Luka 6
6
Ɗiban amur pwari Sabbat
(Matiu 12:1-8; Markus 2:23-28)
1A ɓe pwari Sabbat, pwari usǝlǝo mala amǝ Yahudi, Yesu ar aɓalǝ aɓaban-mǝsa. Alaggana male kǝ harki kir mǝssa sǝ à kǝ bik a ɓabuia à kǝ she.#6:1 Ɓalli gbal aɓa: Nggur 23:25. 2Aɓea amǝ Farisi bangŋa ama, “Palang sǝ wu kǝ pak gir mǝnana ɓoaro ɓǝa pe a pwari usǝlǝo raka?”
3Yesu earia wia ma, “Wu malaká ɓal gir mǝnana murǝm Dauda pe, yi mǝnana yì andǝ aɓwana mana ate nzala walia ka re? 4Mǝnana Dauda kutio a Nda mala Ɓakuli, twal bǝredi mǝfele, mǝnana nzongcau tsǝa ama kǝ apǝris na nǝmurǝia à nǝ̀ li ka, pǝlǝa li sǝ pe aɓwana mǝnana ate ka à li.”#6:4 Ɓalli gbal aɓa: 1Sam 21:1-6; Pǝris 24:9.
5Pǝlǝa Yesu nea wia ama, “Muna mala Ɓwa ka Mǝtalabangŋo na amur Pwari Sabbat.”
Ɓwa mǝnana bui wu ka
(Matiu 12:9-14; Markus 3:1-6)
6A ɓe pwari Sabbat ɗǝm ngga Yesu kutio a Ndakpapi aban kanigir. Ɓe ɓwa nakam mǝnana bui mǝli wu ka. 7Amǝ Farisi andǝ amalǝm Nggurcau mala Musa camarǝ alta cau mǝnana à nǝ̀ tsǝki Yesu a rǝì ka. À tsǝki wi mǝsǝu à nǝ̀ sǝni ko nǝ̀ twalban rǝkwana a pwari Sabbat, pwari usǝlǝo. 8Sǝ Yesu ka surǝna rǝ ɗenyicau malea, pǝlǝa ne mǝbuwuna ama, “Lo, yiu cam a ɓadǝm ɓwapǝndǝa kat.” Nda lo came abanì. 9Pǝlǝa Yesu nea wia ma, “Ən nggǝ ɗi wun, mǝ ye na Nggurcau mala Musa eara sǝm ɓǝ̀ sǝm pe a pwari Sabbat? Ɓǝa pak mǝɓoarne le ko ɓǝa pak mǝɓane, ɓǝa amsǝ yilǝmu le ko ɓǝa kiɗiki?”
10Pǝlǝa sǝnia kàrìban kat sǝ ne mǝbuwuna ama, “Sarǝ buo.” Pǝlǝa sarǝ bui, kara bui sonzǝ àkǝ̀ banì. 11Sǝa ma amǝ Farisi andǝ amalǝm Nggurcau mala Musa ka bumia lul kǝrkǝr, à tita banggia rǝia gir mǝnana à nǝ̀ pak nǝ Yesu ka.
Yesu tàr alaggana lum-nong-ɓari
12Aɓalǝ anonggeo mǝno ka, Yesu o a bum nkono nǝ̀ ká pak hiwi. Bankwari aban hiwi aban Ɓakuli. 13Ban fana ka tunǝ alaggana male rambǝia pǝlǝa tàr lum-nong-ɓari mǝnana tunǝia ama amǝ'mishan ngga. 14À nda ka
Shiman (mǝnana tsǝki wi lullǝu ama Bitǝrus ka),
andǝ Andǝru (mǝ'eam Bitǝrus),
andǝ Jemis,
andǝ Yohana,
andǝ Filip,
andǝ Batalomi,
15andǝ Matiu,
andǝ Toma,
andǝ Jemis (muna mala Alfiyus),
andǝ Shiman (mǝnana à tunǝki ama ɓwa mana earkiyi ace la male raka),
16andǝ Yahuda (muna mala Jemis),
sǝ Yahuda Iskariyoti (mǝnana yi kurkuro nǝ Yesu ka).
Aɓwana ok cau mala Yesu sǝ twalia wia ban arǝkwana.
(Matiu 4:23-25)
17Lang à sulǝni mur nkono ka, Yesu yi came a ɓe palban. Aɓea alaggana male nakam pas aban rambǝa. Aɓwabunda pas mǝnana à purkio aɓa nzali Yahudi, andǝ Urǝshalima andǝa mǝnana a bu-nzali mala amǝ Taya andǝ Sidon mana a kun nggeamur ka, à ndakam gbal. 18À yiu ace ok cau male andǝ kum sonzǝban mala arǝkwana malea. Amǝnana gbal akukwar kǝ pea wia tanni ka, akukwar puri rǝia kat. 19Aɓwana kat ɓariki ama à nǝ̀ je rǝì, acemǝnana rǝcandǝa kǝ puro a rǝì kǝ sonzǝia kat.
