare yiu nǝ yilǝmu ka.”#9:19 Ɓalli gbal aɓa: Mat 14:1,2; Mar 6:14,15; Luk 9:7-8.
20Yesu nyare ɗia ama, “Sǝ wun, a bangŋe ma'wun ngga, mǝ nda yana?”
Bitǝrus eare ama, “A nda Kǝrǝsti#9:20 Kǝrǝsti: Ko “Mezaya.” Mǝ'amsǝban mǝnana Ɓakuli turi ka.”#9:20 Ɓalli gbal aɓa: Yoh 6:68,69.
Yesu na ce tanni andǝ lú male
(Matiu 16:20-28; Markus 8:30–9:1)
21Yesu nunkiria nǝ rǝcandǝa ama, ɓǝa kǝa ne kǝɓwa ɗang. 22Pǝlǝa na ama, “Dumǝna púp Muna mala Ɓwa nǝ̀ kum tanni arǝ agir pas, sǝ akapana, andǝ agbani pǝris, andǝ amalǝm Nggurcau ka à nǝ̀ ginǝi. À nǝ̀ wal-lui, sǝ aɓa tāruia nongŋo ka nǝ̀ lo nǝ yilǝmu.”
23Pǝlǝa nea aɓwana kat ama, “Ɓwa mǝnana kat kǝ earce yiu atam ngga, nǝ̀ ɓinǝ ɓamurì,#9:23 nǝ̀ ɓinǝ ɓamurì: Ko “nǝ̀ burice ɓamurì.” nǝ̀ twal nggun-gangndi male ko aya pwari ka nǝ̀ kpatam. 24Ɓwa mǝnana kǝ earce amsǝ yilǝmi ka, nǝ̀ ɗwanyibanì, sǝ ɓwa mǝnana turta yilǝmi acem ngga, nǝ̀ amsǝi.#9:24 Ɓalli gbal aɓa: Mat 10:39; Luk 17:33; Yoh 12:25. 25Mana gir nì nǝ̀ puri ɓwa yi mǝnana ɓǝ̀ kum ɓanza kat, sǝ ɗwanyi yilǝmi ko yilǝmi kiɗiki ka? 26Ɓǝ̀ kǝsǝkya kǝ pakki ɓwa a rǝam andǝ cau mem ngga, kǝsǝkya nǝ̀ pakki Muna mala Ɓwa a rǝì, a pwari mǝnana nǝ̀ yiu nǝi, aɓa ɓoarɓwa male andǝ ɓoarɓwa mala Tarrí andǝ mala amǝturonjar mǝfele ka. 27Ən nggǝ bangga wun mǝsǝcau, aɓea ɓwana mǝnana à nda ban came kani ka, à pà nǝ̀ wu ɗang, she ɓǝa sǝnǝna Domurǝm mala Ɓakuli ka.”
Nggaɗirǝu mala Yesu
(Matiu 17:1-8; Markus 9:2-8)
28 # 9:28 Ɓalli gbal aɓa:
2Bit 1:17,18. Kǝla anzǝm nongŋo tongno-nong-tārú, mǝnana Yesu nakiyi acau man ngga, tunǝ Bitǝrus andǝ Yohana andǝ Jemis, pǝlǝa à eauwe amur ɓe nkono ace pak hiwi. 29Lang nda rǝ pak hiwi ka, ɓamǝsǝi twalo nggaɗi, sǝ agir-nggurǝu male ka à pwasǝ tyal-tyal, kǝla tǎlaban mala linzama. 30Kara aɓwana ɓari, Musa andǝ Iliya yiu, à kǝ na cau nǝi. 31À pusǝ rǝia aɓa ɓoarɓwa mala kuli, aban na cau andǝ Yesu. À bang cau amur lú male, mǝnana nǝ̀ yia lumsǝo a Urǝshalima ka. 32Sǝ Bitǝrus andǝ aɓi ka à kongŋa malea a nggea ntulo. Lang mǝsǝia nǝ̀ sa ka, à sǝn ɓoarɓwa mala Yesu andǝ aɓwana mǝnia ɓari aban came andǝi ka. 33Lang amǝnia yì aɓwana na ban nying Yesu à nǝ̀ o ka, Bitǝrus pǝlǝa ne wi ama, “Ɓwamǝgule, ndanǝ ɓoaro mǝnana sǝm nda kani ka. Sǝm nǝ̀ gilǝ agumli tārú, mwashat ka nda aceo, mwashat ace Musa, sǝ mǝnia mwashat ka nda ace Iliya.” Sǝ yì ka, surǝ cau mǝnana nakiyi ka ɗang.
