Lũka 5

Yesu akabirikira abiga bʼerĩmbere

(Mt 4.18-22; Mk 1.16-20)

1Neryo omugulu esyondeko syabya sikamũhatatanĩa bati bowe ekĩnywa kya Nyamuhanga, Yesu abya ahangene hakũhĩ nʼengetsi yʼeGenezaretĩ. 2Neryo Yesu mwalangira amato abiri iniane hakũhĩ nʼomũsĩke wʼengetsi; nĩkwa abasohĩ ĩbabĩrĩlũa omo mato ayo, nʼerĩerya ebĩsohĩ byabo. 3Neryo Yesu mwingira omo bwato buguma obwabya bwa Sĩmonĩ, neryo mwamũbũlya ati asegerayebo omo ngetsi mo hake. Neryo Yesu mwĩkala omo bwato obo mwatsũka erĩkangĩrĩrya esyondeko, iniane omo bwato obo. 4Neryo Yesu abere abibuga erĩbũga, mwabwira Petero ati, Muye ahali omutobero, mũtogerayeho ebĩsohĩ byenyũ, musohe. 5Neryo Sĩmonĩ mwamũsũbĩrya ati, Mukama, bukere tukayitsinga kutsibu, neryo sĩtwetabanakĩ! Nĩkwa busana nʼekĩnywa kyawe ngandĩtogerya mwʼebĩsohĩ. 6Neryo babere babikola batya mobahamba amahere mangi nʼebĩsohĩ mobyasonda erĩtwĩka. 7Mobakoherya abalĩkyabo omo bundi bwato bati base bawatĩkayebo. Neryo mobasa mobũsũlya amato abiri mwʼamahere, kyaleka amato iniasonda eritobera. 8Nĩkwa omugulu Sĩmonĩ Petero alangira ebyo, mwawa oko bisando bya Yesu ati, Mukama Ũlũe hakũhĩ nage, kusangwa indi mundu mubi. 9Kusangwa mwasweka haguma nʼabalĩkyabo bosĩ busana nʼerihamba amahere ayo. 10Na Yakobo na Yoane, abagala ba Zebedayo, abasangira haguma nabo mobasweka nibya. Neryo Yesu mwabwira Sĩmonĩ ati, Sigubahe, erĩtsũka lino mukandisyasoha abandu. 11Neryo babere babireta amato wabo oko mũsĩke, mobasĩganĩa ebyosĩ, mobakwama Yesu.

Yesu akalamaya omuhaga

(Mt 8.1-4; Mk 1.40-45)

12Neryo omugulu Yesu abya oko mũyĩ muguma, habya omundu oyũkwĩre ebihaga byo kutsibu; neryo abere alangira Yesu, mwalambama ahisi oko bũsũ buwe, mwamulemba-lemba ati, Mukama, wamabya, ũnanzĩre wangatoka erĩnyĩlamya. 13Neryo Yesu mwakakya ebyala biwe mwamũtũlako ati, Nyĩnanzĩre; ũlamĩbawe, neryo-neryo ebihaga biwe mobyamũlũako. 14Neryo Yesu mwamuhana ati, Sigubwire mundu, nĩkwa ugende ũyĩkanganaye oko mũhererĩ, kandi uhere obuhere bwʼerĩyerya ngoko Musa ategeka, busana nʼerĩmĩnyĩsyabo ko wabirilama. 15Nĩkwa engulu ya Yesu moyagenda-genda kutsibu, nʼesyondeko nene mosyahĩndana erĩmowa nʼerĩlamĩbwa oko syondwala syabo. 16Nĩkwa Yesu mwabya akagenda ahate bandu eriyasaba.

Yesu akalamaya oyũ basĩre

(Mt 9.1-8; Mk 2.1-12)

