Luka 4

Shetan karǝki Yesu

1Yesu lumsǝ nǝ Bangŋo Mǝfele, nyari Nggeasala Jodan ngga, Bangŋo mala Ɓakuli um nǝi a ɓabondo. 2Akano ka Shetan camarǝ karǝkì nongŋo lumi-ine. Aɓalǝ amǝno yì anonggeo ka li kǝgir ɗang. A masǝlǝata anongge ka nzala wali.

3Shetan ne wi ama, “Ɓǝ̀ a nda Muna mala Ɓakuli ka, ne mǝnia yì tali ka ɓǝ̀ pǝlǝ nɗǝmo.”

4Yesu nyesǝi wi ama, “À gilǝ a Malǝmce mala Ɓakuli ama, ‘Ɓwa pà nǝ̀ au nǝ girlina nǝmurǝì ɗang.’#4:4 Ɓalli gbal aɓa: Nggur 8:3.”

5Shetan loasǝi um nǝi a nggea ban mǝdāre, sǝ lǝmndǝì wi anzali-murǝm mala ɓanza kat aɓa kuɓimǝsǝu. 6Pǝlǝa Shetan ne wi ama, “Mǝ nǝ po arǝcandǝa malea andǝ ɓoarɓwa malea kat, acemǝnana à panamia. Mǝ nǝ gandǝ pe ko yan mǝnana ǝn earce pe wi ka. 7Sǝ ɓǝa kūndǝo, a gusǝlǝam ngga, agir man nǝ̀ duk amo yia kat.”

8Yesu nyesǝi wi ama, “À gilǝ a Malǝmce mala Ɓakuli ama,

“ ‘Peri aban Mǝtalabangŋo

Ɓakuli mo,

sǝ wu kpate yì nǝmurǝì.’#4:8 Ɓalli gbal aɓa: Nggur 6:13.”

9Shetan nyare loasǝi um nǝi a Urǝshalima, kya tamsǝi a ɓwang Ndàmǝgule mala Ɓakuli, sǝ ne wi ama, “Ɓǝ̀ a nda Muna mala Ɓakuli ka, ta zurro a nzali. 10-11Acemǝnana Malǝmce mala Ɓakuli bangŋa ama,

“ ‘Ɓakuli nǝ̀ tsǝk

amǝturonjar male aceo

ɓǝa yalo caca;

à nǝ̀ mbalǝkio a ɓabuia

ace mǝnana wu kǝa

tul kusǝo arǝ tali raka.’#4:10-11 Ɓalli gbal aɓa: Ang 91:11-12. ”

12Yesu nyesǝi wi ama, “À gilǝ aɓa Malǝmce mala Ɓakuli ama, ‘Ce a karǝki Mǝtalabangŋo Ɓakuli mo ɗang.’#4:12 Ɓalli gbal aɓa: Nggur 6:16. ”

13Lang Shetan malǝna karǝki Yesu ka, pǝlǝa gǝshì banì zuku.

14Yesu nyare a Galili aɓa rǝcandǝa mala Bangŋo mala Ɓakuli. Cau male akiban kat aɓa nzali mǝno. 15Kanigir arǝ andakpapi malea, sǝ koyan ngga ɓwangsǝki.

À ɓinǝ Yesu a Nazarat

16Yesu kutio a Nazarat la mǝnana gul kam ngga. A pwari Sabbat, pwari usǝlǝo mala amǝ Yahudi ka, Yesu kutio a ndakpapi kǝla mǝnana pakki ka. Lo came nǝ̀ ɓal cau aɓa Malǝmce. 17Pǝlǝa à pe wi Malǝmce mala Ishaya Mǝɓangna mala Ɓakuli. Lang mǝnni ka pǝlǝa kum ban mǝnana à gilǝa ama,

18 “Bangŋo mala Mǝtalabangŋo

na a muram,

acemǝnana tarnam

ɓǝn hamnǝ Cau Mǝɓoarne

aban amǝtǝr.

Tasǝam ɓǝ̀n yi hamnǝ

cau mala panzǝban

aban aɓwana mǝnana

à kùria ka.

Ɓǝa nyesǝi ante

mǝsǝu sǝnban,

sǝ ɓǝa pusǝ aɓwana

mǝnana à nda aɓata

parban ngga a gung.

19 Ɓǝn hama ama

pwari mana Ɓakuli nǝ̀

amsǝ aɓwana male

nǝi ka yina.” # 4:19 Ɓalli gbal aɓa: Isha 61:1-2 .

20Pǝlǝa kar Malǝmce pe mǝ ɗenyi nǝia, ɓunte do. Mǝsǝ ɓwapǝndǝa mǝnana a ndakpapi ka kar a rǝì kat. 21Pǝlǝa tita nea wia ama, “Mǝnia yì cau ɓa Malǝmce mala Ɓakuli kir wun oe ka, lumsǝna yalung.”

22Ko yan ngga bang cau mǝɓoarne amuri, sǝ à pak ndali arǝ sǝlǝ nacau male mǝɓuɓɓuki. Pǝlǝa à ɗiban ama, “Nggearǝì ka, muna mala Yisǝfu na man re?”

