Luka 5

Yesu tunǝ alaggana mǝdǝmbe male

(Matiu 4:18-22; Markus 1:16-20)

1 # 5:1 Ɓalli gbal aɓa: Mat 13:1,2; Mar 3:9,10; 4:1. Ɓe pwari mwashat Yesu naban came a kun Garang Jenasaret, ɓwapǝndǝa nggiki kàrǝì aɓalǝu aban ok cau mala Ɓakuli. 2Mǝsǝì kpa arǝ awaru ɓari a kun mur. Amǝtalea kpashia, à ndaban laki andámbú malea. 3Pǝlǝa Yesu eauwe aɓa waru man mwashat ka, mala Shiman. Ne wi ama ɓǝ̀ tasǝ ta waru a ɓa mùr bǝti nǝ kunmur. Pǝlǝa dum nǝ do a waru sǝ kǝ kani aɓwana gir.

4Lang malǝna cau ka, pǝlǝa ne Shiman ama, “Soa waru ɓǝ̀ kya ban mǝlime a mùr, sǝ wu tur ndámbú ace bwal nji.”

5Shiman eari wi ama, “Ɓwamǝgule, sǝm mal du aban tanni, sǝ ko sǝm bwal kǝgir ɗang. Sǝ acemǝnana a wu nǝ na ka, mǝ nǝ tur ndámbú.” 6Lang à turna ndámbú ka, à bwal nji lumsǝ ndámbú, gandǝa ndámbú tita sana. 7Pǝlǝa à tunǝ aɓia mǝnana aɓa ɓe waru ka, ɓǝa yi bwalia wia. À yì lumsǝ amǝnia yì awaru ɓari ka nǝ nji, gandǝa awaru tita ko a mùr.

8Lang Shiman Bitǝrus sǝn mǝnia yì gir ka, kpa a ɓadǝm Yesu sǝ na ama, “Mǝ nda yan sǝ a wu nǝ came abanam, Mǝtalabangŋo, mim ngga mǝ nda mǝ'cauɓikea.”

9Yì andǝ aɓi ka à ndali nǝ lakki mala nji mǝnana à bwal ka. 10Anggo gbal sǝ aɓi amǝturo mala Shiman, yia Jemis andǝ Yohana, amuna mala Zabadi ndali.

Yesu pǝlǝa ne Shiman ama, “Ɓangciu ɓǝ̀ kǝa pakko ɗang, twal ado ka, aɓwana na a nǝ nggǝ bwalia ɓǝa yiu abanam ngga, anji na ɗang.”

11Pǝlǝa à yì kpashi awaru a nza, sǝ à nying koya gir ka, à o ata Yesu.

Yesu twali mǝdakali ban kwano male

(Matiu 8:1-4; Markus 1:40-45)

12A ɓe kǝ pwari ka Yesu na a ɓe la. Ɓe ɓwa mǝnana nǝ kwano dakali ka yiu abanì. Lang sǝn Yesu ka, kara yi ɓun a ɓadǝmbǝi, sǝ zǝmbǝi wi ama, “Mǝtalabangŋo, ɓǝ̀ a nǝ ear ka, a nǝ gandǝ twalam ban dakali mǝnia a rǝam ngga, ɓǝn ɓoarnsari.”

13Yesu lǝmndǝ bui je, ne wi ama, “Ən earǝna, dakali mo ka à langŋǝni, ɓǝ̀ rǝo mala.” Àkǝ̀ banì kara dakali mala. 14Yesu pǝlǝa ne wi ama, “Kǝa ne kǝɓwa ce ɗang, bwal njar kyane aban pǝris ɓǝ̀ pelǝkio; sǝ wu pa ɓoro mǝnana Musa tsǝa ama ɓǝa pa ka, ace mǝnana ko yan ngga ɓǝ̀ sǝlǝ ama rǝo sonzǝna.”#5:14 Ɓalli gbal aɓa: Pǝris 14:1-13.

15Kat andǝ amani ka cau amur Yesu akiban, gandǝa ɓwabunda yiu ace ok cau male andǝ kum twalban akwano mǝnana a rǝia ka. 16Sǝ pak ka Yesu kǝ o arǝ ban mǝnana kǝɓwa pà kàm raka ace pak hiwi.

Yesu twali ɓeɓwa ban rǝkwana mala rǝwuna

17Ɓe pwari mwashat Yesu ka nda ban kanigir, amǝ Farisi andǝ amalǝm Nggurcau mala Musa mǝnana à purkio arǝ amuna-là ɗàngɗáng aɓalǝ abu-nzali Galili andǝ Yahudi, andǝ Urǝshalima ka, à ndakam aban do. Sǝ Bangŋo mala Ɓakuli ka nda te ace sonzǝ amǝ rǝkwana. 18Aɓea ɓwana yiu nǝ mǝkwano rǝwuna, à twali a kala. À ɓariki à nǝ̀ kuti nǝi a ɓala, à nǝ̀ ngga nongsǝi a ɓadǝm Yesu. 19Lang à kum njar mǝnana à nǝ̀ kuti nǝi raka, ace lakki mala ɓwabunda ka, à pǝlǝa à eauwe amur kurǝm, à mǝn ban, sǝ à sulǝi andǝ kala male a ɓadǝm Yesu aɓalǝ aɓwana.