34Nda aban na cau piu ka, pǝrɓang sulǝo gir muria, pǝlǝa ɓangciu pakkia wia mǝnana pǝrɓang yi gir muria ka. 35Gi Ɓakuli pur nǝ ɓa pǝrɓang na ama, “Mǝnia ka Munem na, nda mǝnana ǝn tarì ka, wu kwaki kir wun a rǝì.”#9:35 Ɓalli gbal aɓa: Isha 42:1; Mat 3:17; 12:18; Mar 1:11; Luk 3:22.
36Lang giu nanacau ka, kara à sǝn Yesu nǝmurǝì. Alaggana man bwal ce a rǝarǝia, à ne kǝɓwa ce gir mǝnana à sǝn aɓalǝ anongge ka ɗang.
Yesu pusǝ kukwar arǝ muna
(Matiu 17:14-18; Markus 9:14-27)
37Ban fana ka, lang Yesu andǝ alaggana mǝnia tārú sulǝni mur nkono ka, ɓwabunda yiu rambǝa aban Yesu. 38Ɓe ɓwa aɓa ɓwabunda loasǝ gi ama, “Malǝm! Ən nggǝ zǝmbǝo, ɓwamur munem, kǝ̀ nda kǝ̀ munem mwashat! 39Ɓe bangŋo mǝɓane kǝ lo à rǝì, sǝ kǝ ci kǝ yasǝlǝban nǝ mak zwalo bang-bang. Kǝ turi aɓa dǝurǝki rǝì wak gandǝa ntara nǝ̀ gupi a kuni. Kani lo a rǝì anggo, pà nǝ̀ eare nǝ̀ nyi ɗang she ɓǝ̀ sokkina te pà nî tanni kǝ̀rkǝ́r ka. 40Ən zǝmbǝi alaggana mo ɓǝa pusǝì, sǝ à gandǝi ɗang.”
41Sǝ Yesu pǝlǝia wia ama, “Wun a nza man ngga wu nda wu pak murcandǝa sǝ wu ɗwanyi paɓamuru aban Ɓakuli ka! Banem nǝ̀ sau lang aban do sǝnǝa wun sǝ wu nǝ̀ kànì pak ɓe kǝgir? Nǝ̀ ngga ká a ya pwari sǝ mǝ nǝ nggǝ twal gandǝrǝu nǝ wun?” Pǝlǝa ne ɓwabure ama, “Yinǝ munio kani.”
42Lang muna longŋǝna aban yiu ka, kara kukwar loasǝi gwarrì a nzali, turi aɓa mǝɓulɓul mǝkǝrkǝr nì. Pǝlǝa Yesu pyau kukwar, kukwar puri rǝ muna, sǝ Yesu nyesǝi pe tarrí. 43Yia kat ka à ndali nǝ gulo mala rǝcandǝa mala Ɓakuli.
Yesu na ce lú male ɗǝm
(Matiu 17:22-23; Markus 9:30-32)
Lang ɓwabunda kat nda rǝ ndali nǝ agir mǝnana Yesu pe ka, ne alaggana male ama, 44“Wu kwaki kir wun arǝ cau mǝnana mǝ nǝ bangga wun ado ka: Muna mala Ɓwa ka à ndo à nǝ̀ me a ɓabu aɓwana amǝɓinǝ mǝsǝì.” 45Sǝ alaggana ka à surǝ ɓa mǝnia yì cau ka ɗang. Ceì sǝmbǝrǝia wia à gandǝ bwalte ɗang, sǝ ɓangciu pakkia wia ɓǝa ɗi amuri.
Yana nda ɓwamǝgule kat?
