Lũka 4

Erirengwako lya Yesu

(Mt 4.1-11; Mk 1.12-13)

1Yesu mwasubula akalũa eYorodanĩ, ĩnĩoswĩre nʼOmũlĩmũ Abũyĩrĩre, neryo mwasondolwa nʼOmũlĩmũ omo mbwarara. 2Neryo Satanĩ moyamulengako omo biro amakũmĩ ani. Kandi mwatalya kindu omo biro ebyo, kyaleka ĩnĩakwa enzala ebiro ebyo byabihwa.

3Neryo Satanĩ moyamubwira iti, Wamabya uli Mugala wa Nyamuhanga, ubwire erĩbwe erĩ ribye bundu. 4Yesu mwasũbĩryayo ati, Amasako akabũga ati, Omundu siendisyabyaho busana nʼobundu ĩbobwene.

5Neryo Satanĩ moyamutwala endata, moyamũkangya amami gosĩ wʼekihugo oko katambĩ kake ngʼerĩkohya lyʼerĩso. 6Neryo Satanĩ moyamubwira iti, Ngandikuha ehamũlĩ yosĩ nʼolukengerwa lwago, kusangwa nabirihabwabyo, nage ngahabyo ukwʼoyo nyanzĩre erimuha. 7Ebyosĩ ebĩ byasyabya byawe, wamanyĩramya. 8Yesu mwasũbĩryayo ati, Amasako ati, Wasyaramya Omukama Nyamuhanga wawe iwamukolera ĩyowene.

9Neryo Satanĩ moyamutwala, moyamũhĩra oko litungulu lyʼeHekalũ neryo moyabũga naye iti, Wamabya uli Mugala wa Nyamuhanga, uyiguse ahisi, 10kusangwa Amasako ati, Nyamuhanga asyahamula abamalaĩka buwe erĩkũteya.

11Kandi,

Basyakubagalira,

Isiwahuma ekisando kyawe kyʼokwʼĩbwe.

12Yesu mwasũbĩryayo ati, Amasako ati, Susyerenga oko Mukama Nyamuhanga wawe.

13Neryo omugulu Satanĩ yabuga erirenga lyosĩ, moyaleka Yesu eritaswalinda ogundi mugulu.

Yesu akatsũka omũbĩrĩ wuwe eGalĩlaya

(Mt 4.12-17; Mk 1.14-15)

14Neryo Yesu mwasuba eGalĩlaya, nʼobũtokĩ bwʼOmũlĩmũ Abũyĩrĩre bwabya haguma naye. Engulu yiwe moyagenda-genda omo kihugo kyosĩ ekyo; 15Neryo mwakangĩrĩrya omo manyũmba wabo wʼerĩhĩndanamo, iniakapipawa nʼabandu bosĩ.

Yesu akaganawa eNazaretĩ

(Mt 13.53-58; Mk 6.1-6)

16Neryo Yesu mwaya eNazaretĩ aho akulira, nʼoko kiro kyʼeSabato mwaya omo nyũmba yʼerĩhĩndanamo ngʼemibere yiwe. Neryo mwahangana erisoma Amasako. 17Neryo mobamuha ekitabu kyʼomũmĩnyererĩ Ĩsaya. Neryo mwalĩngola ekitabu ekyo, mwabana ahasakĩre hati,

18Omũlĩmũ wʼOmukama ali kwĩngye,

Kusangwa abĩrĩnyĩhakabya erĩtũla

Engulu Yowene yʼoko bera,

Abirinyituma erĩtũlĩra obwĩranda oko banyegawa,

Nʼeriswaha erilangira oko syondĩmatĩme,

Eribohola abakanũbĩbawa,

19Erĩtũla omwatsi wʼomwaka ogo Mukama asyalamya abandu buwe.