Tsǝkbu andǝ caukwanban
(Matiu 5:1-12)
20Yesu loasǝ mǝsǝì sǝn amǝte sǝ nea wia ama:
Wu ndanǝ tsǝkbu
mala Ɓakuli
wun amǝ'tǝ̀r,
acemǝnana Domurǝm
mala Ɓakuli ka
ma'wun na.
21 Wu ndanǝ tsǝkbu
mala Ɓakuli,
yì wun mǝnana wu
kǝ ok nzala ado ka,
acemǝnana à nǝ̀
ɗǝmsǝ wun.
Wu ndanǝ tsǝkbu
mala Ɓakuli,
wun man wu kǝ
ɓua ado ka,
acemǝnana wu nǝ̀
ngga oalo.
22 Wu ndanǝ tsǝkbu
mala Ɓakuli,
wun mana ɓwapǝndǝa
kǝ ɓinǝ mǝsǝ wun,
à kǝ tar wun
kǝla amǝɓane,
à kǝ sanggi wun,
à kǝ tunǝa wun
ɓealɓikea, ata cau
mem ngga! # 6:22 Ɓalli gbal aɓa:
1Bit 4:14
.
23 Wu pak bumpwasǝa a mǝno yì pwari ka, wu yalke nǝ banɓoarnado, acemǝnana a kuli ka tangnakusǝ wun ngga mǝgule na. Anggo sǝ atárria pakki amǝ'ɓangna mala Ɓakuli. # 6:23 Ɓalli gbal aɓa:
2Kpa 36:16; Aturo 7:52.
24 Sǝa ma caukwanban
na nǝ wun,
wun amǝkume,
acemǝnana wu angŋa
dǝmbǝa wu kumǝna
ma'wun yì girikiban!
25 Caukwanban na nǝ wun
mǝnana wu ɗǝmna ado ka,
acemǝnana nzala
nǝ̀ wal wun.
Caukwanban na nǝ wun
mana wu kǝ oal ado ka,
acemǝnana wu nǝ̀ keban,
wu nǝ̀ ɓua.
26 Caukwanban na nǝ wun
mǝnana koyan ngga
kǝ ɓwangsǝ wun ngga,
acemǝnana anggo sǝ akea
a pwaryan ɓwangsǝ
amǝ'ɓangna mǝ'nyir nì.
Wu earce aɓi wun amǝbura
(Matiu 5:38-48; 7:12a)
27 Sǝa ma ǝn nggǝ bangga wun, wun mǝnana wu kǝ oem ngga: Wu earce aɓi wun amǝbura, aɓwana mǝnana à kǝ ɓinǝ mǝsǝ wun ngga, wu pakkia wia mǝɓoarne. 28Aɓwana mǝnana à kǝ su wun ngga, wu tsǝkia wia bu. Aɓwana mǝnana ce wun kǝ shiria ka, wu pakkia wia hiwi. 29Ɓǝ̀ ɓwa kweo a takiro ka, pǝlǝi wi ɓe takiro gbal. Sǝ ɓǝ̀ ɓwa ak nggea daura mo a rǝo ka, ce a ginǝi wi ɓǝ̀ twal muna-daura mo ɗang. 30Ɓwa mǝnana kat zǝmbǝo ka, pe wi. Sǝ ɓǝ̀ koyan twalgir mǝnana mona ka, kǝa na ama a nǝ é ɗang. 31Pakki aɓwana gir mǝnana a kǝ earce ama ɓǝa pakko ka.#6:31 Ɓalli gbal aɓa: Mat 7:12.
32 Sǝ ɓǝa aɓwana mǝnana à kǝ earce wun, à nda wu earki cea ka, ya tsǝkbu na wu nǝ̀ kumo a ɓalǝi? Ko nggearǝ “amǝ'cauɓikea” ka à kǝ earce aɓwana mǝnana amǝ'earcea na ka. 33Sǝ ɓǝ̀ kǝ aɓwana mǝnana à kǝ pakka wun pepe, à nda wu nǝ̀ pakkia wia mǝɓoarne ka, ya tsǝkbu na wu nǝ̀ kumo a ɓalǝi? Ko nggearǝ “amǝ'cauɓikea” ka anggo sǝ à kǝ pa. 34Sǝ ɓǝa aɓwana mǝnana wu pākia wia tangna ka, à nda kǝ amǝnana wu kǝ tsǝkɓalǝ wun a rǝia ama à nda à nǝ̀ gandǝ mbwe wun tangne ka, ya tsǝkbu na wu nǝ̀ kumo a ɓalǝi? Ko nggearǝ “amǝ'cauɓikea” ka à kǝ pea “amǝ'cauɓikea” tangna acemǝnana ɓǝa yi mbwea kat gir mǝnana à pa ka. 35Wun ngga, wu earce aɓi wun amǝbura, wu pakkia wia mǝɓoarne. Wu pea wia tangna, sǝ wu kǝa tsǝkɓalǝu ama à nǝ̀ mbwe wun ɗang. Sǝ tangnakusǝ wun nǝ̀ gulo, sǝ wu nǝ̀ duk amuna mala Tar wun Ɓakuli mǝnana Karban nǝ Gulo kat ka. Acemǝnana yì ka, kǝ lǝmndǝ ɓwamuru male, ko aban amǝtǝmbu andǝ amǝ'ɓealɓikea. 36Wu duk amǝ sǝn mǝsǝswatǝr, kǝla mǝnana Tar wun ngga ndanǝ mǝsǝswatǝr ka.