17Neryo ekiro kiguma Yesu abya akakangĩrĩrya, mohabya Abafarĩsayo nʼabakangĩrĩrya bʼEmigambo ĩbĩkereho, ĩbakalũa omo buli mũyĩ wʼeGalĩlaya nʼeYũdea nʼeYerũsalema. Kandi obũtokĩ bwʼomukama bwabya haguma na Yesu erĩlamyabo. 18Neryo abandu mobaheka omundu oko ngyingo iniabiribasa. Neryo mobasonda-sonda erimuleta nʼerĩmũhĩra emuliro wa Yesu. 19Neryo busana nʼendeko, mobabula enzira yʼerĩmwĩngĩryamo. Neryo mobasamba oko lutwe, mobahigula ebĩkayĩ, neryo mobamwandagalya omo katĩkatĩ embere sya Yesu iniane oko ngyingo yiwe. 20Neryo Yesu abere alangira erĩkĩrĩrya lyabo mwabũga ati, Mwĩra wage, ebibi byawe byamabibuyirwa. 21Neryo abakangĩrĩrya bʼEmigambo nʼAbafarĩsayo mobatsũka erĩganĩrya bati, Omundu oyukatsuma nindi kwehĩ? Sihali mundu oyukatoka eribuyira ebibi nina Nyamuhanga ĩyowene! 22Nĩkwa Yesu mwaminya amalengekanĩa wabo, neryo mwabwirabo ati, Busana nakĩ mũkaganĩraya emyatsi eyĩ yʼomo mitima yenyũ kwehĩ? 23Ekyolo ni kyahi, erĩbũga, nyiti, Ebibi byawe byamabuyirwa, kutse erĩbũga nyiti, Hangana ugende, kwehĩ? 24Nĩkwa mutoke eriminya ngoko Mugala wʼomundu ali nʼehamũlĩ muna-kihugo kino busana nʼeribuyira ebibi, neryo mwabwira omundu oyũbasĩre ati, Ngakubwira nyiti, Hangana, wĩmaye engyingo yawe ugende eka wenyũ. 25Neryo-neryo mwahangana embere syabo, mwaheka engyingo abya agotsereko, mwaya eka wabo, inianemupipa Nyamuhanga. 26Neryo abosĩ mobasweka, mobatsũka eripipa Nyamuhanga; kandi mobubaha bati, Twamalangira emyatsi yʼeriswekera mũnabwĩre.

Yesu akabirikira Lawĩ

(Mt 9.9-13; Mk 2.13-17)

27Enyũma wʼemyatsi eyĩ, Yesu mwahuluka mwalangira omũsolesya oyukahulawa mo Lawĩ ĩnĩanĩkere aho bakasoleseraya. Neryo mwamubwira ati, Unyikwame 28Neryo Lawĩ mwahangana, mwasĩganĩa ebyosĩ, mwakwama Yesu.

29Neryo Lawĩ mwakokotya erirya ĩnene omo nyũmba yiwe busana na Yesu. Neryo mohabya endeko nene yʼabasolesya nʼabandi bandu ababya bakalira haguma nabo. 30Neryo Abafarĩsayo nʼabakangĩrĩrya bʼEmigambo babo mobayikuna oko biga buwe, bati, Busana nakĩ mukalya nʼerĩpũlya haguma nʼabasolesya nʼabakola-nabi kwehĩ? 31Yesu mwasũbĩryabo ati, Abakalĩre sibali nʼobwaga bwʼomunganga, nĩkwa abalwere. 32Mondasa eribirikira abandu batunganene, nĩkwa eribirikira abakola-nabi, babindule emitima yabo erireka ebibi.

Omwatsi wʼeritsira akalyo

(Mt 9.14-17; Mk 2.18-22)

33Neryo mobabwira Yesu bati, Abiga ba Yoane, bakatsira akalyo engendo nyingi, nʼerisaba; nʼabiga bʼAbafarĩsayo bakakola batya nibya; nĩkwa abiga bawe bakalya, bakapũlaya. 34Neryo Yesu mwabwirabo ati, Mwanganatoka erĩtsĩrĩsya akalyo oko bĩra bʼĩba wʼomũherũkĩ omugulu akine nabo kwehĩ? 35Nĩkwa ebiro byasyasa omugulu ĩba wʼomũherũkĩ asyalũsĩbwa kubo, neryo oko mugulu oyo basyatsira akalyo.

36Kandi Yesu mwatwĩrabo omũsyo ati, Sihali mundu oyũkatwa ekitomeko kyʼolukimba luhya-luhya, nʼerĩhĩrakyo oko lukimba lwa kera. Amayira atya akandĩtsandya olukimba luhya-luhya. Kandi ekitomeko kyʼoluhya-luhya sĩkyendĩsyowana omo lukimba lwa kera. 37Kandi sihali mundu oyũkũtũlĩra ebĩnyũ bihyabihya omo bihu bikulu-kulu byʼebĩnyũ. Amayira atya, ebĩnyũ bihya-bihya bikatula ebihu ĩbyũtĩka, nʼebihu ibyatsanda. 38Nĩkwa ebĩnyũ bihya-bihya bitolere ĩbyahĩrwa omo bihu bihya-bihya byʼebĩnyũ. 39Kandi sihali omundu amabĩpũlya ebĩnyũ bya kera oyukaswasonda ebihyabihya; ati, Ebya kera byo byowene.

Currently Selected:

Lũka 5: KB80

Highlight

Copy