20Yesu mwalĩnga ekitabu ekyo, mwasũbyakyo oko mũteya wakyo, neryo mwĩkala ahisi. Ameso wʼabosĩ ababya omo nyũmba yʼerĩhĩndanamo mwamutungerera. 21Neryo mwatsũka eribwirabo ati, Mũnabwĩre Amasako aya amabererera ngoko mũkabĩowa. 22Nʼabandu bosĩ mobabũga ndeke busana naye, kandi mobasweka busana nʼebĩnywa bibuya abũga. Bati, Oyũ si mugala wa Yosefũ kwehĩ? 23Neryo Yesu mwabũga nabo ati, Nyĩnasĩ mukandimbwira omũsyo oyũ ati, Omunganga, ũyĩlamaye; kandi mwasyambwira muti, Ukole hano eka wenyũ, ebyo wakola eKapernaũmũ ngoko towa, ubikole nʼena wenyũ eno. 24Neryo Yesu ati, Kwenene ngababwira nyiti, Sihali omũmĩnyererĩ oyũkakokĩbawa omo kihugo kiwe. 25Nĩkwa ngababwira kwenene oko mugulu wa Elĩa, habya abakwakalĩ bangi eĨsraelĩ. Oko mugulu oyo sihabya embũla oko myaka ĩsatu nʼemikera ndatu, nʼenzala nene moyahĩka omo kihugo kyosĩ. 26Nĩkwa Elĩa mwatatumwa kubo, ko nʼoko mũkwakalĩ wʼeZarepata, omo kihugo kyʼeSĩdona. 27Kandi habya abahaga bangi eĨsraelĩ oko mugulu wʼomũmĩnyererĩ Elĩsa; nĩkwa sihali oyo walamĩbawa, nina Namanĩ Omũsũrĩa. 28Abandu bosĩ ababya omo nyũmba yʼerĩhĩndanamo omugulu bowa emyatsi eyĩ mobahitana kutsibu. 29Neryo mobahangana mobakurira Yesu yʼekyaswa, mobamutwala oko ngwangwa yʼekitwa aho mũyĩ wabo abya ahĩmbĩrwe, bati bakamugusa omo kikwangwa. 30Nĩkwa Yesu mwalaba omo katĩkatĩ kabo mwagenda omo nzira yiwe.

Yesu akalamaya omundu oyuli kwʼembĩnga

(Mk 1.21-28)

31Neryo Yesu mwandagalira eKapernaũmũ, omũyĩ wʼeGalĩlaya. Nʼeyo abya akakangĩrĩrya bandu omo kiro kyʼeSabato. 32Abosĩ mobaswekera erĩkangĩrĩrya liwe, kusangwa ebĩnywa biwe byabya nʼehamũlĩ. 33Neryo habya mundu omo nyũmba yʼerĩhĩndanamo oyuli kwʼembĩnga yʼekĩrĩmũ kibi, iniakalaka kutsibu ati, 34Ĩlolo! Tuli na mwatsi wahi nawe uwe Yesu wʼeNazaretĩ, kwehĩ? Wamasa erĩtũherya kwehĩ? Nyĩnakwasĩ, ni iwe Mũbũyĩrĩre wa Nyamuhanga! 35Neryo Yesu mwakungayo ati, Ubye bũkũtũ, ũmũlwĩke! Nʼembĩnga moyamulunda ahisi omo katĩkatĩ kabo, moyamũlũako isiritamukola nabi. 36Nʼabosĩ mobasweka, kandi mobatsũka erĩkanĩa haguma bati, Ekĩnywa ekĩ nĩkĩ kwehĩ? Kusangwa nʼehamũlĩ nʼobũtokĩ omundu oyũ akahamula ebĩrĩmũ bibi, nabyo ĩbyalũamo. 37Nʼengulu yiwe moyatsungana ehosĩ omo kihugo ekyo.

Yesu akalamaya abandu bangi

(Mt 8.14-17; Mk 1.29-31)

38Neryo Yesu mwahangana mwalũa omo nyũmba yʼerĩhĩndanamo, mwaya omo nyũmba ya Sĩmonĩ. Nĩkwa nyĩnyĩbyala wa Sĩmonĩ abya alwere endwala yʼerĩhũhana kutsibu, neryo mwalembalemba Yesu busana naye. 39Neryo Yesu mwaya hakũhĩ nʼengyingo yʼomũkonĩ, neryo mwakunga erĩhũhana eryo, nalyo molyamũlũako; neryo Omũkonĩ mwahangana lũba, mwakolerabo.

40Nĩkwa eryuba lyabere lyalenga, abandu bosĩ ababya bawite abakonĩ bʼesyondwala syʼemĩsĩndo-mĩsĩndo mobaletabo uku Yesu; naye mwahĩra ebyala biwe oko buli mũkonĩ mwalamyabo. 41Nʼesyombĩnga mosyalũa oko bandu bangi, sikalaka-laka kutsibu siti, Uli Mugala wa Nyamuhanga. Neryo Yesu mwakungasyo, kandi mwakagasyo erĩbũga kĩnywa, kusangwa syabya ĩsĩnasĩ kwʼali Kristo.

Yesu akayakangĩrĩraya eYũdea

(Mk 1.35-39)

42Neryo bwabere bwabikya Yesu mwalũa oko mũyĩ oyo mwaya ahate bandu. Neryo esyondeko mosyamusonda-sonda neryo babere babimubana, mobalenga erĩmũkakĩrya bati sĩalũe kubo. 43Nĩkwa mwabwirabo ati, Litolere ĩnatũla Engulu Yowene yʼobwami bwa Nyamuhanga oko yindi mĩyĩ nibya, kusangwa Nyamuhanga mwanyituma erikola omwatsi oyũ. 44Neryo Yesu mwatũla Engulu Yowene omo manyũmba wʼerĩhĩndanamo eYũdea.

Currently Selected:

Lũka 4: KB80

Highlight

Copy