(Matiu 18:1-5; Markus 9:33-37)
46Makgir lo aɓalǝ alaggana mala Yesu amur koyana aɓalǝia nda ɓwamǝgule kat. 47Yesu surǝna ɗenyicau malea, pǝlǝa loasǝ ɓe muna tamsǝi a nkanggari,#9:47 Ɓalli gbal aɓa: Mat 10:40; Luk 10:16; Yoh 13:20. 48sǝ nea wia ama, “Koyana sǝ ɓǝ̀ ak muna kǝla mǝnia ace lullǝam ngga, angŋǝnam, sǝ ɓwa mǝnana em ngga, angŋǝna Tárram mǝnana tasǝam ngga. Ɓwa mǝnana kutibanì kat a nongsǝmuru aɓalǝ wun ngga, nda ɓwamǝgule ma'wun kat.”
Ɓwa mana camba wun a nggaro raka ma'wun na
(Markus 9:38-40)
49Pǝlǝa Yohana ne wi ama, “Ɓwamǝgule, sǝm sǝn ɓeɓwa aban pusǝ akukwar nǝ lullǝo sǝ sǝm ne wi ɓǝ̀ came, ɓǝ̀ kǝa pe ɗang, acemǝnana pà aɓalǝ sǝm ɗang.”
50Yesu ne wi ama, “Wu kǝa tamsǝi ɗang, ɓwa mǝnana pà a nggaro nǝ wun raka, ma'wun na.”
Amǝ Samariya ɓinǝ ak Yesu
51Lang pwari mǝnana Yesu nǝ̀ nyarni aban o a kuli gbashina ka, Yesu tsǝk muri aban ká a Urǝshalima. 52Pǝlǝa tasǝ amǝ'na-turban à aki dǝmbǝa aban ká a ɓe muna-la mala amǝ Samariya ɓǝa kya gilǝki ban-sulǝo. 53Sǝ àkǝ̀ la mǝno ka kǝɓwa gingsǝi ɗang, acemǝnana yì ka, tsǝk muri aban ká nǝ Urǝshalima. 54Alaggana male, Jemis andǝ Yohana, à sǝni anggo ka pǝlǝa à ɗiban ama, “Mǝtalabangŋo, ɓǝ̀ sǝm tunǝ bǝsa a kuli ɓǝ̀ yi pisǝ aɓwana mǝnia ka le?”#9:54 Ɓalli gbal aɓa: 2Amur 1:9-16.
55Yesu pǝlǝ rǝì sà arǝ Jemis andǝ Yohana. 56Pǝlǝa à kutio à o a ɓe muna-la.
Amǝkpata Yesu nǝ mburkun
(Markus 8:19-22)
57À nda ban ká a njargula ka, ɓeɓwa ne Yesu ama, “Mǝ nǝ kpato ko ayaban a nǝ ká kam ngga.”
58Yesu ne wi ama, “Amǝ'nzǝgban ngga à ndanǝ atuli malea, sǝ amuna-nyal mǝnana a kuli ka à ndanǝ anda, sǝ Muna mala Ɓwa ka pànǝ ban mǝnana nǝ̀ usǝlǝ kam ngga ɗang.”
59Pǝlǝa ne ɓeɓwa ama, “Yiu atam.” Sǝ ɓwe ne wi ama, “Mǝtalabangŋo, cam peatu, mǝ kya tsǝkban tárram.”
60Yesu ne wi ama, “Ɗeki alú ɓǝa tsǝk alú malea, sǝ we ka kyane kya hamnǝ Domurǝm mala Ɓakuli.”
61Nyare ɓeɓwa bangŋa ama, “Mǝ nǝ kpato, Mǝtalabangŋo, sǝa ma cam peatu mǝ nyare mǝ kya tsǝk amǝɓala mem a ndà.”#9:61 Ɓalli gbal aɓa: 1Amur 19:20.
62Yesu ne wi ama, “Ɓwa mǝnana nda ban rya nǝ andá, sǝ kǝ kar mǝsǝi a nzǝmi ka, kārǝa nǝ̀ kum Domurǝm mala Ɓakuli ɗang.”
Currently Selected:
Luka 9: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