23Yesu nea wia ama:

Ɓafo ka wu nǝ̀ nam mǝnia yì kun-nacau ka, ama, “Mǝsonzǝo, sonzǝ ɓamuro!” Ɗǝm ngga wu nǝ̀ nam ama, “Agir mǝnana sǝm ok ama a pakkia a Kapanahum ngga, pea kani a là mo.”

24 Ən nggǝ bangga wun mǝsǝcau, kǝ mǝɓangna mala Ɓakuli pà kàm mǝnana à earnǝi a là male ka ɗang. # 4:24 Ɓalli gbal aɓa: Yoh 4:43,44. 25Ən nggǝ na wun mǝsǝcau ama, aman-lú nakam pas a nzali Isǝrayila a nza mala Iliya mǝɓangna mala Ɓakuli a baku mǝnana mbulo came pǝlǝa tārú nǝ cili, sǝ nggea nzal-gula kpa a nzali kat ka.#4:25 Ɓalli gbal aɓa: 1Amur 17:1. 26Kat anggo ka Ɓakuli tasǝ Iliya aban kǝɓwa atea ɗang, she aban ɓe man-lú a Zarefat, a bu-nzali Sidon kano kuko.#4:26 Ɓalli gbal aɓa: 1Amur 17:8-16. 27Amǝdakali nakam pas a nzali Isǝrayila a nza mala Elisha mǝɓangna mala Ɓakuli, kat anggo ka Ɓakuli sonzǝ kǝɓwa atea ɗang, she kǝ Naaman, bǝri ɓwa Suriya.#4:27 Ɓalli gbal aɓa: 2Amur 5:1-14.

28Aɓwana mǝnana kat a ndakpapi ka bumia lullo lang à ok amǝnia yì acau ka. 29Pǝlǝa à lo à ramnggi ta Yesu, à pusǝì anzǝm la, à um nǝi amur muna-nkono mǝnana la malea cam amuri ka, ama à nǝ̀ ramte ɓǝ̀ kpa. 30Kara gya kutio a nre ɓwabunda, bwal njar male aban o.

Yesu pusǝ akukwar

31Pǝlǝa Yesu sulǝo aban ká Kapanahum, ɓe la aɓa bu-nzali Galili. A pwari usǝlǝo ka tita kani aɓwana gir. 32À ndali nǝ kanigir male acemǝnana cau male ka ndanǝ rǝcandǝa.#4:32 Ɓalli gbal aɓa: Mat 7:28,29.

33Aɓa ndakpapi ka, ɓeɓwa nakam nǝ kukwar a rǝì. Lo mak zwalo bang-bang kǝ na ama, 34“Oi! Mana a alkite arǝ sǝm, we Yesu Ɓwa Nazarat. A yiu ace wal sǝm le? Ən surǝna rǝo, a nda Ɓwa Mǝfele mala Ɓakuli.”

35Yesu sà a rǝì ama, “Gir kuno piu! Puri rǝì!” Pǝlǝa kukwar loasǝi me a nzali a ɓadǝm ɓwapǝndǝa kat, pǝlǝa puri rǝì, tsǝki wi pengye ɗang.

36Ɓwapǝndǝa kat ndali, à kǝ nea rǝia ama, “Ulang ya kanigir na man? Nǝ nacau sàrǝban andǝ rǝcandǝa mǝgule sǝ kǝ pusǝ akukwar!”

37Kara cau mala Yesu akiban kat a bu-nzali malea.

Yesu twalia aɓwana pas ban rǝkwana

38Yesu pǝlǝa puri Ndakpapi kutio a ɓala mala Shiman. Nkil Shiman ngga ɓauwa gandǝi nongsǝi. Pǝlǝa à zǝmbǝi Yesu ɓǝ̀ sonzǝi. 39Yesu kūndǝo amuri sǝ gim ɓauwa, pǝlǝa ɓauwa sulǝi rǝì. Kara long nǝ lo àkǝ̀ banì pea wia girlina.

40Lang pwari na rǝ kpa ka, ɓwapǝndǝa yinǝ amǝkwano ɗàngɗáng, pǝlǝa tsǝk bui amur koyan aɓalǝia ka, twalia wia ban rǝkwana kat. 41Ɗǝm ngga akukwar puri rǝ aɓwana pas, à kǝ loasǝ gia ama, “A nda Muna mala Ɓakuli.” Yesu gimbia, eare ama ɓǝa na kǝ cau ɗang, acemǝnana à sǝlǝna ama yì ka, nda Kǝrǝsti#4:41 Kǝrǝsti: Ko “Mezaya.” Mǝ'amsǝban.

Yesu hamnǝ cau mala Ɓakuli arǝ andakpapi

42Nǝ tadǝmbari ka Yesu lo o aban mǝnana kǝɓwa pà kàm raka. Ɓwapǝndǝa camarǝ alte. Lang à kumǝni ka, à ɓariki à nǝ̀ kasǝkuni acemǝnana ɓǝ̀ kǝa nyia ɗang. 43Pǝlǝa nea wia ama, “Dumǝnam púp mǝ hamnǝ Cau Amsǝban mala Domurǝm mala Ɓakuli arǝ aɓea lá gbal, acemǝnana àkǝ̀ ce sǝ à turam.” 44Pǝlǝa kutio aban hamnǝ cau arǝ andakpapi, a nzali Yahudi.

Currently Selected:

Luka 4: mbu

Highlight

Copy