20Lang Yesu sǝn guliarǝu malea ka, pǝlǝa ne mǝkwano ama, “Ɓiam, à twalǝno ban acauɓikea mo.”

21Amalǝm Nggurcau andǝ amǝ Farisi tita ndali nǝ ɓabumia ama, “Yana mǝnia yì ɓwa kǝ ak bancame mala Ɓakuli ka! Ɓǝ̀ Ɓakuli nǝmurǝì raka, yana nǝ̀ twalban cauɓikea!”

22Yesu surǝ ɗenyicau malea pǝlǝa ɗia ma, “Ace mana sǝ wu kǝ ɗikiban a ɓabum wun amur man yì cau ka? 23Mǝ ye na kwano kuti ɓi, ɓǝa na ama, ‘À twalǝno ban acauɓikea mo le’ ko ɓǝa na ama, ‘Lo, wu gya?’ 24Sǝ ace mǝnana ɓǝ̀ wu sǝlǝ ama Muna mala Ɓwa ka ndanǝ rǝcandǝa amur ɓanza nǝ̀ twalban cauɓikea ka, mǝ nǝ lǝmndǝa wun.” Pǝlǝa ne mǝkwano rǝwuna ama, “Lo, twal kala mo o a ɓala!”

25Anggo ka kara lo cam nǝ came a ɓadǝmbǝia, twal kala mǝnana nongŋo amuri ka, o a ɓala, kǝ ɓwangsǝki Ɓakuli. 26Koyan ngga ndali, sǝ à kǝ ɓwangsǝki Ɓakuli. Muria kàrria kǝrkǝr, à na ama, “Sǝm sǝnǝna agir gyamiban yalung.”

Yesu tunǝ Lawi

27Anzǝm man ngga Yesu puro pǝlǝa sǝn mǝ'ak boalo-cemi, lullǝi ama Lawi, dumǝna aɓa mǝdanki cemi. Yesu ne wi ama, “Lo, yiu a tam.” 28Lawi par bui lo, nying girbunda kat o a te.

29Pǝlǝa Lawi tunǝ pakiɗire mala li girlina ace Yesu a ɓala male. Sǝ pas aɓalǝ aɓwabunda mǝnana aban li atea ka amǝ'ak boalo-cemi na. 30Sǝ aɓea amǝ Farisi andǝ amalǝm Nggurcau malea nggwani aban alaggana mala Yesu ama, “Palang sǝ wu kǝ lili, wu kǝ nuki agir wunǝ amǝ'ak boalo-cemi andǝ amǝ'cauɓikea, aɓwana mǝnana à kǝ kpata Nggurcau mala Musa raka.”#5:30 Ɓalli gbal aɓa: Luk 15:1,2.

31Yesu earia wia ama, “Aɓwana mǝnana rǝia bang ngga à alkiyita mǝsonzǝo ɗang, amǝ rǝkwana na à alkiyita mǝsonzǝo ka. 32Ən yiu ace tunǝ amǝ'cauɓoarna ɗang, ǝn yiu ace amǝ'cauɓikea ɓǝa nyare aban Ɓakuli.”

Amǝ Farisi andǝ amalǝm Nggurcau ɗi Yesu amur gilmur

(Matiu 9:14-17; Markus 2:18-22)

33Aɓea ɓwana ne Yesu ama, “Alaggana mala Yohana ka à kǝ gilmur, sǝ à kǝ pak hiwi tutu. Anggo gbal sǝ alaggana mala amǝ Farisi kǝ pa. Sǝ amo yì alaggana ka à came arǝ li sǝ à kǝ nu.”

34Yesu earia wia ama, “Wu nǝ̀ tsǝk agyajam mala bura-manfela ɓǝa gilmur yi mǝnana nda tea piu ka le? 35Pwari na kǝ yiu ka, mǝnana à nǝ̀ twal bura-manfela a rǝia ka. Amǝno yì pwari ka sǝ à nǝ̀ gilmur.”

36Pǝlǝa nea wia mǝnia yì kanicau ka, ama:

Kǝɓwa pà nǝ̀ san kum nggurbyau mǝbǝshe, sǝ nǝ̀ mbakina mǝ'e nǝi ɗang. Ɓǝ̀ pè anggo ka, sanǝna nggurbyau mǝbǝshe, sǝ mbaki mana sanni arǝ nggurbyau mǝbǝshe ka pà nǝ̀ ak rǝarǝia andǝ mǝ'e ɗang.

37 Sǝ kǝɓwa pà nǝ̀ so mur anap mǝbǝshe aɓa du mǝ'e nǝ̀ funyi kuni ɗang. Ɓǝ̀ pè anggo ka mùr-anap mǝbǝshe mǝno ka nǝ̀ ar du, nǝ̀ sukkio, sǝ du ka nǝ̀ ueɓà. 38Mùr-anap mǝbǝshe ka aɓa du mǝbǝshe sǝ à nǝ̀ soé.

39 Sǝ kǝɓwa pà nǝ̀ nu mur anap mǝ'e, sǝ nǝ̀ earce mǝbǝshe ɗang. Acemǝnana nǝ̀ na ama, “Mǝ'e ɓoaro kuti mǝbǝshe.”

Currently Selected:

Luka 5: mbu

Highlight

Copy