Yoane 6

Yesu akalĩsaya abandu elfu ĩtanu (5,000)

(Mt 14.13-21; Mk 6.30-44; Lk 9.10-17)

1Enyũma wʼaho Yesu mwagenda eyisirya wʼengetsi yʼeGalĩlaya, ye Ngetsi yʼeTĩberĩa. 2Nʼendeko nene moyamukwama, kusangwa balangira ebitiko-tiko ebyo abya akakolera abakonĩ. 3Nĩkwa Yesu mwahetukira oko kitwa, nʼeyo mwĩkala nʼabiga buwe. 4Neryo Ebiro Bikulu byʼErikiruka byʼAbayũda byabya hakũhĩ. 5Neryo Yesu mwasumba ameso wuwe, mwalangira endeko nene ĩkamũhĩkako, neryo mwabũga na Fĩlĩpo ati, Twangagula amandu go hahi, aba batoke eriryago kwehĩ? 6Yesu abya akabũga atya erimulengako; kusangwa abya asĩ ebyo asonda erikola. 7Fĩlĩpo mwamũsũbĩrya ati, Amandu wʼesyodĩnarĩ magana abiri siangatolerabo nomo bangalya obuli mundu kake. 8Omuguma wʼoko biga buwe ye Anderea, mugala wabo Sĩmonĩ Petero, mwamubwira ati. 9Hano hali omũlwana oyuwite amandu atanu wʼekisusu, nʼamahere abiri, nĩkwa hino nĩkĩ busana nʼabandu bangahaba kwehĩ? 10Yesu mwabwirabo ati, Mwĩkalaye abandu bʼahisi. Neryo aho habya ebiti bingi. Neryo abalume abo mobĩkala ahisi. Eriganza lyabo lyabya nga elfu ĩtanu (5,000). 11Neryo Yesu mwĩmya amandu ayo, neryo mwagabirago oko babya bĩkere ahisi. Mwakola atya nibya nʼamahere eriha abosĩ ngoko babya banzĩre. 12Babere babĩũgũta, Yesu mwabwira abiga buwe ati, Mukuma-kume ebihandebihande ebitahangukira, sihatale kindu. 13Neryo mobasonga-songya, mobũsũlya ebitiri ĩkũmĩ na bibiri oko bitahangukira ebyalũa oko mandu atanu wʼekisusu ebyasaka, abandu babirya.

14Neryo abandu babere balangira ekitiko-tiko ekyo Yesu akola, mobabũga bati, Kwenene oyũ nĩ Mũmĩnyererĩ oyo wasyasa omo kihugo! 15Nĩkwa Yesu mwaminya kwʼabandu babya bakasonda erĩhĩka nʼerimuhamba nʼamaka erimuyira mo mwami. Neryo mwalũaho mwaya oko kitwa ĩyowene.

Yesu akalendera oko magetsi wʼengetsi

(Mt 14.22-23; Mk 6.45-52)

16Neryo bwabere bwabya ĩgolo-golo abiga buwe mobandagalira oko ngetsi. 17Neryo babere babingira omo bwato, mobatsũka erisoka engetsi bakaya eKapernaũmũ. Neryo ibwamabihumbera, nĩkwa Yesu ĩsĩalĩahĩka aho bali. 18Nʼengetsi moyatsũka erigunga busana nʼerihunga lĩkalĩre eryabya likabuhirira. 19Neryo abiga mobagoya olulengo lwʼebilometre bitanu kutse ndatu, neryo mobalangira Yesu iniakatandayira oko magetsi akahĩka hakũhĩ nʼobwato; neryo mobubaha. 20Nĩkwa Yesu mwabũga nabo ati, Nĩ ĩngye, simubahe! 21Neryo mobalĩga erĩmũkokya omo bwato; neryoneryo obwato mobwahĩka oko mũsĩke eyo babya bakalolya.

Abandu bakasonda-sonda Yesu

22Neryo engyakya endeko eyahangana eyisirya wʼengetsi moyalangira isihali obundi bwato buke aho, ibo nʼobuguma. Kandi mobaminya ko Yesu sialitingira omo bwato haguma nʼabiga buwe, nĩkwa abiga mobagenda ĩbobene. 23Awandi mato make-make mwalũa eTĩberĩa, mwahĩka hakũhĩ nʼaho endeko yalira amandu, Omukama iniamabiha ewasĩngya. 24Neryo omugulu endeko yalangira Yesu nʼabiga buwe ko bateho, mobingira omo mato make-make, mobaya eKapernaũmũ, erisonda-sonda Yesu.