Wu kǝa tsǝki kǝɓwa cau a rǝì ɗang
(Matiu 7:1-5)
37 Wu kǝa wu sǝn cauɓikea mala aɓwana ɗang, sǝ wun gbal ka à pà nǝ̀ sǝn cauɓikea ma'wun ɗang. Wu kǝa ɓashi aɓwana ɗang, sǝ à pà nǝ̀ ɓashia wun gbal ɗang. Wu twalbani, sǝ à nǝ̀ twala wun banì. 38Wu pǎ, sǝ à nǝ̀ pa wun gbal. Kārè mǝɓoarne mǝnana à pàrrí, sǝ à dǝkǝri kǝ sukki ka, nda à nǝ̀ sola wun ngga. Acemǝnana tasau mana wu kārǝia aɓwana nǝi ka nda à nǝ̀ kārǝa wun nǝi ka.
39Yesu nyare nea wia mǝnia yì kanicau ka:
Nte nǝ̀ gandǝ bwali nte gara le? Yia kǝm ngga à pà nǝ̀ kpa a tūli re? # 6:39 Ɓalli gbal aɓa:
Mat 15:14
. 40Mǝ'eaulǝki gir ka kuti malǝm male ɗang. Sǝ ɓwa mǝnana à kanǝnì wi gir pepè ka, nǝ̀ pa kǝla malǝm male.#6:40 Ɓalli gbal aɓa: Mat 10:24,25; Yoh 13:16; 15:20.
41 Palang sǝ mǝsǝo ueo arǝ kǝkar mǝnana a mǝsǝ ɓeo ka, sǝ a tsǝkiro arǝ gbǝlang nggun mǝnana a mo yì mǝsǝu ka ɗang? 42Palang sǝ a wu ne mǝ'eambǝo ama, “Mǝ'eambǝam, came mǝ pyaupo kǝkar mǝnana a mǝsǝo ka,” yi mǝnana a gandǝ sǝn gbǝlang nggun mana a mo yì mǝsǝu raka? We mǝswarki ɓamuru! Pusǝ gbǝlang nggun mǝnana a mǝsǝo ka peatu, sǝ a nǝ gandǝ sǝnban pepè mǝnana a nǝ pyau kǝkar mǝnana a mǝsǝ ɓeo ka.
À kǝ surǝ nggun arǝ ɓǝle
(Matiu 7:16-20; 12:33-35)
43 Nggun mǝɓoarne pà nǝ̀ pusǝ ɓǝle mǝɓane ɗang. Sǝ nggun mǝɓane pà nǝ̀ pusǝ ɓǝle mǝɓoarne gbal ɗang. 44Koya nggun ngga à kǝ surǝì arǝ ɓǝle. Aɓwana kǝ tūki ɓǝla-vwari arǝ nggun-zwe ɗang, ko ɓǝla-nɓau aɓalǝa ankwarki ɗang. 45Ɓwa mǝɓoarne ka, mǝɓoarne mǝnana lumsǝ ɓabumi ka, nda kǝ puro a kuni ka. Sǝ ɓwa mǝɓane ka kǝ pusǝ mǝɓane mǝnana lumsǝ ɓabumi ka. Gir mǝnana lumsǝ ɓabum ɓwa ka, nda kǝ pur a kuni ka.#6:45 Ɓalli gbal aɓa: Mat 12:33,34.
Kanicau arǝ amǝɓa ɓari
(Matiu 7:24-27)
46 Ace mana sǝ wu kǝ tunǝam ama, “Mǝtalabangŋo, Mǝtalabangŋo,” sǝ wu kǝ pak gir mǝnana ǝn bangga wun ngga ɗang? 47Ɓwa mǝnana kǝ yiu abanam, kǝ kwaki kiri arǝ cau mem, sǝ kǝ tsǝi aɓa turo ka, mǝ nǝ lǝmndǝa wun lang sǝ ɓwe pa. 48Yì ka, nda kǝla ɓwa mǝnana nǝ̀ ɓak ɓala male ka, tǝm tūli mǝlime, sǝ kwakita kusǝɓǎ amur tali. Lang mur longŋa yiu akiban ngga, murɓangŋa yi wal ɓǎ man, sǝ ko dǝurǝ ɗang, acemǝnana à kwakite amur tali. 49Sǝ ɓwa mǝnana ok cau mem sǝ tsǝi aɓa turo raka, nda kǝla ɓwa mǝnana ɓak ɓala amur sala, ko tǝm kusǝì raka. Lang murɓangŋa yi wal mǝnia yì ɓala ka, kara ɓala kanggea kpa gbǝrǝrǝm.
Currently Selected:
Luka 6: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