Yesu obundu bwʼengebe

25Kandi omugulu abandu begaya Yesu eyisirya wʼengetsi, mobamũbũlya bati, Mũkangĩrĩrya, wahĩka eno yo mugulu wahi kwehĩ? 26Yesu mwasũbĩryabo ati, Kwenene, kwenene ngabũga nenyũ, mukanyĩsondaya kusangwa mwalya oko mandu, momũgũta, si busana nʼerilangira ebitiko-tiko. 27Simukolere ebyalya ebikahonda, nĩkwa mukolere ebyalya ebikabyaho erĩhĩka oko ngebe yʼerikota. Ebyalya ebĩ Omugala wʼOmundu asyabahabyo, kusangwa Nyamuhanga, Tata, abĩrĩmũhĩra kwʼekiminyikalo kyʼerĩmũsĩma. 28Neryo mobabũlya Yesu bati, Tuyire tuti tutoke erikola emĩbĩrĩ ya Nyamuhanga kwehĩ? 29Yesu mwasũbĩryabo ati, Omũbĩrĩ wa Nyamuhanga goyũ: mwĩkĩrĩraye oyo Nyamuhanga atuma. 30Neryo mobamũbũlya bati, Wangakolakĩ mo kitiko-tiko neryo tulangirekyo, nerĩkwĩkĩrĩrya kwehĩ? Ukakola omũbĩrĩ wahi kwehĩ? 31Abotata-kulu betu mobalya amana omo mbwarara; ngoko byasakawa biti, Mwahabo obundu bwʼerirya obũkalũa elubula. 32Yesu mwabwirabo ati, Kwenene, kwenene ngababwira, kwʼatabya Musa oyo wabaha obundu obwalũa elubula; nĩkwa ni Tata wage oyukabaha obundu bwʼekwenene obũkalũa elubula. 33Kusangwa obundu obo Nyamuhanga akaha yo yũkalũa elubula nʼeriha engebe oko kihugo. 34Neryo mobamubwira bati, Mukama, utuhe obundu obo bwʼebiro byosĩ. 35Yesu mwabũga nabo ati, Ingye indi bundu bwʼengebe. Oyukasa kwĩngye sĩendĩsyakwa nzala na kera, nʼoyũkanyĩkĩrĩraya sĩendĩsyakwa nyota na kera. 36Nĩkwa ngababwira nyiti, Mwabirinyilolako, nĩkwa sĩmũlĩkĩrĩraya. 37Abosĩ abo Tata akamba basyasa ũkwʼĩngye; nʼoyukasa kwĩngye sindiendĩsyamũsũbya eyĩhya nʼahake. 38Kusangwa sinandagala erĩlũa elubula erikola erianza lyage, nĩkwa nandagala erikola erianza lyʼoyo wanyituma. 39Kandi erianza lyʼoyo wanyituma lyerĩ ati, sĩnyĩtalaye nʼomuguma oko bosĩ abirimba, nĩkwa nyĩlũbũkaye abosĩ oko kiro kyʼenyũmanyũma. 40Kusangwa erianza lya Tata wage lyerĩ ati, Oyukalangira Omugala, akamwĩkĩrĩrya, abane engebe yʼerikota; nage nasyamũlũbũkya oko kiro kyʼenyũma-nyũma.

41Neryo Abayũda mobayikuna busana na Yesu, kusangwa abũga ati, Ĩngye indi bundu obwandagala bũkalũa elubula. 42Neryo mobabya bakabũga bati, Omundu oyũ si Yesu, mugala wa Yosefũ kwehĩ? Ĩtwe tũnasĩ ĩse wuwe na nyĩnya wuwe. Ko lino akabũga ati, Nandagala ngalũa elubula, ati kwehĩ? 43Yesu mwasũbĩryabo ati, Muleke emiyikuno omo katĩkatĩ kenyũ. 44Sihali omundu oyukatoka erĩnyĩhĩkako, Tata oyo wanyituma ataliamuleta; nage nasyamũlũbũkya ekiro kyʼenyũma-nyũma. 45Abamĩnyererĩ mobasaka bati, Abandu bosĩ basyakangĩrĩrĩbwa na Nyamuhanga. Obuli mundu oyũkowa Tata nʼerĩkangĩrĩrĩbwa naye, akahĩka ũkwʼĩngye. 46Butsira erĩbũga ambu hali mundu wabirilangira Tata; yo nʼoyũkalũa ewa Nyamuhanga, Iye abirilola uku Tata.

47Kwenene, kwenene ngababwira, Oyũkĩkĩrĩraya awite engebe yʼerikota. 48Ĩngye indi bundu bwʼengebe. 49Abotata-kulu benyũ mobalya amana omo mbwarara, mobahola. 50Obũ bo bundu bukandagala bũkalũa elubula, neryo omundu atoke eriryabo, iniatahola. 51Ĩngye indi bundu bwʼengebe obwandagala bũkalũa elubula. Omundu amalya oko bundu obo, asyabyaho kera na kera; nʼobundu obo nasyaha ni mubiri wage, ogo ngaha, ekihugo kitoke eribyaho.

52Neryo Abayũda mobatsũka erikuba obuhaka omo katĩkatĩ kabo bati, Omundu oyũ angatoka erituha omubiri wuwe eriryago ati kwehĩ? 53Yesu mwabwirabo ati, Kwenene, kwenene ngabũga nenyũ, mwamatindalya omubiri wʼomugala wʼOmundu nʼerĩpũlya omusasi wuwe, simuwite engebe omwisi wenyũ. 54Oyukalya omubiri wage nʼerĩpũlya omusasi wage, awite engebe yʼerikota, nage nasyamũlũbũkya nʼengebe oko kiro kyʼenyũma-nyũma. 55Kusangwa omubiri wage ni kalyo kũndũ, nʼomusasi wage nĩ ʼpũlya lyʼekwenene. 56Oyukalya omubiri wage nʼerĩpũlya omusasi wage amatikene ũkwʼĩngye, nage nyimatikene ukwʼiye. 57Ngoko Tata oyuliho anyituma, nage nyiriho busana na Tata; litya oyukanyirya, asyabyaho busana nage. 58Obũ bo bundu obwandagala bũkalũa elubula; sibuli ngʼobundu obo abotata-kulu benyũ balya, mobahola. Oyukalya obundu obũ asyabyaho kera na kera. 59Yesu mwabũga enyatsi eyĩ omo nyũmba yʼerĩhĩndanamo omugulu akangĩrĩraya eKapernaũmũ.

Ebĩnywa byʼengebe yʼerikota

60Neryo abangi bʼoko biga ba Yesu omugulu bowa ebĩ mobabũga bati, Ekĩnywa ekĩ kĩkalĩre; ko nindi wangowakyo. 61Nĩkwa Yesu, ĩnĩanasĩ kwʼabiga buwe bakayikuna busana nʼebĩ, mwabwirabo ati, Ekĩ kikaleka ĩmwahũka-hũkya emitima kwehĩ? 62Byasyabya biti, mwamalangira Omugala wʼOmundu akahetukira eyo abya erĩmbere kwehĩ? 63Nĩ Mũlĩmũ oyukaha engebe; omubiri sialigasakĩ. Ebĩnywa ebyo nabĩrĩbũga nenyũ nĩ Mũlĩmũ, kandi ni ngebe. 64Nĩkwa hali abandi omo katĩkatĩ kenyũ abatĩkĩrĩraya. Kusangwa Yesu abya asĩ erĩmbere nga ni bahi abatĩkĩrĩrye, nʼoyo wasyamuhotera. 65Neryo Yesu mwaswabũga ati, Busana nʼomwatsi oyũ, nabiribabwira nyiti sihali mundu wangatoka erĩnyĩhĩkako, Tata amatendimuha eriasa ũkwʼĩngye.

66Busana nʼekĩ, abangi bʼoko biga buwe mobasuba enyũma, mobataswalendera naye kandi. 67Neryo Yesu mwabũlya abiga erĩkũmĩ nʼababiri ati, Nenyũ mũnanzĩre ĩmwayĩgenderya kwehĩ? 68Sĩmonĩ Petero mwamũsũbĩrya ati, Mukama, twasyaya ukundi kwehĩ? Uwe uwite ebĩnywa byʼengebe yʼerikota. 69Netu twabĩrĩkĩrĩrya twabiriminya kʼuli Mũbũyĩrĩre wa Nyamuhanga. 70Yesu mwasũbĩryabo ati, Mondayisoga nywe, erĩkũmĩ nʼababiri, kwehĩ? Nĩkwa omuguma gʼũkwʼĩnywe nĩ Satanĩ. 71Nĩkwa abya akahula Yũda mugala wa Sĩmonĩ Ebĩnywa ebyo nabĩrĩbũga nenyũ nĩ Ĩskarĩota. Kusangwa Yũda abya muguma gʼokwʼĩkũmĩ nʼababiri, iyukandisyamuhotera.

Currently Selected:

Yoane 6: KB80

Highlight

Copy